Ebindu bibi ebikabanika okwa kihugho hathya bika kanganaya indi e Paradiso yiri hakuhi. E Biblia muyabugha yithi e Paradiso yangabere yikisiya iyahika, thwangalhangire emighulhu ey’akabi. Lino thuli omwa mughulhu owali ngoyo! Bino bya bighuma okwa ebye Biblia yabugha yithi byangabereho:

Esyanyuhi nene-nene. ‘Erihanga lyasyalhwa n’erindi ihanga n’obwami bwasyalhwa n’obundi bwami.’ (Matayo 24:7) Obuminyereri obu bwamabiri bererera. Erilhwa omwa mwaka 1914, hamabirithabya esyanyuhi ibiri esy’ekihugho kyosi kandi n’esyanyuhi nyike-nyike. Obukekulhu obw’abandu bwabiri holera musyo.

Erikanyirira ery’amalhwere. Hangabere ‘amalhwere ehosi-hosi.’ (Luka 21:11) Eki kyana biri bererera? Inga. E kasa, endwalha ey’omuthima, akakuba, omutsutsa, akabonde, nawandi malhwere abir’itha obukekulhu obw’abandu.

Eribulha ery’ebyalya. Erilhaba omwa kihugho kyosi yiri abandu abathawithe ebyalya ebikaghunza. Obukekulhu obw’abandu bakaholha busana n’enzalha buli kirimo. Aka nikandi kaminyikalho aka kakanganaya indi lhuba e Paradiso yikisiya iyasa. E Biblia yikabugha: ‘Hasyabya esyo nzalha.’​—Mariko 13:8.

 Emisiki. “Hasyabya . . . emisiki ehandi n’ehandi.” (Matayo 24:7) Nakino kyamabiri bererera omwa mughulhu wethu. Abandu abalhabire omwa kakekulhu babiriholera omwa misiki erilhwa 1914.

Abandu babi. Abandu ‘banganzire esya mbulho’ kandi “ibayanza.” Bangabere ‘abanzire eriyitsemesya kwilhaba erianza Nyamuhanga.’ Abana bangabere ‘abathyowa ababuthi babo.’ (2 Timoteo 3:1-5) Siwul’ikiriraya indi haneho abandu bangi abali ngabo munabwire? Sibalisikaya Nyamuhanga, kandi bakalyambaya abo abakalengesaya er’igha oku Nyamuhanga.

Erithwa ebihano. Kandi nibya hangabere “erikanyirira ely’erithwa ebihano.” (Matayo 24:12, NW) Obundi wangan’ikirirya indi erithwa ebihano lilhabirirye kwilhaba ebirimo ebihwere. Abandu ehosi-hosi bali omwa kabi akerinyewa, obulibathangania, kutse n’erihuthalibwa.

Ebyosi ebi bikakanganaya indi Obwami bwa Nyamuhanga buli hakuhi. E Biblia yikabugha: ‘Nenyu mwasyabya mwalhangira ebindu ebi bikabya, imwaminya indi obwami bwa Nyamuhanga buli hakuhi.’ (Luka 21:31) Obwami bwa Nyamuhanga niki? Bw’obuthabali bwa Nyamuhanga obuli e lhubulha obukendi syaletha e Paradiso y’okwa kihugho kino. Obwami bwa Nyamuhanga bwasyasuba omwa mwanya w’amathabali w’abandu.​—Danieli 2:44.