1, 2. Ni bahi abakatsema okwa buthuku bw’eribatizibwa?

WAMABYA iwamabirighunza myaka mingyi iwune mukolera Yehova, wangabya iwabirihulikirira emikania mingyi ey’olhubatizo eyikahebawa okwa mihindano yethu eminene-minene. Kandi ibbwa, nomuwangabya iwabirihulikirira emikania eyi ya mirundi mingyi, obundi wukayowa iwabirihambwako wukalhangira abakayabatizibawa abikere embere bakahangana. Okwa ndambi eyo, wukabana abahulikiriri abosi ibabiritsema, ibakwamyako n’eribbanda-bbanda omwa byalha busana n’ebitsange. Kandi wangana thoghongya n’emisoni wukatha syalhangira abandi bandu ababirithwamu erisighika Yehova. Ka ni butseme bunene obwa thukabya nabu okwa buthuku ng’obu!

² Ithwe thwangana lhangira abakabatizibawa omwa kitsweka ekya thulimu mirundi mike omo mwaka, aliriryo abamalaika ibo bawithe olhusunzo olhw’erilhangira eki kikabya mirundi mingyi n’omwa yindi myanya. Wukalengekanaya ni ‘butseme’ bungahi obukabya ‘elhubulha’ bakalhangira esyongumi sy’abandu omwa kihugho kyosi bakayongera obuli yenga okwa kithunga kya Yehova ekikalhangirika? (Luka 15:7, 10) Ahathe erithika-thika, abamalaika bakatsema kutsibu bakalhangira eriyongera eri!​—Hagai 2:7.

3. Busana naki Sitani akaghenda-ghenda “ng’endale eyikaruruma,” kandi ni kyahi ekya anzire erikolha?

³ Aliriryo, erithendi sosana n’eki, hane ebihangikwa by’ekirimu ebikathungerera abakabatizibawa ibina hithene. Kikahithanaya Sitani n’esyombinga siwe erilhangira esyonkumi  sy’abandu bakaghana ekihugho ekitsandire kino. Eki ni kwenene, kundi Sitani mwayiheka athi sihali abandu abanga kolera Yehova y’omo lhwanzo kandi athi sihali oyuwanga sighalha muthaleghulha amabana ebitsibu ebikalire. (Soma Yobu 2:4, 5.) Omundu akabya akathwamu eriyihayo oku Yehova, akakanganaya ngoku Sitani ni mubehi. Sitani akabya ng’akaswiribawa amakofi n’amakofi obuli yenga omwa mwaka. Kwesi kya kikaleka ‘iniaghenda-ghenda ng’endale eyikaruruma n’erisonda-sonda oyo yangalya’! (1 Petero 5:8) “Endale” eyi yanzire iya thulya bunyakirimu, erileka ithwatsandya kutse erithwa enkolangana yethu na Nyamuhanga.​—Esyonyimbo 7:1, 2; 2 Timoteo 3:12.

4, 5. (a) Yehova abirikakirya obuthoki bwa Sitani omu nzira ngulhu-ngulhu syahi ibiri? (b) Ni kyahi ekya Mukristayo ow’okwenene atholere iniaminya?

⁴ Nomwakine indi thukalhwa n’enzighu eyitsurumire eyi, sihali  ekyanga leka ithwakwa buba. Busana naki? Kundi omwa syonzira ngulhu-ngulhu ibiri Yehova abirikakirya obuthoki ‘bw’endale eyikaruruma’ eyo. Ni syahi? Ey’erimbere, Yehova abirilhaghulha athi “endeko nene” ey’Abakrisitayo ab’ekwenene yikendi syalhama okwa ‘bulighe bunene’ obukayasa. (Eribisulirwa 7:9, 14) Amaminyereri wa Nyamuhanga syangabya athethabererera. Busana n’ekyo, na Sitani atholere iniaminya ngoku syanga thebya abandu ba Nyamuhanga abosi.

