1, 2. Ni mubiiri wahi ow’obuhimbe owa wulimu, kandi busana naki ni kikulhu erikolha wa ndeke?

THUTHABUGHA thuthi wune mukolha kutsibu omubiiri w’obuhimbe. Hamabirilhaba buthuku bulebe iwunemukolha omubiiri w’obuhimbe oyu kandi akina lholha embere. Omubiiri oyu n’omwanakalire, aliwe anemukutsemesya. Hali ki sihali ki, wabirithwamu erithendi lhuhirira, kundi mbulha wakolire omubiiri wawu wo ndeke kutse nabi, akendi hamba okwa ngebe yawu lino, n’omwa buthuku obukasa. Busana naki? Kundi enyumba eyikahimbawa eyi n’iwe!

² Yuda mwahira omuwatho w’okwa mubiiri ow’eriyihimba. Omughulhu abwira Abakrisitayo athi, ‘muyibike omo lhwanzo lhwa Nyamuhanga,’ mwakangania omwa milhondo iyan’eyi enzumwa ngulhu eyanga thuwathikya erikikolha akabugha athi: ‘eriyihimba okw’ikirirya lyenyu eribuyirire kutsibu.’ (Yuda 20, 21) Wanga yihimba omu nzira nga syahi, erighumya erikirirya lyawu nuku wangabya iwuna yibikire omo lhwanzo lhwa Nyamuhanga? Thukanaye okwa bindu bisathu eby’obuhimbe obw’obunyakirimu ebyanga kuwathikya erighumya erikirirya lyawu.

3-5. (a) Sitani anzire ithwabya n’amalengekania wahi mabi owahambire okwa bya Nyamuhanga akathuyithaghako? (b) Ebya Yehova akathuyithaghako thutholere ithwa bilhangira thuthi, kandi eki kitholere ikyahamba kithi okw’iyowa lyethu? Iha eky’erileberyako.

³ Eky’erimbere okwa byosi, thutholere ithwaghumya erikirirya lyethu omwa bihano bya Nyamuhanga. Erilhabira omw’igha ekitabu  kino, wamabiriminya ebindu bingyi ebithunganene ebya Yehova akathuyithaghako ebihambire okwa mibere yethu. Ebiyithawa ebi wukabilhangira wuthi? Sitani anzire iniakuthebya nuku wulhangire ebihano n’emisingyi ya Yehova nga yikakukakiraya okwa bibuya kandi nga yikalire. Kw’anemukolesya amenge aya erilhua ah’akathakoleserya gho omw’irima ly’Edeni. (Enzuko 3:1-6) Amenge wiwe aya anemwendi kuthebya? Eki kikendi sighikira okwa malengekania awa wuwithe.

⁴ Erithaha eky’erileberyako: Thuthabugha thuthi wune muyibungya-bungya omwa kibira ekyuwene, iwalhangira olhughuthu lhuli-lhuli olhukakukakiraya erithendi lhabira omwa kindi kitsweka. Wukasamalira ebiri omwa lhughuthu ibyuwene kutsibu. Wune aho, wangana lhangira olhughuthu nga lhwamakukakirya erilhabira yo. Aliriryo wukakengemererya omwa lhughuthu, iwalhangira endale eyikaramire iyine musoba yikarondya eky’erirya! Okwa ndambi eyo iwalhangira omughaso w’olhughuthu​—obutheya. Mbwino hane enzighu eyikalire kutsibu eyine mukusobera lino? Ekinywe kya Nyamuhanga kikathubwira kithi: ‘Mulebaye, muyitheghaye! Kusangwa enzighu yenyu Sitani, yikaghenda-ghenda ng’endale, eyikaruruma n’erisonda-sonda oyo yangalya.’​—1 Petero 5:8.

