ERISOMO 44

Emibalha Yosi Yikanatsemesaya Nyamuhanga?

BUGHAYA

Yehova anzire ithwatsemera engebe nibya n’eriyisyandira okwa bundi buthuku. Aliwe ibbwa emibalha yosi n’ebiro bikulhu ebyosi bikanamutsemesaya? Thwanga kangania thuthi ku thwanzire Yehova omo mwatsi oyu?

1. Busana naki emibalha mingyi siyiritsemesaya Yehova?

Iwangana sweka wukaminya ngoku emibalha mingyi siyiseghemere oko masako kandi enzuko yayu ku ni y’ekikafiri. Emibalha ng’eyo yanganabya iyihambangene n’edini y’amabehi. Yanganabya iyihambene n’eby’obukumu kutse iyiseghemere okwa ngangirirya y’eribugha indi omundu ali mwa kandu akatheholha. Eyindi mibalha yiseghemere okwa bihaniriro by’obulhaghu kutse okw’ikirirya omwa by’ebbahati. (Isaya 65:11, NWT) Yehova akakunga abaramya biwe athi: ‘Mulhue omo kathi-kathi kabo, simuthule oko kindu kithisirire.’—2 Abanya Korinto 6:17. a

2. Yehova akayowa athi busana n’emibalha mirebe eyikapipa abandu?

Yehova akathuhabulha athi isithwawa omo kithegho ky’eriyikethera ‘amaaka w’abandu.’ (Soma Yeremia 17:5.) Ebindi biro bikulhu bikahalhamba abathabali kutse abasirikali. Abandi bakayisyandira ehiminyikalho hy’erihanga kutse ekiro erihanga lyayithongolha. (1 Yoane 5:21) N’abandi bakakulha-kulhanaya ebithongole by’ekipolitiki kutse eby’erilhwira eribyaho ndeke ly’abandu. Yehova angayowa athi thwamapipa omundu kutse ekithongole kirebe, kutsibu-kutsibu ekikakulha-kulhanaya amalengekania awahukene n’ekighendererwa Kiwe?

3. Ni mibere yahi eyanga leka Yehova iniathaligha omubalha?

E Biblia yikathanga ‘erikunda, erithamira, n’eriyalhumba.’ (1 Petero 4:3) Omwa yindi mibalha abandu sibali yikakiraya kandi bakakolha eby’obutswatswa. Erisighalha ithune banywani ba Yehova, thutholere ithwayihighulha okwa mitse y’obutswatswa ng’eyo.

THASYIGHA BINGYI

Minya ngoku wanga tsemesya Yehova omw’ithwamu ndeke bikahika oko biro bikulhu n’emibalha.

4. Ghana emibalha eyithetsemesaya Yehova

Soma Abanya Efeso 5:10, mwanakania okwa bibulyo bino:

Ni kyahi ekya thutholere ithwabya ithunibukire thukathwamu nga thusangire omwa biro bikulhu birebe?
Ni biro bikulhu byahi ebyasibwe ewenyu?
Wukalengekanaya ebiro bikulhu ebyo bikanatsemesaya Yehova?

Ng’eky’erileberyako, wune wathayibulya Nyamuhanga ng’akalengekanaya athiki okw’ibuka ebiro by’amabuthwa? Omwa Biblia simuli omuramya wa Yehova oyuw’ibuka ebiro by’amabuthwa, aliwe mune ebiro by’amabuthwa bibiri eby’ibukawa n’abandu abathe muramaya. Soma Enzuko 40:20-22 na Matayo 14:6-10. Neryo mukanaye okwa bibulyo bino:

Ni kyahi ekya biro by’amabuthwa ebi bisosenemu?
Erikwamana n’emyatsi ye Biblia eyi, wukalengekanaya Yehova akayowa athi okwa biro by’amabuthwa?

Nomwabine, iwangana yibulya, ‘Mbwino ikyanahamba oku Yehova ingye erisangira omwa biro by’amabuthwa kutse omwa mubalha mulebe owathaseghemere oko Biblia?’ Soma Eriluayo 32:1-8. Neryo, mubughaye EVIDIYO mwanakania okwa bibulyo ebikakwamako.

