ERISOMO 09

Yithunde Hakuhi na Nyamuhanga omw’Isaba

BUGHAYA

Wunewathayowa iwukayithagha obusondoli omwa ngebe? Wunawithe ebibulyo bikulhu-bikulhu ebyo wanzire iwabanako eby’erisubirya? Mbwino wukayithagha erihumulikanibwa? Wunanzire iwayowa iwuli hakuhi na Yehova? Omusabe angana kuwathikya omwa byosi ebyo. Aliwe erisaba erihikire ly’eryahi? Nyamuhanga akanahulikirira emisabe yosi? Wanga kolhaki erilhangira wuthi akowa emisabe yawu? Thulebaye.

1. Thutholere ithwasabandi, kandi ni byahi ebyo thwanga saba?

Yesu mwathukangirirya athi thutholere ithwasaba Thatha wethu w’elhubulha musa. Yesu iyuwene-wene mwasaba Yehova. Mwabugha athi: ‘Musabe muthya, muthi, Thatha wethu oyuli elhubulha.’ (Matayo 6:9) Thukabya thukasaba Yehova, thukaghumaya obunywani bwethu nayu.

Thwangana saba ekyosi-kyosi. Aliwe, Nyamuhanga erisubirya emisabe yethu, yitholere iyahambangana n’erisonda liwe. ‘Thwamabulya kindu omw’isonda lya Nyamuhanga, akathwowa.’ (1 Yoane 5:14) Yesu mwaha eby’erileberyako eby’ebindu ebitholere ebyo thwangahira omo misabe yethu. (Soma Matayo 6:9-13.) Eryongera okw’isaba Nyamuhanga y’ebya thukayithagha, isithwibirirawa erimusima busana n’eby’akathukolera n’erimusaba eriwathikya abandi.

2. Thutholere ithwasaba thuthi?

E Biblia yikathuhira mw’omuhwa ‘w’eryuthulha omuthima wethu ng’amaghetse embere sy’ameso w’Omukama.’ (Ekiriro 2:19) Neryo emisabe yethu yitholere iyalhua oko muthima. Thwangana saba omwa mulenge owakowika kutse kikuthu-kuthu kandi ithunayithekire omwa mibere yosi-yosi ey’erimusikya. Thwangana saba endambi yosi-yosi kandi ahosi-hosi.

3. Nyamuhanga akasubiraya athi emisabe yethu?

Akasubirayayo omwa nzira muthina-muthina. Yehova abirithuha Ekinywe kiwe, e Biblia, omo thukabana eby’erisubirya okwa bibulyo byethu. Erisoma Ekinywe kya Nyamuhanga kyanganaha ‘amenge oko yukabulhagho.’ (Esyonyimbo 19:7; soma Yakobo 1:5.) Nyamuhanga anganathuha obuthekane thukabana ebitsibu. Kandi angana hira omwa baramya biwe mw’omuhwa w’erithuwathikya omughulhu thuli omwa buyithawa.

THASYIGHA BINGYI

Minya ngoku wanga saba emisabe eyikalhua okwa muthima eyikatsemesaya Nyamuhanga, kandi minya ngoku erisaba lyanga kughasira.

4. Hane ebyo thwanga kolha Nyamuhanga eriowa emisabe yethu

Ni byahi ebyanga leka Nyamuhanga iniowa emisabe yethu? Mubughaye EVIDIYO.

EVIDIYO: Nyamuhanga Akanowa Emisabe Yosi?—Akatsweka kake (2:42)

Yehova anzire ithwamusaba. Soma Esyonyimbo 65:2, mwanakania okwa bibulyo bino:

Wukalengekanaya ‘Oyukasubiraya erisaba’ ananzire iwamusaba? Busana naki?

Thutholere ithwalengaho erighendera okwa bihano bya Nyamuhanga thwamabya thwanzire owe emisabe yethu. Soma Mika 3:4 na 1 Petero 3:12, mwanakania okwa kibulyo kino:

Thutholere ithwakolha kyahi nuku Yehova owe emisabe yethu?

Omwa lhuhi, abakalhwa abosi bakasaba erisinga. Nina ky’amenge erilengekania thuthi Nyamuhanga iniasubirya emisabe eyi?

5. Emisabe yethu yitholere iyalhua okwa muthima

Abandi bandu babirikangiriribwa erisubirira omwa misabe mirebe eyo babirihambira omwa muthwe. Mbwino Nyamuhanga kw’anzire ithwamusaba thuthya? Soma Matayo 6:7, mwanakania okwa kibulyo kino:

Wanga yihighulha wuthi ‘okw’isubirira’ omwa binywe bighumerere omwa misabe yawu?

Obuli kiro, iwangana lengekania okwa mughisa mulebe ogho wulyabana neryo iwasima Yehova busana n’ekyo. Wamakolha eki obuli kiro ahabw’ewiki, neryo iwukendibya iwamabirihira omw’isaba lyawu mw’ebindu nga musanju ebiri mbaghane isiwuthabisubiriramo.

Thatha mubuya anzire omwana wiwe iniamubwira ekiri okwa muthima. Kuthya, Yehova anzire ithwamusaba erilhua okwa muthima

6. Omusabe ni kihembo erilhua oku Nyamuhanga

Omusabe anga thughumya athi omwa mibere eyuwene n’eyithuwene? Mubughaye EVIDIYO.

EVIDIYO: Omusabe Akaleka Ithwaghuma (1:32)

E Biblia yikalhaghanisaya yithi erisaba lyangana leka ithwathekana omwa bulengekania. Soma Abanya Filipi 4:6, 7, mwanakania okwa bibulyo bino:

Nomwakine indi mughulhu wosi emisabe siyirileka ebitsibu bikahwaho, yikawathikaya yithi?
Ni bindu nga byahi ebyo wanzire iwahira omwa misabe yawu?

Wunalhue wasi?

Ekinywe “amina” kikamanyisaya “kwabinabye bithya” kutse “kwenene.” Eritsuka omwa buthuku bwe Biblia, ekinywe “amina” kikabughawa omusabe akahwamo.—Esyonyimbo 41:13.

7. Bana obuthuku bw’erisaba

Hanganayira ithwathunga bingyi eby’erikolha ithw’ibirirwa erisaba. Oku Yesu, erisaba kyabya kithi kindu kikulhu? Soma Matayo 14:23 na Mariko 1:35, mwanakania okwa bibulyo bino:

Yesu iniakakolhaki eribana obuthuku bw’erisaba?
Wanga saba mughulhu wahi?

ABANDI BAKABUGHA BATHI: “Nyamuhanga syalisubiraya emisabe.”

Iwe wanga bugha wuthiki?

OMWA BIKUHI

Emisabe eyikalhua okwa muthima yikathuthunda hakuhi na Nyamuhanga, iyaleka ithwathekana omwa bulengekania, kandi iyathuha akaghalha ako thukayithagha eritsemesya Yehova.