1, 2. (a) Thwanga yibulya thuthiki oko balyaherukanaya, kandi busana naki? (b) Ni bibulyo byahi ebya thukendi kaniako omwa sura eno?

WUKANA tsemera erighenda omwa magheni aw’eriherukya? Abanene bakatsema erighenda mugho, kundi amagheni ng’aya akatsemesaya. Wukalhangira abaheruki ibabiriambalha ndeke. Kandi, etseme ng’eyi wukalhangira y’okwa meso wabu! Okwa kiro eki, wukalhangira abosi ibabiritsema kutsibu.

² Aliriryo, thutholere ithwa kikirirya ngoku munabwire amatheke mangyi sy’imene ndeke. Nomwakine indi thukasunzira abalyaherukanaya b’endeke, aliwe thwangana yibulya: ‘Obutheke obu bune mwendibya mw’etseme? Bune mwendi ghuma?’ Eby’erisubirya okwa bibulyo ebi bikasighikira omulhume n’omukali nga bana yikethere Nyamuhanga n’erianza erikolesya erihabulha liwe erihambire okwa butheke. (Soma Emisyo 3:5, 6.) Ekyo kya batholere ibakolha nuku banga yibika omo lhwanzo lhwa Nyamuhanga. Lino, leka thulebaye ebye Biblia yikasubiraya okwa bibulyo bbini bino: Busana naki iw’ingira omwa butheke? Wamanza eringira omwa butheke, wutholere iwasombolha omundu oyuli athi? Wanga yitheghekera wuthi eringira omwa butheke? Ni kyahi ekyanga wathikya abathahenie eribya ibane omwa tseme?

3. Busana naki si kya menge eringira omwa butheke ahabw’esyonzumwa esithatholere?

³ Abandi bakyasi bathi erithahya kutse erithahibwa lya likaletha etseme kandi bathi siwangabana etseme omwa ngebe  wuthalyabana omwanze. Oko sikwenene nahake! Yesu, oyuthabya athahirye, mwakania okwa buhuru ng’ekihembo kandi mwahira omwa banga thoka eribya bahuru mw’omuhwa athi balighe omwatsi oyu. (Matayo 19:11, 12) Omukwenda Paulo nayu mwakania okwa mighaso ey’obuhuru. (1 Abanya Korinto 7:32-38) Sikirimanyisaya indi Yesu kutse Paulo mubahira h’ekilhaghiro erikwamana n’omwatsi oyu; erithwalira haghuma, ‘erighania erihikania’ ni kighuma ‘ky’okw’ikangirirya ly’esyombinga.’ (1 Timoteo 4:1-3) Nomwabine, eribya muhuru likaleka iwakolera Yehova isihali ebikakusulhusuthaya. Busana n’ekyo, sikyangabya ky’amenge eringira omwa butheke ahabw’esyonzumwa esithatholere, ng’abandi erikuhathikana bathi wuthahaye.

4. Obutheke obuwene bukaleka buthi erilembera abaana iryathokekana?

⁴ Okwa lhundi lhuhandi, mbwino hane esyonzumwa esitholere esyanga leka omundu in’ingira omwa butheke? Ee. Eringira omwa butheke nalyo ni kihembo ekikalhua oku Nyamuhanga ow’olhwanzo. (Soma Enzuko 2:18.) Busana n’ekyo, lina withe emighaso mirebe kandi lyangana letha etseme. Ng’eky’erileberyako, obutheke obuwene bw’obukaletha engebe eyuwene omw’eka. Kundi abaana bakabya omwa mibere eyuwene, ihane ababuthi abakabalembera omwa lhwanzo, eribahabulha n’eribasondolha. (Esyonyimbo 127:3; Abanya Efeso 6:1-4) Aliriryo, eribya n’abaana si y’enzumwa nyisa eyanga leka omundu in’ingira omwa butheke.

5, 6. (a) Erisighikira oku Omugambuli 4:9-12, obunywani bw’okwa ndungo bukalhwiririra mw’emighaso yahi? (b) Obutheke bwangabya buthi ng’ekikoba eky’emihungyi isathu?

