Sitani n’esyombinga siwe sibanzire wukakolera Nyamuhanga. Bakanza erilhusya buli mundu yoku Nyamuhanga balyathoka. Kino bakakikolha bathi? Enzira enguma ly’erilhabira omwa dini ey’amabehi. (2 Abanya Korinto 11:13-15) Edini yikabya y’amabehi yamathendi kangirirya ekwenene eyikalhwa omwa Biblia. Edini ey’amabehi yiri ng’esyambulho esy’ebikwangara—syangana lhangirika ng’esy’ekwenene aliriryo isi siwithe mubongo. Syangana kulethera bitsibu binene.

Amabehi aw’edini syangatsemesya Yehova, Nyamuhanga ow’ekwenene. Omughulhu Yesu abya okwa kihugho, habya ekithunga eky’edini ekyabya kyanzire erimwitha. Ibakalengekanaya bathi emiramirya yabo yayihikire. Mubabugha: ‘Thuwithe Thatha, mughuma, ni Nyamuhanga.’ Yesu mwan’ikirirya? Eyihi! Mwababwira: ‘Inywe muli bana ba thatha wenyu Sitani.’ (Yoane 8:41, 44) Munabwire abandu bangi bakalengekanaya bathi bane muramya Nyamuhanga, aliriryo omwa kwenene bakakolera Sitani n’esyombinga siwe!​—1 Abanya Korinto 10:20.

 Ng’omuthi mubi kw’akabyako ebighuma bibi, edini ey’amabehi yikabyamu abandu abakakolha ebindu bibi. E kihugho ky’oswire mw’omulyambo busana n’ebindu bibi abandu bakakolha. Muli obusingiri, amalhwa, obwibi, eriaghalya abandi, obwithi, n’erihamba abakali. Abangi abakakolha ebibi ebi banawithe amadini, aliriryo amadini abo syali basukuma erikolha ebyuwene. Sibangabya banywani ba Nyamuhanga erilhusyako ibanalya lekeraho erikolha ebindu bibi.​—Matayo 7:17, 18.

Edini ey’amabehi yika kangiriraya abandu b’eriramya ebisasani. Nyamuhanga akathanga eriramya ebisasani. Kino nikya menge. Wangana kyanza omundu inyaghana erikania nawu aliriryo inyakania n’ekisasani kyawu? Omundu oyo anganabya inina munywani wawu kundu? Eyihi, syangabya. Yehova anzire abandu ibakania nayu, butsira n’ekya hesawa kutse e kisasani, ekithawithe ngebe.​—Eriluayo 20:4, 5.

Edini ey’amabehi yikakangiriraya yithi eritha abandi sikibi omughulhu ow’olhuhi. Yesu mwabugha athi banywani ba Nyamuhanga bangabere n’olhwanzo omwa kathi-kathi kabo. Sithwang’itha abandu aba thwanzire. (Yoane 13:35) Kandi nibya nikibi ithwe eritha abandu babi. Omughulhu esyanzighu sya Yesu syasa muhamba, mwath’ikirirya abigha biwe erilhwa busana n’erimutheya.​—Matayo 26:51, 52.

Edini ey’amabehi yika kangiriraya yithi ababi basya ghalibwa omwa muliro ow’ekulimu. Aliriryo, e Biblia yika kangiriraya yithi ebibi bikakolhaya okwa lhuholho. (Abanya Roma 6:23) Yehova ni Nyamuhanga ow’olhwanzo. Nyamuhanga ow’olhwanzo angan’aghalya abandu emighulhu n’emighulhu? Ni kwenene eyihi! Omwa Paradiso, mwasyabya dini nguma nyisa, eya Yehova akasima. (Eribisulirwa 15:4) Esya dini esyosi esy’eghemere okw’amabehi a Sitani syasyahwaho.