ERISOMO 28
Kanganaya ku Wukasima Ekya Yehova na Yesu Bakukolera
Wukayowa wuthi omunywani amakuha ekihembo ekyuwene? Obundi, kikaleka iwatsema kutsibu neryo iwanza erikangania munywani wawu ku wukasima ekihembo kyo. Yehova na Yesu babirithuha ekihembo ekilengire ekindi kihembo kyosi-kyosi. Ekihembo ekyo ky’ekyahi, kandi thwanga kangania thuthi ku thukasimakyo?
1. Ni nzira yahi nguma ey’erikanganiryamu ku thukasima ekya Nyamuhanga na Kristo bathukolera?
E Biblia yikalhaghanisaya yithi ‘oyukikiriraya Yesu’ akendi syabyaho kera na kera. (Yoane 3:16) Kikamanyisayaki erikirirya Yesu? Siry’erikwama kya bugha thuthi thwikirirye Yesu. Thutholere ithwakikangania omwa bya thukathwamu n’ebya thukakolha. (Yakobo 2:17) Thukabya thukakangania erikirirya lyethu omwa byathukakolha n’ebya thukabugha, thukaghumaya obunywani bwethu na Yesu na Thatha wiwe, Yehova.—Soma Yoane 14:21.
2. Ni mukonga wahi ow’embaghane owakathuwathikaya erikangania ku thukasima ekya Yehova na Yesu bakolha?
Erigholho-gholho, Yesu athali aholha, mwabwira abigha biwe eyindi nzira eya banga kanganiryamu ku bakasima ekihongo kiwe. Mwatsukisya omukonga w’embaghane ogho e Biblia yikahulhamo “Ekihulho ky’Omukama eky’Erigholho,” owakathasyahulhawamo Eryibuka olhuholho lhwa Kristo. (1 Abanya Korinto 11:20, NWT) Yesu mwatsukisyagho nuku abakwenda biwe—n’Abakristayo abosi ab’okwenene abakwamako—babye bak’ibuka ngoku mwahayo engebe yiwe busana nethu. Erikwamana n’omukonga oyu, Yesu mwabugha athi: ‘Mukole muthya erinyibuka.’ (Luka 22:19) Wukabya wukahindana okw’Ibuka, wukakanganaya ku wukasima kutsibu olhwanzo lhunene olho Yehova na Yesu bathuwithire.
THASYIGHA BINGYI
Ongera eriminya esyonzira esyo wanga kanganiryamu ku wukasima olhwanzo lhunene olho Yehova na Yesu bakanganaya. Lhangira omughaso w’Eryibuka Olhuholho lhwa Kristo.
3. Erisima likaleka ithwayira eky’erikolha
Thathera akasasani imuwasond’isenda neryo omundu amakusabulha. Iwunemwendi kwama ky’eribirirwa ekyo omundu oyo akukolera? Kutse iwune mwendi sondekania esyonzira sy’erimukanganiryamu ku wukasima ekyo akukolera?
Thuliho busana na Yehova. Soma 1 Yoane 4:8-10, mwanakania okwa bibulyo bino:
-
Busana naki ekihongo kya Yesu ni kihembo ky’embaghane?
-
Wukayowa wuthi busana n’ekya Yehova na Yesu bakukolera?
Thwanga kangania thuthi ku thukasima ekya Yehova na Yesu bathukolera? Soma 2 Abanya Korinto 5:15 na 1 Yoane 4:11; 5:3. Mwabirisoma obul’isako, mukanaye okwa kibulyo kino:
-
Erikwamana n’erisako eryo, thwanga kolhaki erikangania erisima lyethu?
4. Gherereraya Yesu
Eyindi nzira eyo thukakanganirayamo erisima lyethu ly’erigherererya Yesu. Soma 1 Petero 2:21, mwanakania okwa kibulyo kino:
-
Wanga kwama olhughobe lhwa Yesu omwa nzira syahi?
Yesu inianzire Ekinywe kya Nyamuhanga, erithulhughania engulhu yuwene, n’eriwathikya abandi
5. Hindana okw’Ibuka olhuholho lhwa Kristo
Erilhangira ekyabya okw’ibuka ly’erimbere ery’Ekihulho ky’Omukama eky’Erigholho, soma Luka 22:14, 19, 20. Neryo mukanaye okwa bibulyo bino:
-
Ni kyahi ekyabya okwa mukonga w’Ekihulho ky’Omukama eky’Erigholho?
-
Omuggati n’evini bik’imaniraki?—Lebaya omulhondo 19 na 20.
Yesu aby’anzire abigha biwe ibabya bak’ibuka olhuholho lhwiwe murundi mughuma omwa mwaka okwa kiro aholeramo. Neryo, Abema ba Yehova bakahindana murundi mughuma obuli mwaka eryibuka olhuholho lhwa Kristo ngoku analhaghira. Erigha okwa muhindano mukulhu oyu, mubughaye EVIDIYO. Neryo mukanaye okwa kibulyo ekikakwamako.
-
Okwa mukonga w’Eryibuka kukabyaki?
Omuggati n’evini ni biminyisyo. Omuggati ak’imanira omubiri wa Yesu owahikene ogho ahayo busana nethu. Evini yik’imanira omusasi wiwe
ABANDI BAKABUGHA BATHI: “Ingye nabirikirirya Yesu ng’omulhamya waghe, ekyo kikaghunza.”
-
Wangakolesya wuthi Yoane 3:16 na Yakobo 2:17 erikangania ngoku ni bingyi ebikayithaghisibawa?
OMWA BIKUHI
Thukakanganaya ku thukasima ekya Yesu athukolera omw’imwikiriryamu n’erihindana okw’Ibuka olhuholho lhwiwe.
Eriyibukya
-
Kikamanyisayaki erikirirya Yesu?
-
Wanzire iwakangania wuthi ku wukasima ekya Yehova na Yesu bakukolera?
-
Busana naki ni kikulhu erihindana okwa mukonga w’Eryibuka olhuholho lhwa Kristo?
MINYA BINGYI
Olhuholho lhwa Kristo lhukathuhira mw’omuhwa w’erikolhaki?
Igha bingyi ebihambire okw’ikirirya kandi ngoku thwanga likangania.
“Kanganaya Erikirirya Lyawu Omwa Milhaghe ya Yehova” (Akaleberyo, Okwerikumi 2016)
Omo mwatsi “Ngayowa Ingahenirye, Inganeho, Kandi Ingalhughirirene,” lhangira ngoku erigha okwa kihongo kya Kristo lyahamba oko ngebe y’omukali mughuma.
“E Biblia Yikahindulha Esyongebe” (The Watchtower, Okwomunani 1, 2011)
Minya ekikaleka abake ibabalya oko biminyisyo by’okw’Ibuka.
