Ekibulyo “busana naki?” ni kibulyo ekya mundu akabulhaya hakabya ekitsibu. Thutsemire kundi e Biblia yikaha eby’erisubirya ebilhangirikire okwa kibulyo ekyo!

1. Sitani aletha athi obubi omwa kihugho?

Sitani Diabolo mwayisamambulha oku Nyamuhanga. Sitani aby’anzire erithabalha okwa bandi, neryo mwathebya abandu b’erimbere, Adamu na Eva, nuku bamuyiyungeko omw’iyisamambulha liwe. Sitani mwakolha eki omw’ibwira Eva y’amabehi. (Enzuko 3:1-5) Mwaleka Eva inialengekania athi Yehova abirimubisa ekindu kirebe ekyuwene. Mwabya ng’oyukabugha athi abandu ibakendi tsema kutsibu bamathendiowa Nyamuhanga. Sitani mwabugha amabehi w’erimbere omw’ibwira Eva athi syendi syaholha. Ky’ekikaleka, e Biblia iyahulha Sitani mwa ‘mubehi, kandi ise w’amabehi.’​—Yoane 8:44.

2. Adamu na Eva mubathwamu erikolhaki?

Yehova mwaha Adamu na Eva ba bingyi. Mwababwira athi ibalya oko mithi yosi y’omw’irima lye Edeni, kwihaho omughuma musa. (Enzuko 2:15-17) Aliwe mubathwamu erirya okwa bighuma by’omuthi oyo. Eva ‘mwimya oko bighuma byagho, mwalyakyo.’ N’enyuma waho, Adamu ‘mwalyakyo.’ (Enzuko 3:6) Abosi mubathowa Nyamuhanga. Kundi Adamu na Eva babya bahikene, neryo babya ini b’erikolha ekihikire. Aliwe ibo erithendiowa Nyamuhanga omw’ikighenderera, mubakolha ekibi n’erighana ehamuli yiwe y’erithabalha. Erithwamu eryo mulyabalethera eriaghalhwa linene.​—Enzuko 3:16-19.

3. Erithwamu lya Adamu na Eva lyabirithuhambako lithi?

Adamu na Eva babere babirihalya, mubabya isibakihikene, kandi obuthahikana obo babiribusighalirya abaana babu abosi. Busana na Adamu, e Biblia yikabugha yithi: ‘Neryo ebibi mubyahika munakihugho busana n’omundu mughuma, n’olhuholho mulhwingira busana n’ekibi kiwe, neryo lithya olhuholho mulhwahika oko bandu bosi.’​—Abanya Roma 5:12.

Thukaghalhawa busana n’esyonzumwa nyingyi. Hakanayira ithwaghalhwa busana n’erithwamu nabi. Ihayira ithwaghalhwa busana n’erithwamu nabi ly’abandi. Kandi ihayira ithwaghalhwa busana n’eribya omo mwanya owathatholere okwa ndambi eyithatholere.​—Soma Omugambuli 9:11.

 THASYIGHA BINGYI

4. Oyukaleka ithwaghalhwa

Abandu bangyi b’ikirirye bathi Nyamuhanga yukathabalha ekihugho kyosi. Ekyo nina kwenene? Mubughaye EVIDIYO.

Soma Yakobo 1:13 na 1 Yoane 5:19, mwanakania okwa kibulyo kino:

• Mbwino Nyamuhanga yukaleka ihabya eriaghalhwa n’obubi?

5. Minya ebikalhwiririra omwa buthabali bwa Sitani

1. Adamu na Eva babya bahikene kandi ibali omo Paradiso. Aliwe mubahulikirira Sitani neryo bamayisamambulha oku Yehova

2.   Babere babiriyisamambulha, ekihugho mukyusulha mw’ekibi, eriaghalhwa, n’olhuholho

3. Yehova akendi ghunzaho ekibi, eriaghalhwa, n’olhuholho. Kandi abandu ibathasyabya abahikene n’erikalha omo Paradiso

6. Yehova analhangire eriaghalhwa lyethu kandi anatsomene

Mbwino Nyamuhanga syaleghene eriaghalhwa lyethu? Thalebya ebya Omwami Dawudi n’omukwenda Petero bahandika. Soma Esyonyimbo 31:7 na 1 Petero 5:7, mwanakania okwa kibulyo kino:

• Eriminya ngoku Yehova akalhangira eriaghalhwa lyethu kandi kw’anatsomene, kikaleka iwayowa wuthi?

 OMWA BIKUHI

Sitani Diabolo n’abandu babiri ab’erimbere babakaleka omwa kihugho imwabya obubi. Yehova akapona thukaghalhwa kandi akisiya inialighunzaho.

Eriyibukya

• Ni mabehi wahi agho Sitani Diabolo abwira Eva?

• Eriyisamambulha lya Adamu na Eva lyabirihamba lithi okw’ithwe bosi?

• Thukaminya thuthi ngoku Yehova analhangire eriaghalhwa lyethu kandi kw’anatsomene?