ERISOMO 31
Obwami bwa Nyamuhanga Niki?
Obwami bwa Nyamuhanga w’omuthwe mukulhu we Biblia. Yehova akendi syakolesya Obwami obo eriberererya ekighendererwa kiwe eky’erimbere busana n’ekihugho. Obwami niki? Thukaminya thuthi ngoku bunemuthabalha lino? Ni byahi ebyo bwabirikolha? Kandi bukendi kolhaki omwa buthuku obukasa? Erisomo lino n’awabiri awakakwamako akendi subirya okwa bibulyo ebyo.
1. Obwami bwa Nyamuhanga niki, kandi Omwami wabu nindi?
Obwami ni buthabali kutse egavumente eyo Yehova Nyamuhanga abirihiraho. Omwami wabu, Yesu Kristo, akathabalira elhubulha. (Matayo 4:17; Yoane 18:36) E Biblia yikakanaya oku Yesu yithi: ‘Asyathabalha kera na kera.’ (Luka 1:32, 33) Yesu ng’Omwami w’Obwami bwa Nyamuhanga, akendi syathabalha obuli mundu okwa kihugho.
2. Ni bahi abakathabalha na Yesu?
Yesu syali thabalha iyuwene. Abandu erilhua ‘omo buli kihanda, n’obuli mubughe, n’obuli bandu, n’obuli kithunga basyathabalha’ ekihugho. (Eribisulirwa 5:9, 10) Ni bangahi abakendi syathabalha na Kristo? Eritsuka aho Yesu akathasira okwa kihugho, esyomiliyoni sy’Abakristayo babiribya bigha biwe. Aliwe abandu 144,000 basa ab’okwa Bakristayo abo b’abakendi ghenda elhubulha eriyathabalha na Yesu. (Soma Eribisulirwa 14:1-4.) Abandi Bakristayo abosi okwa kihugho bakendi syabya ndulhani sy’Obwami.—Esyonyimbo 37:29.
3. Obwami bwa Nyamuhanga bulengire buthi esyogavumente sy’abandu?
Nibya n’omughulhu abathabali b’ekihugho bakanalengaho erikolha ebindu ebyuwene, sibawithe obuthoki bw’erikolha ebyosi ebyo banzire. Erighunzerera abandi bathabali bakasuba omo mwanya wabu, n’abakasubaho abo ibabya nabu isibanga tsomana abo bakathabalha. Aliwe Omuthabali w’Obwami bwa Nyamuhanga, ya Yesu, iyo sihali oyukendi syasuba omo mwanya wiwe. Nyamuhanga ‘asyahangania Obwami obuthendi syaheribwa na kera.’ (Danieli 2:44) Yesu akendi syathabalha ekihugho ekyosi, kandi syendi syabya n’akasolholho. Awithe olhwanzo, olhukeri, n’obulingirirania, kandi akendi syakangirirya abandu erikolongana omo nzira iyan’eyo—omo lhwanzo, omo lhukeri, n’obulingirirania.—Soma Isaya 11:9.
THASYIGHA BINGYI
Minya ekikaleka Obwami bwa Nyamuhanga ibwabya ibulengire egavumente yosi-yosi ey’abandu.
4. Egavumente y’obuthoki bunene yikendi thabalha ekihugho kyosi
Yesu Kristo awithe obuthoki bunene obw’erithabalha kwilhaba omuthabali wosi-wosi oyuwamabirithabyaho. Soma Matayo 28:18, mwanakania okwa kibulyo kino:
-
Obuthoki bwa Yesu bulengire buthi obw’omuthabali wosi-wosi w’okwa kihugho?
Esyogavumente sy’abandu sikahinduka-hinduka, kandi obuli muthabali akathabalha okwa katsweka kake k’ekihugho. Kandi ibbwa Obwami bwa Nyamuhanga? Soma Danieli 7:14, mwanakania okwa bibulyo bino:
-
Busana naki ni kibuya Obwami bwa Nyamuhanga eribya ‘isibwendisyaheribwa’?
-
Busana naki ni kibuya eribya ibukendisyathabalha ekihugho kyosi?
