1, 2. Ni thwamu lyahi erya thutholere ithwakolha erikwamana n’eby’eriyitsemesya?

THATHERA akasasani iwukisiya iwalya ekighuma ekisihire kutsibu aliriryo iwalhangira ikuli akatsweka akabbolire. Iwukendi kolhaki? Obundi, iwanganalya ekighuma kyosi, ikwakuli n’akatsweka akabbolire; iwangana ghusa ekighuma kyosi, ikwakuli n’akatsweka akabbolire; kutse iwangana sara kw’akatsweka akabbolire neryo iwalya ekitsweka ekyuwene. Ni kyahi ekya wanga sombolha?

² Erisosana n’eki, eby’eriyitsemesya biri ng’ekighuma eki. Okwa bundi buthuku, wanganabya iwanzire eby’eriyitsemesya, aliriryo iwakiminya ngoku eby’eriyitsemesya binene ebiriho munabwire biri mw’esyongeso mbi, kutse bibbolire. Iwukendi kolhaki? Abandi bangana ligha eby’eriyitsemesya ebyosi-byosi ebiri omwa kihugho kino. Abandi bangana yihighulha okwa by’eriyitsemesya ebyosi erilhangira bathi sibali sangira omwa kindu kyosi-kyosi ekyanga lhwiririra mw’akabi. Kandi abandi bangana yitheya neryo ibayihighulha okwa by’eriyitsemesya ebyangabya bibi aliriryo ibasangira omwa byangabya nga byuwene. Ni by’eriyitsemesya byahi ebyawanga sombolha nuku wangabya iwuna yibikire omo lhwanzo lhwa Nyamuhanga?

3. Ni kyahi ekya thukayakanayako?

³ Abanene ibakendi sombolha erithwamu eryakasathu. Thunasi ekiyithawa eky’eriyitsemesya aliriryo thwanzire ithwa sangira omwa by’eriyitsemesya ebiri mw’esyongeso mbuya. Kwesi, thutholere ithwa minya eby’eriyitsemesya ebyuwene  n’ebithuwene nga ni byahi. Nomwabine, thutsuke erikania okwa by’eriyitsemesya ebya thukasombolha ngoku byanga hamba okw’iramya lyethu erya thukaha Yehova.

4. Eriyihayo lyethu litholere iryahamba lithi okw’isombolha eby’eriyitsemesya?

⁴ Omwa buthuku obulhabire, Omwema oyukekelhuhire oyuwabatizibawa omw’omwaka owa 1946 mwabugha athi: “Nabirithwamu erilhangira indi ngabya inganeho okwa buli mukania w’olhubatizo n’erihulikirira ndeke nga ningye ngendi batizibwa.” Busana naki? Mwasoborera athi, “Eribya ingane mulengekania okw’iyihayo lyaghe lyabirileka ingabya ingane muthaleghulha.” Ahathe erithika-thika wukaligha amalengekania aya. Eriyibukya ngoku muwalhagha Yehova ngoku wanga kolesirye engebe yawu yosi erimukolera kikaleka iwayiyinia. (Soma Omugambuli 5:4.) Erithwalira haghuma, erighanirya okw’iyihayo lyawu siryendi hamba okwa malengekania awawuwithe okwa mubiiri ow’erithulira lisa aliriryo likendi hamba n’okwa yindi mibere yosi ey’engebe, imwamuli eby’eriyitsemesya. Omukwenda Paulo mwakangania ekwenene eyi akasakangira Abakrisitayo ab’omwa buthuku bwiwe athi: ‘Wamalya akalyo, kutse wukapulya, kutse wamakolha ekindu ki, wukole ebyosi busana n’eriha olhukengerwa oku Nyamuhanga.’​—1 Abanya Korinto 10:31.

