1, 2. (a) Abakatsuka obutheke bakabya n’amahaki? (b) Omwa sura eno thukendi kania okwa bibulyo byahi?

THATHERA akasasani k’omughole w’obulhume n’ow’obukali okwa kiro kyabu ky’obugheni. Batsemire busana n’engebe eya bakayabyamu kandi bawithe amaha n’ebilhotho ebyuwene. Bawithe amaha ngoku obutheke bwabu bukendi syaghunza buthuku buuli kandi ibanatsemire.

² Aliwe, amatheke mangyi aw’akatsuka ndeke endambi yikahika iniatsanda. Obutheke erighuma n’eribya mw’etseme, abathahenie bakayithagha obusondoli bwa Nyamuhanga. Neryo kwesi thulebaye ekye Biblia yikabugha okwa bibulyo bino: Obutheke buwithe mighaso nga yahi? Wamabya wanzire er’ingira omwa butheke, wangasombolha wuthi ndeke omwanze? Wangabya wuthi iba mubuya kutse mukali muthahibwa mubuya? Kandi ni kyahi ekyangawathikya obutheke erighuma?​—Soma Emisyo 3:5, 6.

3. Wukalengekanaya omundu eritsema atholere iniatsuka er’ingira omwa butheke? Soborera.

³ Abandi bakalengekanaya bathi omundu syangatsema athe omwa butheke. Aliwe eki si kwenene. Yesu mwabugha athi obuhuru ni kihembo. (Matayo 19:11, 12) N’omukwenda  Paulo mwabugha athi hane emighaso y’eribya muhuru. (1 Abanya Korinto 7:32-38) Kiri okw’iwe erithwamu nga wukend’ingira omwa butheke. Siwutholere wukalighira abanywani bawu, abahughu, kutse emibere y’ewenyu bikabya iby’ebyamaleka iw’ingira omwa butheke.

4. Obutheke obuwene buwithe mighaso nga yahi?

⁴ E Biblia yikabugha yithi obutheke nabu ni kihembo ekikalhua oku Nyamuhanga ekinawithe mighaso mirebe. Yehova mwabugha okwa mulhume w’erimbere, ya Adamu athi: “Siryuwene omundu eribya iyuwene; ngendi mukolera omuwathikya oyumutholere.” (Enzuko 2:18) Yehova mwahangika Eva eribya mukali wa Adamu, kandi n’ibo bakolha amaka w’erimbere. Abathahenie bamabutha abaana, ambi obutheke bwabu ibwabya omwa mibere eyangaleka abaana ibakulha ndeke. Aliwe eributha abaana si kya kighendererwa kisa ky’er’ingira omwa butheke.​—Esyonyimbo 127:3; Abanya Efeso 6:1-4.

5, 6. Obutheke bwangabya buthi “ng’ekikoba ky’emihungyi isathu”?

⁵ Omwami Solomona mwahandika athi: “Ababiri buwene kwilhaba omughuma, kusangwa bawithe olhuhembo olhuwene busana n’emibiiri yabu. Kusangwa omughuma amayihinda, omughuma asyahangania mulikyabu, nikwa obulighe okwa yuli iyuwene omughulhu akayihinda hathe wundi w’erimusumba.  . . . Olhukoba lhw’emihungyi isathu silhuli thwika lhuba.”​—Omugambuli 4:9-12.

⁶ Obutheke obuwene bwanganabya bunywani bw’ahakuhi-kuhi ahakathi-kathi k’abandu babiri abakawathikanaya, erihumulikangania, n’eritheghania. Olhwanzo lhukaleka obutheke ibwaghuma, aliwe obutheke ibukendi ghuma ndeke omulhume n’omukali  bamabya baramya ba Yehova. Neryo obutheke bwabu ibukendibya “ng’ekikoba ky’emihungyi isathu,” ekikoba ky’emihungyi isathu eyilhukire ndeke. Ekikoba ekiri ng’eki kighumire kutsibu kwilhaba eky’emihungyi ibiri. Abathahenie bamahira Yehova y’omwa butheke bwabu ibukendi ghuma.

7, 8. Ni habulha lyahi erya Paulo aha erihambire okwa butheke?

⁷ Omulhume n’omukali bakabya babirithahania, ikyanganaleka ibughuthya esyongumbu syabu sy’emyatsi y’engyingo. (Emisyo 5:18) Aliwe omundu am’ingira omwa butheke busana n’erith’ughuthya esyongumbu esi, inianganalemwa erisombolha ndeke omwanze. Kya kikaleka e Biblia iyabugha yithi omundu atholere in’ingira omwa butheke abirilhaba omwa “kanyethu kabehi,” omughulhu esyongumbu sy’emyatsi y’engyingo sikabya nene kutsibu. (1 Abanya Korinto 7:36, NW) Ni kibuya er’ingira omwa butheke esyongumbu esi syabirikeha. Neryo aho omundu iniangana lengekania ndeke n’erisombolha ndeke.​—1 Abanya Korinto 7:9; Yakobo 1:15.

