ERISOMO 46
Busana Naki Iwayihayo oku Yehova n’Eribatizibwa?
Wukayihayo oku Yehova omw’imulhaghanisya omwa musabe ngoku wukendi muramya iyo musa n’erihira erisonda liwe ly’embere omwa ngebe yawu. (Esyonyimbo 40:8) Enyuma waho, iwabatizibwa. Omw’ikolha ekyo, wukabya iwukakanganaya abandi ngoku wabiriyihayo. Erithwamu eriyihayo oku Yehova ly’erithwamu eryuwene eryo mundu angakolha. Ni kyahi ekyanga kuhira mw’omuhwa ow’erikolha erithwamu likulhu eri kandi erikahindulha engebe yawu?
1. Ni kyahi ekikahira omwa mundu mw’omuhwa w’eriyihayo oku Yehova?
Olhwanzo lhwo lhukathuhira mw’omuhwa w’eriyihayo oku Yehova. (1 Yoane 4:10, 19) E Biblia yikathubwira yithi: ‘Wanze Omukama Nyamuhanga wawu n’omuthima wawu wosi, n’ekirimu kyawu kyosi, n’obulengekania bwawu bwosi, n’amaaka wawu wosi.’ (Mariko 12:30) Thukakanganaya ku thwanzire Nyamuhanga omwa bya thukabugha n’erikolha. Ngoku omulhume n’omukali abanzene kundu ku bakanaherukanaya, kuthya nethu olhwanzo olhwa thuwithire Yehova lhukaleka ithwayihayo okw’iyo n’eribatizibwa.
2. Ni mighisa yahi eyo Yehova akaha Abema biwe ababatizibirwe?
Wukabya wukabatizibwa, wuk’ingira omw’ihiika lya Yehova eritsemire. Neryo wukendi yilhangirira olhwanzo lhwiwe omwa nzira nyingyi, kandi wukendyongera eriyithunda hakuhi nayu kwilhaba ngoku wuli munabwire. (Soma Malaki 3:16-18.) Eryongera okw’ibya na Yehova nga Thatha wawu, wukendibya omw’ihiika ly’obunyakirimu eriri mw’abalikyethu erithimba omwa kihugho kyosi abanzire Yehova kandi abakwanzire. (Soma Mariko 10:29, 30.) Nomwabine, hane ebya wutholere iwatsuka erikolha wuthe wabatizibwa. Wutholere iwigha oku Yehova, erimwanza, n’erikirirya omu Mughalha wiwe. Erighunzerera, wutholere iwayihayo oku Yehova. Wamabirikolha ebyo neryo wukabatizibwa, iwukendibya omwa nzira ey’erisyatsemera engebe kera na kera. Ekinywe kya Nyamuhanga kikabugha kithi: ‘Olhubatizo ni busana n’erilhama lyawu.’—1 Petero 3:21.
THASYIGHA BINGYI
Minya ekikaleka ikyabya kikulhu iwe eriyihayo oku Yehova n’eribatizibwa.
3. Ithwe bosi thutholere ithwasombolha oyo thukendi kolera
Kera omwa Israeli, abandi mubalengekania bathi bangana ramya Yehova n’enyamuhanga y’amabehi Baali. Aliwe Yehova mwathuma omuminyereri wiwe Eliya erihengulha amalengekania awathahikire aya. Soma 1 Abami 18:21, mwanakania okwa kibulyo kino:
-
N’ithwamu lyahi erya Baisraeli babya b’erikolha?
Nethu ng’Abaisraeli, thutholere ithwasombolha oyo thukendi kolera. Soma Luka 16:13, mwanakania okwa bibulyo bino:
-
Busana naki sithwanga ramya Yehova kandi ithwabya ithunemuramya owundi kutse ekindi kindu?
-
Thukakanganaya thuthi Yehova ku yathukathwamu eriramya?
