Eribya munywani wa Nyamuhanga, wutholere erimw’igha ku. Banywani baghu banasi erina lyaghu kandi bakana likolesaya? Bakalikolesaya. Na Nyamuhanga anzire wuminye kandi wukolesaye erina liwe. Erina lya Nyamuhanga ya Yehova. (Esyonyimbo 83:18; Matayo 6:9, NW) Wutholere n’eriminya eby’anzire n’ebyathanzire. Wuthore iwaminya banywani biwe nganibahi kandi n’esyanzighu siwe nga nisyahi. Kikathwalha buthuku eriminya owundi mundu. E Biblia yikabugha yithi ni ky’amenge erihiraho endambi eyer’igha oku Yehova.​—Abanya Efeso 5:15, 16.

Abanywani ba Nyamuhanga bakakolha ebikamutsemesaya. Thalengekania oku banywani baghu. Wamabathwalha nabi kandi wukakolha ebindu ebyabaponire, ibane mwendilholya emuliro ibakine banywani baghu? Omwa kwenene eyihi! Omwa nzira yen’enguma, wamanza eribya munywani wa Nyamuhanga, wutholere erikolha ebikamutsemesaya.​—Yoane 4:24.

Si madini wosi indi angakolhya okwa bunywani na Nyamuhanga. Yesu, iyo nga munywani wa Nyamuhanga oyumuli hakuhi, mwakania oku nzira ibiri. Enzira ey’erimbere ni nene kandi yoswire mw’abandu. Eyo ni nzira eyikakolhaya okw’ihera. Eyindi nzira ni nge kandi yiwithe bandu bake. Eyo ni nzira eyikakolhaya okwa ngebe y’erikotha. Eki kikamanyisaya kithi wamabya wanzire eribya n’obunywani na Nyamuhanga, wutholere iw’igha enzira eyihikire eyeri muramiryamu.​—Matayo 7:13, 14.