1, 2. Busana naki wukayithagha omusondoli omughulhu wuli omwa kitsweka ekya wuthasi ndeke? Ni busondoli bwahi obwa Yehova abirithuha?

THALENGEKANIA iwabya iwukaghenda bulebe erilhaba omo mbwarara nene kutsibu. Aliwe iwakiminya ngoku erilhaba omo mbwarara nene kutsibu ng’eyo wuthe n’ekikakusondolha iwangana hera. Ni kyahi ekya wangakolha erithoka erihika eya wukaya? Iwukendi sondya omundu oyuwasi embwarara ya ndeke erikusondolha. Kutse iwukendi ghendera okwa lyuba kutse esyongununu. Ni kikulhu  eribya n’ekikakusondolha, kundi eriminya eyo wukaya kyangana lhamya engebe yawu.

² Thukabana ebitsibu bingyi omwa ngebe, kandi okwa bundi buthuku kyolhobire ithwe eriyowa nga thwabirithalha. Aliwe erithusondolha, Yehova abiriha obuli mundu y’obunyamuthima-thima. (Yakobo 1:17) Leka thulebaye obunyamuthima-thima nga niki kandi nga bukakolha buthi. Kandi thukend’igha ngoku thwanga kangirirya obunyamuthima-thima bwethu, ekyanga leka ithwatsomana obunyamuthima-thima bw’abandi, kandi ngoku obunyamuthima-thima obuhenirye bwangana leka engebe yethu iyuwana.

3. Obunyamuthima-thima bwethu niki?

³ Obunyamuthima-thima bwethu ni kihembo ekyuwene ekikalhua oku Yehova. Ni maaka awali omw’ithwe awakaleka ithwaminya ekibuya n’ekibi. Ekinywe ky’Ekigiriki ekikakolesibawa omwa Biblia ekya “obunyamuthima-thima” kikamanyisaya “eriminya erya mundu awithe omw’iyo.” Obunyamuthima-thima bwethu bwamakolha ndeke, kikathuwathikaya eriyiminya ndeke. Bwangana thuwathikya eribya b’okwenene omwa malengekania n’omw’iyowa. Bwangana thusondolha erikolha ekyuwene n’eriyihighulha okwa kithuwene. Kandi bwangana leka ithwatsema omughulhu thukathwamu ndeke kutse ithwayowa nabi busana n’erikolha ekithuwene.​—Lebaya Endomeko 5.

4, 5. (a) Ni kyahi ekyabya kyabere omughulhu Adamu na Eva bagheghena obunyamuthima-thima bwabu? (b) Ni by’erileberyako byahi omwa Biblia ebikakanganaya ngoku obunyamuthima-thima bukakolha?

⁴ Obuli mundu angana thwamu ng’ahulikirire  obunyamuthima-thima bwiwe kutse eyihi. Adamu na Eva mubathwamu erithendi ghendera okwa bunyamuthima-thima bwabu, neryo kyamaleka ibabya ibamakolha ekibi. Enyuma waho mubayowa nabi, aliwe habya isihakiri eky’erikolha. Babya ibabirighana eriowa Nyamuhanga. (Enzuko 3:7, 8) Nomwakine indi babya ibanawithe obunyamuthima-thima obuhikene kandi ibanasi ngoku ni kibi erithendiowa Nyamuhanga, mubathwamu erigheghena obunyamuthima-thima bwabu.

⁵ Mbaghane n’ekyo, abandu bangyi abathahikene babirighendera okwa bunyamuthima-thima bwabu. Yobu abya ky’erileberyako ekyuwene. Busana n’erithwamu ndeke, mwabugha athi: “Obunyamuthima-thima bwaghe sibuli n’omwatsi.” (Yobu 27:6) Hano Yobu akanaya okwa maaka wiwe aw’eriminya ekibuya n’ekibi. Aliwe Dawudi iyo iniakanagheghena obunyamuthima-thima bwiwe neryo iniathabya mwowa embere sya Yehova. Enyuma w’erithendi kangania Omwami Saulo y’erisikya, mwayowa nabi indi mukyabya omuthima wiwe ‘ng’akamuhisiriranaya.’ (1 Samweli 24:5) Hano obunyamuthima-thima bwa Dawudi bwabya ibukamubwira buthi abirikolha ekibi. Omw’ihulikirira obunyamuthima-thima, mwigha ngoku angayihighulha okw’ithasyakolha esobya ng’eyo.

