Wamabya wanzire eribya munywani wa Nyamuhanga, wutholere iwa kwama-kwamania edini ey’anzire. Yesu mwabugha athi “abaramya ab’ekwenene” bangaramirye Nyamuhanga y’omwa “kwenene.” (Yoane 4:23, 24) Hali nzira nguma nyisa eyihikire eriramirya mwa Nyamuhanga. (Abanya Efeso 4:4-6) Edini ey’ekwenene yikakolhaya okwa ngebe y’erikotha, kandi edini ey’amabehi yikakolhaya okw’iherya.​—Matayo 7:13, 14.

Wangana minyerera edini ey’ekwenene wama yitheghererya abandu abakakwama yo. Kusangwa Yehova ni mubuya, abaramya biwe ab’ekwenene batholere ibabya bandu babuya. Kine ng’omuthi ow’omutsungwe omubuya akabyako emitsungwe eyuwene, edini ey’ekwenene yikabyamu abandu abuwene.​—Matayo 7:15-20.

Abanywani ba Yehova bakasikaya e Biblia ya kutsibu. Basi bathi e Biblia yalhwa eyiri Nyamuhanga. Bakikiriraya ebya yikabugha erisondolha esya ngebe syabo, erighunza ebitsibu byabu, kandi n’eribawathikya er’igha oku Nyamuhanga. (2 Timoteo 3:16) Bakalengesaya erikolesya ebya bakakangiriraya.

Banywani ba Yehova bak’anzangana. Yesu mwakangania abandu b’olhwanzo aka bakangirirya  oku Nyamuhanga, aka lhamya abalhwere. Abo abakakwama edini ey’ekwenene nabo bakakanganaya olhwanzo eyiri abandi. Nga Yesu, sibalighaya abatheyithoka kutse abandu abakalhua omwa bindi bihanda. Yesu mwabugha athi abandu bangaminyerere abigha biwe ahabw’olhwanzo olhwa bakakanganaya omwa kathi-kathi kabo.​—Yoane 13:35.

Abanywani ba Nyamuhanga bakasikaya erina liwe, Yehova. Omundu amaghana erikolesya erina lyawu, omundu oyo anganabya inina munywani wawu ow’okwandungu? Eyihi! Thwamabya thuwithe omunywani, thukakolesaya erina liwe kandi thukakanaya ebibuya okwa munywani oyo eyiri abandi. Neryo abo abanzire eribya banywani ba Nyamuhanga batholere ibakolesya erina liwe n’erimukaniako eyiri abandi. Yehova akanza thukole thuthya.​—Matayo 6:9; Abanya Roma 10:13, 14.

Nga Yesu, banywani ba Nyamuhanga bakakangiriraya abandu b’okwa Bwami bwa Nyamuhanga. Obwami bwa Nyamuhanga ni buthabali bw’elhubulha obukendi syakolha ekihugho mwa paradiso. Abanywani ba Nyamuhanga bakathulira abandi b’engulhu yuwene eyi ey’Obwami bwiwe.​—Matayo 24:14.

Abema ba Yehova bakalengesaya eribya banywani ba Nyamuhanga. Bakasikaya e Biblia kandi bawithe olhwanzo omwa kathi-kathi kabo. Kandi bakakolesaya n’erisikya erina lya Nyamuhanga n’erikangirirya abandi bokwa Bwami bwa Nyamuhanga. Abema ba Yehova bakakwama-kwamanaya edini ey’ekwenene okwa kihugho munabwire.