1, 2. Busana naki thutholere ithwayitheya thukasombolha eby’eriyitsemesya?

THALENGEKANIA wukanza erilhuma omwa kighuma neryo iwalhangira ikuli ahabbolire. Iwukendi kolhaki? Wukendi kwama kya kirya wuthya? Iwukendi kighusa? Kutse iwukendi sara ahabbolire neryo iwalya ahuwene?

² Omwa mibere mirebe, eby’eriyitsemesya biri ng’ekighuma ekyo. Ebindi byuwene, aliwe ebingyi bibbolire kundi biri mw’eby’obutswatswa, eby’obwithi, kutse eby’emirimu-limu. Neryo wukabya wukasombolha  eby’eriyitsemesya, mbwino wukabugha wuthi: “Ni thwamu lyaghe. Ingye nangana sombolha eby’eriyitsemesya ebya nganzire”? Kutse wukabugha wuthi: “Eby’eriyitsemesya byosi ni bibi”? Kutse wukasombolha ndeke eby’eriyitsemesya, eriyihighulha okwa bithuwene n’eritsemera ebyuwene?

3. Ni kyahi ekya thutholere ithwaghaniryako thukasombolha eby’eriyitsemesya?

³ Ithwe bosi thwanzire eriyitsemesya kandi thukanza ithwasombolha ndeke. Neryo thutholere ithwayibulya eby’eriyitsemesya ebya thukasombolha nga byanga hamba bithi okw’iramya erya thukaha Yehova.

4. Ni musingyi wahi we Biblia owanga thuwathikya thukasombolha eby’eriyitsemesya?

⁴ Thukabya thukayihayo oku Yehova, thukayilhagha erimukolera omwa ngebe yethu yosi. (Soma Omugambuli 5:4.) Thukayilhagha ‘erikolha ebyosi busana n’eriha olhukengerwa oku Nyamuhanga.’ (1 Abanya Korinto 10:31) Eki kikamanyisaya kithi thuyihereyo oku Nyamuhanga n’omughulhu thuli okw’ilhuhuka kutse eriyitsemesya, butsira omughulhu thuli okwa mihindano kutse omw’ithulira lisa.

5. N’iramya eriri lithi erya thutholere ithwaha Yehova?

⁵ Obuli kindu ekya thukakolha omwa ngebe kihambire okw’iramya erya thukaha Yehova Nyamuhanga. Paulo mwasoborera eki omughulhu abugha athi: “Muyihe oku Nyamuhanga ng’obuhere obuliho, kandi obubuyirire, obukamutsemesaya.” (Abanya Roma 12:1) Yesu mwabugha athi: “Wanze Omukama Nyamuhanga wawu n’omuthima wawu wosi, n’ekirimu kyawu kyosi, n’obulengekania  bwawu bwosi, n’amaaka wawu wosi.” (Mariko 12:30) Mughulhu wosi thukanza ithwaha Yehova y’ekibuya. Omwa Israeli eyakera, abandu ibakabya bakaherera Yehova y’ekisoro, ibatholere eriha ekyuwene ndeke. Ekisoro kyamabya ikiri kw’obulema, Nyamuhanga iniakakighana. (Abalawi 22:18-20) Kuthya, nethu Yehova angana ghana eriramya lyethu. Athi?

6, 7. Eriyitsemesya lyethu lyanga hamba lithi okw’iramya erya thukaha Yehova?

⁶ Yehova akathubwira athi: “Mwasyabya babuyirire, ngoku naghe nyibuyirire.” (1 Petero 1:14-16; 2 Petero 3:11) Yehova iniakendi ligha eriramya lyethu irinalyabya iribuyirire, kutse irihenirye. (Eryibuka Ebihano 15:21) Eriramya lyethu si ryanga henia thwamabya ithune mukolha ebindu ebya Yehova akapona, ng’eby’obutswatswa, eby’obwithi, kutse eby’esyombinga. (Abanya Roma 6:12-14; 8:13) Kandi ikyangana ponesya Yehova thwamayitsemesya omwa bindu ng’ebi. Ebi ibyangana kinia eriramya lyethu kandi Yehova iniathalighalyo kandi ibyangana tsandya obughuma bwethu nayu.

⁷ Neryo ibbwa thwanga sombolha thuthi ndeke eby’eriyitsemesya? Ni misingyi yahi eyanga thuwathikya eriminya eriyitsemesya erikalighawa n’erithalighawa?

8, 9. N’iyitsemesya lyahi erya thukayihighulhako? Kandi busana naki?

⁸ Munabwire hali miringo mingyi y’eriyitsemesya. Eyindi yina tholere okwa Bakristayo, aliwe eminene siyitholere. Eritsuka, thuthalebya nga ni yitsemesya lyahi erya thutholere ithwayihighulhako.