EVIDIYO: Ebiro Bikulhu n’Emibalha Eyithetsemesaya Nyamuhanga (5:07)

Busana naki thutholere ithwaminya ebikatsemesaya Yehova?
Thwanga kikolha thuthi?

Ngoku thwanga minya omubalha mulebe ng’akanatsemesaya Yehova kutse eyihi

Mbwino aseghemere okwa syongangirirya esithe sy’amasako? Eriminya ekyo, lebaya ndeke enzuko yagho.
Mbwino akahalhamba abandu, ebithongole birebe, kutse ehiminyikalho hy’erihanga? Yehova musa ya thukahalhamba n’eriha olhukengerwa kandi thukamuyikethera erighunzaho ebitsibu by’ekihugho kino.
Mbwino emirwa yagho n’ebikakolhawamo bikahakanisaya emisingyi ye Biblia? Thutholere ithwasighalha ithunahenirye omwa by’esyongeso.

5. Wathikaya abandi erisikya ebya wikirirye

Kyangana kalha erighana erisangira omwa mibalha eyithetsemesaya Yehova abandi bamakuhathikana. Omw’ighumisirizya n’omwa menge basoborere erithwamu lyawu. Erilhangira eky’erileberyako ngoku eki kyanga kolhwa, mubughaye EVIDIYO.

EVIDIYO: Omwa Menge Soborera Ebya Wikirirye (2:01)

Soma Matayo 7:12, mwanakania okwa bibulyo bino:

Erikwamana n’omulhondo oyu, wunatholere iwathanga abahughu bawu abathikirirye wuthi sibasangire omwa kiro kikulhu?
Ni byahi ebya wanga kolha erikakasya abahughu bawu wuthi nomwakine indi siwendi sangira omwa biro bikulhu haghuma nabu, wubanzire kandi wubatsomene?

6. Yehova anzire ithwatsema

Yehova anzire ithwatsema haghuma n’abahughu bethu n’abanywani. Soma Omugambuli 8:15, mwanakania okwa kibulyo kino:

Omulhondo oyu akakanganaya athi ngoku Yehova anzire ithwatsema?

Yehova anzire abandu biwe ibayitsemesya kandi ibatsema haghuma n’abandi. Mubughaye EVIDIYO erilhangira ngoku eki kyabirilhangirika ndeke okwa mihindano eminene-minene okukabya ebihugho bingyi.

EVIDIYO: Omubere w’Erikokya Okwa Mihindano Eminene-minene Okukabya Ebihugho Bingyi (5:40)

Soma Abanya Galatia 6:10, mwanakania okwa bibulyo bino:

Mbwino thukayithagha erisangira omwa biro bikulhu imuthwakolera abandi ‘b’ebibuya’?
Ni hithya lyahi eryanga kutsemesya kutsibu—eriyowa iwuli w’erihithya kundi ni kiro kikulhu kutse erihithya kundi wanzire erihithya?
Abema bangyi hakanayira ibathegheka eriha abaana babu b’ebihembo kutse nibya ibabahabyo isibayitsulirye. Wamabya iwuwithe abaana, ni bindu nga byahi eby’embaghane ebya wanga bakolera?

ABANDI BAKABUGHA BATHI: “Enzuko y’ekiro kikulhu siki. Ekikulhu ly’eriyitsemesya n’abahughu n’abanywani.”

Iwe wanga bugha wuthiki?

OMWA BIKUHI

Yehova anzire ithwayitsemesya haghuma n’abahughu n’abanywani. Aliwe kandi anzire ithwayihighulha okwa mibalha eyithemutsemesaya.

Eriyibukya

Ni bibulyo byahi ebya thwanga yibulya eriminya omubalha mulebe ng’akanatsemesaya Yehova kutse eyihi?
Thwanga wathikya thuthi abahughu n’abanywani eriyitheghererya erithwamu lyethu bikahika oko biro bikulhu?
Wukaminya wuthi ngoku Yehova anzire ithwatsema kandi ithwayitsemesya?

Erisomo lino lyamahwa ebiro:

Ekilhubirirwa

Kolesaya ebya wam’igha omw’isomo lino erilebya ndeke ebiro bikulhu ebyasibwe ewenyu.

Ekindi:

Your other goal