5. Abalawi 22:18-20 hakathuwathikaya hathi erilhangira erikunga eribisamire eriri omwa Abanya Roma 12:1?

 ⁵ Ekyosi-kyosi ekya wukakolha omwa ngebe yawu kihambire okw’iramya erya wukaha Yehova. Omwa baruha eya Paulo ahandikira Abanya Roma, mwakolesya ebinywe by’amani erilhangira athi ekwenene yikahika okwa mithima y’abikirirya balikyabo. Mwabahana athi: “Muheyo emibiri yenyu ng’obuhere obuliho, obubuyirire, obukalighawa na Nyamuhanga, omubiiri owabuyirire haghuma n’amaaka wenyu aw’obulengekania.” (Abanya Roma 12:1, NW) Omubiri wawu mwamuli amalengekania wawu, omuthima wawu, n’amaaka wawu. Ebyosi ebi, wukabikolesaya wukakolera Nyamuhanga. (Mariko 12:30) Paulo akakanaya okwa mubiiri ng’oyu ow’erikolha n’omuthima wosi ng’obuhere. Ekinywe “obuhere” ekya Paulo akolesaya eki muli erikunga eribisamire. Omwa Mighambo ya Musa, Nyamuhanga iniakaghana obuhere obwabya kw’obulema. (Abalawi 22:18-20) Kuthya, obuhere obw’Omukristayo obw’obunyakirimu bwamabya ibutsandire omwa nzira ndebe, Nyamuhanga iniakendi ghanabo. Aliwe ibbwa, eki kyangasa kithi?

6, 7. Omukristayo anga tsandya athi omubiri wiwe, kandi ni byahi ebyanga lhwiririramu?

⁶ Paulo mwahabulha Abakrisitayo abe Roma athi: “Simuhe ebitsuku by’emibiri yenyu busana n’ebibi.” Kandi Paulo mwabwirabo athi ‘bithe emikolere y’omubiri.’ (Abanya Roma 6:12-14; 8:13) Omwa baruha yiwe mw’enyuma, abya iniabirithondogholha eby’erileberyako ‘eby’emikolere y’omubiri’ ng’ebi. Akakania okwa bandu b’ekibi, thukasoma thuthi: ‘Eribugha lyabu lyoswire n’erithakira.’ ‘Ebisando byabu bikanguha eryutha omusasi.’ ‘Sibethaminya eryubaha Nyamuhanga.’ * (Abanya Roma 3:13-18) Omukristayo angana tsandya omubiri wiwe amakolesya “ebitsuku” biwe by’omubiri omwa mibere ey’ekibi ng’eyi. Ng’eky’erileberyako, munabwire Omukristayo amalebya ebindu bibi ng’eby’obusingiri kutse eby’er’ithangana, iniakendibya ‘iniakaha ameso wiwe busana’ n’ekibi neryo iniatsandya omubiri wiwe wosi. Eriramya lyosi-lyosi eryo  angaha isiryendi thasyabya buhere obubuyirire kandi Nyamuhanga isyanga lirigha. (Eryibuka Ebihano 15:21; 1 Petero 1:14-16; 2 Petero 3:11) Eki ka kyangana leka obunya muthima-thima bw’omundu ibwaghalhwa kutsibu busana n’erisombolha eby’eriyitsemesya ebithuwene!

⁷ Kwesi, erithwamu ly’Omukristayo okwa by’eriyitsemesya ni mwatsi akalire. Busana n’ekyo, thwanzire ithwa sombolha eby’eriyitsemesya ebikendi uwania obuhere bwethu obwa thukaha Nyamuhanga butsira ebikendi butsandya. Lino, leka thukanaye ngoku thwanga minya eby’eriyitsemesya ebyuwene n’ebithuwene nga ni byahi.

8, 9. (a) Eby’eriyitsemesya byangana ghabwa mw’emiringo yahi ibiri? (b) Ni mulingo wahi ow’eby’eriyitsemesya owathukaghana, kandi busana naki?

⁸ Erithwalira haghuma, eby’eriyitsemesya byangana ghabwa mw’emiringo ibiri. Ow’erimbere mwamuli eby’eriyitsemesya eby’Abakrisitayo bakaghanira ighuma; n’owundi mwamuli eby’eriyitsemesya eby’Abakrisitayo bangana ligha kutse ibaghana. Thutsuke erilebya omulingo ow’erimbere​—eby’eriyitsemesya eby’Abakrisitayo bakaghana.

