1, 2. Busana naki iwanza Yehova Nyamuhanga?

WUNANZIRE Nyamuhanga? Wanganabya iwumwanzire kutsibu indi wabiriyihayo n’okw’iyo. Wanganabya iwukayowa wuthi ni Munywani wawu kutsibu. Aliriryo wabere wuthe wanza Yehova, iyo abya iniabirikwanza. E Biblia yikabugha yithi: “Thukanza, kusangwa Nyamuhanga mwatsuka erithwanza.”​—1 Yoane 4:19.

² Thalengekania okwa syonzira syosi esya Yehova abirithukanganiryamu olhwanzo. Abirithuha ekihugho ng’obwikalho bwethu obuwene n’obuli kindu ekya thukayithagha eritsemera engebe. (Matayo 5:43-48; Eribisulirwa 4:11) Anzire ithwabya bughuma nayu ndeke kandi abirileka ikyathokekana ithwe erimw’ighako. Thukabya thukasoma e Biblia, thukabya ithukahulikirira Yehova. N’omughulhu thukamusaba, akathuhulikirira. (Esyonyimbo 65:2) Akathusondolha n’erithughumya omwa mulimu wiwe abuyirire. (Luka 11:13) Kandi nibya mwathuma Mughalha wiwe omwanzwa erithulhusya omwa bukobe bw’ekibi n’olhuholho.​—Soma Yoane 3:16; Abanya Roma 5:8.

3. Ni kyahi ekyanga thuwathikya eribya ithune n’obughuma obuwene na Yehova?

 ³ Thalengekania oku munywani wawu kutsibu oyukabya iniane nawu omwa bitsibu n’omwa tseme. Kikayithagha akaghalha erilhangira wuthi obunywani ng’obo sibulihwa. Kwabine bithya n’okwa bunywani bwethu na Yehova, Omunywani kundu oyo thwangabya nayu. Obunywani bwethu nayu bwangana byaho kera na kera. Neryo e Biblia yikathubwira yithi: “Muyibike omo lhwanzo lhwa Nyamuhanga.” (Yuda 21) Eki thwanga kikolha thuthi? E Biblia yikasubiraya yithi: “Erianza Nyamuhanga ni kwama ebihano biwe, kandi ebihano biwe sibikalire.”​—1 Yoane 5:3.

4, 5. Olhwanzo olhwa wuwithire Yehova lhwatsuka erikulha lhuthi?

⁴ Omukwenda Yoane mwahandika okwanza Nyamuhanga. Wangan’ibuka nga watsuka erianza Yehova mughulhu wahi?

⁵ Th’ibuka ngoku wabya wayowire omughulhu watsuka erigha ngoku Yehova anzire iwasyikalha kera na kera omwa kihugho kiwe ekihya-kihya. Muwaminya ebyosi ebya Yehova abirikolha eki erithokekana, kandi muwaminya ekihembo ky’obughuli ekya Yehova athuha ithwe bosi omughulhu athuma Mughalha wiwe okwa kihugho. (Matayo 20:28; Yoane 8:29; Abanya Roma 5:12, 18) Wabere wukaminya ngoku Yehova akwanzire, muwatsema, neryo nawu muwatsuka erimwanza.​—Soma 1 Yoane 4:9, 10.

6. Erianza omundu mwamuliki? Iwe erianza Yehova kyabirileka iwakolhaki?

⁶ Aliriryo eriyowa eryo, wabya ibbwa imuwamatsuka.  Ng’eky’erileberyako, thukabya thwamanza omundu, sithuli subulira okw’ikwama kyamubwira thuthi “ngakwanzire” lisa. Olhwanzo lhukaleka ithwanza erikolha ebindu ebikendi tsemesya omundu oyo. Kuthya, nawu erianza Yehova mukyaleka iwanza erikolha ebikamutsemesaya. Olhwanzo olho lhwabere lhune mukulha, wangabya imuwayihayo okw’iyo n’eribatizibwa. Wabere wakolha ekyo, wabya iwamalhaghanisya Yehova erimukolera kera na kera. (Soma Abanya Roma 14:7, 8.) Wanga berererya wuthi eriyilhagha eryo?

7. Thwamabya ithwanzire Yehova, ithukendi kolhaki? Ebighuma by’okwa bihano bya Yehova by’ebyahi?

⁷ Kundi thwanzire Yehova, thukakwama “ebihano biwe.” Eki thukakikolha thuthi? Omw’imwowa. E Biblia yikathukanganaya Yehova ng’anzire ithwabya omwa ngebe eyiri yithi. Ng’eky’erileberyako, akathubwira athi ni kibi erithamira, eriba kutse eribugha amabehi, erisingira, kutse eriramya omundu kutse ekindi kindu athe iyo.​—1 Abanya Korinto 5:11; 6:18; 10:14; Abanya Efeso 4:28; Abanya Kolosai 3:9.