⁵ Enzira eyakabiri yiri omwa kya bughawa n’omuthaleghulha wa Nyamuhanga owa kera, Omuminyereri Azaria. Mwabwira Omwami Asa athi: ‘Omwami Mukulhu ali haghuma nenyu mwamamusonda-sonda.’ (2 Emyatsi y’Emigulu 15:2; soma 1 Abanya Korinto 10:13.) Eby’erileberyako bingyi ebiri omwa Biblia bikakanganaya ngoku omwa buthuku bwa kera, Sitani iniakalemawa erimera omughombe wa Nyamuhanga wosi-wosi oyuthaleghulha. (Abaebrania 11:4-40) Munabwire, Omukrisitayo oyukabya iniane n’obughuma na Nyamuhanga akendi thoka erirwanisya n’erisingura Diabolo. Erithwalira haghuma, Ekinywe kya Nyamuhanga kikathukakasaya kithi: ‘Mulhwe na Sitani, nayo akendi basagha.’​—Yakobo 4:7.

6. Sitani akarwanisaya athi obuli Mukristayo?

⁶ Sitani syanga thusingura omwa malhwa aya, aliriryo angana kuhuthalya wamayirekerania. Sitani anasi ngoku angana thumera amatsekya obughuma bwethu na Yehova. Eki Sitani akakikolha athi? Omw’ongera amalhwa wiwe, erirwanisya obuli mundu ahabwiwe, n’erithurwanisya omwa menge. Thulebaye ebithegho bya Sitani ebikulhu-bikulhu ebi.

7. Busana naki Sitani akongera erirwanisya abandu ba Yehova?

⁷ Eryongera amalhwa wiwe. Omukwenda Yoane mwabugha athi: ‘Ekihugho kino kiri omwa buthoki bw’omubi oyu.’ (1 Yoane 5:19) Ebinywe ebi biri mw’omwatsi w’erikunga busana n’Abakrisitayo abosi ab’okwenene. Kundi Sitani abirimera ekihugho kyosi eky’abandu abathekenga Nyamuhanga, lino akahweraya akaghalha kiwe k’okwa bandu ba Yehova kundi  babirimusighania kandi akongera eribarwanisya. (Mika 4:1; Yoane 15:19; Eribisulirwa 12:12, 17) Ahithene kutsibu kundi asi ngoku awithe kathambi kake buyira. Busana n’ekyo, abirithasyongera erikalira ighuma. Munabwire, thukahikawako obutsurumi bwiwe obw’erighunzerera obw’eritsandya enkolangana yethu na Nyamuhanga.

8. Omukwenda Paulo akamanyisaya ki akabugha athi ‘thukalhwa’ n’ebirimu bibi?

⁸ Erirwanisya obuli mundu ahabwiwe. Omukwenda Paulo mw’ibukya Abakrisitayo balikyabo athi: ‘Thukalhwa n’ebirimu bibi eby’omwa kyanya.’ (Abanya Efeso 6:12) Ni kyahi ekyaleka Paulo iniakolesya ekinywe ‘amalhwa’? Kundi abya iniakakanganaya amalhwa w’erihambirirana. Kwesi, erikolesya ekinywe ekyo, Paulo mwakangania ngoku obuli mughuma w’okw’ithwe ahabwiwe ali omwa malhwa n’ebirimu bibi. Mbulha thwikere omwa kihugho ekyoswire mw’abandu abakikiriraya omwa mirimu mibi kutse eyihi, sithutholere thuk’ibirirwa ngoku omughulhu thwayihayo erikolera Yehova, muthwatsuka amalhwa w’obunyakirimu. Erilhua okwa kiro ky’eriyihayo n’erilholya embere, obuli Mukristayo ak’ingira omwa malhwa aya. Kwesi, sikiri swekaya eribya Paulo imwahabulha mirundi isathu Abakrisitayo abe Efeso athi ‘bahangane ndeke’!​—Abanya Efeso 6:11, 13, 14.

9. (a) Busana naki Sitani n’esyombinga bakakolesaya “amenge” mabi omu nzira muthina-muthina? (b) Sitani akalengesaya athi eritsandya amalengekania wethu, kandi thwanga rwanisya thuthi ebithegho biwe? (Lebaya “ Wuyitheghaye Okwa Menge Mabi wa Sitani!”) (c) Ni kindi kithegho kyahi ekya thukaya kanayako?