⁹ Ngoku thwalhangira omwa Sura 1, eyindi mibere ey’eby’eriyitsemesya yikakanganaya ebindu ebye Biblia yikatsweba ndeke-ndeke. Ng’eky’erileberyako, thalengekania okwa syondegheka esy’omuthahulha owe Intaneti n’esyofilimu, esyondegheka esy’etivi, n’esyonyimbo esikakanaya okwa bibi kutse eby’obukumu kutse omuli eby’obusingiri kutse ebikakulha-kulhanaya emyatsi y’esyonye n’ey’obutswatswa. Kundi emiringo mibi ng’eyi ey’eby’eriyitsemesya yikalhangirawa nga yuwene kandi nibya iyikathwa emisingyi kutse ebihano bye Biblia, Abakrisitayo ab’ekwenene batholere ibayihighulha kuyo. (Emibiri 15:28, 29; 1 Abanya Korinto 6:9, 10; Eribisulirwa 21:8) Erighana eby’eriyitsemesya ebithuwene ng’ebi, wukabya iwukakanganaya Yehova ngoku ‘wukakwa ekibi kyo nye’ kandi mughulhu wosi ngoku ‘wukabunukalha okwa kibi.’ Omwa nzira eyi, wukabya ‘n’erikirirya  ery’ekwenene.’​—Abanya Roma 12:9; Esyonyimbo 34:14; 1 Timoteo 1:5.

10. Ni malengekania wahi awa kabi awahambire okwa by’eriyitsemesya, kandi busana naki?

¹⁰ Aliriryo, abandi bangana yowa bathi erisangira omwa by’eriyitsemesya ebikakanganaya ndeke-ndeke eby’obutswatswa si kibi. Bakaghaniraya bathi, ‘Nangana birebya okwa filimu kutse okwa tivi, aliriryo isinanga bikolha.’ Amalengekania ng’aya ni mabi kandi ni w’akabi. (Soma Yeremia 17:9.) Kyamabya ikikathutsemesaya erilebya ebya Yehova akatsweba, kwenene obo ‘ithukanakwa ekibi kyo nye’? Thwamabera erilebya ebithuwene ithukendi tsandya amalengekania wethu. (Esyonyimbo 119:70; 1 Timoteo 4:1, 2) Ebindu ng’ebi byangana tsandya ebya thukakolha kutse ithwalhangira emikolere mibi ey’abandi nga yuwene.

11. Omwatsi owali omwa Abanya Galatia 6:7 abiribererera athi erikwamana n’eby’eriyitsemesya?

¹¹ Omwa kwenene, eki kyabiribya. Abandi Bakristayo babirikolha eby’obutswatswa busana n’eribera erilebya eby’eriyitsemesya ebithuwene. Ebitsibu eby’ababana mubyaleka ibakiminya ngoku ‘eky’omundu akahera ky’anemwendi syahulhulha.’ (Abanya Galatia 6:7) Aliriryo thwangana yihighulha okwa bitsibu ng’ebi ebyanga lhwiririramu. Wamabiba omwa malengekania wawu mw’ebindu ebyuwene, iwukendi tsema wukahulhulha ebyuwene.​—Lebaya akasanduko “ Ni by’Eriyitsemesya Byahi Ebyanga Tholere Ingasombolha?”

12. Abanya Galatia 6:5 hahambire hathi okwa by’eriyitsemesya, kandi ni busondoli bwahi obwa thuwithe obwanga thuwathikya omw’ithwamu lyethu?

¹² Lino thukanaye okwa mulingo owakabiri​—eby’eriyitsemesya ebikakanganaya ebindu ebithawithe erisako erikabighana kutse erikabisighika. Obuli Mukristayo atholere iniayithwiramu ekya akalhangira athi kitholere akasombolha eby’eriyitsemesya ng’ebi. (Soma Abanya Galatia 6:5.) Nomwabine, thunawithe obusondoli obwanga thuwathikya thukathwamu. E  Biblia yine mw’emisingyi eyikathuwathikaya eriminya ndeke amalengekania wa Yehova. Omw’ikwama-kwamania emisingyi ng’eyi, kikendi thuwathikya eriminya ‘ekya Yehova anzire ithwa kolha’ omwa myatsi yosi, imwamuli n’erisombolha eby’eriyitsemesya.​—Abanya Efeso 5:17.

13. Ni kyahi ekikendi thusukuma eriyihighulha okwa by’eriyitsemesya ebithe byanga tsemesya Yehova?

¹³ Ni kwenene, si bugha indi Abakrisitayo abosi bawithe obulengekania obusosene obw’eriyitheghererya emyatsi.  (Abanya Filipi 1:9) Aliriryo, banasi ngoku erikwamana n’eby’eriyitsemesya, obuli Mukristayo awithe ekya akanza. Busana n’ekyo, sithulengekanaye thuthi Abakrisitayo abosi bakendibya n’erithwamu erisosene. Nomwabine bithya, thwamongera erileka emisingyi ya Nyamuhanga yisondole amalengekania n’emithima yethu, ithukendi ongera erianza eriyihighulha okwa by’eriyitsemesya byosi-byosi ebithe byanga tsemesya Yehova.​—Esyonyimbo 119:11, 129; 1 Petero 2:16.