⁹ Omwa syofilimu nyingyi, emithahulha ye Intaneti, esyotivi, emisathu y’esyovidiyo, n’esyonyimbo nyingyi  muli eby’obusingiri, eby’obwithi, n’eby’emirimu-limu. Ebindu ebithuwene bikana kanganibawa omwa mibere eyikabya nga yuwene kandi eyikatsemesaya. Aliwe Abakristayo batholere ibalhangira bathi bakaghana eby’eriyitsemesya ebithehambangana n’ebihano bya Yehova ebihenirye. (Emibiri 15:28, 29; 1 Abanya Korinto 6:9, 10) Thukabya thukaghana eby’eriyitsemesya ng’ebyo, thukakanganaya Yehova ku thuponire ekibi.​—Esyonyimbo 34:14; Abanya Roma 12:9.

10. Ni kyahi ekyanga lhwiririra omw’isombolha eby’eriyitsemesya ebithuwene?

¹⁰ Aliwe abandi bakayowa nga sihali kibi eriyitsemesya omwa by’obwithi, eby’obutswatswa, kutse eby’esyombinga. Bakabugha bathi: ‘Ibbwa biwithe butsibuki? Nibya singendi syakolha ebindu ng’ebi.’ Thwamalengekania thuthya, thukabya ithukayitheba ithwe bene-bene. E Biblia yikabugha yithi: “Omuthima ni w’eritheba kwilhaba emyatsi yosi, kandi alhwere nabi.” (Yeremia 17:9) Thwamayitsemesya omwa bindu ebya Yehova aponire, thwanga thoka thuthi eribugha thuthi thuponire ebindu ebi? Thukabya thukongera eriyitsemesya mubyo, kwa thukan’ongera thuthya eribilhangira nga byuwene. Endambi iyikendi hika, obunya muthima-thima bwethu ibwatseka n’erileka erithukunga thukanza erithwamu nabi.​—Esyonyimbo 119:70; 1 Timoteo 4:1, 2.

11. Abanya Galatia 6:7 hanga thuwathikya hathi erisombolha ndeke eby’eriyitsemesya?

¹¹ Ekinywe kya Nyamuhanga kikathubwira kithi: “Ekyo mundu akahera, kyo anemwendi syahulhulha.” (Abanya Galatia 6:7) Ni kwenene thwamayitsemesya omwa bindu ebithuwene, obuthuku ibwangana hika nethu ithwatsuka eribikolha. Ng’eky’erileberyako, abandi busana n’eriyitsemesya omwa by’obutswatswa, nabu  ibobene-bene babirikolhabyo. Aliwe Yehova akathuha obuwathikya obwa thukayithagha nuku thusombole ndeke eby’eriyitsemesya.

12. Ni kyahi ekyanga thuwathikya erisombolha ndeke eby’eriyitsemesya?

¹² Eby’eriyitsemesya ebindi binalhangirikire ngoku Yehova abiponire, kandi thunasi ku thutholere ithwayihighulha kubyo. Aliwe ibbwa byamabya isibilhangirikire ndeke? Yehova syali thuthondogholera ebya thutholere erilebya n’ebya thuthatholere, ebya thutholere erihulikirira, kutse erisoma. Anzire ithwakolesya obunyamuthima-thima bwethu obukangiriribwe ne Biblia. (Soma Abanya Galatia 6:5.) Yehova akathuha emisingyi, ni bugha ambu, ekwenene ye Biblia eyikathubwira amalengekania wiwe oko myatsi. Emisingyi eyi yikathuwathikaya erikangirirya obunyamuthima-thima bwethu. Yikathuwathikaya eriminya ‘ebyo Yehova anzire ithwakolha’ nuku thuthwemu ebikamutsemesaya.​—Abanya Efeso 5:17.

13. Busana naki Abakristayo sibali thwamu bighumerera bikahika okw’iyitsemesya? Aliwe ekikulhu okwa Bakristayo abosi ky’ekyahi?

¹³ Mughulhu mungyi, ebya Mukrisitayo owundi akasombolha ng’eby’eriyitsemesya byangana ghana erisosana n’ebya wundi. Busana naki? Kundi, ebya thwanzire sibisosene. Kandi, ekyo wundi angaligha, owundi angana kighana. Nomwabine, erithoka erithwamu ndeke, Abakristayo abosi batholere ibaghendera okwa misingyi ye Biblia. (Abanya Filipi 1:9) Emisingyi eyi iyikendi thuwathikya erisombolha eby’eriyitsemesya ebya Nyamuhanga akaligha.​—Esyonyimbo 119:11, 129; 1 Petero 2:16.

14. (a) Ni kyahi eky’erilengekaniako bikahika okw’ikolesya obuthuku? (b) Ni habulha lyahi erya Paulo aha Abakrisitayo?