⁵ Sitani ni muhighi oyukaramire. Kundi Yehova syanzire thukawa omwa bithegho bya Sitani, abirihira h’ebihano ebikathutheghaya ‘okwa menge’ mabi w’omubi oyu. (Abanya Efeso 6:11) Kwesi, omughulhu thukaghaniraya okwa bihano bya Nyamuhanga, thutholere ithwa bilhangira ng’enzira eyo Thatha wethu w’elhubulha akathukanganiraya mw’olhwanzo lhwiwe. Thwamalhangira ebihano bya Nyamuhanga bya thuthya, ibikendi thutheya n’erithutsemesya. Yakobo mwahandika athi: ‘Oyukalhangira ndeke omughambo owahikene, ow’obwiranda, iniakakwama gho ndeke, asyabana obutseme akakolha gho.’​—Yakobo 1:25.

6. Ni kyahi ekyanga thuwathikya erihimba erikirirya lyethu omwa bihano bya Nyamuhanga n’emisingyi yiwe eyithunganene? Iha eky’erileberyako.

⁶ Erighendera okwa bihano bya Nyamuhanga, y’enzira eyuwene ey’erihimba erikirirya lyethu omwa Oyukaha Ebihano n’omwa menge awali omwa bihano biwe. Ng’eky’erileberyako, ‘emighambo ya Kristo’ mwamuli erihano lya Yesu ery’erikangirirya abandi ‘ebyosi ebyo abirithuhana.’ (Abanya Galatia 6:2; Matayo 28:19, 20) Kandi Abakristayo bakasikaya kutsibu ekihano eky’erihindana  haghuma bakaramya n’erihimbangana kutse erisikania. (Abaebrania 10:24, 25) Kandi ebihano bya Nyamuhanga mwamuli erihabulha ery’erisaba Yehova mughulhu wosi n’erimusaba erilhua omwa muthima. (Matayo 6:5-8; 1 Abanya Tesalonika 5:17) Thune mulholha embere erighendera okwa bihano ng’ebi, thukongera erilhangira ndeke-ndeke ngoku bikathuha obusondoli bw’olhwanzo. Eribikenga kikathulethera etseme n’erihumulikana erya thuthe thwanga bana omwa kihugho kino eky’emilyambo. Wukabya wukaghanirya ngoku wabirighasirwa omw’ighendera okwa bihano bya Nyamuhanga, mbwino erikirirya lyawu siriri ongera erighuma?

7, 8. Ekinywe kya Nyamuhanga kikakakasaya kithi abakathika-thika bathi bangana syalemwa eriberererya enzira ey’erithunganene omwa buthuku obukayasa?

⁷ Okwa bundi buthuku, abandi bakathika-thika bathi obuthuku bunemulhaba, kyanganasya bakalira erilholha embere ibanemughendera okwa bihano bya Yehova. Bakasagha bathi obundi bangana syalemwa. Obuthuku bwamasyahika wukayowa wuthya, lengekanaya  okwa binywe bino: ‘Ingye indi Mwami Mukulhu Nyamuhanga wawu, oyukakukangiriraya wubane endundi, oyukakusondolha omwa nzira eyo wanga lenderamo. Kumbe wahulikirira ebihano byaghe! Neryo obuholho bwawu nga bwabiribya ng’olhusi, n’erithunganene lyawu ng’ebisunda by’omwa ngetse.’ (Isaya 48:17, 18) Wune wathaghanirya wukaminya ngoku ebinywe ebi bikahimba?

⁸ Omwa binywe ebi, Yehova akathw’ibukaya athi n’ithwe thukaghasirawa thwama muhulikirira. Thwama kolha thuthya, akathulhaghanisaya emighisa ibiri. Ow’erimbere, obuholho bwethu ibukendibya ng’olhusi​—erithekana, erikanyirira, n’erilholha embere. Owakabiri, erithunganene lyethu irikendibya ng’ebisunda by’engetse. Wam’imana okwa musike w’engetse, wukalhangira ebisunda bikasa ebindi omwa bindi, ahathe erithika-thika wukalhangira ngoku sibiri hwayo. Wukakiminya ebisunda ebyo ngoku bikendi lholha embere eriasa, eriyighusa okwa musike erihika kera na kera. Yehova akabugha athi erikolha ebithunganene lyanganabya ng’ebisunda ebyo. Wamabya iwune mulengaho eribya muthaleghulha okw’iyo, siendi syaleka wukakindwa na kera! (Soma Esyonyimbo 55:22.) Mbwino emilhaghe eyikatsemesaya ng’eyi siyiri leka wukahimba erikirirya lyawu ly’omu Yehova n’omwa biyithawa biwe ebithunganene?

