ERISOMO 07

Yehova Ni Mundu Oyuli Athi?

BUGHAYA

Wukabya wukalengekania oku Yehova Nyamuhanga, ni kyahi ekikasa omo malengekania wawu? Abandi bakalengekanaya bathi ni w’obuthoki bunene kandi akubahisaya neryo bathi sikyanga thokekana eriyithunda okw’iyo. Kutse wukalengekanaya wuthi si mundu, aliwe ni kindu ekiwithe obuthoki ng’omulhumo w’obuthuku? Kwenene, Yehova ni mundu oyuli athi? Erilhabira omwa Kinywe kiwe, e Biblia, Yehova akabisulha emighuma y’okwa mibere yiwe, kandi ngoku akutsomene.

1. Busana naki sithwanga thoka erilhangira Nyamuhanga?

‘Nyamuhanga ni Mulimu.’ (Yoane 4:24) Yehova syawithe omubiri w’omunyoku. Ni mundu w’ekirimu oyuwikere elhubulha, eyo thuthe thwanga lhangira.

2. Emighuma y’okwa mibere ya Yehova ni yahi?

Nomwakine indi Yehova syalilhangirawa, ni Mundu oyuwithe emibere eyikaleka abamwasi ibamwanza. E Biblia yikabugha yithi: “Yehova anzire obulingirirania, kandi syendi syasighania abathaleghulha biwe.” (Esyonyimbo 37:28, NWT) Kandi ni ‘w’erighanyira kutsibu kandi akaghanyira,’ kutsibu-tsibu abandu abakaghalhawa. (Yakobo 5:11) “Omwami Mukulhu ali hakuhi n’ab’emithima ibbunangikire, akalhamaya abathawithe amaha.” (Esyonyimbo 34:18) Kandi wunalhue wasi ngoku ebyo thukakolha bikahamba oku Yehova? Omundu oyukathwamu erikolha ebithuwene akamuponesaya kandi iniamwitha obulighe. (Esyonyimbo 78:40, 41) Aliwe omundu oyukathwamu erikolha ebihikire akaleka iniatsema.—Soma Emisyo 27:11.

3. Yehova akakanganaya athi kw’athwanzire?

Olhwanzo w’omubere mukulhu wa Yehova. Erithwalira haghuma, ‘Nyamuhanga ni lhwanzo.’ (1 Yoane 4:8) Yehova akabisulha olhwanzo lhwiwe erilhabira omwa Biblia n’omwa bindu ebyo abirihangika. (Soma Emibiri 14:17.) Ng’eky’erileberyako, thalengekania ngoku thukwikire. Abirithuha amaaka w’erilhangira esyorangyi esyuwene, erihulikirira omuziki owuwene, n’erisihirwa ebyalya. Anzire ithwatsemera engebe.

THASYIGHA BINGYI

Minya ekyo Nyamuhanga akakolesaya erikolha ebindu ebikaswekaya. Neryo lhangira ngoku Yehova akabisulha n’erikangania emibere yiwe mibuyanga.

4. Omulimu abuyirire—akaghalha ka Nyamuhanga akakakolha

Nethu ngoku thukanakolesaya ebyalha byethu erikolha omubiiri, Yehova nayu akakolesaya omulimu wiwe abuyirire. E Biblia yikabugha yithi omulimu abuyirire si Nyamuhanga, aliwe ni kaghalha ako Nyamuhanga akakolesaya erikolha ebindu. Soma Luka 11:13 na Emibiri 2:17, mwanakania okwa bibulyo bino:

Nyamuhanga “asyuthulira omulimu” wiwe okwa bakasabagho. Mbwino wukalengekanaya omulimu abuyirire ni Nyamuhanga, kutse ni kaghalha ka Nyamuhanga akakakolha? Busana naki iwabugha ekyo?

Yehova akakolesaya omulimu wiwe abuyirire erikolha ebindu ebikaswekaya. Soma Yobu 33:4 na 2 Petero 1:20, 21, mwanakania okwa kibulyo kino:

Ni nzira nga syahi esyo Yehova abirikoleseryamu omulimu wiwe abuyirire?

5. Yehova awithe emibere eyuwenenga

Musa abya inina mughombe muthaleghulha wa Nyamuhanga, aliwe mwanza eriminya ndeke Omuhangiki wiwe. Neryo Musa mwabwira Nyamuhanga athi: “Wunyikangaye esyonzira syawu, inathoka erikuminya.” (Eriluayo 33:13) Yehova mwabisulira Musa emighuma y’okwa mibere Yiwe. Soma Eriluayo 34:4-6, mwanakania okwa bibulyo bino:

Ni mibere yahi eyo Yehova abisulira Musa?
Ni mibere yahi eya Yehova eyikakutsemesaya?

6. Yehova akatsomana abandu

Abandu ba Nyamuhanga, Abaebrania, babya bakobe e Misiri. Eriaghalhwa lyabu mulyahamba lithi oku Yehova? Mubughaye e AUDIO n’erikwama-kwamania, kutse soma Eriluayo 3:1-10. Neryo mukanaye okwa bibulyo ebikakwamako.

AUDIO: Yehova Mwahambwako Bakaghalhwa (2:45)

Omwatsi oyu akakweghesayaki okwa mibere Yehova akayowiramo abandu bakaghalhwa?—Lebaya omulhondo 7 na 8.
Wukalengekanaya kwenene Yehova ananzire eriwathikya abandu kandi mbwino angana thoka erikolha ekyo? Busana naki?

7. Ebihangikwa bikabisulha emibere ya Yehova

Yehova akabisulha emibere yiwe erilhabira omwa bihangikwa. Mubughaye EVIDIYO. Neryo soma Abanya Roma 1:20, mwanakania okwa kibulyo ekikakwamako.