1-3. (a) Abandu bangyi bakalhangira bathi emibiiri yabu? (b) Ni bibulyo byahi ebya thukendi kaniako omwa sura eno?

ABANDU erithimba omwa kihugho kyosi bakakolha kutsibu eribana ebiyithawa byabu n’eby’amaka wabu. Abangyi sibanzire emibiiri yabu, nibya n’abandi bakasagha erikolha buli kiro. Wamabya ikwa wukayowa wuthya, wangakolhaki eritsemera omubiiri wawu? Wanga thunga wuthi amalengekania awuwene okwa mubiiri wawu?

² Yehova akathubwira athi: “Obuli mundu alye n’eripulya n’eritsemera ebibuya omwa mibiiri yiwe yosi. Ni lhusunzo lhwa Nyamuhanga.” (Omugambuli 3:13) Yehova mwathuhangika n’ekiyithawa ky’erianza erikolha. Akanza ithwatsemera ebya thukakolha.​—Soma Omugambuli 2:24; 5:18.

³ Neryo, ni kyahi ekyanga thuwathikya eritsemera omubiiri wethu? Ni mibiiri yahi eya Bakristayo batholere ibayihighulhako? Thwanga hamba-hambania thuthi ndeke omubiiri wethu n’eriramya Yehova ahathe eryeghemera lhuhandi lhughuma? Kandi ni mubiiri wahi mukulhu kutsibu ogho thwanga kolha?

4, 5. Yehova akalhangira athi erikolha?

⁴ Yehova iyuwene-wene anzire erikolha. Enzuko 1:1 hathi:  “Okw’itsuka Nyamuhanga mwahangika olhubulha n’ekihugho.” Nyamuhanga abere abirighunza erikolha ekihugho n’ebyosi ebiriko, mwabugha athi ebihangikwa biwe byosi ‘byuwene kutsibu.’ (Enzuko 1:31) Omuhangiki wethu mwatsemera ebyo abya iniabirikolha.​—1 Timoteo 1:11, NW.

⁵ Yehova syali athaleka erikolha. Yesu mwabugha athi: “Thatha waghe akakolha emighulhu yosi.” (Yoane 5:17) Nomwakine indi sithwasi ebyosi ebikaswekaya ebya Yehova abiribya iniane mukolha, thunasi ebighuma bya kubyo. Abiribya iniane musombolha abakendi syathabalha na Mughalha wiwe, Yesu Kristo, elhubulha. (2 Abanya Korinto 5:17) Kandi Yehova anemukolha kutsibu erisondolha n’eritheya abandu. Busana n’omubiiri w’erithulira omwa kihugho kyosi, esyomiliyoni sy’abandu bane muminya Yehova n’eribya n’amaha w’erisyabyaho okwa kihugho paradiso.​—Yoane 6:44; Abanya Roma 6:23.

6, 7. Yesu ni mukoli oyuli athi?

⁶ Nga Thatha wiwe, Yesu anzire erikolha. Abere athalyasa okwa kihugho, Yesu abya “mukoli mukulhu” wa Nyamuhanga, amasangira omw’ihangika ebindu byosi omwa lhubulha n’okwa kihugho. (Emisyo 8:22-31; Abanya Kolosai 1:15-17) Yesu iniane okwa kihugho, mwalholha embere erikolha kutsibu. Iniane mulhwana mulere, mwabya mubatsi, obundi ng’eriranda n’erihimba esyonyumba. Yesu mwabya mukoli mubuya indi mwaminywa ‘ng’omubatsi w’esyombaho.’​—Mariko 6:3.

⁷ Aliwe, omubiiri wa Yesu omukulhu kutsibu abya iry’erithulha engulhu yuwene n’erikangirirya abandu oku Yehova. Aby’awithe myaka isathu n’embindi misa erighunza omubiiri wiwe oyo, kandi iniakakolha eritsuka omwa ngyakya-ngyakya erihika omwa kiro. (Luka 21:37, 38;  Yoane 3:2) Yesu iniakaghenda lhughendo lhuuli omwa syonzira esiri mw’engungu, erithulha engulhu yuwene okwa bandu bangyi kyamathokekana.​—Luka 8:1.