9, 10. (a) Busana naki erikulha-kulhana ni kilhubirirwa ekyuwene okwa Bakristayo? (b) Eribya n’amalengekania aw’obunyakirimu kikaletha kithi etseme?

⁹ Ekindu ekyakabiri ekihambire okwa mubiiri wethu ow’obuhimbe kikabisulhawa omwa binywe ebya sondolhawa na Nyamuhanga bino: ‘Thughende embere omwa myatsi eyihikene.’ (Abaebrania 6:1) Erighenda embere kutse erikulha-kulhana ni kilhubirirwa kibuya eky’Omukristayo. Nomwakine indi sithuhikene, thwangana thoka erikulha-kulhana. Eryongera okw’ekyo, Abakristayo bakabya bane mukulha-kulhana omw’ikolera Yehova bakabana etseme nene. Busana naki?

¹⁰ Omukristayo oyukulire y’omundu oyukulire bunyakirimu. Akalhangira ebindu ngoku Yehova akalhangira byo. (Yoane 4:23) Paulo mwahandika athi: ‘Abo abakakwama omubiri bakaghaniraya emyatsi y’omubiri. Nikwa abakakwama omulimu bakaghaniraya emyatsi  y’omulimu.’ (Abanya Roma 8:5) Amalengekania aw’ekinyamubiri akaletha etseme nyike, kundi muli eriyitsomana kutsibu, erithendi lhangirira ebindu bya hali, n’erilhubirira ebindu by’omubiri. Eribya n’amalengekania aw’obunyakirimu kikaletha obutseme, kundi wukalengekanaya oku Yehova, “Nyamuhanga oyutsemire.” (1 Timoteo 1:11, NW) Omundu w’obunyakirimu akanza iniatsemesya Yehova kandi akatsema n’omwa mughulhu ali omwa bitsibu. Busana naki? Ebitsibu bikamuha akaghisa ak’erikangania ngoku Sitani ni mubehi n’erimuha akaghisa ak’eribya muthaleghulha, ekindu ekikatsemesaya Thatha wethu w’elhubulha.​—Emisyo 27:11; soma Yakobo 1:2, 3.

11, 12. (a) Paulo mwakania athiki okwa ‘maaka w’obulengekania’ aw’Omukristayo, kandi ekinywe ekikabindulhawa mwa ‘eribegheresyagho’ kikamanyisayaki? (b) Omubiri wethu atholere inialhaba omw’iyibegheresya lyahi nuku akulha-kulhane n’erikalha-kalha?

¹¹ Eriyibegheresya likaleka omundu iniabya w’obunyakirimu kandi iniakulha-kulhana. Thuthalebya omulhondo ono: “Ebyalya ebikalire ni by’abandu abakulire, ni by’abo ababirikangirirya amaaka wabu aw’obulengekania omw’ibegheresyagho erithoka erighabulha ekibuya n’ekibi.” (Abaebrania 5:14, NW) Paulo abere akakania okwa maaka wethu w’obulengekania ‘eribegheresyagho,’ angabya imwakolesya ekinywe ky’Ekigiriki ekyabya kikakolesibwa kutsibu n’ababya bakakolha eby’erikalya-kalya omubiri omwa kighonye ky’erimbere omwa kihugho kye Greece, kundi kyangana bindulhwa mwa ‘eribegheresibwa ng’oyukakalha-kalhaya omubiri.’ Lino, thalengekania eriyibegheresya eriri ng’eri nga lyanga yithaghisyaki.

