ERISOMO 34

Thwanga Kangania Thuthi Olhwanzo Olho Thuwithire Yehova?

BUGHAYA

Aho wukathatsukira erigha e Biblia, olhwanzo olhwa wuwithire Nyamuhanga lhwanabiryongera? Wunanzire erilholha embere erikamathya obunywani bwawu nayu? Kyamabya ikwakiri kithya, wibuke ngoku Yehova akendibya akongera erilhangira olhwanzo olhwa wumuwithire lhukongera, kw’anemwendiongera athya erikwanza n’erikutsomana. Wanga mukangania wuthi ku wumwanzire?

1. Thwanga kangania thuthi Yehova ku thumwanzire?

Thukakanganaya Yehova ku thumwanzire omw’imwowa. (Soma 1 Yoane 5:3.) Syali kaka mundu wosi-wosi erimwowa. Aliwe, akaha obuli mughuma w’okw’ithwe y’akaghisa ak’erithwamu ng’akendi mwowa kutse eyihi. Busana naki? Yehova anzire ‘ithwamwowa n’omuthima wosi.’ (Abanya Roma 6:17) Ni bugha ambu, anzire iwamwowa, butsira ambu kundi wukathekawa erimwowa, aliwe kundi wumwanzire. Ekitsweka 3 na 4 omwa kitabu kino bikolirwe erikuwathikya erikangania olhwanzo olhwa wuwithire Yehova omw’ikolha ebikamutsemesaya n’eriyihighulha okwa bikamuponesaya.

2. Busana naki kyangana kalha erikangania olhwanzo olhwa thuwithire Yehova?

‘Omundu oyuthunganene akaghalhawa omo malighe mangyi.’ (Esyonyimbo 34:19) Ithwe bosi thukaghalhawa busana n’ebisobyo byethu. Kandi thwangana bana ebitsibu by’esyosente, obuthe bulingirirania, n’ebindi bitsibu. Omughulhu thukabana ebitsibu, kyangana thukalira erikolha ebya Yehova akabugha athi thukole. Ekyo kiri kithya kundi kyolhobire erikwama enzira eyiwire. Aliwe wukabya wukakolha buthaleghulha ebya Yehova akabugha athi wukole, wukakanganaya ku wumwanzire kwilhaba ekindi kindu kyosi-kyosi. Kandi wukakanganaya ku wuli muthaleghulha okw’iyo. Neryo nayu akendibya muthaleghulha okw’iwe. Syendi syakusighania.—Soma Esyonyimbo 18:25.

THASYIGHA BINGYI

Minya ekikaleka obwowa bwawu ibwabya ini kindu kikulhu embere sya Yehova, kandi minya ekyanga kuwathikya erisighalha muthaleghulha okw’iyo.

3. Omwatsi owakuhambireko

Ngoku kiri omwa kitabu kya Yobu, Sitani mwahangirira Yobu n’abandi abosi abanzire erikolera Yehova. Soma Yobu 1:1, 6–2:10, mwanakania okwa bibulyo bino:

Erikwamana na Sitani, ni kyahi ekyaleka Yobu iniowa Yehova?—Lebaya Yobu 1:9-11.
Ni kyahi ekya Sitani abugha okwa bandu bosi, nawu imwawune?—Lebaya Yobu 2:4.

Soma Yobu 27:5b, mwanakania okwa kibulyo kino:

Yobu mwakangania athi kwenene kwanzire Yehova?

Yobu mwakangania kwanzire Yehova omw’isighalha muthaleghulha okw’iyo

Thukakanganaya ku thwanzire Yehova omw’isighalha bathaleghulha okw’iyo

4. Tsemesaya omuthima wa Yehova

Soma Emisyo 27:11, mwanakania okwa bibulyo bino:

Yehova akayowa athi wukabya n’amenge n’erimwowa? Busana naki?

5. Wanganabya muthaleghulha oku Yehova

Olhwanzo olhwa thuwithire Yehova lhukaleka ithwabwira abandi okw’iyo. Obuthaleghulha bwethu okw’iyo bukaleka ithwakolha ekyo n’omughulhu kikalire. Mubughaye EVIDIYO, mwanakania okwa bibulyo ebikakwamako.

EVIDIYO: Lhwira Erikirirya Lyawu Nomuhangabya Erihakanisibwa (5:09)

Kine kyathakukalira eribwira abandi oku Yehova?
Omo vidiyo, ni kyahi ekyawathikaya Grayson erisingura obuba bwiwe?

Kyolhobire eribya muthaleghulha oku Yehova thwamanza ebyo anzire n’eripona ebyo aponire. Soma Esyonyimbo 97:10, mwanakania okwa bibulyo bino:

Erikwamana n’ebya wamabirigha, ni bindu nga byahi ebya Yehova anzire? Ni bindu nga byahi ebyo aponire?
Wang’igha wuthi erianza ebyuwene n’eripona ebithuwene?

6. Thukaghasirawa thukowa Yehova

Eriowa Yehova ky’ekindu ekyuwene kutsibu mughulhu wosi. Soma Isaya 48:17, 18, mwanakania okwa bibulyo bino:

Wukalengekanaya thwangana yikethera ngoku Yehova akabya inianasi ebikendi thughasira? Busana naki?
Erigha e Biblia n’eriminya Nyamuhanga w’okwenene, Yehova, byamabirithakuwathikya bithi?

ABANDI BAKABUGHA BATHI: “Ebyanga kolha sibirihamba nahake oku Nyamuhanga.”