1, 2. Ni byahi ebya thutholere ithwaminya oku Sitani n’esyombinga siwe?

ENGEBE omwa kihugho kihya-kihya kya Yehova yikendi syuwana. Erighunzerera thukendi syabya omwa ngebe eyo Nyamuhanga aby’athutheghekere. Aliwe lino, thuli omwa kihugho ekiri omwa buthoki bwa Sitani n’esyombinga siwe. (2 Abanya Korinto 4:4) Nomwakine indi sithwanga balhangira, baneho kandi bawithe amaaka manene.

² Omwa sura eno, thukendi lhangira ngoku thwanga sighalha hakuhi na Yehova n’eriyitheya oku Sitani. Yehova akayilhagha erithuwathikya. Aliwe thutholere ithwaminya esyonzira esyo Sitani n’esyombinga bakakolesaya erithuthebya n’erithurwanisya.

3. Sitani akanza athukole athi?

³ Sitani akabugha athi abandu bakaramaya Yehova busana n’eby’akabakolera kandi athi emyatsi yamabakalira ibakendi leka erimukolera. (Soma Yobu 2:4, 5.) Omundu akabya akakangania ngoku anzire erigha oku Yehova, Sitani n’esyombinga siwe bakaminya, neryo ibalengesya erimukakirya. Bakahithana omundu akayihayo oku Yehova n’eribatizibwa. E Biblia yithi Sitani ali “ng’endale eyikaruruma, n’erisonda-sonda oyo yangalya.” (1 Petero  5:8) Sitani anzire eritsandya obughuma bwethu na Yehova.​—Esyonyimbo 7:1, 2; 2 Timoteo 3:12.

4, 5. (a) Ni kyahi ekya Sitani athe angakolha? (b) Kikamanyisayaki ‘erilhwa na Sitani’?

⁴ Aliwe sithutholere thukasagha Sitani n’esyombinga siwe. Yehova abirikehya amaaka wabu. Yehova akalhaghanisaya athi “endeko nene” y’Abakristayo b’okwenene yikendi syalhama okwa “bulighe bunene.” (Eribisulirwa 7:9, 14) Sihali ekya Sitani angakolha erikakirya ekyo eribya, kundi Yehova anemutheya abandu Biwe.

 ⁵ Thwamasighalha ithune bughuma na Yehova, Sitani syangathwa obughuma obo. Ekinywe kya Nyamuhanga kikathukakasaya kithi: “Omwami Mukulhu ali haghuma nenyu, mwamamusonda-sonda.” (2 Emyatsi y’Emigulu 15:2; soma 1 Abanya Korinto 10:13.) Abalhume n’abakali bangyi abatheleghulha nga Abeli, Enoka, Noa, Sara, na Musa mubarwanisya Sitani omw’isighalha ibane bughuma na Yehova. (Abaebrania 11:4-40) Nethu thwangana kolha ekyo. Ekinywe kya Nyamuhanga kikalhaghanisaya kithi: “Mulhwe na Sitani, nayu akendisya basagha.”​—Yakobo 4:7.

6. Sitani akalhwa nethu athi?

⁶ Nomwakine indi Sitani anasi ngoku Yehova abirimukakirya okwa bindi eby’angathukolhako, akendi lengaho erikolha ekyosi-kyosi eky’angathoka eritsekya obughuma bwethu na Nyamuhanga. Munabwire, Sitani akalhwa nethu omwa syonzira nyingyi, kandi akakolesaya esyonzira esy’anabirikolesya habw’esyongumi sy’emyaka. Esyonguma sy’okwa syonzira esi ni syahi?

7. Busana naki Sitani akalhwa n’abandu ba Yehova?

⁷ Omukwenda Yoane mwahandika athi: “Ekihugho kyosi kiri omo buthoki bw’Omubi.” (1 Yoane 5:19) Ekihugho kibi kino kiri omwa buthegheki bwa Sitani kandi anzire iniathegheka n’abandu ba Yehova. (Mika 4:1; Yoane 15:19; Eribisulirwa 12:12, 17) Diabolo anasi kw’awithe kathambi kake buyira, neryo ak’ongera erithukalirya emyatsi nuku thwanga leghulha oku Nyamuhanga. Hakanayira Sitani inialhwa nethu kinyamwisi, n’okwa bundi buthuku iniakolesya ebithegho by’obubiso-biso.

