ERISOMO 24
Ekwenene Eyihambire Okwa Bamalaika Ni Yahi?
Yehova anzire ithw’igha okw’ihiika liwe ery’elhubulha. Erihiika eryo muli abamalaika, abakahulhawamo ‘baghalha ba Nyamuhanga.’ (Yobu 38:7) E Biblia yikabugha yithiki okwa bamalaika? Bakahamba bathi okwa bandu? Mbwino abamalaika abosi nina b’okw’ihiika lya Nyamuhanga?
1. Abamalaika ni bahi?
Yehova ahangika abamalaika athali ahangika ekihugho. Ng’iyo, nabu sibalilhangirawa kandi bikere elhubulha. (Abaebrania 1:14) Hali bamalaika bangyi kandi obuli mumalaika ni w’embaghane okwa wundi. (Eribisulirwa 5:11) ‘Bakakenga amahano [wa Yehova], bakahulikirira ebyo akabugha.’ (Esyonyimbo 103:20) Kera, ihakanayira Yehova iniathuma abamalaika erikolya okwa bandu biwe kw’emyatsi n’eribawathikya n’eribalhamya. Munabwire, abamalaika bakasondolha Abakristayo erihika okwa bandu abanzire erigha oku Nyamuhanga.
2. Sitani n’esyombinga siwe ni bahi?
Abandi bamalaika mubathasighalha bathaleghulha oku Yehova. Omulaika w’erimbere eriyisamambulha ‘akahulhawamo Diabolo na Sitani, oyukatheba ekihugho kyosi.’ (Eribisulirwa 12:9) Sitani mwanza athabale okwa bandi, neryo mwathebya abandu b’erimbere n’enyuma waho n’abandi bamalaika bamamuyiyungako. Abamalaika abayisamambulha abo bakahulhawamo esyombinga. Endambi muyahika Yehova amabathibithako elhubulha eribaghusa okwa kihugho, kandi bakendisya thoghothibwa.—Soma Eribisulirwa 12:9, 12.
3. Sitani n’esyombinga bakalengaho bathi erithuthebya?
Sitani n’esyombinga bakathebaya abandu bangyi erilhabira omwa by’obukumu, owali mutse mubi ow’erianza erikanirania n’emirimu. Ng’eky’erileberyako, abandi bandu bakakanaya n’abakalhaghuliraya esyongununu, abalhaghuli, n’abathahwa b’ekibindi. Abandi bakasondekanaya emithambirire eyirimo eby’obukumu. Kandi abandu bakathebibawa omw’ikirirya bathi bangana kania n’abaholi. a Aliwe Yehova akathukunga athi: ‘Simubindukire ab’esyombinga, kutse abakumu, simusonda-sondayebo.’ (Abalawi 19:31) Akathuha erikunga eri erithutheya oku Sitani n’esyombinga. Ni nzighu sya Nyamuhanga, kandi banzire erithukolha nabi.
THASYIGHA BINGYI
Minya okwa bibuya ebya bamalaika bakakolha, akabi akali omwa by’obukumu, kandi ngoku thwangayitheya oku Sitani n’esyombinga.
4. Abamalaika bakawathikaya abandu erigha oku Yehova
Abamalaika ba Nyamuhanga sibali thulira abandu busu okwa busu. Omwakanya k’ekyo, bangana sondolha abaramya ba Nyamuhanga erihika okwa bandu abanzire erimw’ighako. Soma Eribisulirwa 14:6, 7, mwanakania okwa bibulyo bino:
-
Busana naki thukayithagha obuwathikya bw’abamalaika omw’ithulira?
-
Kyanamakuhira mw’omuhwa eriminya ngoku abamalaika bangana kusondolha erihika okwa bandu abanzire eriminya ebiri omwa Biblia? Busana naki?
5. Ghana eby’obukumu
Sitani n’esyombinga ni nzighu sya Yehova. Nethu ni nzighu syethu. Soma Luka 9:38-42, mwanakania okwa kibulyo kino:
-
Ni byahi ebyo esyombinga sikakolha oko bandu?
Sithwanzire thukayikurirako esyombinga. Soma Eryibuka Ebihano 18:10-12, mwanakania okwa bibulyo bino:
-
Esyombinga sikalengesaya erithuthebya n’erianza erikanirania nethu omo nzira syahi? Ni byahi eby’obukumu ebikanyirire ewenyu?
-
Wukalhangira inina ky’amenge Yehova erithanga eby’obukumu? Busana naki?
Mubughaye EVIDIYO, mwanakania okwa bibulyo ebikakwamako.
-
Wukalengekanaya ehirizi eya mwana wa Palesa ambere yanabya y’akabi? Busana naki?
-
Palesa aby’atholere erikolhaki eriyitheya okwa syombinga?
Mughulhu wosi Abakristayo ab’okwenene bakalhwa n’esyombinga. Soma Emibiri 19:19 na 1 Abanya Korinto 10:21, mwanakania okwa kibulyo kino:
-
Busana naki ni kikulhu erihisya ekyosi-kyosi ekihambangene n’eby’obukumu?
6. Singa amalhwa w’erirwanisya Sitani n’esyombinga siwe
Oyukathabalha esyombinga ni Sitani. Aliwe, oyukasondolha abamalaika abathaleghulha ni malaika mukulhu Mikaeli, erindi rina lya Yesu. Mikaeli awithe buthoki bungahi? Soma Eribisulirwa 12:7-9, mwanakania okwa bibulyo bino:
-
Oyuwithe obuthoki bunene kutsibu nindi? Mikaeli n’abamalaika biwe kutse Sitani n’esyombinga siwe?
-
Wukalengekanaya abakakwama Yesu banatholere ibasagha Sitani n’esyombinga siwe?
Wangana singa amalhwa w’erirwanisya Sitani n’esyombinga siwe. Soma Yakobo 4:7, mwanakania okwa kibulyo kino:
-
Wanga yitheya wuthi oku Sitani n’esyombinga siwe?
ABANDI BAKABUGHA BATHI: “Si kibi erisatha kutse erilebya emisathu eyihambire okwa by’obukumu. Ni yitsemesya buyira.”
-
Busana naki amalengekania ng’ayo ni w’akabi?
OMWA BIKUHI
Abamalaika abathaleghulha bakathuwathikaya. Sitani n’esyombinga siwe ni nzighu sya Yehova, kandi bakakolesaya eby’obukumu erithebya abandu.
Eriyibukya
-
Abamalaika ba Yehova banemuwathikya bathi abandu erimw’ighako?
-
Sitani n’esyombinga siwe ni bahi?
-
Busana naki wanzire iwayihighulira ighuma okwa by’obukumu?
MINYA BINGYI
Minya ebikakanganaya ngoku Yesu ya Mikaeli omumalaika mukulhu.
“Mikaeli Omumalaika Mukulhu Nindi?” (Omwatsi okwa muthahulha)
Minya ebikakanganaya ngoku Diabolo si bubi buyira obuthulimu.
Minya ngoku omukali ayihighulha okwa by’esyombinga.
“Mwabana Ekighendererwa omo Ngebe” (The Watchtower, Okwomusanju 1, 1993)
Minya ngoku Sitani akakolesaya eby’obukumu erithebya abandu.
a Ngoku kikendi syasoborerwa omw’Isomo 29, abaholi sibasiki