⁵ Thulebaye erisako ery’esura eno yiseghemereko n’ekikulhu ekya likakanayako: ‘Ababiri buwene kwilhaba omughuma, kusangwa bawithe olhuhembo lhuwene busana n’emibiiri yabu. Kusangwa omughuma amayihinda, omughuma asyahangania mulikyabu, nikwa obulighe okw’oyuli iyuwene omughulhu akayihinda hathe owundi w’erimusumba. Kandi, ababiri bamaghotsera haghuma, bakahuha; nikwa omughuma anga thoka erihuha iyuwene athi kwehi? Neryo omundu mughuma  amathoka erikinda oyuliho iyuwene, abandu babiri basya muthoka. Olhukoba lhw’emihungyi isathu silhuli thwika lhuba.’​—Omugambuli 4:9-12.

⁶ Erisako eri lyahandikawa kutsibu-tsibu erikangania omughaso ow’obunywani. Likakolha n’okwa butheke, kundi nibya abali omwa butheke bakabya ini banywani kutsibu. Erisako eri ngoku likakanganaya, obughuma ng’obu bw’obwangaleka abathahenie ibawathikania, owundi erihumulikania owundi, n’eritheghania. Obutheke bukaghuma, kwilhabirirya obughuma bw’ababiri abo bwamabya isibuli ahakathi-kathi kabo ibo basa. Ngoku omulhondo oyu akakanganaya, ekikoba ky’emihungyi ibiri, kyangana thwika. Aliriryo ekilhukirwe omwa mihungyi isathu sikyanga thwika lhuba. Erianza eritsemesya Yehova kyamabya kilhubirirwa ky’omulhume n’omukali, obutheke bwabu buli ng’ekikoba eky’emihungyi isathu ekyo. Omulhume n’omukali bamahira Yehova y’embere omwa butheke bwabu, kikaleka ibwa ghuma kutsibu.

7, 8. (a) N’ihano lyahi erya Paulo ahandika busana n’abahuru abakarwanisaya esyongumbu sy’omubiri? (b) Ni kyahi ekya Biblia yikabugha yithi abak’ingira omwa butheke batholere ibabya ibanasi?

⁷ Abali omwa butheke basa babahamulirwe erikolha emyatsi y’engyingo. Aho, emyatsi y’engyingo imuyikendi lhangirwa ng’ekindu ekikaletha etseme. (Emisyo 5:18) Omuhuru nomwanga lhaba omwa buthuku bw’obunyetho obuli mw’esyongumbu nyingyi esy’emyatsi y’engyingo, angana lholha embere erirwanisya esyongumbu esyo. Esyongumbu esyo syamathendi kakiribwa, isyangana leka omundu iniakolha eby’obuthundirya. Paulo mwasondolhwa n’omulimu abuyirire erihandika busana n’abahuru athi: ‘Bamathalhuka eriyithulerya, ibahikania; kusangwa lyuwene erihikania kwilhaba eriaka omwa ngumbu.’​—1 Abanya Korinto 7:9; Yakobo 1:15.

⁸ Mbulha ni nzumwaki eyanga leka omundu in’ingira omwa butheke, atholere iniabya inianasi ebyanga lhwiririramu. Ngoku Paulo abugha, abakahikaya, ‘basyabana amalighe omwa mubiri.’ (1 Abanya Korinto 7:28) Abatheke bakabana ebitsibu eby’abahuru bathebana. Nomwabine, wamathwamu er’ingira  omwa butheke, wanga kehya wuthi ebitsibu n’eryongera etseme? Enzira nguma ly’erisombolha omwanze ya ndeke.

9, 10. (a) Paulo mwakangania athi akabi ak’erimathana n’abathikirirye? (b) Mughulhu mungyi ni kyahi ekikalhwiririra omw’igheghena erihabulha lya Nyamuhanga ery’erithendi ingira omwa butheke n’oyuthikirirye?

