Erithimba omwa kihugho, abandu bawithe malengekania muthina-muthina oko bwabu. Hakanayira abandi ibanywa obwabu n’abanywani babu bakayitsemesya. Abandi ibathwamu erithendi bunywa nahake. N’abandi ibabunywa erihika n’okw’ithamira. E Biblia yikabugha yithiki oko bwabu?

1. Nina kibi erinywa obwabu?

E Biblia siyirithanga erinywa obwabu. Nibya yikabya yikathondogholha ebihembo bingyi ebyo Nyamuhanga abirithuha, yikahiramo ‘n’ebinyu [evini]’ ebikaleka abandu ibatsema. (Esyonyimbo 104:14, 15) E Biblia yikanahulha abalhume n’abakali abathaleghulha balebe abanywa oko bwabu.​—1 Timoteo 5:23.

2. Ni habulha lyahi erya Biblia yikaha okwa bakathwamu erinywa obwabu?

Yehova akathanga erinywa obwabu bunene n’erithamira. (Abanya Galatia 5:21) Ekinywe kiwe kikabugha kithi: ‘Siwubye omwakathi-kathi k’abakalhumba obwabu.’ (Emisyo 23:20) Neryo thwamathwamu erinywa obwabu​—nomuthwangabya ithwibene—​sithutholere thukanywa bunene kikaleka thukalemwa erilengekania ndeke, eritheya olhulimi lhwethu n’ebya thukakolha, kutse eritsandya amaghalha wethu. Thwamabya isithwanga thoka erinywa obwabu okwa lhulengo, thutholere ithwathwamu eribulekera ighuma.

3. Thwanga sikya thuthi erithwamu ly’abandi bikahika okw’inywa obwabu?

Obuli mundu atholere iniayithwiramu ng’anywe obwabu kutse eyihi. Isithwatswera mundu oyukathwamu erinywa obwabu okwa lhulengo, kandi sithutholere thukahathikana omundu oyuthanza erinywa obwabu thuthi abunywe. (Abanya Roma 14:10) Thukathwamu erithendinywa obwabu kyamabya ikikendi lethera abandi b’ebitsibu. (Soma Abanya Roma 14:21.) Sithuli yisondera endundi ithwebene-bene, aliwe thukasondayayo busana n’abalikyethu.​—Soma 1 Abanya Korinto 10:23, 24.

 THASYIGHA BINGYI

4. Ithwamu nga wunywe obwabu kutse eyihi

Yesu iniakalhangira athi erinywa obwabu? Eribana eky’erisubirya, lebaya ekithiko-thiko eky’erimbere ekyo akolha. Soma Yoane 2:1-11, mwanakania okwa bibulyo bino:

• Erikwamana n’ekithiko-thiko eki, thwang’ighaki oko malengekania agho Yesu awithe oko bwabu n’abakabunywa?

• Kundi Yesu mwathathanga erinywa obwabu, Omukristayo atholere inialhangira athi oyukathwamu erinywa obwabu?

Aliwe, Omukristayo eribya iniali bwiranda erinywa obwabu, sikirimanyisaya kithi mughulhu wosi ni ky’amenge eribunywa. Soma Emisyo 22:3, wanalebya nga wunatholere erinywa obwabu kutse eyihi wamabya omwa mibere eyiri ahikwa hano:

• Wukaghendya ematoka kutse wukakolha oko byuma.

• Wuli mukule.

• Dokita amabya iniabirikuhabulha athi isiwanywa obwabu.

• Kikakukalira erinywa okwa lhulengo.

• Ekilhaghiro sikirikulighira erinywa obwabu.

• Iwune n’omundu oyuwabirithwamu erithendinywa obwabu kundi kyabya kikamukalira eribuleka kera.

Mbwino wunatholere erihira obwabu okwa bugheni bw’eriherukya kutse okw’iyitsemesya? Eriminya ekyanga kuwathikya erithwamu, mubughaye EVIDIYO.

Soma Abanya Roma 13:13 na 1 Abanya Korinto 10:31, 32. Enyuma w’erisoma obul’isako, mukanaye okwa kibulyo kino:

• Erighendera okwa musingyi oyu kyanga kuwathikya kithi erithwamu ebikatsemesaya Yehova?

 5. Ithwamu nga wunywe bungahi

Wamathwamu erinywa obwabu, ambi iwibuka kino: Nomwakine indi Yehova syali thanga erinywa oko bwabu, akathanga erinywa bunene. Busana naki? Soma Hosea 4:11, 18, mwanakania okwa kibulyo kino:

• Ni byahi ebyangabya omundu amanywa obwabu bunene?

Thwanga yihighulha thuthi okw’inywa bunene? Thutholere ithwayikehya, kutse eriminya erilemererwa lyethu. Soma Emisyo 11:2, mwanakania okwa kibulyo kino:

• Busana naki ni ky’amenge erihiraho olhulengo wukanywa obwabu?

6. Ni kyahi ekyanga wathikya omundu erileka erinywa bunene?

 OMWA BIKUHI

Yehova mwathuha obwabu nuku thutseme, aliwe akathanga erinywa bunene n’ethamiro.

Eriyibukya

• E Biblia yikabugha yithiki oko bwabu?

• Ni bitsibu byahi ebikalhua omw’inywa bunene?

• Thwanga sikya thuthi erithwamu ly’abandi bikahika okw’inywa obwabu?