ERISOMO 05
E Biblia Muli Omwatsi wa Nyamuhanga
Yehova abirithuha ekihembo kibuyanga—ebitabu 66 ebyabirihirwa haghuma, e Biblia. Aliwe wangana yibulya: ‘E Biblia yahika yithi oko bandu? Omwinyeyo nindi?’ Leka thulebaye eby’erisubirya okwa bibulyo ebyo.
1. E Biblia yamabya iyahandikawa n’abandu, busana naki Nyamuhanga ya mwinyeyo?
E Biblia yahandikawa n’abahandiki nga 40 habw’emyaka eyilhabire omu 1,600, eritsuka 1513 E.K.K. erihika ng’omwa 98 E.K. Kandi abahandiki bayo balhua omwa mibere muthina-muthina. Aliwe, ebyosi ebyo bahandika bikalighirana. Eki kikathokekana kithi? Kundi Nyamuhanga ya Mwinye e Biblia. (Soma 1 Abanya Tesalonika 2:13.) Abahandiki mubathahandika amalengekania wabu. Aliwe, ‘mubabugha ebinywe ebyo Nyamuhanga ahabu, ibakasondolibawa n’omulimu abuyirire.’ a (2 Petero 1:21) Nyamuhanga mwakolesya omulimu wiwe abuyirire erisondolha, kutse erihira omwa balhume mw’omuhwa w’erihandika amalengekania wiwe.—2 Timoteo 3:16.
2. Mbwino e Biblia yangana ghasira obuli mundu?
‘Obuli kithunga ky’abandu, n’obuli kihanda, n’obuli mubughe, n’abandu’ bangana ghasirwa omwa ngulhu yuwene eyiri omwa Biblia. (Soma Eribisulirwa 14:6.) Nyamuhanga abirilhangira athi e Biblia yikabanika omwa mibughe mingyi kwilhaba ekindi kitabu kyosi-kyosi. Hakuhi obuli mundu munabwire anganasoma e Biblia. Eki kithokekene abandu nomubangabya ib’ikere hayi kutse ibakabugha mubugheki.
3. Yehova abiritheya athi e Biblia?
E Biblia muyahandikwa okwa bindu ebitheghunza buthuku bunene. Aliwe abandu abanzire e Biblia ibakabera erilhusya mw’esindi kopi, n’esyokopi esyo isyathasyalhusibwa mw’esindi omw’ikolesya ebyalha. Nomwakine indi abathabali n’abakulhu b’amadini ibakananza erighunzaho e Biblia, abandi babya ibanayitheghekire eritsama esyongebe syabu eritheyayo. Yehova syali athalighira owosi-wosi kutse ekyosi-kyosi erimukakirya erikania nethu. E Biblia yikabugha yithi: ‘Ekinywe kya Nyamuhanga wethu kikahangana kera na kera.’—Isaya 40:8.
THASYIGHA BINGYI
Minya bingyi okwa mibere Nyamuhanga asondoleramo abandu erihandika e Biblia, ngoku atheghayayo, kandi ngoku alhangira athi yikahika oko bandu.
4. E Biblia yikabisulha Omwinyeyo
Mubughaye EVIDIYO. Neryo soma 2 Timoteo 3:16, mwanakania okwa bibulyo ebikakwamako.
-
E Biblia yamabya iyahandikawa n’abandu, busana naki iyahulhwa mwa Kinywe kya Nyamuhanga?
-
Wukalengekanaya nina ky’amenge eriligha wuthi Nyamuhanga mwalhabya amalengekania wiwe omwa bandu erihandikagho?
Omundu angana bwira omuhandiki athi amuhandikire ebaruha, aliwe omwatsi owalimo iniabya ini w’omundu oyo. Kuthya, abandu mubahandika e Biblia, aliwe omwatsi owalimo alhua oku Nyamuhanga
5. E Biblia yikasabuka
Kundi e Biblia yikalhua oku Nyamuhanga, akalhangira athi akatheghayayo. Eritsuka kera, abandu ab’obuthoki babirilengesya erighunzaho e Biblia. Abakulhu b’amadini mubathanza abandu bakasomayo. Abandu bangyi babiritsama esyongebe syabu eritheya e Biblia, nomuhane erihakanisibwa erikalire. Eriminya omughuma w’okwa balhume ng’abo, mubughaye EVIDIYO, mwanakania okwa bibulyo ebikakwamako.
-
Eriminya ngoku ni bingyi ebyakolhawa eritheya e Biblia kyangana leka iwanza erisomayo? Busana naki?
Soma Esyonyimbo 119:97, mwanakania okwa kibulyo kino:
-
Ni kyahi ekyabirileka abandu bangyi ibatsama esyongebe syabu erihindulha n’erighaba e Biblia?
6. Ekitabu ky’abandu abosi
E Biblia ky’ekitabu ekyamabirithahindulhwa n’erighabwa kutsibu kwilhaba ebindi bitabu byosi. Soma Emibiri 10:34, 35, mwanakania okwa bibulyo bino:
-
Busana naki Nyamuhanga anzire Ekinywe kiwe ikyahindulhwa n’erighabwa kutsibu?
-
Ni kyahi ekikakutsemesaya okwa Biblia?
Hakuhi abandu
100 okwa 100
omwa kihugho
bangana soma e Biblia omwa mubughe owa banga yitheghererya
Yine omwa mibughe eyilhabire omu
3,000
eyosi kutse omwa bitsweka
5,000,000,000
Kikalengekanibawa indi oyu w’omughanzo w’esyokopi esyabirihulhukibwa,
sihali ekindi kitabu ekyanga yirenga kuyo
ABANDI BAKABUGHA BATHI: “E Biblia ni kitabu kya kera buyira ekyahandikawa n’abandu.”
-
Iwe wangabugha wuthiki?
-
Ni byahi ebikakanganaya ngoku e Biblia ni Kinywe kya Nyamuhanga?
OMWA BIKUHI
E Biblia ni Kinywe kya Nyamuhanga, kandi abirilhangira athi yikahika okwa bandu bosi.
Eriyibukya
-
Thukamanyisayaki thukabugha thuthi Nyamuhanga mwasondolha abandu erihandika e Biblia?
-
Ni kyahi ekikakuswekaya okw’isabuka, erihindulhwa, n’erighabwa lye Biblia?
-
Eriminya ngoku Nyamuhanga abirihiraho akaghalha akosi aka nuku akaniranaye nawu kikaleka iwayowa wuthi?
MINYA BINGYI
Soma okwa bihambire okwa Biblia—eritsuka okwa mikunzo y’erimbere-mbere erihika okwa syombindulha esya munabwire.
“Ngoku e Biblia Yathuhikako” (Awake!, Okwerikuminakughuma 2007)
Minya ngoku e Biblia yabirisabuka ebindu bisathu ebyanga lekire iyahwaho.
Lebaya ngoku abandi bayitsama erihindulha e Biblia.
E Biblia yabirilhusibwamo esindi kopi n’erihindulhwa mirundi mingyi omo yindi mibughe. Wanga minya wuthi ngoku omwatsi we Biblia syathahinduka?
“Mbwino e Biblia Yabirihinduka Kutse Erihengemibwa?” (Omwatsi okwa muthahulha)
a Ngoku kikendi kanibwako omw’Isomo 7, omulimu abuyirire ni kaghalha ka Nyamuhanga akakakolha.
