ERISOMO 19
Abema ba Yehova Nina Bakristayo b’Okwenene?
Ithwe ng’Abema ba Yehova, thwikirirye ngoku thuli Bakristayo b’okwenene. Busana naki? Esyonyikirirya syethu siseghemere okuki? Busana naki thukayahulhamo Abema ba Yehova? Thukakanganaya thuthi ku thwanzene?
1. Abema ba Yehova bakaseghemeraya esyonyikirirya syabu sy’okuki?
Yesu mwabugha athi: ‘Ekinywe [kya Nyamuhanga] ni mwatsi w’ekwenene.’ (Yoane 17:17) Nga Yesu, Abema ba Yehova bakaseghemeraya esyonyikirirya syabu okwa Kinywe kya Nyamuhanga. Thalengekania okwa bihambire okwa Bema ba Yehova ababya basibwe kera ng’Abigha be Biblia. Ekighana kye 19 kikayahwa, egurupu y’Abigha be Biblia muyatsuka eriyithendya ndeke okwa Biblia. Mubaseghemerya esyonyikirirya syabu okwa bya yikabugha, nomwakine indi esyonyikirirya esyo musyahukana oko syongangirirya sy’amakanisa. N’enyuma waho, mubatsuka eribwira abandi oko byababirigha omo Biblia ebyo. a
2. Busana naki thukayahulhamo Abema ba Yehova?
Yehova ak’ahulha abakamuramaya mwa balhangiri kutse abema biwe kundi bakabugha ekwenene eyimuhambireko. (Abaebrania 11:4–12:1) Ng’eky’erileberyako, kera, Nyamuhanga mwabwira abandu biwe athi: ‘Inywe muli balhangiri [bema] baghe.’ (Soma Isaya 43:10.) Yesu akahulhawamo “Omwema Oyutheleghulha.” (Eribisulirwa 1:5, NWT) Busana n’ekyo, omo 1931 muthwimya erina Abema ba Yehova. Thukayisyetha eryahulhwa omo lina eryo.
3. Abema ba Yehova bakagherereraya bathi olhwanzo lhwa Yesu?
Yesu mwanza abigha biwe ba kutsibu erihika okw’ibya nga ni b’erihiika lighuma. (Soma Mariko 3:35.) Kuthya, Abema ba Yehova n’ihiika ery’ekihugho kyosi eriri bughuma. Ky’ekikaleka ithwabirikiranamu mulikyethu, kutse mughalha wethu, mwali wethu. (Filemono 1, 2) Kandi thukakwama ekihano kino: ‘Mwanze abalikyethu Abakristo.’ (1 Petero 2:17) Abema ba Yehova bakakanganaya olhwanzo olhu omo nzira nyingyi, ng’eriwathikya abikirirya balikyethu erithimba omo kihugho kyosi omughulhu hali obuyithawa.
THASYIGHA BINGYI
Thasyaminya bingyi okwa kera eyihambire oko Bema ba Yehova, wanalhangira obundi bwema obukakanganaya ngoku thuli Bakristayo b’okwenene.
Abakristayo ab’okwenene bakaseghemeraya esyonyikirirya syabu okwa Biblia n’erisibwirako abandi
4. Thukaseghemeraya esyonyikirirya syethu oko Biblia
Yehova mwabugha athi ekwenene ye Biblia yikendi syaminyikalha ndeke oko biro by’enduli. Soma Danieli 12:4, mwanakania okwa kibulyo kino:
-
Ni kyahi ekyanga ‘kanyirire’ omo bandu ba Nyamuhanga bakalholha embere eriyithendya ndeke okwa Biblia?
Thalebya ngoku egurupu y’Abigha be Biblia yigha Ekinywe kya Nyamuhanga, omughuma w’okw’ibo ini Charles Russell. Mubughaye EVIDIYO, mwanakania okwa kibulyo ekikakwamako.
-
Omo vidiyo, Charles Russell n’Abigha be Biblia balikyabo mubigha bathi e Biblia?
Wunalhue wasi?
Hakanayira ithwahindulha esindi nyikirirya syethu. Busana naki? Ngoku eryuba erikakununuka likaleka ebindu ebyaghenda bikalhangirika ndeke, Nyamuhanga akaleka thuyitheghereraye Ekinywe kiwe lyolho-lyolho. (Soma Emisyo 4:18.) Nomwakine indi e Biblia iyo siyirihinduka, ithwe thukahindulha ebya thwikirirye thukongera eriyitheghererya ndeke ebiri omwa Biblia.