⁹ Paulo mwasondolhwa n’omulimu abuyirire erihandika omusingyi mukulhu owatholere erikolesibwa wukasombolha omwanze ow’erithahya: ‘Simumathikane n’abathikirirye.’ (2 Abanya Korinto 6:14) Eky’erileberyako kiwe kyabya kihambire okwa by’obulime. Ebisoro bibiri ebith’ingene omwa bunene kutse omwa kaghalha byamalimisibwa haghuma, ebyosi ibikendi aghalhwa. Kuthya, omwikirirya n’oyuthe mwikirirya bamathahania, ahathe erithika-thika ibakendi bana ebitsibu. Omughuma amabya inianzire eriyibika omo lhwanzo lhwa Yehova, owundi isyatsomene kutsibu kutse isyatsomene nahake, ebighendererwa byabu omwa ngebe isibyendi hambana, neryo imwangana lhwiririra erithendibya n’etseme. Busana n’ekyo, Paulo mwahana Abakrisitayo athi bahikaye ‘Omukristayo’ musa.​—1 Abanya Korinto 7:39.

¹⁰ Hakanayira abandi Bakristayo abahuru ibayowa bathi eringira omwa butheke n’oyuthikirirye kilengire eribya omwa mbwera. Abandi bakathwamu erigheghena ekihano kye Biblia, neryo ibathahya kutse ibathahibwa n’oyuthe mughombe wa Yehova. Mughulhu mungyi, ebikalhwiririramu ni bibi. Abandu ng’abo bakayisanga ibabirithahya omundu oyubathe banga kanirania nayu ebindu by’omughaso munene omwa ngebe. Embwera eyikalhwiririramu yanganabya nene kutsibu kwilhaba eya babya nayu bathe bingira omwa butheke. Eky’obutseme, hane esyonkumi nyingyi esy’Abakrisitayo abathe bingira omwa butheke abakayikethera n’erighondera omwa buthaleghulha erihabulha lya Nyamuhanga erikwamana n’omwatsi oyu. (Soma Esyonyimbo 32:8.) Nomubana withe amaha awʼerisyingira omwa butheke, bakayisinga obuhuru erihika  aha bakendi syabanira omwanze omw’abo abakaramaya Nyamuhanga Yehova.

11. Ni kyahi ekyanga kuwathikya erisombolha ndeke ow’eringira nayu omwa butheke? (Lebaya “ Nga Sondaya OMwanzi Oyuli Athi?”)

¹¹ Si bugha mbu obuli mughombe wa Yehova anganabya mwira wawu kutse mukali wawu oyutholere. Wamabya iwukanza erithahya kutse erithahibwa, sondaya omundu oyuwithe emibere, n’ebilhubirirwa eby’obunyakirimu, n’oyuwanzire Nyamuhanga ngoku wumwanzire. Omughombe oyuthaleghulha n’ow’amenge abirithuha emyatsi mingyi ey’erilengekaniako eyihambire oko mwatsi oyu, kandi kyangabya kibuya erisaba n’erilebya erihabulha eriseghemere okwa Masako ng’eri, erileka likusondole wukathwamu oko mwatsi mukulhu oyu. *​—Soma Esyonyimbo 119:105.

12. Ni mutse wahi owahambire oko mwatsi w’erithahya owali omwa bitsweka bingyi, kandi ni ky’erileberyako kyahi ekiri omwa Biblia eky’er’ighirako?

¹² Omwa bitsweka bingyi, ababuthi bakasombolera omwana wabu y’ow’eringira nayu omwa butheke. Omwa bitsweka ebyo, kikalighawa ehosi-hosi indi ababuthi basi binene ebyanga leka ibathoka erisombolha oyutholere. Mughulhu mungyi obutheke obw’erikusombolera omwanze bukuwana, ngoku kyabya omwa buthuku bwe Biblia. Ababuthi abanga kolha emitheghekere eyiri ng’eyi munabwire, batholere ibighira okwa ky’erileberyako kya Abrahamu akathuma omughombe wiwe eriyasonderya Isaka y’omukali. Abrahamu mwathatsomana esyosente n’ekitsumbi ekya mundu angabya iniawithe omwa bandu. Aliwe, mwalengaho kutsibu erisonderya Isaka y’omukali omwa bandu ababya bakaramya Yehova. *​—Enzuko 24:3, 67.

