ERISOMO 37
Ekya Biblia Yikabugha okw’Ikolha n’Esyosente
Omubiiri kutse esyosente bine byathaleka wukahangya-hangya? Kyangana kalha eribya ithunemutsomana ebiyithawa byethu n’eribya ithunemuha Yehova y’eriramya erimutholere. E Biblia yikaha amenge awanga thuwathikya.
1. E Biblia yikabugha yithiki okw’ikolha?
Nyamuhanga anzire ithwatsemera omubiiri wethu. E Biblia yikabugha yithi ‘busana n’omundu sihali ekibuya ekilhabire eriyibwira athi omubiiri wiwe ni mubuya.’ (Omugambuli 2:24) Yehova akakolha kutsibu. Thukabya thukamugherererya omw’ikolha emibiiri n’omuhwa, thukamutsemesaya kandi ikyaleka ithwayowa ndeke.
Ni kikulhu erikolha. Aliwe isithwalighira omubiiri eribya mukulhu kwilhaba eriramya Yehova. (Yoane 6:27) Akalhaghanisaya athi thwamamuhira embere, iniakendi tsomana ebiyithawa byethu by’ekinyamubiri.
2. Ni malengekania wahi awatholere awahambire okwa syosente?
Nomwakine indi e Biblia yikabugha yithi “esyofranka ni butheya,” kandi yikahabulha yithi esyosente sisa si syanga thulethera etseme. (Omugambuli 7:12) Busana n’ekyo, thukahirawa mw’omuhwa w’erithendianza esyosente sya kutsibu aliwe ‘eritsemera ebya thuwithe.’ (Soma Abaebrania 13:5.) Thukabya thukatsemera ebya thuwithe, thukabya bwiranda oko maghaniryo w’eribera erianza bingyi. Thukayihighulha oko mabanza awathatholere. (Emisyo 22:7) Kandi thukayibalhaya oko bitsibu ebikalhua omo misathu y’erisathira esyosente n’omo bitebe ebikalhaghanisaya eribana esyosente nyingyi syalhuba.
3. Thwangabya thuthi benge omw’ikolesya esyosente syethu?
Yehova ni Nyamuhanga oyukahithaya, kandi thukamughereraya ‘thukahithya ndeke, n’erisangira ebindu byethu n’abandi.’ (1 Timoteo 6:18) Thwanganabya benge omw’ikolesya esyosente syethu omw’isighika ekithunga n’omw’iwathikya abali omo buyithawa, kutsibu-tsibu abaramya balikyethu. Ekya Yehova akatsemera ky’ekilhubirirwa ekya thuwithe eky’erihithya butsira nga thwamahithya bingahi. Thwamahithya erilhua okwa muthima, ithukendi tsema kandi ithwatsemesya Yehova.—Soma Emibiri 20:35.
THASYIGHA BINGYI
Lhangira emighaso y’erihira omubiiri omo mwanya wagho n’eritsemera ebya wuwithe.
4. Hereraya Yehova y’olhukengerwa omwa mibere wukakoleramu omubiiri wawu
Obunywani bwethu na Yehova butholere ibwahamba okwa malengekania awathuwithe okw’ikolha. Mubughaye EVIDIYO, mwanakania okwa bibulyo ebikakwamako.
-
Omo vidiyo, ni kyahi ekyamakutsemesya oko malengekania n’emibere ya Jason okwa mubiiri wiwe?
-
Mwakolhaki erilhangira athi omubiiri akabya omo mwanya wagho?
Soma Abanya Kolosai 3:23, 24, mwanakania okwa kibulyo kino:
-
Busana naki ni kikulhu erilebya amalengekania agho thuwithe okw’ikolha?
Ni kikulhu erikolha. Aliwe isithwalighira omubiiri eribya mukulhu kwilhaba eriramya Yehova
5. Eritsemera ebya thuwithe kikathughasira
Abandu bangyi bakanza bathunge esyosente nene. Aliwe e Biblia yikathuha amenge awali mbaghane. Soma 1 Timoteo 6:6-8, mwanakania okwa kibulyo kino:
-
E Biblia yikathuhira mw’omuhwa w’erikolhaki?
Nomuthwangabya ithuwithe bike, thwangana tsema. Mubughaye EVIDIYO, mwanakania okwa kibulyo ekikakwamako.
-
Nomwakine indi bawithe esyosente nyike, ni kyahi ekikaleka esyofamile esi isyabya isinatsemire?
Kandi ibbwa thwamabya ithunawithe esyosente nyingyi kandi ithwabya ithukinanza esindi? Yesu mwaha eky’erileberyako ekikakanganaya akabi akali omw’eki. Soma Luka 12:15-21, mwanakania okwa kibulyo kino:
-
Eky’erileberyako kya Yesu kyamakweghesyaki?—Lebaya omulhondo 15.
Soma n’erilinganisya Emisyo 10:22 na 1 Timoteo 6:10. Neryo mukanaye okwa bibulyo bino:
-
Wukalengekanaya ekikulhu kutsibu ky’ekyahi, eribya munywani wa Yehova kutse eribya n’esyosente nene? Busana naki?
-
Ni bitsibu byahi ebikalhua omw’ikwamirira esyosente?
6. Yehova akendi tsomana ebiyithawa byethu
Ebitsibu by’omubiiri n’eby’esyosente byangana lenga okw’ikirirya lyethu omu Yehova. Mubughaye EVIDIYO erilebya nga thwanga rwanisya thuthi erilengwako eri, neryo mwanakania okwa bibulyo ebikakwamako.
-
Omo vidiyo, ni bitsibu byahi ebya mughalha wethu abana?
-
Mwakolhaki erirwanisya ndeke ebitsibu ebi?
Soma Matayo 6:25-34, mwanakania okwa kibulyo kino:
-
Ni byahi ebya Yehova akalhaghanisaya abakamuhira embere?
ABANDI BAKABUGHA BATHI: “Ngatholere ingakolha kutsibu erisighika eka yaghe. Sinanga ghenda okwa mihindano obuli wiki.”
-
N’isako lyahi erikakukakasaya ngoku erihira eriramya lya Yehova ly’embere ly’erithwamu eryuwene?
OMWA BIKUHI
Omubiiri n’esyosente bikayithaghisibawa, aliwe sibitholere bikathulemesya erikolera Yehova.
Eriyibukya
-
Ni kyahi ekyanga kuwathikya eribya n’amalengekania awatholere okw’ikolha?
-
Eritsemera ebya wuwithe kikakughasira kithi?
-
Wangakangania wuthi ku wukayikethera omulhaghe wa Yehova ow’eriha abandu biwe b’ebya bakayithagha?
MINYA BINGYI
Minya e Biblia nga yikanabugha yithi esyosente ni nyibi.
“Esyosente Nina Nzuko y’Ebibi Byosi?” (Omwatsi okwa muthahulha)
N’ihithya eriri lithi erikatsemesaya Yehova.
“E Biblia Yikabugha Yithiki okw’Ihithya?” (Omwatsi okwa muthahulha)
Mbwino emisathu y’erisathira esyosente yinawithe butsibu?
“Ekya Biblia Yikabugha—Emisathu y’Erisathira Esyosente” (Awake!, Okwakasathu 2015)
Minya ekyawathikaya oyuwabya akasatha emisathu y’erisathira esyosente kandi omwibi erihindulha engebe yiwe.