14. (a) Ni nzumwa yahi eya thutholere ithwa lengekaniako thukasombolha eby’eriyitsemesya? (b) Thwanga hira thuthi emyatsi y’Obwami y’embere omwa ngebe?

¹⁴ Wukasombolha eby’eriyitsemesya, hane eyindi nzumwa nkulhu ey’erilengekaniako: endambi. Nomwakine indi ebiri omwa by’eriyitsemesya byawu bikakanganaya ebya wukalhangira wuthi bitholere, endambi eya wukaghunza omwa by’eriyitsemesya ebi yikakanganaya ebya wukahira embere. Okwa Bakrisitayo, eby’obunyakirimu bya bakahira embere. (Soma Matayo 6:33.) Ibbwa kwesi, ni kyahi ekya wangakolha erilhangira wuthi emyatsi ey’Obwami ya yikabya embere omwa ngebe yawu? Omukwenda Paulo mwabugha athi: ‘Muyitheghaye ndeke, simusibe ng’abandu bakiru, nikwa ng’abandu b’amenge. Simulhabaye ebiro ebi bya buyira kusangwa omughulhu ono ni mubi.’ (Abanya Efeso 5:15, 16) Omwa kwenene, erihira h’obuthuku bulebe obw’eriyitsemeseryamu kikendi kuwathikya eribya n’obuthuku obukayithaghisibawa busana n’erikolha “ebibuya”​—emibiiri eyikendi kuwathikya eribya n’obunyakirimu obuwene.​—Abanya Filipi 1:10.

15. Busana naki ni ky’amenge erihira h’olhubibi olhw’erithutheya thukasombolha eby’eriyitsemesya?

¹⁵ Kandi ni ky’amenge erihira h’olhubibi olhwanga thutheya thukasombolha eby’eriyitsemesya. Ekyo kikamanyisayaki? Thuthasya lebaya eky’erileberyako eky’ekighuma. Eriyitheya okw’irya ahabbolire, siwuli sara ahabbolire hasa aliriryo wukasariranayamu n’ahatha bbolire. Kuthya, ni ky’amenge erihira h’olhubibi olhw’erikutheya wukasombolha eby’eriyitsemesya. Omukristayo ow’amenge syali yihighulha okw’eby’eriyitsemesya ebikathwa ndeke-ndeke emisingyi eye Biblia bisa aliriryo  akayihighulha n’okwa bikathika-thikirawa kutse ebyangabya nga biri mw’ebindu ebyanga tsandya obunyakirimu bwiwe. (Emisyo 4:25-27) Erikwama-kwamania ndeke Ekinywe kya Nyamuhanga kikendi kuwathikya erikolha ekyo.

16. (a) Thwanga kangania thuthi ngoku thuwithe amalengekania wa Yehova okwa myatsi ey’eby’esyongeso? (b) Erikolesya emisingyi eye Biblia kyangabya kithi kindu kya buli kiro omwa ngebe yawu?

¹⁶ Abakrisitayo ab’ekwenene bakabya bakasombolha eby’eriyitsemesya, bakatsuka erilebya Yehova nga withe amalengekaniaki. E Biblia yikabisulha eriyowa lya Yehova n’emisingyi yiwe. Ng’eky’erileberyako, Omwami Solomono akathondogholha emyatsi mingyi eya Yehova aponire, nga ‘olhulimi lhw’eribiha, n’ebyalha ebikutha omusasi owathe kw’olhubanza, omuthima owakayitheghekaya eriyikandayirira libi, ebisando ebyanguhire oko bibi.’ (Emisyo 6:16-19) Amalengekania wa Yehova atholere iniahamba athi okwa malengekania wawu? Omusakangyi w’Esyonyimbo mwahabulha athi, ‘Yehova anzire abakakwa ebibi by’obusu.’ (Esyonyimbo 97:10) Erithwamu lyawu okwa by’eriyitsemesya litholere irya kangania ngoku kwenene wukakwa obusu ebya Yehova akwire obusu. (Abanya Galatia 5:19-21) Kandi wibuke wuthi ebya wukakolha omwa bubiso-biso, bya bikakanganaya nga wuli mundu oyusosire athi kwilhaba ebya wukakolha kinyamwisi. (Esyonyimbo 11:4; 16:8) Busana n’ekyo, wamabya kwenene iwanzire erikangania ku wunawithe amalengekania wa Yehova awahambire okwa myatsi ey’esyongeso omwa mibere yawu yosi ey’engebe,  mughulhu wosi iwukendibya wukathwamu erikwamana n’emisingyi eye Biblia. Ikikendibya kindu kya buli kiro omwa ngebe yawu erikolha wuthya.​—2 Abanya Korinto 3:18.