5. Thukakolha ekya lina lyethu likamanyisaya
Busana naki muthwimya erina Abema ba Yehova? Mubughaye EVIDIYO, mwanakania okwa kibulyo ekikakwamako.
-
Busana naki erina Abema ba Yehova litholere?
Busana naki Yehova abirisombolha abandu eribya bema biwe? Kusangwa bakamuminyikalhaya nga Nyamuhanga w’ekwenene, kundi abirikanibwako amabehi manene. Thuthalebya amabehi abiri w’okw’igho.
Awandi madini akakangiriraya abandu abali mugho athi Nyamuhanga anzire ibakolesya esyosanamu omw’iramya lyabo. Aliwe, soma Abalawi 26:1, mwanakania okwa bibulyo bino:
-
Ekwenene y’eyahi? Yehova akabugha athiki oko syosanamu?
Abandi basondoli b’amadini bakakangiriraya bathi Yesu ni Nyamuhanga. Aliwe, soma Yoane 20:17, mwanakania oko bibulyo bino:
-
Ekwenene y’eyahi? Mbwino Yesu yana Nyamuhanga?
-
Eriminya ngoku Yehova abirithuma Abema biwe erithulha ekwenene eyihambire okw’iyo na Mughalha wiwe, kikaleka iwayowa wuthi?
6. Thwanzene
E Biblia yikasosekanaya Abakristayo n’ebitsuko muthina-muthina eby’omubiri w’omundu. Soma 1 Abanya Korinto 12:25, 26, mwanakania okwa bibulyo bino:
-
Abakristayo ab’okwenene batholere ibakolhaki abandi Bakristayo balikyabo bakaghalhwa?
-
Ni kyahi ekya wabirilhangira oko lhwanzo lhw’Abema ba Yehova?
Omughulhu Abema ba Yehova bakaghalhawa omwa kindi kihugho, Abema balikyabo erithimba omwa kihugho kyosi bakalhuaho ibayira eky’erikolha. Erithalhangira eky’erileberyako kighuma, mubughaye EVIDIYO. N’enyuma waho, mukanaye okwa kibulyo ekikakwamako.
-
Obuwathikya obwa Bema ba Yehova bakaha abawire kw’ebitsibu bukakanganaya buthi olhwanzo?
Abakristayo ab’okwenene bakakanganaya abali omwa buyithawa b’olhwanzo
ABANDI BAKABUGHA BATHI: “Abema ba Yehova ni dini mbyaka.”
-
Yehova atsuka mughulhu wahi eryahulha abaramya biwe mo bema?
OMWA BIKUHI
Abema ba Yehova ni Bakristayo b’okwenene. Thuli ihiika ery’ekihugho kyosi ery’abaramya abakaseghemeraya esyonyikirirya syabo oko Biblia kandi abakaminyikalhaya ekwenene eyihambire oku Yehova.
Eriyibukya
-
Busana naki muthwimya erina Abema ba Yehova?
-
Thukathwalhana thuthi?
-
Wukalengekanaya Abema ba Yehova nina Bakristayo b’okwenene?
MINYA BINGYI
Minya bingyi ebihambire okwa kera yethu.
Abema ba Yehova—Erihira Erikirirya ly’Omwa Mikolere, Ekitsweka 1: Erilhua Omwa Mwirimya (1:00:53)
Lhangira eky’erileberyako ekikakanganaya ngoku Abema ba Yehova babiribisulha esyongangirirya sy’amabehi.
Bana eby’erisubirya okwa bibulyo ebya wangabya iwuwithe ebihambire okwa Bema ba Yehova.
“Ebibulyo Ebikabera Eribulibwa Ebihambire Okwa Bema ba Yehova” (akatsweka okwa jw.org)
Stephen mwasangira omw’ikolha ebyagha okwa sindi nganda busana n’eriponasyo. Minya nga ni kyahi eky’alhangira omwa Bema ba Yehova ekyaleka inianza erihindulha emibere yiwe.
“Engebe Yaghe Yabya Iyiri Kwongoberera Kutsibu Omwa Bubi” (The Watchtower, Okwomusanju 1, 2015)
a Egazeti yethu ngulhu eya Akaleberyo, yabirilholha embere erihulhukya ekwenene ye Biblia eritsuka 1879.