8. Ni kyahi ekya buli Mukristayo atholere iniaminya?

⁸ Abanya Efeso 6:12 hakathubwira ebinywe bino:  “Thukalhwa . . . n’emilhondo y’ebirimu by’ebibi ebiri omo kyanya.” Obuli Mukristayo akalhwa na Sitani n’esyombinga siwe ahabwiwe. Thutholere ithwaminya ngoku abosi abakayihayo oku Yehova bane omo malhwa aya. Omwa baruha eyo ahandikira Abanya Efeso, omukwenda Paulo mwabwira Abakristayo ngendu isathu athi “muhangane, musike.”​—Abanya Efeso 6:11, 13, 14.

9. Ni kyahi ekya Sitani n’esyombinga bakalengaho erithukolhako?

⁹ Sitani n’esyombinga bakalengaho erithutheba omwa nzira nyingyi. Neryo kundi muthwanathoka erirwanisya Sitani omwa nzira ndebe sikirimanyisaya kithi syanga thusingura omwa yindi. Diabolo akalengaho kutsibu eriminya obutseke bwethu nuku angabana ekithegho eky’erikolesya. Aliwe sithutholere thukahambwa, kundi e Biblia yikathubwira ebithegho bya Sitani. (2 Abanya Korinto 2:11; lebaya Endomeko 31.) Ekighuma kya kubyo by’eby’emirimu-limu.

10. (a) Eby’emirimu-limu niki? (b) Yehova akalhangira athi eby’emirimu-limu?

¹⁰ Eby’emirimu-limu mwamuli ebindu ebikabya nga biwithe amaaka awathe w’obuli kiro ebikaleka omundu iniakolongana n’esyombinga, ng’obulhaghu, obulhoyi, obukumu, obusaki, n’erianza erikanirania n’abaholi. E Biblia yikathubwira yithi eby’emirimu-limu ni “nye” kandi yithi sithwanga sangira mubyo kandi okwa buthuku bughumerera ithwaramya na Yehova. (Eryibuka Ebihano 18:10-12; Eribisulirwa 21:8) Abakristayo batholere ibayihighulira ighuma okwa miringo yosi y’olhulimu-limu.​—Abanya Roma 12:9.

11. Erianza eriminya okwa by’amaaka awathe w’obuli kiro kyangana thukolya okuki?

 ¹¹ Sitani anasi ngoku thwamanzisibwa n’ebikabya nga biwithe amaaka awathe w’obuli kiro, ikikendi mw’olhobera erithwingirya omwa by’emirimu-limu. Ekyosi-kyosi ekiri mw’eby’olhulimu-limu ikikendi tsandya obughuma bwethu na Yehova.

12. Sitani anzire iniahengemya athi amalengekania wethu?

¹² Sitani akalengesaya erithabulha amalengekania w’abandu. Lyolho-lyolho akahira omwa bandu mw’erithika-thika, erihika okwa kiika ky’eribya ibangana lhangira “ebibi mo bibuya n’ebibuya mo bibi.” (Isaya 5:20) Sitani akakulha-kulhanaya amalengekania w’eribugha indi erihabulha lye Biblia siryanga kolha kandi athi ithukendi tsema thwamagheghena ebihano bya Nyamuhanga.

13. Sitani abirilengesya athi erihira omwa bandu mw’erithika-thika?

¹³ Erithika-thika ni kighuma ky’okwa bithegho ebikakolha kutsibu ebya Sitani akakolesaya. Abirikolesyakyo habw’obuthuku buuli. Omw’irima ly’Edeni, mwalengesya eriletha omu Eva mw’erithika-thika akamubulya athi: ‘Ko Nyamuhanga abiribugha athi, simusyerya oko mithi yosi y’eririma kwehi?’ (Enzuko 3:1) Enyuma waho, omwa biro bya Yobu, Sitani mwabulya Yehova embere sy’abamalaika athi: ‘Ko Yobu akakengera Nyamuhanga yo busa kwehi?’ (Yobu 1:9) Yesu abere abiribatizibwa, Sitani mwamulengako omw’ibugha athi: ‘Wamabya iwuli mughalha wa Nyamuhanga, wubwire amabwe aya abye mandu.’​—Matayo 4:3.