8, 9. Thwanga minya thuthi ebya Yehova anzire ithwakolha hamabya isihali ekilhaghiro kirebe omwa Biblia? Iha eky’erileberyako.

⁸ Aliwe eritsemesya Yehova, thutholere ithwakolha bingyi kwilhaba erikwama ky’owa ebihano biwe lisa. Syali thuthondogholera obuli kilhaghiro ekihambire okwa buli kindu ekya thwanga kolha omwa ngebe. Neryo kwesi, hanganayira ihabya isihali kilhaghiro kirebe omwa Biblia ekikathubwira eky’erikolha. Thwanga thwamu thuthi ndeke? (Abanya Efeso 5:17) Omo Biblia thukabana mw’emisingyi, ni bugha ambu, ekwenene  eyikathukangiriraya Yehova ng’akalhangira athi emyatsi. Kandi thukabya thukasoma e Biblia, thukaminya ndeke Yehova nga nindi. Thukaminya amalengekania wiwe, imwamuli eby’anzire n’eby’aponire.​—Soma Esyonyimbo 97:10; Emisyo 6:16-19; lebaya Endomeko 1.

⁹ Ng’eky’erileberyako, thukathwamu thuthi okwa bya thwanga lebya okwa tivi kutse okwa Intaneti? Yehova syali thubwira ekyonyine-nyine ekya thutholere erikolha. Aliwe emisingyi ey’akathuha yangana thuwathikya erithwamu ndeke. Ebingyi eby’eriyitsemesyamu munabwire byoswire mw’eby’amalhwa n’obusingiri. Omwa Biblia, Yehova akathubwira athi “akakwa abanzire omwagha [amalhwa, NW] b’obusu” kandi athi “asyatswera ab’amaraghane n’abasingiri.” (Esyonyimbo 11:5; Abaebrania 13:4) Emisingyi eyi yanga thuwathikya yithi erithwamu ndeke? Thwamabiriminya ngoku Yehova aponire ekindu kutse erikilhangira mwa kibi, thutholere ithwayihighulha kukyo.

10, 11. Busana naki ithwowa Yehova?

¹⁰ Busana naki ithwowa Yehova? Si bugha ambu kundi thukasagha erisuyirwa kutse ebitsibu ebikalhwiririra omw’ithwamu nabi. (Abanya Galatia 6:7) Aliwe, thukamwowa kundi thumwanzire. Ng’abaana abakanza eritsemesya thatha wabu, nethu thwanzire ithwatsemesya Thatha wethu w’elhubulha. Sihali ekirengire eriminya ngoku Yehova akathutsemera!​—Esyonyimbo 5:12; Emisyo 12:2; lebaya Endomeko 2.

¹¹ Sithuli kenga Yehova omughulhu thuli ndeke kutse omughulhu sithukiwithe eky’erikolha. Kandi sithuli sombolha nga ni bihano n’emisingyi yiwe yahi  eya thutholere erikwama n’eya thuthatholere. (Eryibuka Ebihano 12:32) Aliwe, thukamwowa n’omuthima wethu wosi ng’omwimbi w’esyonyimbo oyuwabugha athi: “Ngabana obutseme omw’ikenga ebihano byawu, kusangwa nyanzirebyo.” (Esyonyimbo 119:47; Abanya Roma 6:17) Thwanzire ithwabya nga Noa, oyuwanza Yehova omw’ikolha ekyosi-kyosi ekya Yehova amulhaghira. E Biblia yikabugha yithi Noa “mwakolha athya.” (Enzuko 6:22) Wunanzire Yehova iniakubughako athya?

12. Thwanga tsemesya thuthi Yehova?

¹² Yehova akayowa athi thwamamwowa? ‘Thukatsemesaya omuthima wiwe.’ (Emisyo 11:20; 27:11) Thakilengekaniako! Thukatsemesaya Omuhangiki w’obuhangwa bwosi, omughulhu thukamwowa. Nomwabine syali thukaka erikolha ekyo. Abirithuha obughabe bw’eriyithwiramu. Eki kikamanyisaya kithi thuwithe obughabe obw’erithwamu erikolha ekyuwene kutse ekithuwene. Yehova anzire olhwanzo olhwa thumuwithire ilhwathusukuma erithwamu ndeke nuku thwangabya n’engebe eyuwene.​—Eryibuka Ebihano 30:15, 16, 19, 20; lebaya Endomeko 3.

13, 14. Thukaminya thuthi ngoku ebihano bya Yehova sibikalire erikenga? Iha eky’erileberyako.