⁹ Ebithegho by’amenge. Paulo akahabulha Abakrisitayo athi bahangane ndeke erilhwa “n’amenge” wa Sitani. (Abanya Efeso 6:11) Hali ebithegho bingyi ng’ebyo. Ebirimu bibi bikakolesaya amenge mabi omu nzira muthina-muthina​—kandi busana n’enzumwa ndebe. Obuthuku bune mulhaba, abandi bikirirya babirihanganira kutse erirwanisya omulingo mughuma ow’erilengwako aliriryo ibaleghulha bakabana owundi mulingo w’erilengwako. Busana n’ekyo, Diabolo n’esyombinga bakathungerera kutsibu emitse ey’obuli mughuma w’okw’ithwe erilebya aha thutsekire. Neryo ibakolesya obutseke bw’obunyakirimu  obwa thwangabya nabu. Aliriryo, eky’obutseme, thwangana minya ebithegho bingyi ebya Diabolo, kundi bina kanganibwe ndeke omwa Biblia. (2 Abanya Korinto 2:11) Omwa syosura sy’erimbere-mbere esy’ekitabu kino, muthwakania okwa bithegho ng’ebi ng’erianza ebindu bya kutsibu, amanywani mabi, n’emyatsi ey’obusingiri. Lino thulebaye awandi menge awa Sitani akakolesaya​—eby’obukumu.

10. (a) Eby’obukumu niki? (b) Yehova akalhangira athi eby’obukumu, nawu wukabilhangira wuthi?

¹⁰ Omundu erikolha eby’obukumu, akabya iniakakolangana ndeke-ndeke n’emirimu mibi. Eby’obulhaghu, obulhoyi, obusaki, n’erikanirania n’abaholi ni bighuma by’okwa bindu eby’obukumu. Ngoku thunasi ndeke-ndeke, eby’obukumu ni “nye” oku Yehova. (Eryibuka Ebihano 18:10-12; Eribisulirwa 21:8) Kundi nethu thutholere ‘ithwakwa ekibi kyo nye,’ ni ky’obukiru ithwe erianza erinywana emirimu mibi. (Abanya Roma 12:9) Eki ikikendibya kindu ky’obughobya embere sya Thatha wethu ow’elhubulha, Yehova!

11. Sitani amathusona-sona eringira omwa by’obukumu, busana naki iniakendibya iniamasingura kutsibu? Iha eky’erileberyako.

¹¹ Nomwabine, kundi eriyingirya omwa by’obukumu ni kindu ky’esyonye n’eky’obughobya embere sya Yehova, kya kikaleka Sitani inialholha embere erilhangira athi abaghuma b’okw’ithwe bakingira mubyo. Sitani akabya amingirya Omukristayo y’omwa by’obukumu, akabya iniamasingura kutsibu. Busana naki? Thalengekania okwa ky’erileberyako kino: Omusirikali amasonwa-sonwa erilhua kutse erighoberya amahe awalhuemu neryo akayiyunga kutse eringira omwa mahe aw’esyonzighu, omukulhu w’esyonzighu iniakendi tsema. Nibya iniangana kangania omughobya oyu ng’ekindu ekikakanganaya erisingura, nuku anga hithania omukulhu w’amahe aw’abyamu. Kuthya, Omukristayo am’ingira omwa by’obukumu, iniakendibya iniama kighenderera erisighania Yehova n’eriyihira ndeke-ndeke omw’isi sy’obusondoli bwa Sitani. Thalengekania nga kyangaha Sitani y’etseme yingahi akakangania Omukristayo ng’oyu ng’ekindu ekikakanganaya  erisingura olhuhi! Hane owosi-wosi okw’ithwe oyuwanganza eriha Diabolo y’erisingura ng’eri? Eyihi nahake! Sithuli baghobya.

12. Ni nzira yahi eya Sitani akakolesaya erihindulha amalengekania wethu awahambire okwa by’obukumu?

¹² Thwamakwa eby’obukumu by’esyonye, Sitani isyendi thuthebererya eribikolha. Busana n’ekyo, akalhangira athi atholere iniahindulha amalengekania wethu. Athi? Akasondaya esyonzira esy’eritaburira mw’Abakrisitayo erihikya abandi okwa kiika eky’erilhangira “ebibi mo bibuya, n’ebibuya mo bibi.” (Isaya 5:20) Erithoka ekyo, Sitani akabera erikolesya ekighuma ky’okwa bithegho biwe eky’abirikolesya erilhua kera​—akakolesaya ebibulyo ebikaletha erithika-thika.