⁸ Wamabya iwunemulengekania okw’ingira omwa butheke, ni kibuya eriminya ngoku obuli butheke mukabya ebitsibu. Paulo mwabugha athi abo abak’ingira omwa butheke “basyabana amalighe omwa mubiri.” (1 Abanya Korinto 7:28) Nibya n’obutheke obuwene nabu bukabana ebitsibu. Neryo wamathwamu er’ingira omwa butheke, ambi iwasombolha ndeke.

9, 10. Ni kyahi ekyangabya thwam’ingira omwa butheke n’oyuthe kolera Yehova?

⁹ Hano hane omusingyi mukulhu we Biblia owawutholere iw’ibuka wukasombolha ow’er’ingira nayu omwa butheke: “Simumathikane n’abath’ikirirye.”  (2 Abanya Korinto 6:14) Omukwenda Paulo akahandika ebi, aby’akalengekania okwa mubere ow’abya akakolesibwa omwa by’obulime ow’eribohera engomo y’okwa bisoro bibiri. Ebisoro bibiri byamabya isib’ingene omwa bunene kutse omwa kaghalha, omulimi syangabiboha haghuma bikalima. Ekyo ikikendibya isikitholere kundi ebyosi bibiri ibikendi ghalhwa. Kuthya, oyukaramaya Yehova n’oyuthe muramaya bamathahania, ibanganabana ebitsibu bingyi. Neryo e Biblia yikathuhabulha yithi thw’ingire omwa butheke n’oyuli “Mukristo kwenene.”​—1 Abanya Korinto 7:39.

¹⁰ Okwa bundi buthuku, abandi Bakristayo bakanayowa bathi batholere er’ingira omwa butheke n’oyuthe muramya wa Yehova omwakanya k’eribya ibobene. Aliwe thwamagheghena erihabulha lye Biblia, mughulhu mungyi mukalhwiririra obulhumi n’eribulha etseme. Ithwe ng’abaramya ba Yehova, erimukolera kya kindu kikulhu kutsibu omwa ngebe. Iwukendi yowa wuthi wamabya isiwangathoka erisangira omwa kindu kikulhu kutsibu eki n’omwanze wawu? Abangyi babirithwamu erithend’ingira omwa butheke omwakanya k’eribwingiramu n’oyuthe kolera Yehova.​—Soma Esyonyimbo 32:8.

11. Wangasombolha wuthi ndeke omwanze?

¹¹ Eki sikirimanyisaya kithi obuli mundu oyukakolera Yehova anganabya mwanze oyukutholere. Wamabya iwunemulengekania okw’ingira omwa butheke, ambi iwasondya oyo wanzire erilhua okwa muthima n’oyo mwangakolongana nayu ndeke. Linda erihika aho wukendi syabanira oyuwanzire erikolha ebiri ng’ebyo wanzire n’oyukahira erikolera Nyamuhanga ly’embere omwa ngebe. Bana obuthuku bw’erisoma n’erighanirya okw’ihabulha erihambire okwa butheke eriri omwa bitabu by’omughombe.​—Soma Esyonyimbo 119:105.

12. Ni kyahi ekya thukigha okwa mubere w’omwa buthuku bwe Biblia ow’erisombolera omundu y’ow’er’ingira nayu omwa butheke?

 ¹² Omwa bindi bihanda, ababuthi babakasombolera omwana wabu ow’er’ingira nayu omwa butheke. Bakayowa ababuthi babasi ndeke oyutholere omwana wabu. Omubere oyu aby’akakolesibwa kutsibu omwa buthuku bwe Biblia. Neryo ab’eka yenyu bamathwamu erikolesya omubere oyu, e Biblia iyangana wathikya ababuthi eriminya emibere eyo batholere ibasamalira. Ng’eky’erileberyako, Abrahamu abere akasombolera mughalha wiwe Isaka y’omukali, ekilhubirirwa kiwe sikyabya okwa syosente kutse ekitsumbi; mwasondya oyuwanzire Yehova.​—Enzuko 24:3, 67, lebaya Endomeko 25.

13-15. (a) Omulhume angayithegheka athi eribya iba mubuya? (b) Omukali angayithegheka athi eribya mukali muthahibwa mubuya?

¹³ Wamabya wunemulengekania okw’ingira omwa butheke, lhangira wuthi wunayitheghekire. Wangana lengekania wuthi wunayitheghekire, aliwe thuthakania nga kikamanyisayaki eriyitheghekera obutheke. Eky’erisubirya kyangana kuswekya.