8, 9. Ni kyahi ekyaleka Yesu iniatsemera omubiiri wiwe?

⁸ Oku Yesu, erikolha omubiiri wa Nyamuhanga iriri ng’ebyalya. Omubiiri oyu iniakamuha akaghalha n’amaaka. Ihakanabya ebiro Yesu iniakolha kutsibu iniabya isyanga bana n’endambi y’erirya. (Yoane 4:31-38) Mwakolesya akaghisa kosi-kosi eriwathikya abandi erigha oku Thatha wiwe. Ekyo ky’ekyaleka iniabya iniangana bwira Yehova athi: “Munakusikya okwa kihugho, nabiribugha omubiiri ogho wamba erikolha.”​—Yoane 17:4.

⁹ Ahathe erithika-thika, Yehova na Yesu bakakolha kutsibu n’eritsemera ebya bakakolha. Thwanzire ‘ithwagherererya Nyamuhanga,’ kandi thwanzire ‘ithwakwama olhughobe lhwa Yesu.’ (Abanya Efeso 5:1; 1 Petero 2:21) Kya kikaleka ithwalengaho erikolha kutsibu n’erilhangira thuthi thukakolha ndeke ekyosi-kyosi ekya thukakolha.

10, 11. Ni kyahi ekyanga thuwathikya eribya n’amalengekania awuwene okwa mubiiri owathuwithe?

¹⁰ Ithwe ng’abandu ba Yehova, thukakolha kutsibu eribana ebya thukayithagha n’eby’amaka wethu. Thukanza ithwatsemera omubiiri wethu, aliwe eki kyangana kalha. Neryo, thwanga kolhaki thwamabya isithuli tsemera omubiiri owathuwithe?

¹¹ Ibya n’amalengekania awuwene. Thwanganabya isithwanga thoka erihindulha emibere eya thulimu, aliwe thwangana hindulha amalengekania wethu. Eriminya ebya Yehova akathuyithaghako lyangana wathikya. Ng’eky’erileberyako: Yehova akanza oyuli muthwe w’eka  iniatsomana ebiyithawa by’eka yiwe ngoku angathoka. Nibya ne Biblia yikabugha yithi oyukalemawa eritsomana eka yiwe ni “mubi kwilhaba oyuthikirirye.” (1 Timoteo 5:8) Wamabya iwuli muthwe w’eka, wukakolha kutsibu eritsomana eka yawu. Mbulha wanzire omubiiri wawu kutse wuponiregho, wunasi ngoku wukatsemesaya Yehova wamatsomana eka yawu.

12. Erikolha kutsibu n’eribya w’okwenene kikathughasira kithi?   

¹² Kolha kutsibu kandi ibya w’okwenene. Eki kyangana leka ikyakwolhobera eritsemera omubiiri wawu. (Emisyo 12:24; 22:29) N’oyukuhere omubiiri iniakendi kuyikethera. Abinye mibiiri bakanza abakoli abali mw’okwenene kundi sibang’iba esyosente, ebindu, kutse endambi. (Abanya Efeso 4:28) Kandi ekikulhu kitsibu, Yehova akaminya omughulhu wukakolha kutsibu n’eribya mw’okwenene. Iwanganabya ‘n’obunyamuthima-thima obuwene’ kundi wunasi ku wukatsemesaya Nyamuhanga oyo wanzire.​—Abaebrania 13:18; Abanya Kolosai 3:22-24.

13. Ni kindi kyahi ekyanga lhwiririra omw’ibya b’okwenene okwa mubiiri?

¹³ Minya ngoku emibere yawu aho wukakolera yanganaha Yehova y’olhukengerwa. Eki kikathuha eyindi nzumwa y’eritsemera omubiiri wethu. (Tito 2:9, 10) Obundi nibya n’abawukakolha nabu bangananza erigha e Biblia busana n’emibere yawu mibuya.​—Soma Emisyo 27:11; 1 Petero 2:12.

14-16. Ni byahi ebya thutholere ithwatsuka eriminya thukasombolha omubiiri?