6. Busana naki ithwabugha thuthi obunyamuthima-thima ni kihembo erilhua oku Nyamuhanga?

⁶ N’abandu abathasi Yehova bakabya ibanasi ngoku hane ebihikire n’ebithahikire. E Biblia yikabugha yithi: “Amalengekania wabu akahandikirirabo kutse erihanganirabo.” (Abanya Roma 2:14, 15) Ng’eky’erileberyako, abandu bangyi banasi ngoku er’itha kutse eriba ni kibi. Nomubangabya isibakyasi, omo kwenene bane mughendera okwa bunyamuthima-thima obo, amaaka w’eriminya ekibuya n’ekibi agho Yehova abahiramo. Kandi nibya bane  mughendera okwa misingyi ya Nyamuhanga, kutse ekwenene eya Yehova abirithuha erithuwathikya erithwamu ndeke omwa ngebe.

7. Ni kyahi ekyanga leka obunyamuthima-thima bwethu ibwabya bubi?

⁷ Aliwe okwa bundi buthuku obunyamuthima-thima bwethu bwangana thuthalya. Ng’eky’erileberyako, bwangana tsandibwa omwa malengekania n’eriyowa lyethu erithahikene neryo ibwathusondolha omwa nzira eyithuwene. Obunyamuthima-thima obuwene sibuliyiretha. (Enzuko 39:1, 2, 7-12) Butholere ibwakangiriribwa. Erithuwathikya, Yehova akathuha omulimu wiwe abuyirire n’emisingyi ye Biblia. (Abanya Roma 9:1) Leka thulebaye ngoku thwanga kangirirya obunyamuthima-thima bwethu.

8. (a) Eriyowa lyethu likahamba lithi okwa bunyamuthima-thima bwethu? (b) Ni kyahi ekya thutholere ithwayibulya thuthe thwathwamu?

⁸ Abandi bandu bakalengekanaya bathi erihulikirira obunyamuthima-thima bwabu ly’erighendera okw’iyowa lyabu. Bakayowa bathi bangana kolha ekyosi-kyosi ekya banzire kyamabya ikyangana batsemesya. Aliwe eriyowa lyethu sirihikene, kandi lyangana thuthebya. Eriyowa lyethu lyangana thunga amani iryahamba n’okwa bunya muthima-thima bwethu. E Biblia yithi: “Omuthima ni w’eritheba kwilhaba emyatsi yosi kandi alhwere nabi. Nindi wanga thoka eriminyagho kwehi?” (Yeremia 17:9) Neryo ithwangana tsuka erilengekania thuthi ekindu kirebe kyuwene kwesi ini kibi. Ng’eky’erileberyako, Paulo athali abya Mukristayo, abya akendererya kutsibu abandu ba Nyamuhanga kandi iniasi athi eby’akakolha bihikire.  Okw’iyo, obunyamuthima-thima bwiwe bwabya ibunuwene. Aliwe enyuma waho mwabugha athi: “Omukama yukanyitswera.” (1 Abanya Korinto 4:4; Emibiri 23:1; 2 Timoteo 1:3) Paulo abere aminya Yehova ng’akayowa athi okwa by’abya akakolha, mwaminya ngoku atholere iniahinduka. Omo kwenene, thuthe thwakolha kindu kyosi-kyosi, thutholere ithwatsuka eriyibulya, ‘Ni kyahi ekya Yehova anzire ingakolha?’

