E paradiso siyendisyabya ng’ekihugho ekya thwikeremo hathya. Nyamuhanga syabya anzire ekihugho kikusulha mw’omulyambo n’obulighe, eriaghalhwa n’erisindoghera. Omughulhu owakasa, Nyamuhanga akendi syakolha ekihugho mwa paradiso. E Paradiso yasyasosa yithi? Thulebaye e Biblia nga yikabugha yithiki:

Abandu abuwene. E paradiso yasyabya eka y’abanywani ba Nyamuhanga. Basyakolera balikyabo b’ebibuya. Basyalenderera omwa syanzira sya Nyamuhanga esy’obuthunganene.​—Emisyo 2:21.

Ebyalya bingi. Omwa Paradiso, simwendisyabya nzalha. E Biblia yikabugha yithi: ‘Hasyabya ebyalya bingi omwa kihugho.’​—Esyonyimbo 72:16.

Amanyumba awuwene n’emibiiri eyikatsemesaya. Okwa kihugho ekye Paradiso, obuli ihiika lyasyabya n’eka eyalyo ahabwalyo. Obuli mundu asyakolha omubiiri owakaletha obutseme obw’ekwenene.​—Isaya 65:21-23.

 Obuholho okwa kihugho kyosi. Abandu sibendi syasya lhwa n’eriholera omwa nyuhi. Ekinywe kya Nyamuhanga kikabugha: “[Nyamuhanga] akakubaya esyanyuhi.”​—Esyonyimbo 46:8, 9, NW.

Engebe eyuwene. E Biblia yikalhaghanisaya: “Sihali ndulhani [omwa Paradiso] eyasyabugha yithi: Nyilhwere.” (Isaya 33:24) Kandi, sihali oyo wasyabya mulema kutse ndimethime kutse omutsiha kutse oyuthe thoka eribugha.​—Isaya 35:5, 6. 

Eriaghalhwa, erisusumana, n’olhuholho byasyahwa. Ekinywe kya Nyamuhanga ki kabugha kithi: ‘Olhuholho silhwendisyaswabyaho, kutse erisusumana, kutse eririra kutse eriaghalhwa. Eby’erimbere byabirirenga.’​—Eribisulirwa 21:4.

Abandu babi basyahwaho. Yehova akalhaghanisaya: ‘Ababi basyithirwa ehali erilhwa omwa kihugho; n’abaghobya basy’imurwa mukyo.’​—Emisyo 2:22.

Abandu basy’anzana n’erisikyangania. Sihendisyaswabya obuthe bulingirirania, erinubya, omururu, kandi n’eriponangana. Abandu basyayitherana haghuma kandi n’er’ikalha ibanamughendera omwa syanzira sya Nyamuhanga esy’obuthunganene.​—Isaya 26:9.