Obunywani buseghemere okwa lhwanzo. Eya wuk’ighira bingi oku Yehova, ya lhwanzo lhwawu busana nayu lhuka kanyirira. Olhwanzo wuwithe oku Nyamuhanga lhukabya lhukakulha, n’eriyisunza lyaghu ery’erimukolera nalyo likakulha. Kino ikikendi kusukuma eribya mwigha wa Yesu Kristo. (Matayo 28:19) Wamayitherania n’erihiika eritsemire ery’Abema ba Yehova, iwanganabya munywani wa Nyamuhanga emighulhu yosi. Wutholere iwa kolha ki?

Wutholere erikangania Nyamuhanga y’olhwanzo lhwaghu wukasikya ebihano biwe. ‘Kusangwa eryanza Nyamuhanga ni kwama ebihano biwe kandi ebihano biwe si muheke.’​—1 Yoane 5:3.

Kolesaya ebya wuk’igha. Yesu mwathulha olhughano olhukakanganaya kino. Omulhume ow’amenge mwahimba enyumba yiwe y’okwa lhukuka. Omulhume mukiru mwahimba enyumba yiwe y’okwa museghe. Enzotho yabere yasa, enyumba eyabya yihimbire okwa lhukuka mwayithathera, aliriryo enyumba eyabya yihimbire okwa museghe muyathera n’erithera linene. Yesu mwabugha athi abakowa erikangirirya liwe n’erikolha lyo, bingene n’omulhume ow’amenge oyowahimba okwa lhukuka. Aliriryo abo abakowa erikangirirya liwe bakathendi kolha lyo bingene n’omulhume mukiru oyo  wahimba okwa museghe. Wanzire eribya nga mulhume wahi?​—Matayo 7:24-27.

Eriyihayo. Kino kikamanyisaya erighendera Yehova y’omwa musabe kandi iwamubwira wuthi wanzire erikolha erisonda liwe omughulhu wosi. Erikolha erisonda lya Nyamuhanga ikikendi kakangania indi wuli mwigha wa Yesu Kristo.​—Matayo 11:29.

Olhubatizo. ‘Batizibawa kandi wulhakira erina liwe, ebibi byawu byeribawe.’​—Emibiri 22:16.

Yingiriraye ighuma omw’ikolera Nyamuhanga. “Ebyosi mukakolha, mukole n’omuthima ow’omuhwa, ngamukakolera Yehova, butsira abandu.”​—Abanya Kolosai 3:23, NW.