17. Thuthe thwasombolha eby’eriyitsemesya, ni bibulyo byahi ebya thutholere ithwa yibulya?

¹⁷ Ni kindi kyahi ekya wangakolha erilhangira wuthi wukendi ghenda-ghendania n’amalengekania wa Yehova wukasombolha eby’eriyitsemesya? Ghaniraya okwa kibulyo kino, ‘Eki kikendi nyihambako kithi haghuma n’engolangana yaghe na Nyamuhanga?’ Ng’eky’erileberyako, wuthe wa ghunzerera nga wuna lebaye efilimu ndebe, yibulhaya, ‘Ebiri omwa filimu eyi bikendi hamba bithi okwa bunya muthima-thima bwaghe?’ Thulebaye nga ni misingyi yahi eyihambire okwa mwatsi oyu.

18, 19. (a) Omusingyi owali omwa Abanya Filipi 4:8 anga thuwathikya athi eriminya eriyitsemesya lyethu nga linuwene? (b) Ni yindi misingyi yahi eyanga kuwathikya erisombolha eby’eriyitsemesya ebyuwene? (Lebaya n’omwatsi ahikwa.)

¹⁸ Omusingyi mukulhu ali omwa Abanya Filipi 4:8, akabugha athi: ‘Musulhaye amalengekania wenyu mw’emyatsi mibuya n’eyanga pipwa. Emyatsi eyo y’eyi: eby’ekwenene, eby’erisikibwa, ebithunganene, ebibuyirire, ebyanganzwa, eby’erisimwa.’ Ni kwenene, Paulo sy’akanaya okwa by’eriyitsemesya, aliriryo abya akakania okw’ighanirya ly’omuthima, eritholere erihambana n’ebindu ebikatsemesaya Nyamuhanga. (Esyonyimbo 19:14) Aliwe ibbwa, ebinywe bya Paulo byangana kolesibwa omwa yindi nzira omw’omwatsi ow’eby’eriyitsemesya. Bithi?

¹⁹ Yibulhaye, ‘Esyofilimu n’esyovidiyo esyanga lebaya, esyonyimbo esyanga hulikirira, kutse eyindi mibere ey’eriyitsemesya bikanusulhaya omw’amalengekania waghe mw’emyatsi “eyibuyirire”?’ Ng’eky’erileberyako, wukabya wabirilebya efilimu, ni bindu ebisosire bithi ebikasighalha omwa malengekania wawu? Byamabya ibikatsemesaya, ibyuwene, kandi ibikahumulikanaya, neryo iwakiminya ngoku eriyitsemesya lyawu lilhue libuya. Aliriryo ibbwa, efilimu eya wulyalebaya yamaleka wukalengekania okwa bindu ebithuwene, neryo obo, eriyitsemesya lyawu isirilhue ryuwene, kandi iryangana kutsandya. (Matayo 12:33; Mariko 7:20-23) Busana naki? Kundi  erilengekania okwa bindu ebithuwene kikakughunza kw’obuholho, ikya huthalya obunya muthima-thima bwawu obukangiriribwe ne Biblia, kandi kyangana tsandya obughuma bwawu na Nyamuhanga. (Abanya Efeso 5:5; 1 Timoteo 1:5, 19) Kundi eriyitsemesya ng’eri lyangana kutsandya, wuthwemu eriyihighulha kulyo. * (Abanya Roma 12:2) Wubye ng’omusakangyi w’Esyonyimbo oyuwasaba Yehova athi: ‘Wunyikakiraye okw’ithendi hira ameso okwa bithawithe mughaso.’​—Esyonyimbo 119:37.

20, 21. 1 Abanya Korinto 10:23, 24 hakahamba hathi okw’isombolha eby’eriyitsemesya ebyuwene?