13. Sitani abirikolesya athi enzira ey’eribulya ebibulyo erihira omwa mundu mw’erithaka-thika?

¹³ Thalebya ngoku Sitani abya kolesirye enzira eyi omwa buthuku bwa kera. Omwa Edeni mwabulya Eva athi: ‘Kwenene Nyamuhanga abiribugha athi simusyalya okwa mithi yosi y’eririma kwehi?’ Omwa buthuku bwa Yobu, omughulhu abamalaika babya n’omuhindano elhubulha, Sitani mwabulya ekibulyo athi: ‘Ko Yobu akakengera Nyamuhanga yo busa kwehi?’ Yesu abere akatsuka omubiiri wiwe ow’okwa kihugho kwa hano, Sitani mwahakanisya Kristo akabugha athi: ‘Wamabya iwuli mughalha wa Nyamuhanga, wubwire amabwe aya abye mandu.’ Thalengekania​—oku Yesu, Sitani mwalengesya eriseka ebinywe ebya Yehova iyuwene-wene abya iniamabiribugha amayenga mukagha awalhabire ebikabugha bithi: ‘Oyu ni Mughalha waghe mwanze, namamutsemera ndeke’!​—Enzuko 3:1; Yobu 1:9; Matayo 3:17; 4:3.

14. (a) Sitani akakolesaya athi ekithegho kiwe eky’erihira omwa mundu mw’erithika-thika erikwamana n’eby’obukumu? (b) Ni byahi ebya thukayalebaya?

¹⁴ Munabwire, Diabolo akakolesaya enzira iyan’eyo akalengesya erihira omwa bandu mw’amalengekania aw’eribugha indi eby’obukumu si bibi. Eky’obulighe, abirisingura omw’ihira  omwa malengekania aw’abikirirya balebe mw’erithika-thika. Babiritsuka eriyibulya eyindi miringo ey’obukumu kwenene nga nina mibi. (2 Abanya Korinto 11:3) Abandu ng’aba thwanga bawathikya thuthi nuku bahindule amalengekania wabu? Ni kyahi ekya thwanga kolha erilhangira thuthi Sitani syali thutheba omwa menge wiwe mabi? Erisubirya, thulebaye ebindu bibiri ebithuhambireko ebya Sitani akatsandaya omwa menge akakolesya eby’obukumu. Eriyitsemesya n’erianza eribya n’amaghalha awuwene.

15. (a) Abanene omwa bihugho by’Ebusungu bawithe malengekaniaki okwa by’obukumu? (b) Amalengekania w’ekihugho okwa by’obukumu, abirithebya athi abandi Bakristayo?

¹⁵ Kwilhabirirya omwa bihugho by’Ebusungu, obulhoyi, n’eyindi miringo ey’eby’obukumu bikongera erilhangirwa nga si bibi. Esyofilimu, ebitabu, esyondegheka esy’etivi, n’emisathu ey’ekombyuta bikakanganaya ebindu ebiri mw’eby’emirimu nga bikatsemesaya, nga ni by’amenge, kandi nga si by’akabi. Esyofilimu n’ebitabu birebe ebiri mw’emyatsi ey’obulhoyi byamabiri kanyirira kutsibu omwa bandu erihika n’okwa kiika indi ababyanzire kutsibu babirikolha ebitebe eby’abandu abakabisighika. Kilhangirikire ngoku esyombinga syabirisingura omw’ireka eby’obulhoyi ibyabya nga sibiwithe kabi. Amalengekania aya aw’erithwalha eby’obukumu nga sibiwithe kabi ane ingira omwa Bakrisitayo? Amalengekania w’abandi abirithebibwa. Omu nziraki? Erithaha eky’erileberyako ekilhangirikire, Omukristayo mughuma abere abirilebya efilimu eyabya yihambire okwa by’obukumu, mwabugha athi, “Ngalyalebaya efilimu buyira, singalya bikolha.” Busana naki amalengekania ng’aya ni w’akabi?