13-15. (a) Omusingyi owali omwa Emisyo 24:27 anga wathikya athi omunyethu oyukanza erithahya? (b) Ni kyahi ekyo mukali anga kolha eriyitheghekera erithahibwa?

¹³ Wamabya iwukanza eringira omwa butheke, kyangabya kibuya wamayibulya, ‘Kwenene ngana yitheghekire ndeke?’ Eki sikiri sighikira okw’iyowa lyawu okwa by’olhwanzo, emyatsi y’engyingo, eribya haghuma n’owundi, kutse eribya n’abaana. Aliriryo, hali bindu birebe ebyo abakanza eringira omwa butheke batholere ibalengekaniako ndeke.

¹⁴ Omunyethu oyukasondaya omukali ow’erithahya atholere inialengekania ndeke okwa musingyi ono: ‘Wukokothaye emibiiri yawu y’eyihya, wuyikokotherayeyo omoli; n’enyuma w’aho wuhimbe enyumba yawu.’ (Emisyo 24:27) Enzumwa ni yahi? Omwa biro ebyo, omulhume anabya amanza erithahya nuku athunge amaka, abya atholere iniayibulya, ‘Kwenene nganayitheghekire eritsomana oyo nangathahya n’abaana abo thwanga butha?’ Abya atholere iniatsuka erikolha, erisuwa amalima iwe, kutse ebirimwa. Omusingyi oyu akakolha munabwire. Omulhume oyukanza erithahya atholere iniayitheghekera olhukwamirwa. Amabya iniakina withe akaghalha, atholere iniakolha kutsibu. Ekinywe kya Nyamuhanga kikakanganaya kithi omulhume oyuthatsomana ebiyithawa eby’eka yiwe eby’ekinyamubiri, eby’eriyowa ly’omuthima, n’eby’obunyakirimu, ni mubi kwilhaba omundu oyuthikirirye!​—Soma 1 Timoteo 5:8.

¹⁵ Omukali oyukathwamu erithahibwa, nayu akabya iniamaligha eribya n’olhukwamirwa olhulithohire. E Biblia yikakanaya okwa mibere eyo omukali atholere iniabya nayu akawathikya mwira wiwe n’eritheya ab’omw’eka yiwe. (Emisyo 31:10-31) Abalhume n’abakali abakanza eringira omwa butheke mwa lhuba bathe bayitheghekera eriberererya olhukwamirwa lhw’obutheke, bakabya ibayitsomene omw’ithendi lengekania ngoku banga wathikya oyobang’ingira nayu omwa butheke. Nomwabine, ekikulhu kutsibu, abakanza eritsuka obutheke batholere ibabya ibanayitheghekire bunyakirimu.

16, 17. Abakanza eringira omwa butheke batholere ibaghanirya okwa misingyi yahi eyiri omwa Masako?

 ¹⁶ Eriyitheghekera eringira omwa butheke mwamuli erighanirya okwa lhukwamirwa olhwa Nyamuhanga abiriha omulhume n’omukali. Omulhume atholere iniaminya ekya kikamanyisaya eribya muthwe w’eka ey’Ekikrisitayo. Olhukwamirwa olhu silhulimanyisaya indi anubaye ab’eka yiwe. Aliwe, atholere iniagherererya emibere eya Yesu akoleseraya mw’obukulhu bwiwe. (Abanya Efeso 5:23) Kuthya, omukali Omukristayo atholere iniaminya olhukwamirwa lhwiwe. Ane mwendianza erighondera ‘omughambo owamubohere okw’iba wiwe’? (Abanya Roma 7:2) Erimbere, ali omwisi sy’omughambo wa Yehova n’owa Kristo. (Abanya Galatia 6:2) Obuthoki obwa mwira wiwe omw’eka bukathasyahira h’owundi mughambo. Mbwino anemwendi sighika n’erighondera obuthoki bw’omulhume oyuthahikene? Amalhangira athi syanga thoka omwatsi oyu, ni kibuya erithendi thahibwa.