²⁰ Paulo mwahulha omusingyi mukulhu owali omwa Biblia owa wutholere iwalengekaniako wukathwamu okwa myatsi eyikuhambireko. Mwabugha athi: ‘Emyatsi yosi yangana kolhwa, nikwa emyatsi yosi siyiri ghasaki. Emyatsi yosi yangana kolhwa, nikwa emyatsi yosi siyiri himba. Omundu syasondaye endundi yiwe iyuwene-wene, nikwa asondaye endundi busana na mulikyabo.’ (1 Abanya Korinto 10:23, 24) Omusingyi oyu ahambire athi okw’isombolha eby’eriyitsemesya ebyuwene? Wutholere iwayibulya, ‘Eby’eriyitsemesya ebyanga sombolha bikendi hamba bithi okwa bandi?’

²¹ Obunya muthima-thima bwawu bwangana kulighira erisangira omwa by’eriyitsemesya birebe ebya wukalhangira nga byanga ‘kolhwa,’ kutse nga byuwene. Aliriryo, wamakiminya wuthi abandi bikirirya abawithe obunya muthima-thima obuthe balighira erisangira omwa by’eriyitsemesya ng’ebi, wangana thwamu erilekabyo. Busana naki? Kundi siwanzire ‘erikolha balikyenyu bo nabi’​—kutse ‘erikolha Kristo ya nabi,’ ngoku Paulo abugha​—omw’ireka ikya kalira abikirirya balikyenyu erilholha embere eribya bathaleghulha oku Nyamuhanga. Kwama-kwamanaya ekihano kino: ‘Si wuhire h’ekindu ekyanga thwikalya mulikyenyu.’ (1 Abanya Korinto 8:12; Abanya  Roma 14:13) Abakrisitayo ab’okwenene abamunabwire bakowa erikunga ly’olhwanzo erya Paulo omw’iyihighulha okwa by’eriyitsemesya ebyangana ‘kolhwa’ aliriryo isibyanga ‘himba.’​—Abanya Roma 14:1; 15:1.

22. Busana naki Abakrisitayo sibali hathikana abandi erighendera okwa malengekania wabu omwa myatsi ey’eriyithwiramu?

²² Aliriryo ibbwa, hane eyindi nzumwa ey’erisonderya mw’endundi busana n’abandi. Omukristayo oyuwithe obunya muthima-thima obukamukakiraya kutsibu syatholere akahathikana athi abosi abali omwa kithunga ky’Ekikrisitayo batholere ibaghendera okwa malengekania wiwe ngoku akalhangira eriyitsemesya eritholere nga ni ryahi. Amakolha athya, iniakendibya ng’oyukaghendaya ematoka oyukahathikana athi abandi abosi abakaghenderaya omwa nguda eyo batholere ibathibithya esyomatoka syabu ngoku akathibithaya eyiwe. Ekindu ng’eki si ky’amenge. Busana n’olhwanzo lhw’Ekikrisitayo, oyuwithe obunya muthima-thima obukamukakiraya atholere iniasikya abikirirya balikyabo abawithe amalengekania awali mbaghane okwa wiwe, aliriryo ibabya ibakine omwa lhubibi olhw’emisingyi y’Ekikrisitayo. Omwa nzira eyi, kikaleka ‘iniaminyikalya eriyibombeka liwe okwa bandu bosi.’​—Abanya Filipi 4:5; Omugambuli 7:16.

23. Ni kyahi ekya wanga kolha erilhangira wuthi wukasombolha eby’eriyitsemesya ebitholere?

²³ Omwa bikuhi, ni kyahi ekya wanga kolha erilhangira wuthi wukasombolha eby’eriyitsemesya ebitholere? Ghana eriyitsemesya lyosi-lyosi erikakanganaya ndeke-ndeke ebindu by’esyonye n’eby’obutswatswa eby’Ekinywe kya Nyamuhanga kikatsweba ndeke-ndeke. Kwama-kwamanaya emisingyi eyanga kolesibwa omwa by’eriyitsemesya muthina-muthina ebithakanibweko ndeke-ndeke omwa Biblia. Yihighule okwa by’eriyitsemesya ebikatsandaya obunya muthima-thima bwawu, kandi sikikukalire erileka eby’eriyitsemesya ebyanga leka abandi ibayowa nabi, kwilhabirirya abikirirya balikyethu. Kwesi erithwamu lyawu erighumire ery’erikolha ekyo lihe Nyamuhanga y’olhukengerwa n’erikubika, iwe n’eka yawu omo lhwanzo lhwa Nyamuhanga.