Erikolha obunywani kikayithaghisaya akaghalha; obunywani erighuma kikayithaghisaya akaghalha. Akaghalha akawukahiraho erianza erikalha iwune munywani wa Nyamuhanga ikakendi tsumulhwa kutsibu. Yesu mwabugha n’ababya bakamw’ikiriryamo: “Ekwenene yasyabayira mw’ab’obwiranda.” (Yoane 8:32, NW) Ekyo kikamanyisaya ki?

Wanganabana obwiranda lino. Wanganabya bwiranda erilhwa okwa syangangirirya esy’amabehi n’amabehi awabiritsatsangwa na Sitani. Wanganabya bwiranda okwa buthabya na maha okuswire omwa ngebe esy’obukekulhu obw’abandu abathasi Yehova. (Abanya Roma 8:22) Abanywani ba Nyamuhanga nibya bakabya bwiranda “okw’isagha olhuholho.”​—Abaebrania 2:14, 15, NW.

Wanganabana obwiranda omwa kihugho kya Nyamuhanga ekihya-kihya. Ni bwiranda bwa butseme bungahi obwa wangatsemera emighulhu eyikasa! Omwa kihugho ekye Paradiso, mwasyabya obwiranda okwa nyuhi, esyandwalha, n’okwithwa ebihano. Obwiranda erilhwa okwa busama n’enzalha. Obwiranda okw’ikekelhuha n’olhuholho. Obwiranda erilhwa okwa buba, eriaghalibwa, n’obuthe bulingirirania. E Biblia yikabugha yithya oku Nyamuhanga:  “Wukasanzulha ebyalha byaghu kandi iwughuthya obwagha obwa buli kihangikwa kyosi ekikahumulha.”​—Esyonyimbo 145:16, NW.

Abanywani ba Nyamuhanga basya thulhaho kera na kera. Engebe y’erikotha ni kihembo kibuya ekya Nyamuhanga asyaha abosi abakarondekanaya obunywani nayu. (Abanya Roma 6:23) Thalengekanaya engebe eyithabahwa ngayangamanyisyaki okwiwe!

Wasyabya n’endambi ey’erikolha bindu bingi. Obundi wuli aho wanganzire er’igha eriwatha ekyuma eky’omuziki. Kutse obundi wanganza er’igha erihaka erangi yokwa bisasani kutse n’eribya mubatsi. Wangan’anza er’igha okwa bisoro kutse ebithi. N’obundi wuli aho iwang’anza erighenda eriyalebya ebindi bihugho n’abandu. Eribya n’engebe y’erikotha kyasyaleka iwa berererya ebyosi ebi!

Wasyabya n’endambi ey’erinywana n’abangi. Eribyaho kera na kera kyasyaleka iwaminya abandi ababiribya banywani ba Nyamuhanga. Wukendi syaminya esya talanta syabo n’emibere yabo mibuya, kandi nabo basyabya banywani baghu. Wasya banza, kandi nabo basya kwanza. (1 Abanya Korinto 13:8) Eribya n’engebe eyithabahwa kyasya kuha endambi ey’erinywana buli mundu okwa kihugho! N’ekisingire ebyosi, obunywani bwaghu na Yehova bwasyongera eribya ibuna mukulha ebighonye bikaghenda bikalhaba. Ka wubye no munywani wa Nyamuhanga kera na kera!