14. Sitani angaleka athi abandu ibathika-thika indi eby’obukumu ni by’akabi?

¹⁴ Namunabwire, Sitani akalholha embere erihira  omwa bandu mw’erithika-thika. Akuwaniriraya ebindi bindu ebiri mw’olhulimu-limu nuku abandu balhangire nga binuwene. Nibya n’abandi Bakristayo sibakilhangire obubi bwabyo. (2 Abanya Korinto 11:3) Neryo thwanga kolhaki eriyitheya? Thwanga kolhaki nuku sithuwe omwa bithegho bya Sitani? Thukanaye okwa nzira ibiri esya thwangana theberwamu: eby’eriyitsemesya n’eby’emithambirire.

15. Thwangana yingirya thuthi omwa by’esyombinga erilhabira omwa by’eriyitsemesya?

¹⁵ Munabwire, esyofilimu nyingyi, esyovidiyo, esyondegheka sy’etivi, emisathu y’ekombyuta, ne Intaneti bikakanganaya eby’esyombinga, majiki, n’eby’amaaka awathe w’obuli kiro. Abangyi bakalhangira ebi nga sibiwithe butsibu kandi sibali lhangira n’akabi k’erilighira esyombinga omwa ngebe syabu. Kandi omundu iniangana kolongana n’esyombinga omwa bindu nga bino: erianza eriminya eby’embere, erisoma ebighanza by’ebyalha, akabindi, n’akalegha k’amaghetse. Sitani akabisa akabi akali omw’ebi kandi akalengesaya eribikangania nga bikatsemesaya. Omundu angana lengekania athi sikibi erilebya ebindu by’olhulimu-limu kutse eby’amaaka awathe w’obuli kiro iyo amabya isyanga bikolha. Busana naki amalengekania ng’aya ni w’akabi?​—1 Abanya Korinto 10:12.

16. Busana naki thutholere ithwaghana eby’eriyitsemesya omuli eby’olhulimu-limu?

¹⁶ Sitani n’esyombinga siwe sibanga minya ebiri omwa amalengekania wethu. Aliwe bangana minya ebya thwanzire n’emilengekanirye yethu omw’isamalira ebya thukayisombolera n’erisombolera ab’eka yethu, imwamuli ebya thukayitsemesayamu. Thwamasombolha esyofilimu,  emiziki, kutse ebitabu ebihambire okwa mirimu, eby’obukumu, eby’obulhaghu, obulhoyi, kutse ebindi ng’ebyo, Sitani n’esyombinga siwe ibakendi minya ngoku thwanzire eribiminya. Neryo ibakendi lengesya erithwongobererya omwa by’emirimu-limu.​—Soma Abanya Galatia 6:7.

17. Sitani angathuthegha athi omwa kiyithawa kyethu eky’erianza eribya n’amaghalha awuwene?

¹⁷ Kandi Sitani angana thutheghera omwa kiyithawa kyethu eky’erianza eribya n’amaghalha awuwene. Munabwire, abanene balhwere kutsibu. Omundu anganabya iniabirihika omw syosipatara nyingyi aliwe iniathalhama. (Mariko 5:25, 26) Iniangana handabuka inianza  erihika okwa bakumu kutse erikwama-kwamania emithambirire eyiri mw’olhukumu-kumu. Aliwe ithwe ng’Abakristayo, thutholere ithwayitheya okw’isombolha emithambirire eyiri mw’erikolesya eby’olhukumu-kumu.​—Abalawi 19:31.

