ERISOMO 35

Ngoku Wanga Thwamu Ndeke

BUGHAYA

Ithwe bosi thukabya n’ebikayithagha erithwamu. Ebingyi by’okw’ibyo byangana thuhambako kutsibu kandi ibyahamba oko bunywani bwethu na Yehova. Ng’eky’erileberyako, thwangana thwamu nga thwikale hayi, nga thwanga bana thuthi esyosente, kutse nga thun’ingire omwa butheke. Thwamathwamu ndeke, ithwanganabya n’engebe eyiri mw’etseme kandi ithwatsemesya Yehova.

1. Wanga kolesya wuthi e Biblia erikuwathikya erithwamu ndeke?

Wuthe wathwamu, saba Yehova y’obuwathikya kandi lebaya omwa Biblia eriminya ng’akalhangira athi omwatsi oyo. (Soma Emisyo 2:3-6.) Hakanayira Yehova iniaha ekihano ekilhangirikire. Byamabya ikwabiri bithya, erithwamu eriowa ekihano ekyo, ly’erithwamu eryuwene eryo wanga kolha.

Kandi ibbwa hamabya isihali ekihano kye Biblia ekilhangirikire ekikakubwira eky’erikolha? Paka Yehova iniakendi kusondolha ‘omo nzira eyo wanga lenderamo.’ (Isaya 48:17) Athi? Hanganabya emisingyi eyanga kusondolha. Emisingyi ye Biblia ye kwenene y’omusingyi eyikabisulha amalengekania n’eriyowa lya Nyamuhanga. Mughulhu mungyi thukaminya Nyamuhanga ng’akayowa athi okwa kindu thukasoma omwatsi mulebe omwa Biblia. Thwamabiriminya Yehova ng’akayowa athi, ithukendi thwamu ebikamutsemesaya.

2. Ni byahi ebya wutholere iwatsuka erilengekaniako wuthe wathwamu?

E Biblia yikabugha yithi: ‘Omugherekania akalebaya ndeke ngoku angaghenda.’ (Emisyo 14:15) Eki kikamanyisaya kithi thuthe thwathwamu, thutholere ithwatsuka erilengekania okw’ithwamu lyethu. Wukalebya obuli ekya wukanza erithwamu, yibulhaye: ‘Ni misingyi yahi ye Biblia eyihambire okw’eki? N’ithwamu lyahi erikendi nyilethera obuholho? Erithwamu lyaghe likendi hamba lithi oko bandi? Ekikulhu kutsibu, linemwendi tsemesya Yehova?’—Eryibuka Ebihano 32:29.

Yehova awithe obughabe bw’erithubwira ekihikire n’ekithahikire. Thukabya thukaminya ebihano n’emisingyi yiwe n’erithwamu eribighenderako, thukabya n’obunyamuthima-thima obuwene. Obunyamuthima-thima ni maaka awali omw’isi syethu aw’eriminya ekihikire n’ekithahikire. (Abanya Roma 2:14, 15) Obunyamuthima-thima obukangiriribwe bukendi thuwathikya erithwamu ndeke.

THASYIGHA BINGYI

Lebaya ndeke ngoku emisingyi ye Biblia n’obunyamuthima-thima bikathuwathikaya kutsibu thukathwamu.

3. Leka e Biblia yikusondole

Emisingyi ye Biblia yanga thusondolha yithi thukathwamu? Mubughaye EVIDIYO, mwanakania kwa bibulyo ebikakwamako.

EVIDIYO: Leka Emisingyi ye Biblia Yikusondole (5:54)

Obughabe bw’eriyithwiramu niki?
Ni kyahi ekyaleka Yehova iniathuha obughabe bw’eriyithwiramu?
Abirithuhaki erithuwathikya erikolesya obughabe bwethu obw’eriyithwiramu omo nzira eyitholere?

Erithalhangira eky’erileberyako ky’omusingyi we Biblia, soma Abanya Efeso 5:15, 16. Neryo mukanaye nga wangakolha kyahi erithendi ‘lhabya ebiro ebi byo buyira’ . . .

omw’isoma e Biblia mughulhu wosi.
omw’ibya iba kutse mukali muthahibwa mubuya, mubuthi mubuya, kutse mwana mubuya.
omw’ihindana okwa mihindano y’ekithunga.