¹⁴ E Biblia yikakanganaya yithi abalhume n’abakali abali omwa butheke bawithe esyongwamirwa muthina-muthina. Neryo kwesi ni ky’amenge eriminya ngoku eriyitheghekera obutheke kikamanyisaya eriminya olhukwamirwa lhwawu iwe ng’omulhume kutse ng’omukali. Omulhume amabya anemulengekania okw’ingira omwa butheke, atholere iniayibulya nganayitheghekire eribya muthwe w’eka. Yehova akanza omulhume oyuli omwa butheke iniatsomana mukali wiwe n’abaana biwe kinyamubiri n’omw’iyowa. Ekikulhu kutsibu, omulhume yutholere iniasondolha eka yiwe omw’iramya Nyamuhanga. E Biblia yikabugha yithi omulhume oyuthatsomana eka yiwe ni “mubi kwilhaba oyuth’ikirirye.” (1 Timoteo 5:8) Neryo wamabya iwuli mulhume oyunemulengekania okw’ithahya, lengekanaya nga wangakolesya wuthi omusingyi ono: “Wukokothaye emibiiri yawu y’eyihya, wuyikokotherayeyo omoli; n’enyuma wuhimbe enyumba yawu.” Ni bugha ambu, wuthe wathahya, ambi iwalhangira wuthi wanganabya mulhume mutheke oyo Yehova akayithagha.​—Emisyo 24:27.

¹⁵ Omukali oyune mulengekania okw’ithahibwa atholere iniayibulya ng’anayitheghekire er’imanira olhukwamirwa lhw’eribya mukali muthahibwa obundi nibya eribya mama. E Biblia yikahulha esyonzira nyingyi ndebe  esyo mukali akatsomaniramu mwira wiwe n’abaana biwe. (Emisyo 31:10-31) Munabwire, abalhume n’abakali bangyi bakakwama kyalengekania okwa by’oyo bak’ingira nayu omwa butheke anga bakolera bisa. Aliwe Yehova anzire ithwalengekania okwa kya thwangakolera omwanze wethu.

16, 17. Wamabya iwunemulengekania okw’ingira omwa butheke, ni kyahi ekya wutholere iwaghaniryako?

¹⁶ Wuthe w’ingira omwa butheke, ghaniraya okwa bya Yehova akabugha okw’ibya iba n’omukali omuthahibwa. Eribya muthwe w’eka sikirimanyisaya kithi omulhume atholere iniabya ndale omwa nyumba. Omuthwe w’eka oyuwene akagherereraya Yesu, oyukakanganaya mughulhu wosi olhwanzo n’olhukeri oko bali omwa butheya bwiwe. (Abanya Efeso 5:23) Omukali atholere inialengekania nga kikamanyisayaki erisighika erithwamu lya mwira wiwe n’erikolongana nayu. (Abanya Roma 7:2) Atholere iniayibulya ng’anganatsemera erighondera omulhume oyuthahikene. Amayowa athi syanga thoka, kyuwene erithwamu eribya muhuru lino.

¹⁷ Abiba n’abakali abathahibwa batholere ibatsomana kutsibu eritsemesya abanze babu kwilhaba eriyitsemesya. (Soma Abanya Filipi 2:4.) Paulo mwahandika athi: “Obuli mundu omwa kathi-kathi kenyu anze mukali wiwe ngoku akayanza iyuwene, n’omukali nayu akenge iba wiwe.” (Abanya Efeso 5:21-33) Abosi babiri batholere ibayowa ibanzibirwe n’erisikibwa. Aliwe obutheke eribya ndeke, omulhume atholere iniaminya ngoku mukali wiwe amusikirye, kandi n’omukali atholere iniaminya ngoku mwira wiwe amwanzire.

18. Busana naki abali omwa buthethane batholere ibayitheya?

¹⁸ Obuthuku bw’obuthethane butholere ibwabya buthuku bw’eriminyana ndeke. Kandi ni buthuku bw’eriminya  esyongwamirwa syabu n’eriberana b’okwenene nuku bathwemu nga b’ingire omwa butheke haghuma. Omwa buthethane, omulhume n’omukali bak’igha erikanirania n’erilengaho eriminya ebiri omwa muthima w’owundi. Obughuma bwabu bukabya buk’ongera, neryo bakanzana. Aliwe batholere ibayitheya bakakanganania olhwanzo bathe b’ingira omwa butheke nuku sibakole ekibi. Olhwanzo lhw’okwenene ilhukendi bawathikya eriyikakirya n’eribatheya okwa kindu ekyanga tsandya obughuma bwabu n’obughuma bwabu na Yehova.​—1 Abanya Tesalonika 4:6.

19, 20. Abakristayo bakalhangira bathi obutheke?

