ERISOMO 25
Nyamuhanga Athuhangika Iniawithe Kighendererwaki?
E Biblia yikaligha ngoku engebe y’abandu ni ‘y’ebiro bike, yoswire n’obulighe.’ (Yobu 14:1) Mbwino kwenene eki kya Nyamuhanga akathusunzira? Byamabya ikwabithe bithya, athuhangika iniawithe kighendererwaki? Kinemwendi syabererera? Thalengekania okwa ebya Biblia yikasubiraya ebikahumulikanaya.
1. Yehova anzire ithwabya omo ngebe eyiri yithi?
Yehova anzire ithwabya omo ngebe eyuwene. Abere akahangika abandu b’erimbere, Adamu na Eva, mwabahira omwa paradiso eyuwene kutsibu, eririma lye Edeni. Neryo ‘Nyamuhanga mwatsumulhabo, neryo Nyamuhanga mwabwirabo athi, Mubuthe mukanyirire, musulhaye ekihugho, mughondayekyo.’ (Enzuko 1:28) Yehova aby’anzire ibabutha abaana, ibakolha ekihugho kyosi mwa paradiso, n’eritheya ebisoro. Aby’anzire abandu bosi ibabya n’amaghalha awahikene kandi ibabyaho kera na kera.
Nomwakine indi sikithabya kithya, a ekighendererwa kya Nyamuhanga sikyathahinduka. (Isaya 46:10, 11) Akinanzire abandu abowa ibabyaho kera na kera omwa mibere eyihikene.—Soma Eribisulirwa 21:3, 4.
2. Thwangabya thuthi lino omo ngebe eyuwene?
Yehova mwathuhangika “n’obwagha bwa Nyamuhanga,” ni bugha ambu, ekiyithawa ky’erianza erimuminya n’erimuramya. (Soma Matayo 5:3-6.) Anzire ithwabya banywani biwe ndeke, ‘erirendera omo nzira siwe syosi, erimwanza,’ n’erimukolera ‘n’omuthima wethu wosi.’ (Eryibuka Ebihano 10:12; Esyonyimbo 25:14) Thwamakolha ekyo, ithukendi tsema nomuthunawithe ebitsibu. Eriramya Yehova kikaleka ithwabya n’engebe eyuwene kandi eyiwithe ekighendererwa.
THASYIGHA BINGYI
Minya olhwanzo lhunene olho Yehova akanganaya akatheghekania ekihugho busana nethu n’ebya Kinywe kiwe kikakangiriraya okwa kighendererwa ky’engebe.
3. Yehova awithe ekighendererwa kibuyanga busana n’abandu
Mubughaye EVIDIYO, mwanakania okwa kibulyo ekikakwamako.
-
Ni kyahi ekyaleka Nyamuhanga iniahangika ekihugho kyethu ekibuyanga?
Soma Omugambuli 3:11, mwanakania okwa kibulyo kino:
-
Eki kikakweghesayaki oku Yehova?
4. Ekighendererwa kya Yehova sikyathahinduka
Soma Esyonyimbo 37:11, 29 na Isaya 55:11, mwanakania okwa kibulyo kino:
-
Thukaminya thuthi ngoku ekighendererwa kya Yehova busana nethu sikyathahinduka?
Enyumba eyabiritsandibwa yangana suba-subanibwa. Kuthya, ekihugho, ekya bandu babiritsandya, Nyamuhanga akendi syakisuba-subania busana n’abamwanzire
5. Eriramya Yehova kikaleka ithwabya n’engebe eyuwene
Eriminya ekighendererwa ky’engebe kyangana leka ithwatsema. Mubughaye EVIDIYO, mwanakania okwa kibulyo ekikakwamako.
-
Terumi mwaghasirwa athi omw’iminya ekighendererwa ky’engebe?
Soma Omugambuli 12:13, mwanakania okwa kibulyo kino:
-
Kundi Yehova abirithukolera bingyi, nethu thutholere ithwakolhaki?
OMUNDU ANGANA BULYA ATHI: “Ekighendererwa ky’engebe ni kyahi?”
-
Wanga bugha wuthiki?
OMWA BIKUHI
Yehova anzire ithwatsemera engebe kera na kera omo mibere eyihikene hano okwa kihugho. Thukabya thukamuramya n’omuthima wosi, engebe yikuwana, iyabya n’ekighendererwa—nibya nalino.
Eriyibukya
-
Yehova ahangika Adamu na Eva iniawithe ekighendererwaki?
-
Thukaminya thuthi ngoku ekighendererwa kya Yehova busana nethu sikyathahinduka?
-
Wangabya wuthi n’engebe eyuwene, eyiwithe ekighendererwa?
MINYA BINGYI
Minya ebikakanganaya ngoku kwenene eririma lye Edeni lyanabyaho.
“Eririma lye Edeni—Lyanabyaho Kutse Eyihi?” (The Watchtower, Okwokubanza 1, 2011)
Minya ekikaleka ithwakakasya ngoku ekihugho kikendi syabyaho kera na kera.
“Ekithaka Kine Mwendi Syathoghothibwa?” (Omwatsi okwa muthahulha)
Minya ebya Biblia yikabugha okw’ibana etseme omo ngebe yawu.
Lhangira ngoku omulhume oyuwabya akayowa ngawithe obuli kindu aminya ekibulirwe omo ngebe yiwe.
a Omw’isomo erikakwamako, wukendi syaminya ekitsibu nga kyabya iniki.
