ERISOMO 17

Yesu Awithe Mibereki?

BUGHAYA

Thukabya thuk’igha okwa bindu ebya Yesu abugha n’erikolha okwa kihugho, thukaminya emibere eyikaleka ithwayithunda hakuhi nayu na Thatha wiwe, Yehova. Emighuma y’okwa mibere eyikatsemesaya eyi ni yahi? Kandi thwanga gherererya thuthi Yesu?

1. Yesu ali nga Thatha wiwe omwa nziraki?

Iniane elhubulha, Yesu iniakathungerera ebya Thatha wiwe w’olhwanzo akakolha kandi mwamwighirako habw’esyobbiliyoni sy’emyaka. Busana n’ekyo, akalengekanaya, eriyowa, n’erikolha ng’iyo. (Soma Yoane 5:19.) Erithwalira haghuma, Yesu akakanganaya ndeke-ndeke emibere ya Thatha wiwe kyaleka iniabugha athi: ‘Oyuwamanyilhangira iniabirilhangira Thatha.’ (Yoane 14:9) Wukendibya wunemwigha okwa mibere ya Yesu, wukendi minya Yehova ya ndeke. Ng’eky’erileberyako, omubere wa Yesu ow’erikwira abandi b’obulighe akakanganaya Yehova ng’akayowa athi busana nawu.

2. Yesu abirikangania athi kwanzire Yehova?

Yesu mwabugha athi: ‘Ngoku Thatha anyihana, ko ngakolha nyithya, ekihugho kithoke eriminya ko nyanzire Thatha.’ (Yoane 14:31) Iniane okwa kihugho, Yesu mwakangania kwanzire Thatha wiwe ya kutsibu omw’imwowa nibya n’omughulhu kyabya kikalire erikolha. Kandi Yesu aby’anzire erikania oku Thatha wiwe n’eriwathikya abandi eribya banywani ba Yehova.—Yoane 14:23.

3. Yesu abirikangania athi kwanzire abandu?

E Biblia yikabugha yithi ‘obutseme bwa Yesu bwabya haghuma n’abaghalha b’abandu.’ (Emisyo 8:31) Mwakangania olhwanzo olhu omw’ihumulikania abandu n’eribawathikya ndeke. Mwakolha ebithiko-thiko eby’akanganaya butsira obuthoki bwiwe busa aliwe n’omubere wiwe w’erikwira abandi b’obulighe. (Mariko 1:40-42) Mwakangania abandu b’olhukeri kandi isyali solholha mundu. Ebinywe biwe mubyahumulikania abosi ab’emithima myolho abamuhulikirira kandi byamabaha amaha. Yesu abya inianayitheghekire eriaghalhwa n’eriholha busana n’olhwanzo olhw’aby’awithire abandu abosi. Aliwe kutsibu-tsibu anzire abakaghendera okwa syongangirirya siwe.—Soma Yoane 15:13, 14.

THASYIGHA BINGYI

Minya bingyi okwa mibere ya Yesu. Kandi lebaya ngoku wangabya n’olhwanzo n’omubere w’erihithya ng’iyo.

4. Yesu anzire Thatha wiwe

Eky’erileberyako kya Yesu kikakanganaya ngoku thwanga kangania ku thwanzire Nyamuhanga. Soma Luka 6:12 na Yoane 15:10; 17:26. Mwabirisoma obul’isako, mukanaye okwa kibulyo kino:

Omw’igherererya Yesu, thwanga kangania thuthi ku thwanzire Yehova?

Yesu inianzire Thatha wiwe w’elhubulha kandi mughulhu wosi iniakakanaya nayu omwa musabe

5. Yesu atsomene abandu abali omwa buyithawa

Yesu iniakahira ebiyithawa by’abandi embere okwa biwe. Nibya n’omughulhu aby’alhuhire, mwakolesya endambi n’akaghalha kiwe eriwathikya abandu. Soma Mariko 6:30-44, mwanakania okwa bibulyo bino:

Omo mwatsi oyu, ni nzira nga syahi esyo Yesu akanganirayamu kw’atsomene abandi? Lebaya omulhondo 31, 34, 41, na 42.
Ni kyahi ekyaleka Yesu iniawathikya abandi? Lebaya omulhondo 34.
Kundi Yesu akakanganaya emibere ya Yehova, ebyosi ebi bikakweghesayaki oku Yehova?
Ni nzira nga syahi esyo thwanga gherereryamu omubere wa Yesu ow’eritsomana abandi?

6. Yesu ni mwenge

Nomwakine indi Yesu syabya awithe ebindu bingyi by’ekinyamubiri, iniakahithaya, kandi mwathuhira mw’omuhwa w’eribya benge. Soma Emibiri 20:35, mwanakania okwa kibulyo kino:

Ngoku Yesu abugha, thwanga bana thuthi etseme?

Mubughaye EVIDIYO, mwanakania okwa kibulyo ekikakwamako.

EVIDIYO: “Erihithya Likaletha Obutseme”—Akatsweka kake (4:00)

Ni mwanzira nga syahi esya thwanga hithiryamu, nomuthwangabya isithuwithe bingyi?

Wunalhue wasi?

E Biblia yikathukangiriraya yithi ithwasaba Yehova erilhabira omwa lina lya Yesu. (Soma Yoane 16:23, 24.) Thukabya thukasaba thuthya, thukakanganaya ku thukasima ekya Yesu akolha erithuwathikya eribya banywani ba Yehova.

ABANDI BAKABUGHA BATHI: “Abandu bakaghalhawa kundi Nyamuhanga yukabalengako.”

Kundi Yesu akakanganaya emibere ya Thatha wiwe, eby’akolha bikakanganaya bithi ngoku Yehova athutsomene?

OMWA BIKUHI

Yesu anzire Yehova, kandi anzire abandu. Kundi Yesu awithe emibere eyiri ng’eya Thatha wiwe, thukabya thukongera eriminya Yesu, kwa thukanongera thuthya eriminya Yehova.