16. Busana naki ni ky’akabi erisombolha eby’eriyitsemesya ebihambire okwa by’obulhaghu?

¹⁶ Nomwakine indi hali embaghane ahakathi-kathi k’erikolha eby’obukumu n’eribilebya, omwa kwenene ekyo sikiri manyisaya kithi eribilebya sikiwithe kabi. Busana naki? Thalengekania okwa kino: Ekinywe kya Nyamuhanga kikakanganaya  kithi Sitani n’esyombinga siwe sibawithe amaaka aw’eriminya ebiri omwa malengekania wethu. * Busana n’ekyo, ngoku kyabirikanibwako enyuma, erithoka eriminya ebya thukalengekanaya n’ahathulemererwe bunyakirimu, ebirimu bibi bikathungerera kutsibu ebya thukakolha​—imwamuli eby’eriyitsemesya ebya thukasombolha. Omukristayo amabya n’omutse owakakanganaya ngoku anzire esyofilimu n’ebitabu ebihambire okwa syombandwa, erighusa emighereku, ebikakolhawa n’abali kw’esyombinga, kutse n’eyindi myatsi eyiri ng’eyi, akabya iniakabwira esyombinga athi ebyo bya bikamutsemesaya. Ni bugha mbu, akabya iniakasikanganaya ahali obutseke bwiwe! Neryo esyombinga isyangan’ongera erihira h’akaghalha ak’erilhwa n’Omukristayo oyo nuku syanga kolesya obutseke obw’abirikangania erihika okwa kiika eky’erimubendekerya. Erithwalira haghuma, abandi abatsuka erianza eby’obukumu busana n’erilebya eby’eriyitsemesya ebihambire okwa by’obulhaghu, erighunzerera babirikolha eby’obukumu.​—Soma Abanya Galatia 6:7.

17. Ni kithegho kyahi ekya Sitani anga kolesya erilenga okwa mulhwere?

¹⁷ Sitani syali lengaho erikolesya eby’eriyitsemesya bisa, aliriryo akakolesaya n’ekiyithawa eky’eribana obubalya obuwene. Athi? Omukristayo anganabya iniane mulengaho kutsibu erisondya omubatsi owakendi lhamya obulhwere bwiwe obukongera erikalha aliriryo ibyalema. (Mariko 5:25, 26) Ekyo kyangana leka Sitani n’esyombinga ibabana akaghisa ak’erimulengako. Esyombinga syangana lenga okw’oyulhwere nuku busana n’eriyibulha-bulha asombole erithambirwa eriri mw’erikolesya “amaaka w’obulhaghu,” kutse eby’obukumu. (Isaya 1:13, NW) Ekithegho eky’amenge eky’esyombinga eki kyamakolha, ikyangana tsekya engolangana eya mulhwere awithe na Nyamuhanga. Omu nzira ki?

18. Ni mithambirire eyiri yithi ey’Omukristayo atholere iniaghana, kandi busana naki?

 ¹⁸ Yehova mwakunga Abaisraeli ababya ibali okw’ikolesya “amaaka w’obulhaghu” athi: ‘Omughulhu mukasumba ebyalha byenyu, nasyabisa ameso waghe. Omughulhu mukakanyiriraya erisaba lingyi, singendi owa.’ (Isaya 1:15) Ni kwenene, mughulhu wosi thwanzire ithwa yihighulha okwa kindu kyosi-kyosi ekyanga kakirya emisabe yethu n’erikehya obuwathikya obwa Yehova anga thuha​—na kwilhabirirya omughulhu thulhwere. (Esyonyimbo 41:3) Busana n’ekyo, eripimwa n’emithambirire mirebe yamabya iyiri mw’ebindu by’obukumu-kumu, Omukristayo ow’okwenene atholere iniaghanayo. * (Matayo 6:13) Amakolha athya, atholere iniakiminya ndeke-ndeke ngoku Yehova akendi musighika.​—Lebaya akasanduko “ Kwenene Nina by’Obukumu?”

19. (a) Diabolo abirithebya abandu banene erihika okwa kiika eky’eriligha kindu kyahi ekihambire okwa kaghalha kiwe? (b) Ni myatsi yahi ey’Abakrisitayo ab’ekwenene batholere ibayihighulhako?