¹⁹ Ebitabu n’esyofilimu nyingyi bikabera eritsuka omwatsi w’eryingira omwa butheke iniahindira okwa tseme y’obugheni. Aliwe omwa kwenene, obugheni y’enzuko y’obutheke. Yehova atsukisaya obutheke ini bw’eribyaho kera na kera.​—Enzuko 2:24.

²⁰ Munabwire, abangyi bakalhangira obutheke nga ni ndegheka y’obuthuku buke. Ni kyolho eringira omwa butheke kandi ni kyolho erithwa embeta. Abandi bakayowa bathi ebitsibu byamatsuka, bukabya ini buthuku bw’erisighania omwanze wabu n’eribikyako. Aliwe wibuke eky’erileberyako kye Biblia eky’ekikoba ekighumire eky’emihungyi isathu eyilhukire haghuma ndeke. Ekikoba ekiri ng’ekyo sikyanga thwika nomuhangabya ebitsibu. Thwamasondya obuwathikya oku Yehova, obutheke bwethu ibukendi ghuma. Yesu mwabugha athi: “Abo Nyamuhanga abirimathania haghuma, sihabye mundu oyukaghabulhabo.”​—Matayo 19:6.

21. Ni kyahi ekyanga wathikya omulhume na mukali wiwe erianzana?

²¹ Ithwe bosi thunawithe ebya thukathoka na hathukalemererawa. Kyolhobire erihwerya amalengekania wethu w’okw’ilemererwa ly’abandi, kutsibu-tsibu abathuli nabu omwa butheke. Aliwe thwamakolha eki, sithwangabya n’etseme. Okwa lhundi lhuhandi, thwamahwerya amalengekania w’okwa mibere mibuya y’abanze bethu, ithukendibya n’obutheke obutsemire. Mbwino nina ky’amenge eribya n’amalengekania ng’aya oko mwanze wawu oyuthahikene? Ee! Yehova anasi ngoku sithuhikene, aliwe akahira amalengekania wiwe okwa mibere yethu mibuya. Thalengekania amathendi kolha ekyo! Omuhandiki w’esyonyimbo mwabugha athi: “Wamaghanza ebibi byethu,  Omwami Mukulhu, nindi wanga thoka erisingana kwehi Mukama?” (Esyonyimbo 130:3) Abiba n’abakali bathahibwa batholere ibagherererya Yehova omw’isondekania ebibuya omwa banze n’eribya abakaghanyira lhuba.​—Soma Abanya Kolosai 3:13.

22, 23. Abrahamu na Sara mubahiraho bathi eky’erileberyako kibuya okwa bali omwa butheke?

²² Emyaka yine mulhaba, obutheke bwangana ghuma.  Abrahamu na Sara mubaghunza omwa butheke mo myaka mingyi kandi ibana tsemire. Omughulhu Yehova abwira Abrahamu athi alhue omwa muyi we Uri, Sara angabya iniabya awithe myaka eyilhabire omu 60. Thalengekania nga mukyamukalira bungahi erisighania enyumba yabu eyuwene eriyikalha omwa syohema. Aliwe Sara abya munywani mubuya kandi muwathikya wa mwira wiwe, kandi kwenene aby’amusikirye. Neryo mwathwamu erisighika ebya Abrahamu akathwamu kandi mwamuwathikya nuku bithokekane.​—Enzuko 18:12; 1 Petero 3:6.

²³ Ni kwenene, eribya n’obutheke obuwene sikirimanyisaya kithi omulhume na mukali wiwe bakendi bera erilighirana. Kiro kighuma, Abrahamu mwathalighirana na Sara, Yehova mwamubwira athi: “Wuhulikirire omulenge wiwe.” Abrahamu mwahulikirira neryo mumwalhwiririra ebibuya. (Enzuko 21:9-13) Kyamabya indi iwe n’omwanze wawu hamabya erithendi lighirana, isiwahwa amani. Ekikulhu kiri indi nomuhangabya erithendi lighirana, ambi ihabya ihakine owundi erikangania owundi y’olhwanzo n’erisikania.

24. Obutheke bwethu bwangaha buthi Yehova y’olhukengerwa?

²⁴ Omwa kithunga ky’Ekikristayo, mune esyongumi sy’abathahenie bangyi abatsemire. Wamanza eringira omwa butheke, wibuke ngoku erisombolha omwanze ni kighuma ky’okw’ithwamu likulhu erya wanga kolha. Kikendi hamba okwa ngebe yawu yosi, neryo sondaya obusondoli bwa Yehova. Aho iwukendi thoka erisombolha ndeke omwanze wawu, iwayitheghekera ndeke obutheke, n’erikolha kutsibu eribya n’obutheke obughumire kandi obuli mw’olhwanzo obukendiha Yehova y’olhukengerwa.