ERISOMO 38
Sima Ekihembo ky’Engebe
Ni bingyi ebyuwene ebya thwangakolha n’eritsemera kundi thuwithe engebe. Nibya n’omughulhu thuwithe ebitsibu, ithwangana tsemera ebindu birebe omo ngebe. Thwanga kangania thuthi ku thukasima ekihembo ky’engebe? Kandi ni nzumwa yahi ngulhu eyikaleka ithwakolha ekyo?
1. Busana naki thutholere ithwasima engebe?
Thutholere ithwasima engebe kundi ni kihembo ekikalhua oku Thatha wethu w’olhwanzo, Yehova. Ya “nzuko y’engebe”—yuwahangika engebe yosi. (Esyonyimbo 36:9) ‘Akaha engebe n’omuka n’ebindu byosi oko bandu bosi.’ (Emibiri 17:25, 28) Yehova akathuha ebya thukayithagha nuku thubyeho. Aliwe eryongera okw’ekyo, akaleka ikyathokekana ithwe eritsemera engebe.—Soma Emibiri 14:17.
2. Thwanga kangania thuthi Yehova ku thukasima ekihembo ky’engebe?
Yehova atsuka erikutsomana eritsuka aho mama wawu ahekera obukule bwawu. Omwa Biblia, omughuma w’okwa baramya ba Nyamuhanga, ya Dawudi, mwabugha athi: ‘Muwanyilholhako isindi nabuthwa.’ (Esyonyimbo 139:16) Yehova akalhangira engebe yawu mwa y’obughuli bunene. (Soma Matayo 10:29-31.) Ikikendi muponesya kutsibu omundu amakighenderera erighunzaho engebe y’owundi mundu, nibya n’eyiwe iyuwene-wene. a (Eriluayo 20:13) Kandi ikikendi ponesya Yehova thwamaghalha-ghandya engebe yethu kutse erithendi ghendera okwa busondoli bw’eritheya engebe y’abandi. Thukabya thukatheya engebe yethu n’erisikya esyongebe sy’abandi, thukakanganaya ku thukasima ekihembo kibuyanga eky’engebe.
THASYIGHA BINGYI
Minya esyonzira esya wanga kanganiryamu ku wukasima ekihembo ky’engebe.
3. Tsomana amaghalha wawu
Abakristayo abayihereyo oku Yehova bakakolesaya engebe yabu yosi erimukolera. Kundi bakahayo emibiri yabu ng’obuhere oku Nyamuhanga, batholere ibatsomanayo. Soma Abanya Roma 12:1, 2, mwanakania okwa bibulyo bino:
-
Ni kyahi ekitholere erikuhira mw’omuhwa w’eritsomana amaghalha wawu?
-
Ni nzira nga syahi esyawanga koleramo ekyo?
4. Yitheghaye okwa bindu ebyanga leka iwahuthalha kutse erikwa
E Biblia yikathuhabulha yithi ambi ithwayihighulha okwa mitse eyanga hira engebe yethu y’omwa kabi. Mubughaye EVIDIYO eriminya ebya wanga kolha eriyitheya.
Soma Emisyo 22:3, mwanakania iwe n’abandi nga mwanga yitheya muthi . . .
-
omw’eka.
-
okwa mubiiri.
-
mukasatha.
-
wukaghendya kutse erihekwa omwa matoka, okwa piki-piki, kutse eggali.
5. Sikaya engebe y’omwana oyuthe wabuthwa
Dawudi mwasoborera ngoku Yehova akabya inianalhangire ebyosi ebikabya oko mwana iniane omo nda ya mama wiwe. Soma Esyonyimbo 139:13-17, mwanakania okwa kibulyo kino:
-
Embere sya Yehova, mbwino engebe y’omundu yikatsuka mama wiwe akaheka obukule kutse akabuthwa?
Ebihano bya Yehova okwa Israeli byabya bikatheya abamama n’abaana babu abathe babuthwa. Soma Eriluayo 21:22, 23, mwanakania okwa bibulyo bino:
-
Yehova iniakalhangira athi omundu oyukaghunzaho engebe y’omwana oyuthe wabuthwa omw’ithendi kighenderera?
-
Ibbwa angayowa athi omundu amakighenderera erikolha ekyo? b
-
Wukalhangira wuthi amalengekania agho Nyamuhanga awithe aya?
Nibya n’omukali oyukalhangira engebe mwa y’obughuli anganayowa eriha mw’obukule nga ky’ekyo kisa ekyanga muwathikya omwa mibere ey’alimu. Soma Isaya 41:10, mwanakania okwa bibulyo bino:
-
Omukali amahiribwa kw’akahathikano ak’erilhusyamo obukule, angasabandi y’obuwathikya? Busana naki?
ABANDI BAKABUGHA BATHI: “Omukali awithe obughabe bw’eriyithwiramu ng’alhusayemo obukule—ni mwana wiwe.”
-
Ni kyahi ekikaleka iwaligha ngoku Yehova akalhangira engebe ya mama n’ey’omwana oyuthe wabuthwa mwa y’obughuli?
OMWA BIKUHI
E Biblia yikathukangiriraya yithi thwanze, thusikaye, n’eritheya ekihembo kya Yehova eky’engebe. Eki mwamuli engebe yethu n’ey’abandi.
Eriyibukya
-
Busana naki engebe y’omundu ni y’obughuli embere sya Yehova?
-
Yehova akayowa athi omundu akakighenderera erighunzaho engebe y’omundu?
-
Ni kyahi ekya wukasima okwa kihembo ky’engebe?
MINYA BINGYI
Thwanga sima thuthi Yehova busana n’ekihembo ky’engebe?
Bana eky’erisubirya okwa kibulyo kino, Mbwino Nyamuhanga angana ghanyira omukali oyuwabirilhusyamo obukule?
“E Biblia Yikabugha Yithiki okw’Ihamo Obukule?” (Omwatsi okwa muthahulha)
Minya amalengekania agho Nyamuhanga awithe oko ngebe ng’atholere iniahamba athi okwa bya thukayitsemesayamo.
“‘Emisathu Eyikahira Engebe y’omw’Akabi’—Wunayitsame?” (Awake!, Okwerikumi 8, 2000)
Ibbwa omundu amasa mw’amalengekania w’eriyitha? Lebaya ngoku e Biblia yanga wathikya.
a Yehova atsomene kutsibu ababbunikire muthima. (Esyonyimbo 34:18) Anasi eriyowa ery’obulhumi eryangaleka omundu inianza eriyitha, kandi anzire eriwathikya. Eriminya ngoku obuwathikya bwiwe bwangana hindulha amalengekania, soma omwatsi “Nganzire Ngahole—E Biblia Iyananyiwathikya Namasa mw’Amalengekania w’Eriyitha?” owali omwa katsweka Minya Bingyi omw’isomo lino.
b Abanalhusiryemo obukule isibayowa nga sibanga ghanyirwa—Yehova angana baghanyira. Eriminya bingyi, lebaya omwatsi “E Biblia Yikabugha Yithiki okw’Ihamo Obukule?” owali omwa katsweka Minya Bingyi akali omw’isomo lino.