¹⁹ Nomwakine indi abandu bangyi abali omwa bihugho by’Ebusungu bakalhangira obuthoki bwa Sitani nga si buwithe kabi kosi-kosi, kwa bithe bithya  n’omwa bindi bihugho. Diabolo abirithebya abandu banene erihika okwa kiika eky’eriligha bathi awithe akaghalha kanene kwilhaba ako atholere eribya iniawithe. Abandi bandu bakalya, ibakolha, n’erighotsera ibane mw’olhubaho olhw’emirimu mibi. Emyatsi eyihambire okwa buthoki bw’esyombinga yikanyirire. Mughulhu mungyi emyatsi ng’eyi bakathulhayo ibana tsemire; iya tsemesya abandu. Thunatholere erisangira omw’itsatsanga emyatsi ng’eyi? Eyihi, abaghombe ba Nyamuhanga ow’ekwenene bakayihighulha okw’ikolha eki ahabw’esyonzumwa nkulhu-nkulhu ibiri.

20. Omundu anga tsatsanga athi amabehi wa Sitani omwa buthaminya?

²⁰ Ey’erimbere, omundu erilhalhania emyatsi eyihambire okwa bya syombinga sikakolha, akabya iniakakulha-kulhanaya erisonda lya Sitani. Busana naki ikyabya kithya? Ekinywe kya Nyamuhanga kikaghumaya kithi Sitani angana thoka erikolha ebithiko-thiko by’amaaka, aliwe kandi kikakunga kithi akakolesaya “ebiminyisyo by’amabehi” ‘n’eritheba.’ (2 Abanya Tesalonika 2:9, 10) Kundi Sitani ya mubehi mukulhu, anasi ngoku  anga thebya abandu abakalengekanaya okwa by’obukumu kandi ngoku anga leka ibikirirya emyatsi eyithe y’ekwenene. Abandu ng’aba bangana kakasya bathi mubakalhangira n’eriowa emyatsi mirebe kandi ibangana bwira abandi ebya balyalholhako ng’eby’okwenene. Obuthuku bukabya bunemulhaba, emyatsi yabu eyi yinemukanibwa, iyangan’ongerwa mw’ebindi binywe neryo iyalhabirirania. Omukristayo amatsatsanga emyatsi ng’eyi, ni bugha mbu iniakendibya iniakakolha erisonda lya Diabolo​—“ise w’amabehi.” Iniakendibya iniakatsatsanga amabehi wa Sitani.​—Yoane 8:44; 2 Timoteo 2:16.

21. Ni kyahi ekya thutholere ithwa bera erikaniako?

²¹ Eyakabiri, Omukristayo nomwangabya imwanahikwako ebirimu bibi, syatholere akabera erisubirira omwa myatsi eyi akabwira y’Abikirirya balikyabo. Busana naki? Thukahanawa thuthya: ‘Thuhire ameso wethu w’oku Yesu oyukathuletha okw’ikirirya n’oyukaberereraya lyo.’ (Abaebrania 12:2) Omwa kwenene, thutholere ithwahwerya amalengekania wethu w’oku Kristo, butsira oku Sitani. Ni kibuya eriminya ngoku omughulhu Yesu abya okwa kihugho mwathabya akabwira abigha biwe b’emyatsi y’ekisehya eyihambire okwa mirimu bibi, nomwakine indi angana kanirye mwatsi munene owahambire okwa bya Sitani anga kolha n’ebya athe anga kolha. Aliwe, Yesu mwahwerya amalengekania wiwe w’oko mwatsi w’Obwami. Busana n’ekyo, omw’igherererya Yesu n’abakwenda, thwanzire eribera erikania okwa ‘mibiiri y’amaaka ya Nyamuhanga.’​—Emibiri y’Abakwenda 2:11; Luka 8:1; Abanya Roma 1:11, 12.

22. Thwanga lholha thuthi embere erileka ‘obutseme bubye elhubulha’?

²² Ni kwenene Sitani akakolesaya amenge muthina-muthina, imwamuli eby’obukumu, erianza eritsandya engolangana yethu na Yehova. Aliriryo, thwamakwa ekibi kyo nye, thukakwamirira ekibuya, isithwendiha Diabolo y’akaghisa ak’eritsekya erithwamu lyethu ery’erighana eby’obukumu omwa mibere yosi-yosi. (Soma Abanya Efeso 4:27.) Thalengekania nga bwangabya ‘butseme’ bungahi ‘elhubulha’ thwamalholha embere ‘erihangana n’erilhwa n’amenge wa Sitani’ erihika ah’akendi syathoghothibirwa!​—Luka 15:7; Abanya Efeso 6:11.