ENDOMEKO
Erisingura Omutse ow’Erinyighitha Ebitsuku by’Olhubuthu
Erinyighitha ebitsuku eby’olhubuthu nuku wangabya nga wamakolha emyatsi y’engyingo ni mutse owathetsemesaya Nyamuhanga, owakaleka omundu inianza eriyitsemesya iyuwene kandi akaleka inialengekania okwa bindu ebithisirire. Omundu oyuwithe omutse oyu angana tsuka erilhangira abandi bandu ng’ab’erikolha kw’emyatsi y’engyingo misa. Eki kikaleka emyatsi y’engyingo iyaghana erithasyabya busana n’olhwanzo, aliriryo iyabya busana n’eriyitsemesya aho n’aho n’eriyighunza mw’esyongumbu okwa ndambi eyo. Aliriryo eriyihumulikania eryo ni ry’akathambi kake. Omwa kwenene, omwakanya k’eritha esyongumbu sy’omubiri, imwamuli ‘erisingira, ebithisirire, engumbu nyibi,’ erinyighitha ebitsuku by’olhubuthu likongera esyongumbu esyo.—Abanya Kolosai 3:5.
Omukwenda Paulo mwahandika athi: ‘Abanze bethu, thuyitheghaye okwa bithisirire byosi eby’omubiri n’eby’ekirimu, kandi thusonde eribya babuyirire ndeke, n’erilendera omwa lhubahwa lhwa Nyamuhanga.’ (2 Abanya Korinto 7:1) Wamabya iwune mulengaho erighendera okwa binywe ebi, si wulhuhirire. Mughulhu wosi Yehova anayitheghekire ‘eribuyira’ n’eriwathikya. (Esyonyimbo 86:5; Luka 11:9-13) Omwa kwenene, obunya muthima-thima bwawu erikuhandikirira n’akaghalha akawukahiraho erileka omutse oyu kikakanganaya amalengekania awuwene, nomwakine indi okwa bundi buthuku wanganabya iwunemulemwa. Kandi wukiminye wuthi, ‘Nyamuhanga ni mukulhu, alengire emithima yethu kandi asi emyatsi yosi.’ (1 Yoane 3:20) Nyamuhanga syali thungerera ebibi byethu bisa aliriryo akathungerera omundu iyo wosi. Eriminya eri likaleka iniathuhulikirira omwa lhukeri thukamusaba ekighanyiro erilhua omwa muthima wethu. Busana n’ekyo, isiwalhuhirira erisaba Nyamuhanga, ng’omwana oyukaghenda eyiri thatha wiwe omughulhu ali omwa bitsibu. Yehova akendi kuha obunya muthima-thima obuwene. (Esyonyimbo 51:1-12, 17; Isaya 1:18) Nomwabine bithya, wutholere iwayira ekya wukakolha erikwamana n’emisabe yawu. Ng’eky’erileberyako, iwukendi lengaho kutsibu eriyihighulha okw’ilebya kutse erihulikirira eby’obutswatswa ebyosi haghuma n’abanywani babi. *
Ekitsibu kyawu eky’erinyighitha ebitsuku by’olhubuthu kyama lholha embere, kisi lhangira wuthi wukakanaya n’omubuthi Omukristayo kutse mulikyenyu oyukulire bunyakirimu kutse omunywani wawu ow’okwa muthima. *—Emisyo 1:8, 9; 1 Abanya Tesalonika 5:14; Tito 2:3-5.
^ enu. 2 Amaka mangyi erithoka eriyitheya okw’ikolesya ekombyuta yanabi, akasonderaya ekombyuta y’omwanya owangaleka abandu bosi ab’omw’eka ibathoka eribya ibana lhangireyo. Eryongera okw’ekyo, awandi maka akahira omwa kombyuta mw’eprogramu eyikakakiraya emyatsi eyithatholere okwa Intaneti. Nomwabine, sihali endegheka eyanga yiketherwa kundu.
^ enu. 1 Erithoka eribana amalengekania awuwene awahambire okw’isingura omutse ow’erinyighitha ebitsuku eby’olhubuthu, lebaya omwatsi “Eminyethu Yikabulhaya . . . Nanga Singura Nyithi Omutse Oyu?” owali omwa Awake! eya Novemba 2006, n’ekitabu Questions Young People Ask—Answers That Work, Volume 1, olhupapura 178-182.
