ERISOMO 22

Wanga Bwira Wuthi Abandi Okwa Ngulhu Yuwene?

BUGHAYA

Wukabya wuk’igha ekwenene ye Biblia, iwangana lengekania wuthi, ‘Obuli mundu atholere iniaminyayo!’ Ni kwenene, obuli mundu atholere iniaminyayo! Nomwabine, wangana sagha eribwira abandi oko byawuk’igha. Thulebaye ngoku wanga singura obuba obo kandi ngoku wanga tsuka eribwira abandi okwa ngulhu yuwene ye Biblia iwunatsemire.

1. Wanga bwira wuthi abandu abo wasi okwa bya wuk’igha?

Abigha ba Yesu mubabugha bathi: ‘Sithwanga thoka erireka eribugha ebyo thwabirilholhako n’ebyo thwabiriowa.’ (Emibiri 4:20) Mubalhangira ekwenene mwa y’obughuli bunene kyamaleka ibanza eribwira kuyo kw’abandu bangyi ngoku banga thoka. Mbwino nawu kwa wunemuyowa wuthya? Kyamabya ikwakiri kithya, sondekanaya ehighisa ehy’eribwiriramo abahughu n’abanywani bawu iwunabasikirye okwa bya wamathigha.—Soma Abanya Kolosai 4:6.

Ngoku wanga tsuka

Wukakania n’omuhughu, tsuka omukania owahambire okwa Biblia omw’ibugha wuthi: “Omo wiki eno nabirigha omwatsi owakatsemesaya.”
Bwira omunywani wawu oyulhwere kutse oyuli omwa maghaniryo erisako erikahumulikanaya.
Abawukakolha nabu bamakubulya eyenga yawu nga muyaghendire yithi, babwire okwa bya w’igha muk’igha kutse ebya w’igha okwa mihindano.
Kanganaya banywani bawu omuthahulha jw.org.
Kokaya abandi okw’igha lyawu kutse bakanganaye ngoku banga saba eryeghesibwa okwa jw.org.

2. Busana naki ni kikulhu eribya n’ekilhubirirwa ky’erithulira iwune haghuma n’ekithunga?

Abigha ba Yesu mubathasubulira okw’ibwira abandu abo basi b’engulhu yuwene lisa. Yesu ‘mwathumabo mo babiri-babiri embere siwe, eriya oko miyi yosi’ eriyathulira. (Luka 10:1) Omubiiri w’erithulira owali omwa buyithondeke oyo mwaha abandu bangyi b’akaghisa k’eriowa engulhu yuwene. Kandi erithulira haghuma mulyaleka abigha ibatsema kutsibu. (Luka 10:17) Mbwino nawu wune mwendi kolha mwa kilhubirirwa kyawu erithulira iwune haghuma n’ekithunga?

THASYIGHA BINGYI

Minya ngoku wanga rwanisya obuba kandi ngoku wanga bana etseme eyikasa busana n’eribwira abandi okwa ngulhu yuwene.

3. Yehova akendibya haghuma nawu

Abandi abanzire erithulira bangana sagha nga kikendi hamba kithi okwa bandi kutse abandu nga banemwendi hulikirira.

Mbwino wukasagha eribwira abandi okwa byawuk’igha? Busana naki?

Mubughaye EVIDIYO, mwanakania okwa kibulyo ekikakwamako.

EVIDIYO: Munasaba Yehova y’Obuthubaha (4:05)

Abema abalere aba mubarwanisya bathi obuba?

Soma Isaya 41:10, mwanakania okwa kibulyo kino:

Wamasagha erithulira, erisaba lyanga kuwathikya lithi?

Wunalhue wasi?

Abangyi b’okwa Bema ba Yehova mubanayowa nga sibanga bwira abandi okwa ngulhu yuwene. Ng’eky’erileberyako, Sergey iniakayowa mo wa bbule kandi ikikamukalira erikania n’abandi. Aliwe neryo mwigha e Biblia. Akabugha athi: “Nomunanabya mw’obuba, munatsuka eribwira bandi okwa byang’igha. Ekya nyiswekaya, eribwira abandi okwa Biblia mukyanyighunzamo omubere w’eriyilhangira mo wa bbule. Kandi mukyanyiwathikya erihathirya ndeke ebyo ng’igha omo muthima waghe.”

4. Kanganaya erisikya

Wukabwira abandi b’engulhu yuwene, ambi iwalengekania okwa bya wanga bugha kandi ngoku wanga bibugha. Soma 2 Timoteo 2:24 na 1 Petero 3:15, 16 mwanakania okwa bibulyo bino:

Wanga ghendera wuthi okwa milhondo eyi wukakanirya abandi okwa Biblia?
Abandi bahughu bawu kutse abanywani bangana ghana erilighirana nawu. Iwukendi kolhaki? Ni byahi ebya wuthatholere erikolha?
Busana naki ni kibuya eribulya ebibulyo omwa menge butsira eribakaka ebya wikirirye?

5. Eribwira abandi okwa ngulhu yuwene kikaletha etseme

Yehova mwaha Yesu y’omubiiri w’erithulhughania engulhu yuwene. Yesu mwalhangira athi omubiiri oyo? Soma Yoane 4:34, mwanakania okwa bibulyo bino:

Erirya ebyalya ebyuwene likaleka ithwabya ithuneho kandi ikyaleka ithwatsema. Busana naki Yesu mwalinganisya erikolha erisonda lya Nyamuhanga—imwamuli erithulhughania engulhu yuwene—ng’erirya ebyalya?
Wukalengekanaya ni tseme yahi eyangasa busana n’eribwira abandi okwa ngulhu yuwene?

Amenge wano

Okwa mihindano eya hakathi-kathi k’ewiki, sondekanayamo esyonzira esyo wanga tsukiramo omukania.
Lengekanaya okw’ibya mwigha omwa muhindano wa hakathi-kathi k’ewiki. Ebitsweka ebikahebawa abigha byangana kuwathikya eryongera eriyitheghekera eribwira abandi okwa bya wuk’igha.
Kolesaya akatsweka “Abandi Bakabugha Bathi” kutse “Omundu Angana Bulya Athi” omw’igha lino eriyibegheresya ngoku wanga subirya ebibulyo ebikabera eribulibwa n’erihakanisya erikanyirire.

OMUNDU ANGANA BULYA ATHI: “Thambwira okwa muhyaka?”

Wanga kolesya wuthi akaghisa aka eribwira omundu okwa bya wuk’igha?

OMWA BIKUHI

Eribwira abandi okwa ngulhu yuwene kikaletha etseme, kandi sikikalire ngoku wukalengekanaya.

Eriyibukya

Busana naki iwabwira abandi okwa ngulhu yuwene?
Wanga kolha ekyo kya wuthi omw’isikya?
Wanga rwanisya wuthi obuba obwa wangabya iwuwithe okw’ithulira?

Erisomo lino lyamahwa ebiro:

Ekilhubirirwa

Lengekanaya okwa mundu omughuma oyo wanga bwira okwa ngulhu yuwene. Lengekanaya okwa bya wanga bugha, ngoku wanga bibugha, n’endambi y’eribibughiramo.

Ekindi:

Your other goal