9. Eryubaha Nyamuhanga kikamanyisayaki?

⁹ Wamanza omundu, siwulyanza erikolha ebikamuponesaya. Kundi thwanzire Yehova, sithwanzire erikolha ekikamuponesaya. Thutholere ithwasagha kutsibu eriponesya Yehova. Eki thukakilhangira omwa ky’erileberyako kya Nehemia. Mwaghana erikolesya ekitsumbi kiwe ng’omuthabali, nuku abye mughuda. Busana naki? Mwabugha athi ni “busana n’eryubaha Nyamuhanga.” (Nehemia 5:15) Nehemia mwathanza erikolha ekyosi-kyosi ekyanga ponesya Yehova. Nethu nga Nehemia, thukasagha eriponesya Yehova omw’ikolha ekithuwene. Thwangana minya ebikatsemesaya Yehova omw’isoma e Biblia.​—Lebaya Endomeko 6.

10, 11. Ni misingyi yahi eye Biblia eyanga thuwathikya erithwamu ndeke bikahika oko bwabu?

¹⁰ Ng’eky’erileberyako, Omukristayo angana thwamu ng’ane mwend’inywa okwa bwabu kutse eyihi. Ni misingyi yahi eyikendi muwathikya erithwamu ndeke? Hano hane emighuma y’okw’iyo: E Biblia siyirighanaya erinywa obwabu. Nibya yikathubwira yithi obwabu ni kihembo erilhua oku Nyamuhanga. (Esyonyimbo 104:14, 15) Aliwe, Yesu mwabwira abigha biwe athi isi “bathamira.” (Luka 21:34) N’omukwenda Paulo mwabwira Abakristayo athi bayihighule okwa ‘magheni w’ebyughungu n’erithamira.’ (Abanya Roma 13:13, NW) Mwabugha athi abathamiri “sibendi syasangira oko Bwami bwa Nyamuhanga.”​—1 Abanya Korinto 6:9, 10.

 ¹¹ Omukristayo angana yibulya: ‘Obwabu bunyiwithire mughasoki? Mbwino ngabuyithagha erithalhuhuka? Ngabunywa inganza erihwa kw’isoni? Nangana yikakirya okw’inywa bunene n’emirundi eyo ngabunywiramu? * Nanganatsanga ndeke n’abanywani baghe nibya isihali obwabu?’ Thwangana saba Yehova athuwathikaye erithwamu ndeke. (Soma Esyonyimbo 139:23, 24.) Omwa nzira eyi, thukakangiriraya obunyamuthima-thima bwethu erighendera okwa misingyi ye Biblia. Ni bingyi ebikayithaghisibawa ngoku thukendi lhangira.

12, 13. Busana naki obunyamuthima-thima bwethu ibuthasosana n’obw’abandi? Thwanga kolhaki erikwamana n’erithendi sosana ng’eri?

¹² Obunyamuthima-thima bwethu sibusosene. Obunyamuthima-thima bwawu bwangana kulighira erikolha ekindu ekya bw’owundi bukaghana. Ng’eky’erileberyako, wangana thwamu erinywa obwabu, aliwe owundi iniathwamu erithendinywa. Busana naki abandu babiri bangana thunga amalengekania w’embaghane okw’eki?

¹³ Mughulhu mungyi omundu akabya n’amalengekania malebe okwa kindu erikwamana n’ah’akulire, ngoku eka yabu yabya yikakilhangira, eby’alhabiremu, n’ebindi-n’ebindi. Bikahika ng’okw’inywa obwabu, obundi oyo kyabya kikakalira kera eriyikakirya okw’inywa inianganathwamu eribulekera ighuma. (1 Abami 8:38, 39) Neryo wamaha omundu y’obwabu akabughana, iwukendi kolhaki? Iwukendi yowa nabi? Iwukendi muhathikabo? Mbwino  iwukendianza erimubulirirya ekyamaleka iniaghana? Eyihi, kundi wusikirye obunyamuthima-thima bwiwe.

