Sitani akanza wukole obukumu. Abangi bakahongera abathatha-kulhu babo kutse abalimu eribatheya okwa kabi. Bakakolha eki kusangwa bakasagha akaghalha k’emirimu. Bakambalha esyambeta kutse obubangili obw’obulhaghu. Bakanywa kutse ibasaka emibiri yabo “y’omubatsi” owa bakalengekanirayamo ambu awithe akaghalha ak’obulhaghu. Abandi bandu omwa manyumba abo kutse omwa bibanza byabu, bakabisa mw’ebindu ebya bakalengekanirayamo eribya n’obuthoki obukabateghaya. Abandi bakakolesaya “omubatsi” ow’ebisambu kundi bakalengekanaya bathi kyangaleka ibathoka omwa by’obusubure, ebighezyo by’esukuru, kutse bakathetha.

Eriyirinda Sitani erisingireyo ly’eriyihambya Yehova nga munywani wawu. Yehova Nyamuhanga n’abamalaika biwe babawithe akaghalha kanene kwilhaba Sitani n’esyombinga siwe. (Yakobo 2:19; Eribisulirwa 12:9) Yehova anayitheghekire erikangania akaghalha kiwe busana n’abanywani biwe—abo abayihambiryeyo ndeke-ndeke.​—2 Emyatsi y’Emigulu 16:9.

Ekinywe kya Nyamuhanga kikabugha: ‘Isiwalhaghulha.’ Yehova aponire obulhaghuli n’obulhoyi kusangwa ebikorwa ebyo byangana hira omundu yahisi sy’akaghalha ka Sitani Diabolo.​—Abalawi 19:26.