4. Kangiriraya obunyamuthima-thima bwawu erithoka erithwamu ndeke

Hamabya ekihano kye Biblia ekilhangirikire ekihambire oko mwatsi mulebe, kyangan’olhoba erithwamu ndeke. Kandi ibbwa hamabya isihali ekihano ng’ekyo? Mubughaye EVIDIYO, mwanakania okwa kibulyo ekikakwamako.

EVIDIYO: “Mubye n’Obunyamuthima-thima Obuwene” (5:13)

Omo vidiyo, ni biika byahi ebya mwali wethu akolha erikangirirya obunyamuthima-thima bwiwe n’erithwamu ebikatsemesaya Yehova?

Busana naki sithutholere thukabugha thuthi abandi bathuthwiremo oko bya thutholere eriyithwiramu? Soma Abaebrania 5:14, mwanakania okwa bibulyo bino:

Nomwakine indi kyanganabya nga kyolhobire eribwira abandi thuthi bathuthwiremu, ni kyahi ekya thutholere eribya ithwangana yiminyira?
Ni byahi ebya thuwithe ebyanga kuwathikya erikangirirya obunyamuthima-thima bwawu n’erithoka erithwamu ndeke?

Ng’emapu, obunyamuthima-thima bwethu bukathusondolha omo ngebe

5. Sikaya obunyamuthima-thima bw’abandi

Abandi bangana thwamu ebithasosene n’eby’abandi. Thwanga kangania thuthi ku thukasikaya obunyamuthima-thima bw’abandi? Thulebaye eby’erileberyako bibiri:

Eky’erileberyako 1: Mwali wethu oyubeghere eriambalha embali hakabya eriyitsemesya iniahumira omwa kithunga eyo bali bethu bangyi bakahambawako bakalhangira abandi bakambalhayo.

Soma Abanya Roma 15:1 na 1 Abanya Korinto 10:23, 24, mwanakania okwa bibulyo bino:

Erikwamana n’emilhondo eyi, mwali wethu oyo iniangana thwamu erikolhaki? Wangakolhaki wamabya n’omundu oyo obunyamuthima-thima bwiwe bukaghana erikolha ekindu ekya bunyamuthima-thima bwawu bukakulighira erikolha?

Eky’erileberyako 2: Mughalha wethu anasi ngoku e Biblia siyiri thanga erinywa obwabu okwa lhulengo, aliwe iniathwamu erithendibya akabunywa. Akakokibawa okw’iyitsemesya eyo akalhangira baghalha bethu ibanemunywa obwabu.

Soma Omugambuli 7:16 na Abanya Roma 14:1, 10, mwanakania okwa bibulyo bino:

Erikwamana n’emilhondo eyi, mughalha wethu oyo iniangana thwamu erikolhaki? Wangakolhaki wamalhangira owundi mundu akakolha ekindu ekya bunyamuthima-thima bwawu bukaghana erikolha?

Ni biika byahi ebyanga thuhikya okw’ithwamu ndeke?

1. Saba Yehova akuwathikaye erithwamu eky’erikolha.—Yakobo 1:5.

2. Sekulhaya omwa Biblia n’omwa bitabu ebiseghemere okwa Biblia eribana emisingyi ey’erighenderako. Kandi wangana bulya Abakristayo abasi bingyi.

3. Lengekanaya erithwamu lyawu nga lyanga hamba lithi okwa bunyamuthima-thima bwawu n’obw’abandi.

ABANDI BAKABUGHA BATHI: “Wuwithe obughabe bw’erikolha ekyosi-kyosi ekya wanzire. Nindi oyutsomene eby’abandi bakalengekanaya?”

Busana naki thutholere ithwalengekania okw’iyowa lya Nyamuhanga, kuthya n’ery’abandi bandu?

OMWA BIKUHI

Thukathoka erithwamu ndeke thwamatsuka eriminya Yehova ng’akayowa athi oko mwatsi n’erilebya ebya thukakolha nga binemwendi wathikya abandi kutse nga bikendi bakolha nabi.

Eriyibukya

Wanga thwamu wuthi ebikatsemesaya Yehova?
Wanga kangirirya wuthi obunyamuthima-thima bwawu?
Wanga kangania wuthi ku wukasikaya obunyamuthima-thima bw’abandi?

Erisomo lino lyamahwa ebiro:

Ekilhubirirwa

Lengekanaya okw’ithwamu lirebe erya wunemuthegheka erikolha. Ghendera okwa biika bisathu ebiri omwa kasanduko “ Ni Biika Byahi Ebyanga Thuhikya okw’Ithwamu Ndeke?”

Ekindi:

Your other goal