14, 15. Muhabya mibereki omwa biro bya Paulo? Ni habulha lyahi eryuwene erya Paulo aha?

¹⁴ Omwa biro by’omukwenda Paulo, muhabya ekikakanganaya ngoku obunyamuthima-thima si busosene. Esindi syonyama esyabya sikaghulibwa omwa kathali isikabya isyabiritsuka erikolesibwa omw’iramya ly’amabehi n’erihongerwa esyosanamu. (1 Abanya Korinto 10:25) Paulo mwayowa isi kibi erighulha n’erirya enyama eyo. Okw’iyo, ebyalya ebyosi ibikalhua oku Yehova. Aliwe balikyethu abanabya baramya b’esyosanamu kera ibakakilhangira nabi. Ibakayowa ini kibi erirya esyonyama esyo. Mbwino Paulo mwanalengekania athi: ‘Ingye si kiri hamba okwa bunyamuthima-thima bwaghe. Ngawithe obughabe bw’erirya ekyosi-kyosi ekya nganzire’?

¹⁵ Paulo mwathalengekania athya. Mwatsomana kutsibu eriyowa ly’abalikyabo indi mwathwamu erileka n’eby’anawitheko ehamuli. Paulo mwabugha athi sithutholere thukabya abanzire “eriyitsemesya.” Mwongerako athi: “Kusangwa Kristo mwathayitsemesya.” (Abanya Roma 15:1, 3) Nga Yesu, Paulo mwatsomana abandi ba kutsibu kwilhaba eriyitsomana.​—Soma 1 Abanya Korinto 8:13; 10:23, 24, 31-33.

16. Busana naki sithutholere thukatswera balikyethu busana n’ebya bunyamuthima-thima bwabu bukabalighira erikolha?

¹⁶ Ibbwa kandi obunyamuthima-thima bw’owundi bwamamusukuma erikolha ebya thukalhangira nga sibihikire? Thutholere ithwayitheya nuku sithumukaleko n’erimuhathikana thuthi n’ithwe thuhikire aliwe iyo syahikire. (Soma Abanya Roma 14:10.) Yehova mwathuha obunyamuthima-thima bwethu buthutswere, butsira eritswera abandi. (Matayo 7:1) Sithwanzire nahake erithwamu lyethu likaghabulha ekithunga. Aliwe, thukasondekanaya  esyonzira sy’erikulha-kulhaniryamo olhwanzo n’obughuma.​—Abanya Roma 14:19.

17. Obunyamuthima-thima bw’abandi bwabiribya buthi?

¹⁷ Omukwenda Petero mwahandika athi: ‘Mubye n’obunyamuthima-thima obuwene.’ (1 Petero 3:16) Eky’obulighe, omughulhu abandu bakabera erigheghena emisingyi ya Yehova, neryo obunyamuthima-thima bwabu bukalekera aho eribakunga. Paulo mwabugha athi obunyamuthima-thima ng’obo bukabya ‘ibwabirihisibwa  n’ekyuma kihuhire kutsibu.’ (1 Timoteo 4:2) Wune wathahya kutsibu? Ekyo kyabere kikabya, omubiri wawu mwabya kw’engolhu n’eribya kihirithi indi n’ekindu kyamathulhaho isiwang’owa. Omundu amalholha embere erikolha ebindu bibi, obunyamuthima-thima bwiwe bukabya kihirithi, kandi n’endambi iyahika ibwabya isibwangathasya kolha.

18, 19. (a) Omuthima erikuhandikirira n’eriyowa iwabirihemuka bikathweghesayaki? (b) Thwanga kolhaki thwamayowa nabi busana n’ebibi ebyathwakolha nibya ithwabirinayisubamu?