¹⁴ E Biblia siyiri thondogholha emibiiri eya Mukristayo atholere erikolha n’eyo athatholere erikolha. Aliwe  yiri mw’emisingyi eyanga thuwathikya erithwamu ndeke thukasombolha emibiiri. (Emisyo 2:6) Omw’ikolesya emisingyi ye Biblia, ithwangana yibulya bino.

¹⁵ Omubiiri oyu akendi nyiyithaghisya erikolha ekindu ekya Yehova akaghana? Thwabirigha okwa bindu ebya Yehova aponire, ng’eriba n’eribugha amabehi. (Eriluayo 20:4; Emibiri 15:29; Abanya Efeso 4:28; Eribisulirwa 21:8) Neryo sithuli kolha mubiiri wosi-wosi owathe lighirana n’emisingyi ya Yehova.​—Soma 1 Yoane 5:3.

 ¹⁶ Omubiiri oyu akasighika kutse erikulha-kulhania emitse eya Yehova aponire? Ng’eky’erileberyako, wanga kilhangira wuthi wulyahebawa omubiiri w’eryangirira abandu okwa kiliniki eya bakalhusiraya mw’amakule? Erikolha ng’omuthangiriri si kibi. Aliwe wunasi amalengekania wa Yehova okw’iha mw’obukule. Nomwakine indi siwe wukendi wathikya oyuk’iha mw’obukule, embere sya Yehova nawu isiwendi yowa iwabirisangira omwa kibi ekyo?​—Eriluayo 21:22-24.

17. Ni kyahi ekyanga thuwathikya erithwamu ebikatsemesaya Nyamuhanga?

¹⁷ Omw’ikolesya emisingyi ya Nyamuhanga, ithwanganabya ng’abandu abakanibweko omu Abaebrania 5:14, NW, “ababirikangirirya amaaka w’obulengekania bwabu omw’ibegheresyagho erighabulha ekibuya n’ekibi.” Thayibulya: ‘Namaligha omubiiri oyu, ikinemwendi thwikalya abandi? Omubiiri oyu akendi leka ingasigha abaana baghe n’omwanze waghe inaghenda haali kutse omwa kindi kihugho? Eki kikendi bahambako kithi?’

18. Busana naki kyangana kalha erihira eriramya lyethu ly’embere?

¹⁸ Kyangana kalha erihira eriramya Yehova ly’embere omwa “mighulhu eyikalire” eno. (2 Timoteo 3:1) Kyangana kalha eribana omubiiri owathe angahwa. Thutholere ithwatsomana ab’eka yethu, aliwe thunasi ngoku eriramya lyethu ly’eritholere iryabya embere. Sithwanga lighira ebindu by’omubiri eribya embere omo ngebe syethu. (1 Timoteo 6:9, 10) Neryo thwanga ‘minya thuthi eby’omughaso munene’ kandi ithune muha n’eka yethu y’ebiyithawa?​—Abanya Filipi 1:10, NW.

19. Eriyikethera Yehova kikathuwathikaya kithi erithendyeghemera lhuhandi lhughuma omwa by’omubiiri?

 ¹⁹ Yikethere Yehova n’omuthima wawu wosi. (Soma Emisyo 3:5, 6.) Thunasi ngoku Nyamuhanga anasi ebya thukayithagha kandi ngoku akathutsomana kutsibu. (Esyonyimbo 37:25; 1 Petero 5:7) Ekinywe kiwe kikathubwira kithi: “Simukwamirire erianza esyofranka, nikwa mutsemere ebyo muwithe. Kusangwa Nyamuhanga abiribugha athi: Singendi syakuleka na kera, kandi, singendi syakusighania nahake.” (Abaebrania 13:5) Yehova syalianza thukabya omw’ihangya-hangya ly’olhughumerera busana n’ebiyithawa by’eka yethu. Habw’emyaka mingyi, abirikangania ngoku anganaha abandu biwe b’ebya bakayithagha. (Matayo 6:25-32) Nomuthwangabya ithukakolha omubiiri owali athi, thukalengaho erigha Ekinywe kya Nyamuhanga, erithulira engulhu yuwene, n’erihindana okwa mihindano y’Ekikristayo.​—Matayo 24:14; Abaebrania 10:24, 25.