¹⁷ Eryongera okw’ekyo, obuli mughuma atholere iniayithegheka eriberererya ebiyithawa eby’owundi. (Soma Abanya Filipi 2:4.) Paulo mwasakanga athi: ‘Obuli mundu omwa kathi-kathi kenyu anze mukali wiwe ngoku ayanzire; n’omukali nayo akenge iba wiwe.’ Busana n’erisondolhwa na Nyamuhanga, Paulo mwalhangira ngoku omulhume awithe ekiyithawa eky’embaghane eky’eriyowa ngoku mukali wiwe amusikirye kutsibu. N’omukali awithe ekiyithawa eky’embaghane eky’eriyowa ngoku mwira wiwe amwanzire.​—Abanya Efeso 5:21-33.

18. Busana naki abakanza erisyathahania batholere ibayikakirya omughulhu bali omwa buthethane?

¹⁸ Kwesi obuthuku bw’obuthethane si buthuku obw’erikwama kya yitsemesya. Ni buthuku obw’omulhume n’omukali eriminyana ndeke, erilebya nga kyanganabya ky’amenge ibo erithahania. Kandi ni buthuku obw’erikangania eriyikakirya! Erilengwako ery’eribya n’esyongumbu lyangana kanyirira kutsibu, kundi ni sy’obuhangiranwa. Nomwabine, abanzene omwa kwenene ibakendi yihighulha okwa kindu kyosi-kyosi ekyanga tsandya obunyakirimu bwabu. (1 Abanya Tesalonika 4:6) Neryo omughulhu muli omwa buthethane, muyikakiraye;  mwangana ghasirwa omwa mubere oyu omwa ngebe yenyu yosi, nomuwanga thahya kutse wukathendi thahya.

19, 20. Amalengekania aw’Omukristayo awahambire okw’iherukya atholere iniabya athi w’embaghane okw’ow’abandu bangyi munabwire? Iha eky’erilhangirirako.

¹⁹ Abathahenie bamabya banzire obutheke bwabu bughume, batholere ibabya n’amalengekania awuwene okwa lhukwamirwa lhwabu. Eringira omwa butheke, wukabya iwam’ingira omwa kindu ekyo Yehova atheghekanaya eribyaho kera na kera. (Enzuko 2:24) Eky’obulighe, abangyi kubathekithwalha bathya. Omundu akabya akalunga, abandi bakana ky’ahulha mu “eriboha erikundu.” Aliriryo bangan’ibirirwa ngoku erikwamana n’amalengekania agho bandu bawithe okwa butheke munabwire, eki ikyangana manyisya indi obutheke buli ng’erikundu eryawangana boha kandi isi kikalire eriliboholha.

²⁰ Munabwire, abanene bakalhangira obutheke nga ni kindu eky’obuthuku buke. Bak’ingira omwa butheke kundi bathi bukendi berererya ebiyithawa byabu, aliwe bakabya ibanayitheghekire eribulhwamu mwamabya ebitsibu. Aliriryo, th’ibuka ngoku e Biblia yikalinganisaya obughuma bw’obutheke ng’ekikoba. Ebikoba ebikakolesibawa okwa bwathu bikolirwe erighunza buthuku buuli, erithendi syakulha kutse eritsutsangika, nibya n’omwa lihunga linene. Kuthya, obutheke bukolirwe ini bw’eribyaho kera na kera. Wibuka, Yesu mwabugha athi: ‘Abo Nyamuhanga abirimathania haghuma, sihabye mundu oyukaghabulhabo.’ (Matayo 19:6) Wam’ingira omwa butheke, wutholere iwabya n’amalengekania ayo. Mbwino eki kyanamamanyisya indi obutheke ni muheke? Eyihi.