 ¹⁴ Ekindi eky’erilengekaniako bw’obuthuku obwa thukaghunza omw’iyitsemesya. Eki kyangana leka ithwaminya nga thukalhangira thuthi eriyitsemesya. Ithwe ng’Abakrisitayo, erikolera Yehova kya kindu kikulhu omwa ngebe yethu. (Soma Matayo 6:33.) Aliwe omwa buthaminya, ithwangana leka eriyitsemesya iryathulira buthuku bunene. Paulo mwahabulha Abakrisitayo athi: “Neryo muyitheghaye ndeke simusibe ng’abandu bakiru, nikwa ng’abandu b’amenge. Simulhabaye ebiro ebi bya buyira.” (Abanya Efeso 5:15, 16) Neryo thutholere ithwahiraho olhubibi okwa buthuku obwa thukakolesaya omw’iyitsemesya  n’erilhangira thuthi erikolera Nyamuhanga kya thukahira embere omwa ngebe yethu.​—Abanya Filipi 1:10.

15. Thukayitheghaya thuthi okwa by’eriyitsemesya ebyangana tsandya obughuma bwethu na Yehova?

¹⁵ Ahathe erithika-thika, thutholere ithwaghanira ighuma eby’eriyitsemesya ebya Yehova aponire. Kandi ibbwa eriyitsemesya erya thwangabya nga thukathika-thikira? Thunatholere ithwayitheya kulyo? Thalengekania oku kino. Wamabya iwune mughenda omwa kayira akali okwa kithwe, iwunemwendi lhaba hakuhi-kuhi n’engwangwa? Eyihi. Wamabya iwukanathwalha engebe yawu mw’ey’obughuli, isiwendi hika ahangahira engebe yawu y’omwa kabi. Kwabine bithya n’okw’iyitsemesya. Ekinywe kya Nyamuhanga kikathubwira kithi: “Wulhusaye ekisando kyawu ky’okwa kibi.” (Emisyo 4:25-27) Kwesi sithuli subulira okw’iyihighulha okwa by’eriyitsemesya ebya thwasi thuthi si byuwene lisa, aliwe thukayihighulha n’okwa bya thukalhangira nga sibitholere kandi ebyangana tsandya obughuma bwethu na Yehova.

16. (a) Ni byahi ebya Yehova aponire? (b) Thukakanganaya thuthi ku thuponire ebya Yehova aponire?

¹⁶ Omuhandiki w’esyonyimbo athi: “Omwami Mukulhu anzire abandu abakakwa ebibi by’obusu.” (Esyonyimbo 97:10) E Biblia yikathubwira amalengekania n’eriyowa lya Yehova. Yibulhaye ebya wuk’igha nga byanga kuwathikya bithi erilhangira emyatsi ngoku Yehova akalhangirayo. Ng’eky’erileberyako, thukigha ngoku Yehova aponire “olhulimi lhw’eribiha, n’ebyalha ebikutha omusasi owathe kw’olhubanza, omuthima owakayitheghekera erikandayirira libi, n’ebisando ebyanguhire okwa  bibi.” (Emisyo 6:16-19) Thukigha ngoku thutholere eriyihighulha okwa “erisingira, . . . erisaba esyosanamu, erilhaghulha, . . . obuha, erihithana, . . . eritsura, erikunda, n’emyatsi yosi eyiri ng’eyi.” (Abanya Galatia 5:19-21) Wanamalhangira ngoku emisingyi ye Biblia eyi yangana kuwathikya erisombolha eby’eriyitsemesya? Thwanzire erighendera okwa misingyi ya Yehova omwa ngebe yethu yosi, omughulhu thuli n’abandi n’omughulhu thuli ithwibene. (2 Abanya Korinto 3:18) Omo kwenene, ebya thukakolha ithune ithwibene bikabisulha nga thuli bandu abali bathi.​—Esyonyimbo 11:4; 16:8.

17. Thuthe thwasombolha eby’eriyitsemesya, ni bibulyo byahi ebya thutholere ithwayibulya?

¹⁷ Kwesi, omughulhu wukasombolha eby’eriyitsemesya, yibulhaye: ‘Ebya ngasombolha bikendi hamba bithi okwa bughuma bwaghe na Yehova? Kikendi hamba kithi okwa bunyamuthima-thima bwaghe?’ Thulebaye eyindi misingyi eyanga thuwathikya thukasombolha eby’eriyitsemesya.

18, 19. (a) Ni habulha lyahi erya Paulo aha Abakristayo? (b) Ni misingyi yahi eyanga thuwathikya erisombolha ndeke eby’eriyitsemesya?