18. Ni mithambirire yahi eya Mukrisitayo atholere iniayihighulhako?

¹⁸ Yehova akakunga abakathwa ebihano biwe athi: “Oyukakungutha okuthu kw’iwe okw’owa ebihano, erisaba liwe ni nye.” (Emisyo 28:9) Nawu thalengekania​—Yehova syanganza erihulikirira emisabe yabu! Sithwanganza erikolha ekyosi-kyosi ekyanga tsandya obughuma bwethu na Yehova n’eribya isyanga thasyathuwathikya, kutsibu-tsibu omughulhu thulhwere. (Esyonyimbo 41:3) Thutholere ithwalebya ndeke emithambirire eya thukanza erikolesya nga yinahambene n’eby’obukumu-kumu. (Matayo 6:13) Yamabya nga yinahambene nabyo, thutholere ithwayihighulha kuyo!​—Lebaya Endomeko 32.

19. Ni byahi ebyabirileka abandu bangyi ibasagha Diabolo?

¹⁹ Nomwakine indi abandi bakalengekanaya bathi Sitani n’esyombinga sibaliho, bathi ni malengekania buyira, abandi ibo banasi ngoku baneho busana n’ebya babiriyilhangirira. Abangyi bali omwa buba bunene bw’emirimu mibi kandi ni bakobe b’ebihaniriro by’obulhaghu. Abandi bakahikaya okwa bandi kw’obuba obu omw’ibabwira emyatsi eyik’itha obuba eyo syombinga sikakolha okwa bandu. Mughulhu mungyi, abandu bakatsemera emyatsi eyi kandi bakanza bakabwirayo abandi. Emyatsi eyi yikaleka abandu ibasagha Diabolo.

20. Thwanga lhalhania thuthi amabehi wa Sitani?

²⁰ Thalengekania oku kino​—Sitani anzire abandu  ibamusagha. (2 Abanya Tesalonika 2:9, 10) Ni mubehi oyuwasi erihengemya amalengekania w’abakanza eby’emirimu-limu n’erileka bikiriraye ebindu ebithe by’ekwenene nibya. Abandu abo bangana bugha emyatsi eya bakalengekanaya bathi babiriowa n’erilhangira. Abandu bakabya bakongera erisubirira muyo, kwa yikan’ongera yithya erihiribwa mw’ekisehya. Sithwanzire eriwathikya Sitani omw’ihikya okwa bandi kw’obuba obu omw’isubirira omo myatsi ng’eyo.​—Yoane 8:44; 2 Timoteo 2:16.

21. Omwakanya k’erikania emyatsi y’esyombinga, ni byahi ebya thwanga kaniako?

²¹ Omughuma w’okwa bandu ba Yehova amabya imwanahikwako esyombinga kera, isyendibya mwatsi w’eribera erikanirya abandi. Abandu ba Yehova sibatholere bakasagha ekyosi-kyosi ekya Sitani n’esyombinga siwe bangakolha. Omwakanya k’ekyo, thutholere ithwahwerya malengekania wethu w’oku Yesu n’okwa maaka agho Yehova abirimuha. (Abaebrania 12:2) Yesu mwathabera erikanirya abigha biwe oko myatsi y’esyombinga. Mwahwerya amalengekania w’oko mwatsi w’Obwami ‘n’emibiiri y’amaaka ya Nyamuhanga.’​—Emibiri 2:11; Luka 8:1; Abanya Roma 1:11, 12.

22. Wukendi thwamu erikolhaki?

²² Ambi isithw’ibirirawa ngoku ekilhubirirwa kya Sitani ly’eritsandya obughuma bwethu na Yehova. Akendi lengaho erilhangira athi ekyo kikabya. Aliwe thunasi esyonzira syosi sya Diabolo kandi thunayitheghekire erighana emiringo yosi ey’eby’emirimu-limu. Sithwend’iha ‘Sitani y’omwanya’ w’eritsekya erithwamu lyethu. (Soma Abanya Efeso 4:27.) Omo kwenene, thwamalhwa na Sitani, isithwendi hambwa omwa bithegho biwe kandi ithukendibya omwa butheya bwa Yehova.​—Abanya Efeso 6:11.