20. Thwang’olhobya thuthi engebe yethu?

²⁰ Ibya n’eriso erikathungerera kighuma. (Soma Matayo 6:22, 23, NW.) Eki kikayithaghisaya eriolhobya engebe nuku wuhweraye amalengekania w’okw’ikolera Yehova. Thunasi ngoku ni ky’obukiru erilighira esyosente, engebe eyuwene, eribya bikulhu kutsibu omwa ngebe kwilhaba obunywani bwethu na Nyamuhanga. Neryo kwesi, ni kyahi ekikendi thuwathikya erihira eby’omughaso by’embere? Thutholere ithwalengaho erithendibya mw’amabanza. Wamabya iwune mw’amabanza, kolha ekya wanga thoka erikehyagho kutse erithuhagho. Thwamathendi yitheya, ebindu by’omubiri ibyangana thwalha obuthuku bwethu n’akaghalha kethu kosi, neryo ithwabulha obuthuku bw’erisaba, erigha, kutse erithulira. Omwakanya k’erilighira ebindu by’omubiri  erithukalirya engebe, thukanza ithw’igha eritsemera ebiyithawa bikulhu “akalyo n’eky’eriyiswika.” (1 Timoteo 6:8) Kandi nomuthwangabya omwa mibere eyiri yithi, ni kibuya eribya ithune mulebya emibere yethu mughulhu wosi nuku thuminye ngoku thwanga kolera Yehova ya ndeke.

21. Busana naki thutholere ithwathwamu ekitholere eryasa embere omwa ngebe?

²¹ Minya eby’erihira embere ebitholere. Thutholere ithwakolesya ndeke endambi yethu, akaghalha kethu, n’ebindu byethu by’ekinyamubiri. Thwamathendi yitheya,  ebindu by’omughaso muke, ng’esukuru kutse esyosente, ibyangana thulira endambi yethu yosi. Yesu mwabugha athi: “Mutsuke erisondya Obwami.” (Matayo 6:33) Ebya thukasombolha, emibere yethu, ebya thukakolha buli kiro, n’ebilhubirirwa byethu ebyosi bikakanganaya ekya thukahira embere omwa mithima yethu.

22, 23. (a) Ithwe ng’Abakristayo, ni mubiiri wahi mukulhu owa thutholere ithwakolha? (b) Ni kyahi ekikendi thuwathikya eritsemera omubiiri wethu?

²² Omubiiri mukulhu owathuwithe ly’erikolera Yehova. Enguma y’okwa syonzira ngulhu ey’erikolera mw’eki ly’erithulira abandi b’engulhu yuwene. (Matayo 24:14; 28:19, 20) Nga Yesu, thwanzire ithwakolha omubiiri oyu ngoku thwanga thoka. Abandi babirihumira eyiri obuyithawa bunene bw’abathuliri. Abandi banemw’igha owundi mubughe nuku banga thulira abandu abakabugha omubughe oyo. Kanaya n’ababirikolha ebi, kandi babulhaye okw’ekyo. Ibakendi kubwira ngoku babiribana etseme omwa ngebe.​—Soma Emisyo 10:22.

²³ Munabwire, abangyi omw’ithwe bakaghunza buthuku bunene okwa mubiiri kutse ibangana kolha mibiiri muthina-muthina bakasonderya ab’eka yabu b’ebya bakayithagha. Yehova anasi ekyo, kandi akatsemera ekyosi-kyosi ekya thukakolha eritsomana eka yethu. Neryo kwesi ithwe bosi ka thugherereraye Yehova na Yesu omw’ikolha kutsibu, mbulha thukakolha mubiiri owali athi. Kandi thwibuke ngoku omubiiri wethu mukulhu w’ow’erikolera Yehova, n’erithulha engulhu yuwene ey’Obwami bwa Nyamuhanga. Eki kikendi thulethera etseme y’okwenene.