Erikwamana n’eriramya liwe, omukali Omukristayo atholere iniaswika omuthwe wiwe mughulhu wahi, kandi busana naki? Thulebaye ebya mukwenda Paulo asondolibawa erihandika okwa mwatsi oyu. Akaha obusondoli obwa thukayithagha nuku thwangaha Nyamuhanga y’olhukengerwa omw’ithwamu ndeke. (1 Abanya Korinto 11:3-16) Paulo akabisulha emyatsi isathu ey’erilengekaniako ndeke: (1) emibiiri eyangaleka omukali iniaswika omuthwe wiwe, (2) emibere eyanga leka iniakolha ekyo, na (3) ebyangaleka iniakolesya omusingyi oyu.

Emibiiri. Paulo akakanaya okwa mibiiri ibiri: erisaba n’erithulhagho. (Omulhondo 4, 5) Thunasi ngoku erisaba ni nzira ey’erikanirania na Yehova. Munabwire, erithulhagho lyangana hambana n’erikangirirya lyosi-lyosi eriseghemere okwa Biblia eryo Omukristayo akakolha. Mbwino Paulo akabugha athi omukali atholere iniaswika omuthwe wiwe okwa buli ndambi yosi eya akasabiramu kutse akakangirirya ekwenene eye Biblia? Eyihi. Emibere eyiriho omukali akasaba kutse akakangirirya yangana leka iniaswika omuthwe wiwe kutse eyihi.

Emibere eyangabyaho. Ebinywe bya Paulo bikakanganaya emibere ibiri eyangabyaho—omw’eka n’omwa kithunga. Akabugha athi: ‘Omulhume ni muthwe w’omukali wiwe. Obuli mukali oyutheswika omuthwe wiwe omughulhu akasaba kutse erithulhagho, akahemulha omuthwe wiwe.’ (Omulhondo 3, 5) Omwa ndegheka ey’eka, Yehova abirihira h’omulhume eribya muthwe  w’omukali wiwe. Omukali amathendi minya ehamuli ya mwira wiwe, iniakendi muhemulha amakolha ebya Yehova abiri bugha athi ibyakolhwa na mwira wiwe oyo. Ng’eky’erileberyako, kyamayithaghisya omukali ery’eghesya omwigha we Biblia mwira wiwe inianeho, iniakendi swika omuthwe erikangania ngoku asikirye ehamuli ya mwira wiwe. Iniakendi kolha athya mwira wiwe nomwangabya iniabatizibirwe kutse isiabatizibirwe, kundi omulhume ya muthwe w’eka. * Amabya w’erisaba kutse erikangirirya ihane mughalha wiwe mulere oyubatizibirwe, omukali iniakendi swika omuthwe wiwe, butsira indi omwana oyu ni muthwe w’eka, aliriryo busana n’ehamuli eyabirihebwa abalhume Abakristayo ababatizibirwe omwa kithunga.

Paulo akakanaya okwa mibere eyangabyaho omwa kithunga, athi ‘Omundu amabya inianzire erikuba obuhaka, nyithi, ithwe kutse amakanisa wa Nyamuhanga sithuwithe eyindi mitse.’ (Omulhondo 16) Omwa kithunga ky’Ekikrisitayo, endegheka ey’eribya muthwe yikahebawa abalhume ababatizibirwe. (1 Timoteo 2:11-14; Abaebrania 13:17) Abalhume basa babakasombolhawa ng’abasyakulhu kutse ng’abawathikya b’ekithunga, eribya n’esyonzunzo esya Nyamuhanga akaha busana n’eritheya ekihangulho Kiwe. (Emibiri 20:28) Aliriryo, okwa bundi buthuku, hanganabya emibere eyangaleka omukali Omukristayo iniakolha omubiiri owatholere iniakolhwa n’omulhume oyubatizibirwe oyutholere. Ng’eky’erileberyako, angana yithaghisibwa erisondolha omuhindano ow’eriyathulira kundi omulhume oyubatizibirwe oyutholere syaliho. Kutse iniangan’igha n’omundu e Biblia omulhume oyubatizibirwe inianeho. * Kundi emibiiri ng’eyi yihambire okwa kithunga ky’Ekikrisitayo, omukali iniakendi ambalha ekitambara erikangania ngoku akakolha omubiiri owakahebawa abalhume.

Okwa lhundi lhuhandi, hane eyindi mibiiri mingyi eyihambire okw’iramya eyithayithaghisaya mwali wethu eriswika omu thwe wiwe. Ng’eky’erileberyako, sikiri muyithaghisaya eriswika omuthwe wiwe akasubirya omwa mihindano, akasangira omwa mubiiri w’erithulira nyumba okwa nyumba iniane na mwira wiwe kutse owundi mughalha wethu oyubatizibirwe, kutse erigha kutse erisaba n’abaana biwe abathe babatizibwa. Nomwabine, hangana buthuka ebindi bibulyo, neryo mwali wethu amabya isyasi eky’erikolha ekihambire okwa mwatsi oyu, angana thasyasekulya okwa mwatsi oyo. * Kandi amabya iniakina thika-thika, n’obunya muthima-thima bwiwe ibukamubwira buthi aswike omuthwe wiwe, si kibi amakolha ekyo, ngoku kikanganibwe omwa kisasani.

Ebyangaleka. Omwa mulhondo 10, thukabana mw’esyonzumwa ibiri esikaleka omukali Omukristayo iniaberererya ekiyithawa eki: ‘Busana n’abamalaika omukali atholere iniabya n’ekiminyisyo eky’ehamuli okwa muthwe wiwe.’ Ey’erimbere, by’ebinywe, “ekiminyisyo ky’ehamuli.” Eriswika omuthwe ni nzira eyikakanganaya ngoku omukali akaligha ehamuli eyo Yehova abiriha abalhume ababatizibirwe omwa kithunga. Busana n’ekyo, akakanganaya olhwanzo n’obuthaleghulha oku Nyamuhanga Yehova. Enzumwa eyakabiri yikabanika omwa binywe “busana n’abamalaika.” Omukali eriswika omuthwe wiwe kikahamba kithi okwa bihangikwa eby’amaaka eby’ekirimu?

Abamalaika bakanza ibalhangira abandu ibane mukenga ehamuli ya Nyamuhanga omwa kithunga kya Yehova ekyosi, omwa lhubulha n’okwa kihugho. Kandi eby’erileberyako eby’abandu abathahikene bikabaghasira omwa nzira eyi. Nibya nabu batholere ibaghondera endegheka ya Yehova—ekindu ekyalema abandi bamalaika omwa buthuku bwa kera. (Yuda 6) Hathya, abamalaika bangana lhangira omukali Omukristayo iniasi bingyi kutsibu, kandi iniawithe amenge manene kwilhaba ow’omulhume oyubatizibirwe omwa kithunga; aliriryo, inianguhirwa erikangania ngoku akaghondera ehamuli eya mughalha wethu oyo awithe. Omwa yindi mibere, omukali anganabya ini Mukristayo omuhakabibwa oyukendi syathabalha haghuma na Kristo. Omukali ng’oyu akendisyabya omwa kitsumbi kya haghulhu kwilhaba ekya abamalaika bawithe kandi iniathabalha haghuma na Kristo omwa lhubulha. Eki ka ni ky’erileberyako kibuya eky’abamalaika bakalhangira munabwire! Omwa kwenene, olhu ka ni lhusunzo lhunene olhwa bali bethu bawithe olhw’erikangania obwowa n’obuthaleghulha bwabu embere sy’abamalaika bangyi abathaleghulha!