ERISOMO 10
Emihindano y’Abema ba Yehova Yanga Kughasira Yithi?
Wunewathakokibwa okwa mihindano y’Abema ba Yehova? Wamabya isiwuli wathahindana kuyo, iwanganabya ng’oyukasagha eriyahindana kuyo omurundi w’erimbere. Iwangana yibulya: ‘Ni byahi ebikabya okwa mihindano eyi? Yikendi nyighasira yithi? Busana naki ingahindana kuyo?’ Omw’isomo lino, wukendi minya ngoku erihindana haghuma n’abandi kyangana kuthunda hakuhi na Nyamuhanga n’erikuwathikya.
1. Enzumwa ngulhu kutsibu ey’erihindana haghuma ni yahi?
Lhangira ngoku omuhandiki we Biblia akanganaya enzumwa ngulhu kutsibu ey’erihindana haghuma n’abandi: ‘Ngapipa Omwami Mukulhu omo syondeko.’ (Esyonyimbo 26:12) Kuthya, Abema ba Yehova bakabana etseme nene bakahindana haghuma. Omwa kihugho kyosi, obuli wiki bakahindana haghuma eripipa Nyamuhanga, eriimba, n’erisaba. Mirundi mike obuli mwaka, bakahindana haghuma okwa mihindano eminene-minene eriramya.
2. Ni byahi ebyo wang’igha okwa mihindano yethu?
Okwa mihindano, thukahira omuwatho okwa Kinywe kya Nyamuhanga, erikiminyikalya n’erikisoborera ndeke. (Soma Nehemia 8:8.) Okwa mihindano yethu, wuk’igha oku Yehova n’emibere yiwe mibuyanga. Neryo wukendibya wukongera eriminya olhwanzo olho akuwithire, wukendi yithunda hakuhi nayu. Kandi wukendi minya ngoku angakuwathikya eribana engebe eyuwene.—Isaya 48:17, 18.
3. Wanga ghasirwa wuthi omw’ihindana haghuma n’abandi okwa mihindano yethu?
Yehova akathubwira athi thutholere ‘ithwaghanirya ngoku thwang’ibukania oko lhwanzo n’emibiiri yuwene. Sithuleke erihindana lyethu haghuma.’ (Abaebrania 10:24, 25) Wamasa okwa mihindano yethu, iwukendi banako abandu abanzene kundu, kandi nabu ng’iwe abanzire eriminya bingyi oku Nyamuhanga. Iwukendiowa bakakania okwa biri omwa Biblia ebikahimba. (Soma Abanya Roma 1:11, 12.) Kandi iwukendi kanirania n’abandi, abahuru n’abathahenie abatsemire nomubanawithe ebitsibu. Ebi ni bighuma by’okwa bikaleka Yehova iniabugha athi thuhindane haghuma mughulhu wosi!
THASYIGHA BINGYI
Minya ebikabya okwa mihindano y’Abema ba Yehova n’ekyangaleka iwahiraho akaghalha erihindana kuyo.
4. Emihindano y’Abema ba Yehova
Omwa kighana ky’erimbere, Abakristayo ibakahindana haghuma mughulhu wosi eriramya Yehova. (Abanya Roma 16:3-5) Soma Abanya Kolosai 3:16, mwanakania okwa kibulyo kino:
-
Abakristayo ab’omwa kighana ky’erimbere mubaramya bathi Yehova?
Munabwire, Abema ba Yehova nabu bakahindana haghuma mughulhu wosi omwa myanya yabu y’eriramiryamo. Eriminya ebikabya okwa mihindano yabu, mubughaye EVIDIYO. Neryo, mulebaye ekisasani eky’emihindano y’ekithunga n’erikania okwa bibulyo ebikakwamako.
-
Ni byahi ebya wulyalhangira okwa Kingdom Hall ebisosene n’ebya wulyasoma omwa Abanya Kolosai 3:16?
-
Omwa vidiyo kutse okwa kisasani, ni byahi ebya wamalhangira ebihambire okwa mihindano ebyamakutsemesya?
Soma 2 Abanya Korinto 9:7, mwanakania okwa kibulyo kino:
-
Busana naki emihindano y’Abema ba Yehova si y’erithuhira?
Iwe n’omukangirirya wawu, mulebaye ebikendi kanibwako omwa muhindano mughuma w’oko wiki eno.
-
Ni kitsweka kyahi eky’okwa mihindano ekyamakutsemesya kutse ekyanga kughasira?
Wunalhue wasi?
Okwa jw.org, wangana minya omwanya n’endambi aho emihindano yikaberamo erithimba omwa kihugho kyosi.
-
Emihindano yethu mukabya emikania, eby’erilhangirirako, n’esyovidiyo. Emihindano yikatsuka n’olhwimbo n’omusabe kandi ikuyanahinda yithya
-
Ebindi bitsweka by’okwa ndegheka, abahulikiriri bakasabawa erisubirya
-
Obuli mundu akathangirirawa—abawithe amaka, abahuru, abakekelhuhire, n’abaana
-
Emihindano yethu ni ya busa. Abema ba Yehova sibali lhabaya akibo
5. Kikayithagha erihiraho akaghalha erihindana
Lengekanaya okwa ky’erileberyako ky’eka yabu Yesu. Erihindana okwa mikonga y’obuli mwaka, ibakaghenda olhughendo olhw’ebiro nga bisathu erilhaba omwa bithwe erilhua e Nazareti erihika e Yerusalemu. Soma Luka 2:39-42, mwanakania okwa bibulyo bino:
-
Wukalengekanaya olhughendo olhw’eriya e Yerusalemu olhu mulhwanayithagha erihiraho akalhagha?
-
Busana naki wangana yithagha erihiraho akaghalha erihindana okwa mihindano?
-
Wukalengekanaya nina kikulhu erighenda okwa mihindano? Busana naki?
E Biblia yikabugha yithi erihindana haghuma busana n’eriramya ni kindu kikulhu kutsibu. Soma Abaebrania 10:24, 25, mwanakania okwa kibulyo kino:
-
Busana naki thutholere ithwahindana mughulhu wosi?
ABANDI BAKABUGHA BATHI: “Sikiri yithaghisibawa erihindana n’abandi. Erisomera e Biblia y’eka kikaghunza.”
-
N’isako lyahi kutse ni ky’erileberyako kyahi ekiri mwa Biblia ekikakanganaya ekyo Yehova anzire?
OMWA BIKUHI
Erihindana okwa mihindano kikendi leka iw’igha bingyi oku Yehova, iwakamathya obunywani bwawu nayu, kandi iwamuramya haghuma n’abandi.
Eriyibukya
-
Busana naki Yehova akathuhira mw’omuhwa w’erihindana haghuma?
-
Ni byahi ebyo wang’igha okwa mihindano y’Abema ba Yehova?
-
Erihindana okwa mihindano lyangana thasyakughasira lithi?
MINYA BINGYI
Ibbwa wamabya iwukasagha erihindana? Lhangira ekyaleka omulhume oyuwabya akayowa athya inianza emihindano.
Lhangira ngoku omulhume atsemera emihindano n’ebyo akolha erilholha embere erihindana.
Minya abandi nga bakayowa bathi bakahindana.
“Busana Naki Iwaghenda Okwa Mihindano Okwa Kisenge ky’Obwami?” (Omwatsi okwa muthahulha)
Minya ngoku omughuma w’okwa gurupu y’abayaya ahindulha engebe yiwe enyuma w’erihindana okwa mihindano y’Abema ba Yehova.
“Isindi Ghenda Ahosi-hosi Isingawithe Embundu” (The Watchtower, Okwomusanju 1, 2014)