¹⁸ Thukabya thukasombolha eby’eriyitsemesya, thukabya ithwamasombolha ebya thukendyusulya omwa bulengekania bwethu. Paulo mwahandika athi: “Musulhaye omwa malengekania wenyu mw’eby’ekwenene, eby’erisikibwa, ebithunganene, ebibuyirire, ebyanganzwa, n’eby’erisimwa.” (Abanya Filipi 4:8) Thwamusulya omwa bulengekania bwethu mw’ebibuya ng’ebi, ithwangana bugha thuthi: “Ebinywe byaghe n’amalengekania w’omuthima waghe birighawe omwa meso wawu, iwe Mwami Mukulhu.”​—Esyonyimbo 19:14.

¹⁹ Yibulhaye: ‘Ni bindu byahi ebyangusulhaya omwa  bulengekania bwaghe? Ngabya nabirilebya efilimu ndebe, nganabya n’amalengekania awakatsemesaya n’erihumulikania? Ngana yowa buholho, eribya n’obunyamuthima-thima obuhenirye? (Abanya Efeso 5:5; 1 Timoteo 1:5, 19) Ngana yowa bwiranda erisaba Yehova? Kutse ngayowa nabi? Mbwino eriyitsemesya likaleka ingalengekania okwa by’obwithi kutse eby’obutswatswa? (Matayo 12:33; Mariko 7:20-23) Eriyitsemesya eryanga sombolha, likanaleka ingasosekanibwa n’emyatsi ey’ekihugho kino?’ (Abanya Roma 12:2) Erisubirya lyethu erikalhua okwa muthima likendi thuwathikya erilhangira ekya thutholere ithwakolha obughuma bwethu na Yehova eribya ibunaghumire. Thwanzire ithwasaba ng’omuhandiki w’esyonyimbo kw’asaba athi: “Wunyikakiraye okw’ithendi hira ameso okwa bithawithe mughaso.” *​—Esyonyimbo 119:37.

20, 21. Busana naki thutholere ithwalengekania okw’iyowa ly’abalikyethu thukasombolha eby’eriyitsemesya?

²⁰ Owundi musingyi mukulhu owathwanga lengekaniako w’ono: “Emyatsi yosi yangana kolhwa, nikwa emyatsi yosi siyirighasaki. Emyatsi yosi yangana kolhwa, nikwa emyatsi yosi siyirihimba. Omundu syasondaye endundi yiwe iyuwene-wene, nikwa asondaye endundi busana na mulikyabo.” (1 Abanya Korinto 10:23, 24) Eribya ithuwithe obughabe obw’erikolha ekindu kirebe, sikirimanyisaya kithi thutholere ithwakikolha. Thutholere ithwalengekania kutsibu erithwamu lyethu nga likahamba lithi okwa balikyethu.

 ²¹ Thuwithe obunyamuthima-thima obuthasosene. Ng’eky’erileberyako, obunyamuthima-thima bwawu bwangana kulighira erilebya endegheka ndebe ey’etivi. Neryo iwaminya ngoku endegheka eyo siyiritsemesaya mulikyethu mulebe. Iwukendi kolhaki? Nomwakine indi wuwithe obughabe bw’erilebyayo, wangana thwamu erithendi lebyayo. Busana naki? Kundi siwanzire ‘erikolha mulikyenyu ya nabi’​—kutse nibya ‘erikolha Kristo ya nabi.’ (1 Abanya Korinto 8:12) Sithwanzire erikolha ekindu ekyanga thwikalya Omukristayo mulikyethu.​—Abanya Roma 14:1; 15:1; 1 Abanya Korinto 10:32.

22. Thukendi kangania thuthi ku thuwithe amenge abandi Bakristayo bakathwamu?

²² Neryo ibbwa, obunyamuthima-thima bwawu bwamathendi kulighira erilebya, erisoma, kutse erikolha ekindu kirebe eky’owundi akayowa nga kyuwene? Kundi wanzire n’erisikya mulikyenyu siwutholere wukamuhathikana wuthi nayu asombole ebiri ng’ebyawu. Oyukaghendaya ematoka akabya inianasi ngoku abandi bangana thibithyayo kutse ibaghendya lyolho-lyolho, aliwe abosi ibabya inina bafuyi babuya. Kuthya, iwe n’owundi mulikyethu mwanganabya imunemughendera okwa misingyi ye Biblia aliwe inywe bosi imunawithe amalengekania awathasosene nga ni by’eriyitsemesya byahi ebitholere.​—Omugambuli 7:16; Abanya Filipi 4:5.

23. Ni kyahi ekikendi thuwathikya erisombolha ndeke eby’eriyitsemesya?

²³ Neryo, ni kyahi ekikethuwathikya erisombolha ndeke eby’eriyitsemesya? Thwamakolesya obunyamuthima-thima bwethu obukangiriribwe n’emisingyi ye Biblia, n’eritsomana balikyethu, ithukendi ithwamu ndeke. Kandi ithukendi tsema busana n’eribya ithwabirikolha “ebyosi busana n’eriha olhukengerwa oku Nyamuhanga.”