¹² Omughulhu thwabuthawa, omubiri wethu abya isyabegheresibwe. Ng’eky’erileberyako, olhumekeke si lhuli minya aha lhwa mahira amaboko n’ebisandu byalhu. Kyakikaleka ilhwa nagha-nagha amaboko walhu, nibya n’eriyiswirangya omwa busu, neryo ilhwa yowa nabi. Lyolho-lyolho, omubiri ane mukolesibwa, akabeghera. Olhumekeke ilhwa tsuka erikulhulhuka, eribbasulha, n’erithibitha. * Hathya ibbwa oyukakalha-kalhaya omubiri? Wukabya wukalhangira omundu ng’oyu, akaghulhuka n’eriyibindulira omwa kyanya  omwa mibere eyikatsemesaya kandi iniana yithondekenie ndeke, ahathe erithika-thika wukalhua iwakiminya ngoku abiriyibegheresya ahabw’omughulhu muuli. Iyo erikolha ebindu ng’ebi, mukithasa bwase​—mukya muyithaghisya erighunza esyosaha nyingyi iniane muyibegheresya. Erikalya-kalya ly’omubiri ng’eri, e Biblia yikalikanayako yithi ni ‘ry’omughaso muke.’ Kwesi eribegheresya amaaka wethu w’obunyakirimu aw’obulengekania ka lyangabya ly’omughaso munene!​—1 Timoteo 4:8.

13. Thwanga begheresya thuthi amaaka wethu aw’obulengekania?

¹³ Omwa kitabu kino, thwabirikania okwa myatsi mingyi eyikendi kuwathikya eribegheresya amaaka wawu aw’obulengekania nuku wanga sighalha muthaleghulha oku Yehova ng’omundu ow’obunyakirimu. Iwunemusaba, lengekanaya okwa misingyi n’ebihano bya Nyamuhanga wukathwamu mughulhu wosi omwa ngebe yawu. Wukanza erithwamu, yibulhaye: ‘Ni bihano byahi kutse ni misingyi yahi eyiri omwa Biblia eyihambire okwa mwatsi oyu? Nanga bikolesya nyithi? Ni kyahi ekikendi tsemesya Thatha waghe w’elhubulha?’ (Soma Emisyo 3:5, 6; Yakobo 1:5.) Erithwamu lyosi erya wukakolha omwa nzira eyi likendi ongera eribegheresya amaaka wawu w’obulengekania. Eriyibegheresya ng’eri likendi kuwathikya erilholha embere eribya mundu w’obunyakirimu.

14. Erithoka erikulha-kulhana bunyakirimu thutholere ithwabya n’enzalha eyiri yithi, aliriryo ni kyahi ekya thutholere ithwa yitheyako?

¹⁴ Nomwakine indi omundu akakulha kinyamubiri iniahwayo, erikulha ery’obunyakirimu iryo siriwithe busubuliro. Omundu erikulha, akayithagha ebyalya. Busana n’ekyo Paulo mwahandika athi: “Ebyalya ebikalire ni by’abandu bakulhu.” Ekindu ekyanga kuwathikya erihimba erikirirya lyawu ly’erilholha embere erirya ebyalya eby’obunyakirimu ebikalha-kalire. Wukabya wukakolesya ndeke ebya wuk’igha, obo ni bwenge, ne Biblia yikabugha yithi: “Amenge  ni mwatsi w’erimbere.” Busana n’ekyo, thutholere ithwabya n’enzalha ey’erianza eriminya ekwenene ey’endundi eya Thatha wethu akathuha. (Emisyo 4:5-7; 1 Petero 2:2) Aliriryo, eribana eriminya n’obwenge obukalhua oku Nyamuhanga isibya leka thukayiheka kutse eriyowa nga thulengire abandi. Mughulhu wosi thutholere ithwayilebya ndeke nuku omwa mithima yethu si mubye emibere ey’eriyiheka kutse obundi butseke. Paulo mwahandika athi: ‘Muyirengeko nga mukakwama omw’ikirirya, muyitswere.’​—2 Abanya Korinto 13:5.

15. Busana naki olhwanzo lhukayithaghisibawa erithoka erikulha bunyakirimu?

¹⁵ Enyumba yanganahwa erihimbwa, aliriryo iyabya iyine muwanibwa. Erisugha enyumba eyo n’erisuba-subania ahamatsanda bikayithaghisibawa, kandi wangananza eryongera mw’ekindi kisenge erisighikira n’esyombinduka esyamabyaho. Ni kyahi ekya thukayithagha erithoka erikulha n’erilholha embere eryuwania obunyakirimu bwethu? Ekikulhu okwa byosi, lhw’olhwanzo. Thutholere ithwongera erianza Yehova n’abikirirya balikyethu. Thwamabya isithuwithe olhwanzo, ebya thwabiriminya n’ebya thukakolha ini buyira. (1 Abanya Korinto 13:1-3) Thwanganabya Bakrisitayo abakulire kandi ithwa lholha embere erikulha bunyakirimu thwamabya ithunawithe olhwanzo.