¹³ Kandi ibbwa thwamalhangira ebihano bya Yehova nga bikalire erikenga kutse thuthi bikendi leka ithuthabya n’obwiranda? E Biblia yikabugha ndeke-ndeke yithi: “Ebihano biwe sibikalire.” (1 Yoane 5:3) Ekinywe ky’Ekigiriki ekikahindulhawa mwa ‘bikalire’ kikamanyisaya “erilithoha.” Omwa yindi milhondo, ekinywe  eki kikakolesibawa erisoborera ebilhaghiro ebikabendekeraya kutse abandu abakalengaho erifundikirya kutse erihuthalya abandi. (Matayo 23:4; Emibiri 20:29, 30) E New English Translation, yikabugha yithi: “Ebihano biwe sibirithubundamiraya.” Ebihano bya Yehova si “birithohire,” ni bugha ambu, si bikalire erikengwa. Eby’akathuyithaghako thukabya ithwangana bithoka.

¹⁴ Ng’eky’erileberyako, iwawathikya munywani wawu erihuma. Abirihira ebindu biwe byosi by’omwa bikapa. Ebindi byanguhirire n’ebindi birithohire indi bikayithagha abandu babiri eribithethemba. Mbwino munywani wawu iniane mwendi bugha athi wuheke ekikapa ekirithohire iwuwene? Eyihi nahake! Busana naki? Kundi syanzire wukabbunika. Ng’omunywani oyo, Yehova syanga bugha athi thukole ekindu ekikalire kutsibu. (Eryibuka Ebihano 30:11-14) Yehova athwasi ndeke. “Anasi emibiri yethu, akibuka ngoku thuli lhuthuthu.”​—Esyonyimbo 103:14.

15. Busana naki ithwayikethera ngoku ebihano bya Yehova bikathughasira?

¹⁵ Musa mwabwira ekihanda kye Israeli athi ebihano bya Yehova biriho busana n’eribaghasira “ebiro byosi” kandi ibo eribya bowa kikendi leka ‘ibathoka eribyaho.’ (Eryibuka Ebihano 5:28-33; 6:24) Ku bine bithya namunabwire. Ekyosi-kyosi ekya Yehova akabugha athi thukole kikathughasira omwa ngebe. (Soma Isaya 48:17.) Thatha wethu, Yehova, akabya inianasi ebithutholere. (Abanya Roma 11:33) E Biblia yikathubwira yithi: “Nyamuhanga ni lhwanzo.” (1 Yoane 4:8) Eki kikamanyisaya kithi ebyosi ebya Yehova akabugha n’erikolha biseghemere oko lhwanzo.

16. Thukaminya thuthi ngoku thwanganabya bowa nomwakine indi sithuhikene n’eribya omwa kihugho kibi?

 ¹⁶ Mughulhu mungyi sikyolho erighondera Nyamuhanga. Thuli omwa kihugho kibi ekithaberweko na Sitani. Akalengaho erithebererya abandu erikolha ebithuwene. (1 Yoane 5:19) Kandi thutholere ithwarwanisya amalengekania n’eriyowa lyethu ebithahikene, kundi byangana leka ithuthaghondera Nyamuhanga. (Abanya Roma 7:21-25) Aliwe erianza Nyamuhanga likathuha amaaka w’erikolha ebihikire. Akalhangira akaghalha akathukahiraho erimukenga, kandi akathuwathikaya omw’ithuha omulimu wiwe abuyirire. (1 Samweli 15:22, 23; Emibiri 5:32) Omulimu abuyirire akathuwathikaya eribya n’emibere eyikaleka ikyathwolhobera eriowa Yehova.​—Abanya Galatia 5:22, 23.

17, 18. (a) Ni byahi ebya thukendigha omwa kitabu kino? (b) Thukendi kania okuki omwa sura eyikakwamako?

¹⁷ Omo kitabu kino, thukendi minya ngoku thwangabya omwa ngebe eyikatsemesaya Yehova. Thukendi minya ngoku thwanga hira emisingyi n’ebihano biwe by’omwa mikolere. Wibuke ngoku Yehova syali thukaka erimwowa. Thukabya thukathwamu erimwowa, engebe yethu yikuwana kandi ithwabya n’amaha awuwene aw’obuthuku obukasa. Ekikulhu kutsibu, ithwe eribya bowa kikendi kangania Nyamuhanga ngoku thumwanzire kutsibu.​—Lebaya Endomeko 4.

¹⁸ Erithuwathikya eriminya ekibuya n’ekibi, Yehova abiriha obuli mundu y’obunyamuthima-thima. Thwamakangirirya obunyamuthima-thima bwethu, ikikendi thuwathikya ‘erikwama ebihano biwe.’ Neryo ibbwa kwesi, obunyamuthima-thima niki, kandi thwanga bukangirirya thuthi? Thulebaye.