4. Ghaniraya oko lhwanzo olho Yehova akuwithire
Yehova abirithuha ebihembo bingyi bibuyanga. Thwangamuhaki? Mubughaye EVIDIYO.
Ni nzira nga syahi esyo Yehova abirikukanganiryamo olhwanzo? Soma Esyonyimbo 104:14, 15 na 1 Yoane 4:9, 10, mwanakania okwa bibulyo bino:
-
Ni bihembo byahi ebyo Yehova abirikuha ebya wukatsemera kutsibu?
-
Ebihembo ebyo bikaleka iwayowa wuthi okw’iyo?
Thwamahebwa ekihembo ekyo thwanzire kutsibu, thukanza ithwakangania ku thukasima oyulyathuhakyo. Soma Eryibuka Ebihano 16:17, mwanakania okwa kibulyo kino:
-
Wukabya wukalengekania okwa byosi ebya Yehova abirikukolera, kikaleka iwanza erimuhaki?
5. Eriyihayo oku Yehova likaletha mighisa mingyi
Abangyi bikirirye bathi obuminywa, omubiiri owuwene, kutse esyosente by’ebikendi leka ibatsema. Ekyo nina kwenene? Mubughaye EVIDIYO, mwanakania okwa bibulyo ebikakwamako.
-
Nomwakine indi omusathi oyuli omwa vidiyo aby’anzire erisatha omupira, ni kyahi ekyaleka inialeka omusathu oyo?
-
Mwathwamu eriyihayo oku Yehova, butsira okwa by’erisatha omupira. Wukalengekanaya mwanathwamu ndeke? Busana naki?
Omukwenda Paulo athalyabya Mukristayo, aby’awithe omubiiri w’ekitsumbi kinene. Omukangirirya oyuwasibwe yuwamukangiriraya emighambo y’Ekiyuda. Aliwe mwasighania ebyo nuku abye Mukristayo. Paulo mwanayikubya bwomo? Soma Abanya Filipi 3:8, mwanakania okwa bibulyo bino:
-
Ni kyahi ekyaleka Paulo iniabugha athi ebyo abya akakolha athalyabya Mukristayo byabya “ng’ebibaya,” kutse ekyabu?
-
Mwabanaki ibbwa?
-
Mbwino wangana linganisya erikolera Yehova n’eyindi nzira yosi-yosi eyo wangakoleseryamo engebe yawu?
Paulo abere akabya Mukristayo, mwabana ebilengire eby’asighanaya
ABANDI BAKABUGHA BATHI: “Sihali ekyangaleka iwahayo engebe yawu oku Nyamuhanga. Thatsuka eriyitsemesya.”
-
Busana naki iwabugha wuthi kitholere iwe eriyihayo oku Yehova?
OMWA BIKUHI
Olhwanzo lhukaleka ithwayihayo oku Yehova n’eribatizibwa.
Eriyibukya
-
Busana naki Yehova yutholere olhwanzo lhwethu lhwosi n’eriramibwa?
-
Yehova akahemba athi Abema biwe ababatizibirwe?
-
Wunanzire eriyihayo oku Yehova?
MINYA BINGYI
Lebaya ekyaleka omwimbi n’omusathi w’omupira ibathwamu eriyihayo oku Yehova.
Abalere Bakayibulhaya—Ngendi Kolesya Indi Engebe Yaghe?—Erisubya Ameso Okwa by’Enyuma (6:54)
Minya esindi nzumwa esyangaleka iwayihayo.
“Busana Naki Iwayihayo oku Yehova?” (The Watchtower, Okwokubanza 15, 2010)
Omwa muziki w’evidiyo, lhangira etseme ey’abo abakayihayo oku Yehova.
Omo mwatsi “Ahabw’Emyaka Iningayibulhaya, ‘Ekighendererwa ky’Engebe Niki?’” lhangira ekyaleka omukali inialebya ndeke eby’akahira embere.
“E Biblia Yikahindulha Esyongebe” (The Watchtower, Okwerikuminakughuma 1, 2012)