16. Sitani akakulha-kulhanaya amalengekania awali athi, kandi ni butheya bwahi obwa Yehova abirithuha?

¹⁶ Thuthasya lebaya ekindi kindu ekihambire okwa mubiiri wethu ow’obuhimbe. Erithoka eriyihimba ndeke ng’omwigha wa Kristo, wutholere iwatheya amalengekania wawu. Sitani, omuthabali w’ekihugho kino, asi ndeke erithebererya abandu nuku baghendere okwa malengekania mabi, erihangya-hangya, erithendibya n’amaha, n’erithendi yikethera abandi. (Abanya Efeso 2:2) Amalengekania ng’aya ni w’akabi okwa Mukristayo ngoku erilhunda ni ry’akabi okwa nyumba eyihimbire omwa mithi. Eky’obutseme, Yehova akathuha ekindu ekikathutheghaya​—amaha.

17. Ekinywe kya Nyamuhanga kikakanganaya kithi omughaso w’amaha?

 ¹⁷ E Biblia yikathondogholha ebindu by’amalhwa muthina-muthina eby’obunyakirimu ebyanga thuwathikya erirwanisya Sitani n’ekihugho kiwe. Ekighuma ky’okwa bindu ebi ekiwithe omughaso k’akakira kutse esapeho​—‘amaha w’omulhamu.’ (1 Abanya Tesalonika 5:8) Omusirikali omwa buthuku bwe Biblia, iniakabya inianasi ngoku syanga lhama omwa lhuhi athambere esapeho. Kundi esapeho eyo yabya yikolirwe omwa kyuma kandi imuli n’engobi, iyikaleka ebya bakaghusa okwa muthwe ibya thendera neryo iniatha huthalha kutsibu. Ngoku esapeho yikatheghaya omuthwe, amaha angana theya amalengekania wawu.

18, 19. Yesu mwahira h’eky’erileberyako kyahi eky’eribya n’amaha, kandi thwanga mugherererya thuthi?

¹⁸ Yesu mwahira h’eky’erileberyako ekyuwene eky’eribya n’amaha. Ibuka ebyo ayiyiniraya omwa kiro eky’erighunzerera ly’engebe yiwe okwa kihugho kwa hano. Munywani wiwe mwamughoberya busana n’esyosente. Owundi mwa muyighana athi nibya sy’amwasi. Abandi muba musighania bamathibitha. Ab’omwa kihugho kiwe mubamughana, eribugha bathi abasirikali be Roma bamwithe omw’imughalya. Kilhangirikire ndeke-ndeke ngoku Yesu mwabana erilengwako erikalire erya thuthe thwangabana. Ni kyahi ekya muwathikaya? Abaebrania 12:2, akasubiraya athi: ‘Kusangwa Yesu mwayiyinia okwa [“muthi w’eriaghalya,” NW], abya asi obutseme obwa syabya bwiwe kandi mwathalebya esisoni syawu nga kindu. Lino ikere okwa lhuhandi lhw’amali lhw’ekithumbi ky’obwami bwa Nyamuhanga.’ Yesu mwathibirirwa “obutseme obwasyabya bwiwe.”

