Enzighu enkulhu ya Nyamuhanga ni Sitani Diabolo. Iyo ni kihangikwa eky’ekirimu oyo wayisamambulha oku Yehova. Sitani akina lholha emuliro akalhwa na Yehova kandi akalyambaya abandu ba kutsibu. Sitani ni mubi. Iyo ni mubehi kandi ni mwithi.​—Yoane 8:44.

Ebindi Ebihangikwa eby’ekirimu mubyayitherana na Sitani omw’iyisamambulha liwe oku Nyamuhanga. E Biblia yikabahulha mw’esyombinga. Nga Sitani, esyombinga ni nzighu sy’abandu. Syanzire eriaghalya abandu. (Matayo 9:32, 33; 12:22) Yehova akendi syathoghothya Sitani n’esyombinga siwe. Bawithe kathambi kake kutsibu aka sighereyo eribya bakina lyambaya abandu.​—Eribisulirwa 12:12.

Wamabya iwunanzire eribya munywani wa Nyamuhanga, anguli isiwakolha ebya Sitani yanzire wukole. Sitani n’esyombinga baponire Yehova. Ni nzighu sya Nyamuhanga, kandi banzire erikuyira mwa nzighu ya Nyamuhanga. Wutholere iwasombolha nga wanzire eritsemesya ndi—Sitani kutse Yehova. Wamabya wanzire engebe ey’erikotha, anguli iwasombolha erikolha erisonda lya Nyamuhanga. Sitani awithe hithegho hingi kandi n’esyanzira esy’erithebera mw’abandu. Abandu bangi bakathebawa nayu.​—Eribisulirwa 12:9.