21. Ni malengekania wahi aw’omulhume n’omukali batholere ibabya nawu, kandi ni kyahi ekyanga bawathikya erikolha bathya?

²¹ Omulhume atholere iniasamalira ebibuya ebyo omukali wiwe akakolha, kuthya n’omukali. Obuli mughuma amalengaho erisamalira emibere mibuya ey’owundi n’ebibuya eby’akakolha, obutheke ibukendibya mw’etseme n’obuholho. Mbwino ni ky’obukiru eribya n’amalengekania ng’aya? Yehova  anasi ngoku thuthahikene, aliriryo ni kikulhu ithwe eriminya ngoku akasamalira ebibuya ebya thukakolha. Omusakangyi ow’Esyonyimbo mwabulya: ‘Wamaghanza ebibi byethu, Mwami Mukulhu, nindi wangathoka erisingana kwehi Mukama?’ (Esyonyimbo 130:3) Abalhume n’abakali batholere ibabya n’amalengekania awuwene ng’aya n’aw’erighanyirana.​—Soma Abanya Kolosai 3:13.

22, 23. Abrahamu na Sara mubahira h’eky’erileberyako kyahi ekyabya kibuya busana n’abathahenie munabwire?

²² Obutheke bwangan’ongera eribya mw’etseme nene bune  mulholha embere erighuma ahabw’emyaka mingyi. E Biblia yikathukaniraya okwa butheke bwa Abrahamu na Sara omughulhu babya omwa myaka yabu ey’obukulhu. Si bugha indi engebe yabu yabya isiyiri mw’ebitsibu n’ebindu ebikabalyambaya. Thalengekania oku Sara, omukali obundi oyuwabya awithe myaka nga 60, nga mwayowa athi erisighania omuyi owuwene omwa tawuni ye Uri n’eriyikalha omwa syohema omwa biro byosi eby’engebe yiwe. Aliriryo, mwaghondera obukulhu obwa mwira wiwe. Ng’omuwathikya wa Abrahamu ow’okwenene, omw’isikya, mwasighika ebya Abrahamu abya akathwamu. Kandi erisikya liwe siryabya ly’eyighulhu-ghulhu. Nibya ‘n’omwa muthima,’ Sara mwahulha mwira wiwe mwa mukama wiwe. (Enzuko 18:12; 1 Petero 3:6) Erisikya Abrahamu lyalhua omwa muthima.

²³ Nomwabine, ekyo sikirimanyisaya kithi Abrahamu na Sara mughulhu wosi ibakalighirana okwa myatsi yosi. Muhanabya obuthuku Sara amahayo amalengekania wiwe awaleka Abrahamu iniakwa ‘obulighe’ kutse iniahithana kutsibu. Aliwe, busana n’obusondoli bwa Yehova, omw’iyikehya, Abrahamu mwowa omulenge wa mukali wiwe, n’enyuma waho kyamalhwiririra mw’emighisa ey’eka yiwe. (Enzuko 21:9-13) Eky’erileberyako eky’abatheke aba, kyangan’eghesya abalhume n’abakali b’emyatsi mingyi munabwire, nibya n’ababirighunza omwa butheke mw’emyaka mingyi.

24. Ni matheke mulingoki awakaha Nyamuhanga Yehova y’olhukengerwa, kandi busana naki?

²⁴ Omwa kithunga ky’Ekikrisitayo, muli amatheke mangyi awali mw’etseme​—amatheke awali mw’abakali abasikirye bira babu ba kutsibu, abalhume abanzire n’erisikya bakali babu, kandi abosi ibabya ibakakolera haghuma erihira erisonda lya Yehova ly’embere omwa myatsi yosi. Wamathwamu eringira omwa butheke, wusombole ndeke omwanze wawu, yitheghekere ndeke obutheke, kandi lengaho eribya n’obutheke obuli mw’obuholho n’olhwanzo obukaha Nyamuhanga Yehova y’olhukengerwa. Omwa nzira eyi, obutheke bwawu ahathe erithika-thika ibukendi kuwathikya eriyibika omo lhwanzo lhwa Nyamuhanga.