¹⁹ Obutseme obwangabere bwa Yesu ni bwahi? Yesu abya inianasi ngoku amayiyinia, iniakendibya iniamawathikya omw’iyira erina lya Yehova mwa libuyirire. Anga here obwema obulengireyo obukakanganaya ngoku Sitani ni mubehi. Sihali awandi maha awangahere Yesu y’obutseme bunene obu! Kandi, abya inianasi ngoku Yehova akendisya muhemba kutsibu busana n’obuthaleghulha bwiwe​—omwa buthuku obuthe bwa hali ngoku akendi thasyabya haghuma na Thatha wiwe. Yesu iniakabya iniane mulengekania okwa maha w’obutseme aya omw’ighalhwa lyosi erikalire erya alhabamu. Nethu ku thutholere ithwabya thuthya. Nethu thunawithe  obutseme obuli embere syethu. Yehova abiriha obuli mughuma w’okw’ithwe y’olhusunzo olhw’eriyira erina liwe likulhu mwa libuyirire. Thukakanganaya Sitani ngoku ni mubehi thwamaligha Yehova ng’Omuthabali wethu Mukulhu n’eriyibika omo lhwanzo lhwa Thatha wethu nomuthwanga bana eriaghalhwa n’erilengwako lyosi-lyosi.

20. Ni kyahi ekyanga kuwathikya eribya iwune n’amalengekania awuwene n’eribya iwune n’amaha?

²⁰ Yehova anzire kutsibu erihemba abaghombe biwe abatheleghulha. (Isaya 30:18; soma Malaki 3:10.) Akatsema akaha abaghombe biwe abathunganene b’eriyisunza ly’emithima yabu. (Esyonyimbo 37:4) Kwesi, wuhire amalengekania wawu w’okwa maha aw’erilhangira eribererera ery’emilhaghe ya Nyamuhanga. Isiwaligha amalengekania mabi, awahengemire kandi awatsandire awali omwa kihugho kya Sitani kino. Wamalhangira ekirimu ky’ekihugho kino ikiri mw’ingira omwa malengekania kutse omwa muthima wawu, saba Yehova ya kutsibu akuhe ‘obuholho bwa Nyamuhanga, obulhabire amenge wosi.’ Obuholho ng’obu obwa Nyamuhanga akaha bukendi theya omuthima n’amalengekania wawu.​—Abanya Filipi 4:6, 7.

21, 22. (a) Ni maha wahi awuwene awa ‘endeko nene’ yiwithe? (b) Okwa maha awa Abakristayo bawithe, ni kyahi ekikakutsemesaya kutsibu, kandi erithwamu lyawu ni lyahi?

²¹ Aya ka ni maha awakatsemesaya awawutholere iwalengekania  kwa kutsibu! Wamabya iwuli mughuma w’okwa ‘ndeko nene,’ eyikendi syalhua omwa ‘bulighe bunene,’ lengekanaya okwa ngebe eya wukisiya iwabana. (Eribisulirwa 7:9, 14) Sitani n’esyombinga siwe bakendi syabya babirilhusibwaho, wukendi syayowa iwuwithe obuholho obwa wuthe wanga soborera munabwire. Erithwalira haghuma, nindi okw’ithwe oyuthe wathahikwa kw’ebitsibu eby’amathebo wa Sitani? Ebitsibu ebi bikendi syabya byabirihwaho, ka bukendisyabya butseme erikolha omubiiri ow’erisubya ekihugho mwa paradiso erilhabira omwa busondoli bwa Yesu n’abandu 144,000 abakathabalha haghuma nayu omwa lhubulha! Ka thukatsema busana n’amaha aw’erisyalhangira amalhwere wosi n’amatseke akahwaho, aw’erisyathangirira abanze bethu ababiriholha bakalhua omwa masinda, aw’erisyabya n’engebe eya Nyamuhanga abya anzire ithwabya nayu! Thukendi syabya thune muhikana, n’ekihembo ekisingireyo kikendisyabya ikine museghera hakuhi, omulhaghe owakabisulhawa omwa Abanya Roma 8:21​—‘eringira omwa lhukengerwa olhw’abaana ba Nyamuhanga.’

²² Yehova anzire iwabana obwiranda bunene kutsibu. Eribana obwiranda obu kikasighikira okw’ibya mwowa. Mbwino si kyangabya ini ky’omughaso lino erihira h’akaghalha ak’erikenga Yehova ya buli kiro? Kwesi, ahathe erithika-thika, ongera eriyihimba okw’ikirirya eribuyirire kutsibu, nuku wanga yibika omo lhwanzo lhwa Nyamuhanga erihika kera na kera!