¹⁸ Thwamayowa obunyamuthima-thima bwethu ibwabirithuhandikirira, bwanganabya ibukathubwira buthi thwabirisobya. Eki kyangana thuwathikya eriminya ikyathwakolire n’erileka erithasyakikolha. Thwanzire erighira okwa bisobyo byethu nuku sithubisubemu. Ng’eky’erileberyako, nomwakine indi Omwami Dawudi mwakolha  ekibi, obunyamuthima-thima bwiwe mubwaleka iniayisubamu. Mwapona eky’akolha n’erithwamu eriowa Yehova omwa buthuku obwakwamako. Ebya Dawudi ayilhangirira mubyaleka iniabugha athi Yehova ni ‘mubuya kandi akabuyira.’​—Esyonyimbo 51:1-19; 86:5; lebaya Endomeko 7.

¹⁹ Aliwe omundu nomwangabya iniabiriyisubamu kera busana n’ekibi eky’akolha, angana thasyayowa nabi busana n’eky’akolha. Eriyowa ng’eryo rikalhuma kandi lyangana leka omundu iniayowa nga syawithe mughaso. Wamabya okwa bundi buthuku iwukana yowa wuthya, wibuke ngoku siwanga hindulha ebyabya kera. Mbulha okwa buthuku obo wanabya wuyitheghererye ndeke ekihikire n’ekithahikire kutse eyihi, Yehova iyo mwakughanyira ndeke, n’ekibi ekyo mukyasangulhwa. Wuhenirye embere sya Yehova kandi wuminye ngoku ebya wune mukolha lino bihikire. Omuthima wawu angana  thasyakuhandikirira, aliwe e Biblia yikabugha yithi: “Nyamuhanga alengire emithima yethu.” (Soma 1 Yoane 3:19, 20.) Eki kikamanyisaya kithi olhwanzo lhwiwe n’erighanyira liwe bilengire kutsibu eriyowa nabi lyethu kutse ekihemu ekya thwanga bana. Wutholere iwaminya ngoku Yehova abirikughanyira. Omughulhu omundu akaligha erighanyira lya Yehova, obunyamuthima-thima bwiwe bukabya buholho kandi iniakolera Nyamuhanga inianatsemire.​—1 Abanya Korinto 6:11; Abaebrania 10:22.

20, 21. (a) Ekitabu kino kikolirwe erikuwathikya erikolhaki? (b) Ni bughabe bwahi obwa Yehova abirithuha? Thutholere ithwabukolesya thuthi?

²⁰ Ekitabu kino kikolirwe habw’erikuwathikya erikangirirya obunyamuthima-thima bwawu nuku bwanga kukunga n’erikutheya omwa biro by’enyuma-nyuma bino ebikalire. Kandi kikendi kuwathikya erihira emisingyi ye Biblia y’omwa mikolere omwa ngebe yawu yosi. Ni kwenene, ekitabu kino sikyendi thondogholha ebilhaghiro ebya wangakolesya omwa buli mibere. Thukaghendera okwa “mighambo ya Kristo,” eyiseghemere okwa misingyi ya Nyamuhanga. (Abanya Galatia 6:2) Eribya isihali kilhaghiro kirebe oko mwatsi sikirimanyisaya kithi ibbwa thwamabana enzira ey’eriyihambulyamu erikolha ekibi. (2 Abanya Korinto 4:1, 2; Abaebrania 4:13; 1 Petero 2:16) Aliwe, thukakolesaya obughabe bwethu erikangania ku thwanzire Yehova.

²¹ Thukabya thukaghanirya okwa misingyi ye Biblia n’erihira y’omwa mikolere, thukaminya ngoku thwanga kolesya ‘amaaka wethu w’obulengekania’ n’erilengekania ngoku Yehova akalengekanaya. (Abaebrania 5:14, NW) Ekikalhwiririramu bw’obunyamuthima-thima obukangiriribwe obukendi thusondolha omwa ngebe yethu yosi n’erithuwathikya erisighalha ithune omo lhwanzo lhwa Nyamuhanga.