5. Amathabali w’abandu atholere iniahwaho
Busana naki Obwami bwa Nyamuhanga butholere ibwasuba omo mwanya w’esyogavumente sy’abandu? Mubughaye EVIDIYO, mwanakania okwa kibulyo ekikakwamako.
-
Ni byahi ebyabirilhwiririra omw’ithabalha ly’abandu?
Soma Omugambuli 8:9, mwanakania okwa bibulyo bino:
-
Wukalengekanaya Obwami bwa Nyamuhanga bunatholere ibwasuba omo mwanya w’esyogavumente sy’abandu? Busana naki?
6. Abathabali b’omo Bwami bwa Nyamuhanga bathwasi ndeke
Kundi Omwami wethu, Yesu, anabere mundu ng’ithwe, angana ‘thukwira obulighe.’ (Abaebrania 4:15) Abalhume n’abakali abathaleghulha 144,000 abakendisyathabalha na Yesu basombolhawa na Yehova erilhua “omo buli kihanda, n’obuli mubughe, n’obuli bandu, n’obuli kithunga.”—Eribisulirwa 5:9.
-
Kyanamakuhumulikania eriminya ngoku Yesu n’abosi abo akendi syathabalha nabu banabere bandu ng’ithwe? Busana naki?
Yehova abirisombolha abalhume n’abakali abalhuire omwa mibere yosi erithabalha na Yesu
7. Obwami bwa Nyamuhanga buwithe ebilhaghiro ebilengire kutsibu eby’abandu
Esyogavumente sikahiraho ebilhaghiro ebyo sikalengekanaya sithi bikendighasira n’eritheya abandu babu. N’Obwami bwa Nyamuhanga nabu bunawithe ebilhaghiro ebyo bandu abali omw’isi wabu batholere ibaghenderako. Soma 1 Abanya Korinto 6:9-11, mwanakania okwa bibulyo bino:
-
Wukalengekanaya ekihugho kikendisyabya kithi obuli mundu akaghendera okwa bilhaghiro bya Nyamuhanga eby’esyongeso? a
-
Wukalengekanaya nina ky’amenge Yehova eribugha athi abali ahisi sy’Obwami baghendere okwa bilhaghiro ebi? Busana naki?
-
Ni kyahi ekikakanganaya ngoku abandu abathaghendera okwa bilhaghiro ebi bangana hinduka?—Lebaya omulhondo 11.
Esyogavumente sikahiraho ebilhaghiro ebyo sikalengekanaya sithi bikendighasira n’eritheya abandu babu. Obwami bwa Nyamuhanga buwithe ebilhaghiro ebirengire ebikatheghaya n’erighasira abandu abali omw’isi syabu
OMUNDU ANGANA BULYA ATHI: “Obwami bwa Nyamuhanga niki?”
-
Iwukendi subirya wuthiki?
OMWA BIKUHI
Obwami bwa Nyamuhanga ni buthabali kutse egavumente yonyine-nyine eyiri omwa lhubulha eyikendi syathabalha ekihugho kyosi.
Eriyibukya
-
Abathabali b’Obwami bwa Nyamuhanga ba bahi?
-
Obwami bwa Nyamuhanga bulengire buthi esyogavumente sy’abandu?
-
Ni bindu nga byahi ebya Yehova anzire esyondulhani sy’Obwami bwiwe ibakolha?
MINYA BINGYI
Thalengekania oko kya Yesu akangiriraya ekihambire oko aho Obwami buli.
“Mbwino Obwami bwa Nyamuhanga Buli omo Muthima Wawu?” (Omwatsi okwa muthahulha)
Busana naki Abema ba Yehova bakathwamu erisighika Obwami bwa Nyamuhanga omwakanya k’erisighika amathabali w’abandu?
Minya ekya Biblia yikabugha okwa bandu 144,000 abo Yehova akasombolha erisyathabalha na Yesu.
Ni kyahi ekya lighisaya omukali iniane omwa ngomo ngoku Nyamuhanga musa yuwanga lethaho ekihugho ekiri mw’obulingirirania?
“Ngoku Nabana Ekyanga Ghunzaho Obuthe Bulingirirania” (Awake!, Okwerikuminakughuma 2011)
a Ebighuma by’okwa bilhaghiro by’esyongeso ebi bikendi syakanibwako omwa Kitsweka 3.
