Okw’abo abanzire Yehova n’Ekinywe kiwe, e Biblia:

Yesu mwabugha athi, ‘wasyaminya ekwenene, n’omwatsi w’ekwenene asyakuha obwiranda.’ (Yoane 8:32) Thalengekania ngoku wabya wayowire wukatsuka eribana ekwenene erilhua omwa Biblia! Mukyatsemesya kutsibu eriminya ngoku omwa kihugho ekyoswire mw’amabehi, thwangana minya ekwenene.​—2 Timoteo 3:1.

Yehova Nyamuhanga anzire ithwaminya ekwenene. Neryo kundi thwanzire abandu, thwanzire ithwa babwira oko kwenene eyo. Aliwe erikolera Nyamuhanga muli binene. Thutholere ithwalengaho eribya omwa ngebe y’Ekikrisitayo kundi thusikirye kutsibu emisingyi ya Yehova. Yesu mwasoborera enzira ngulhu eya thwanga kanganiryamu ngoku thwanzire Nyamuhanga. Mwabugha athi: “Mwamakenga ebihano byaghe, mwasy’ikalha omo lhwanzo lhwaghe, ngoku naghe nabirikenga ebihano bya Thatha waghe, neryo nyikere omo lhwanzo lhwiwe.”​—Yoane 15:10.

Omo kwenene Yesu anzire Thatha wiwe, kandi akakolha obuli kindu ekya Thatha wiwe akamubwira athi akole. Thwamagherererya Yesu omwa mibere y’engebe yethu, Yehova iniakendi thwanza kandi ithwatsema. Ngoku Yesu anabugha, “Mwamaminya emyatsi eyi, muli n’obutseme mwamakolhayo.”​—Yoane 13:17.

Thuwithe amaha thuthi ekitabu kino kikendi kuwathikya erigha erighendera oko kwenene eyiri omwa Biblia n’eribya munywani wa Nyamuhanga. Ni saba lyethu thuthi wukendyongera erianza Nyamuhanga n’erisighalha “omo lhwanzo lhwa Nyamuhanga . . . erikaletha engebe y’erikotha.”​—Yuda 21.