ERISOMO 11

Ngoku Wanga Ghasirwa Ndeke omw’Isoma e Biblia

BUGHAYA

Wunewathanza eritsuka omubiiri munene neryo iwabulha ah’eritsukira? Omubiiri oyo erikwanguhira, iwangana kolhagho mwa muke-muke. Ku bine bithya bikahika n’okw’isoma e Biblia. Iwangana bulya, ‘Ibbwa ngatsukire hayi?’ Omw’isomo lino, thukendi lebya esyonzira ndebe nyolho-nyolho esya wanga kolesya esikendi kuwathikya eritsemera erisoma e Biblia n’erighayo.

1. Busana naki thutholere ithwasoma e Biblia mughulhu wosi?

Omundu oyukasoma e Biblia, kutse ‘Emighambo y’Omwami Mukulhu’ mughulhu wosi, akatsema kandi ebyosi akakolha bikatsumulhawa. (Soma Esyonyimbo 1:1-3.) Erithatsuka, lengesaya eribya wukasomayo habw’esyodakika nyike obuli kiro. Wukabya wunemwongera eriyibegheresya Ekinywe kya Nyamuhanga, kwawukanongera wuthya eritsemera erisoma e Biblia.

2. Ni kyahi ekikendi kuwathikya erighasirwa omw’isoma e Biblia?

Erithoka erighasirwa ndeke omw’isoma e Biblia, thutholere ithw’imana hake n’erilengekania okwa bya thukasoma n’erighanirya kubyo. (Yosua 1:8) Wukasoma, yibulhaye ebibulyo nga bino: ‘Omwatsi oyu akanyeghesayaki oku Yehova Nyamuhanga? Nanga ghendera kugho kw’indi omo ngebe yaghe? Nangakolesya indi emilhondo eyi eriwathikya abandi?’

3. Wangabana wuthi obuthuku obw’erisoma e Biblia?

Mbwino kikanakukalira eribana endambi y’erisoma e Biblia? Abanene kikabakalira. Lengaho erithendi ‘lhabya ebiro bya buyira.’ (Abanya Efeso 5:16) Wanganakolha eki omw’ihiraho endambi ndebe ey’erisomeramo e Biblia obuli kiro. Abandi bakabana endambi ey’erisomeramo e Biblia omo ngyakya-ngyakya. Abandi ibabana endambi ng’omw’ithungyi, obundi okwa ndambi y’erilhuhuka omw’ithungyi. Kandi n’abandi ibasoma e Biblia omwa kiro bathe bakesya. Iwe ni ndambi yahi eyanga kukolera?

THASYIGHA BINGYI

Minya nga wanga kolhaki nuku erisoma lyawu lye Biblia lyongere eritsemesya. Lhangira ngoku wanga thegheka ndeke nuku wughasirawe ndeke wuk’igha e Biblia.

Ngoku thwangan’igha erianza erirya ebyalya muthina-muthina, thwangan’igha eritsemera erisoma e Biblia

4. Minya ngoku wanga tsemera erisoma e Biblia

Kyangana ghan’ibya kyolho eritsuka erisoma e Biblia. Aliwe, thwangana ‘sonda kutsibu’ kutse eribya n’obwagha bw’ekyo, ngoku omundu angana ghenda akanza ebyalya eby’athabeghere. Soma 1 Petero 2:2, mwanakania okwa kibulyo kino:

Wukalengekanaya erisoma e Biblia obuli kiro, kyangana kuwathikya erianza n’eritsemera erisoma eryo?

Mubughaye EVIDIYO erilhangira ngoku abandi batsuka eritsemera erisoma e Biblia. Neryo mukanaye okwa bibulyo ebikakwamako.

EVIDIYO: Eminyethu Erigha Erianza Ekinywe kya Nyamuhanga (5:33)

Omo vidiyo, ni bitsibu byahi ebya balere barwanisaya?
Ni kyahi ekya bawathikaya erikwama-kwamania ekilhubirirwa kyabu ky’erisoma e Biblia?
Mubakolha byahi nuku erisoma lyabu lye Biblia lyongere eritsemesya?

Amenge awanga kuwathikya eritsuka:

Bana embindulha ye Biblia ey’omubughe owa munabwire ey’eriyikethera. Thalengesya e New World Translation yamabya iyine omwa mubughe wawu.
Tsuka erisoma ekitsweka kye Biblia ekikakutsemesaya kutsibu. Eribana amenge, lebaya echati “Tsuka Erisoma e Biblia.”
Minya aha wamahika wukasoma. Kolesaya echati eya “Minya aha Wamahika omo Busomi Bwawu bwe Biblia” eyiri omwa kitabu kino.
Kolesaya e JW Library^®app. Omo, wangana soma e Biblia n’erihulikirira yikasomwa omwa mibughe mingyi ahosi-hosi aha wangabya, omw’ikolesya esimatifoni n’ebindi byuma ng’ebyo.
Kolesya e appendixes omwa New World Translation. Muli esyomapu, esyochati, n’enzoborera y’ebinywe ebyangana leka erisoma lyawu lye Biblia iryongera eritsemesya.

5. Thegheka ebya mukend’igha muk’igha e Biblia

Soma Esyonyimbo 119:34, mwanakania okwa kibulyo kino:

Busana naki kyuwene eritsuka erisaba wuthe wasoma e Biblia kutse eriyitheghekera erigha lyawu lye Biblia?

Wangathoka wuthi erighasirwa ndeke obuli erigha? Wukathegheka erisomo omw’igha lino, lengesaya esyonzira hino:

Soma esyonungu esikatsuka esy’erisomo.
Lebaya n’erisoma amasako, kandi lengesaya eriyitheghererya ng’ahambene athi n’omwatsi.
Ramba esyonzumwa esikasubiraya obuli kibulyo; eki kikendi kuwathikya erikania okw’isomo n’oyukakweghesaya.

Wunalhue wasi?

Abema ba Yehova babirikolesya esyombindulha muthima-muthina esye Biblia. Aliwe, kutsibu-tsibu thukatsemera e New World Translation of the Holy Scriptures kundi yihikire, yikayitheghereribawa, kandi yikakolesaya erina lya Nyamuhanga.—Lebaya omwatsi okwa Muthahulha “Mbwino Abema ba Yehova Bawithe Eyabu Biblia?”

ABANDI BAKABUGHA BATHI: “Erigha e Biblia ni mubiiri munene kutsibu. Singwithe obuthuku n’akaghalha ako.”

Iwe wukabugha wuthiki?

OMWA BIKUHI

Erithoka erighasirwa ndeke omw’isoma e Biblia, hiraho endambi y’erisomayo, saba Nyamuhanga wuyitheghererayeyo, kandi thegheka ebya mukend’igha muk’igha e Biblia.