Abakine baghole bakabya n’amaha bathi etseme eyo babya nayo okwa kiro balungawa yikendibya ya kera na kera. Kandi ekyo kyanganabya. Abakrisitayo abamabirighunza myaka minene omwa butheke kandi ababirikolha kutsibu erighendera okw’ihabulha lye Biblia banasi ekyo ku kithokekene.

1. N’ihabulha lyahi erya Biblia yikaha abiba?

Yehova abirisombolha omulhume eribya muthwe w’eka yiwe. (Soma Abanya Efeso 5:23.) Yehova anzire omulhume iniabya akathwamu ebikendi ghasira eka yiwe. E Biblia yikahabulha abiba yithi: ‘Mwanze abakali benyu.’ (Abanya Efeso 5:25) Ekyo kikamanyisayaki? Omulhume oyuwithe olhwanzo akathwalha mukali wiwe omo lhukeri, iban’eka n’omwa bandu. Akamutheghaya oko byanga mukolha nabi kandi akalengaho kutsibu erimutsomana kinyamubiri n’omw’iyowa. (1 Timoteo 5:8) Ekikulhu kutsibu, akasondolha omw’itsomana ebiyithawa biwe eby’obunyakirimu. (Matayo 4:4) Ng’eky’erileberyako, anganasaba n’erisoma haghuma e Biblia na mukali wiwe. Omulhume amatsomana mukali wiwe omo lhwanzo, akasighalha iniane bughuma ndeke na Yehova.​—Soma 1 Petero 3:7.

2. N’ihabulha lyahi erya Biblia yikaha abakali bathahibwa?

Ekinywe kya Nyamuhanga kikabugha kithi omukali ‘akenge iba wiwe.’ (Abanya Efeso 5:33) Angakolha ekyo ky’athi? Angana lengekania okwa mibere mibuya ya mwira wiwe n’akaghalha ako akahiraho erimutsomana iyo n’abaana babu. Kandi angana kangania erisikya omw’isighika erithwamu eryo akakolha n’omw’ikania nayu omo bwolho-bwolho n’erimukaniako ndeke, nomwangabya isi mwikirirya.

3. Abathahenie banga kamathya bathi obutheke bwabu?

E Biblia yikakanaya okwa bathahenie yithi: ‘Ababiri basyabya mubiri mughuma.’ (Matayo 19:5) Eki kikamanyisaya kithi batholere ibarwanisya ekyosi-kyosi ekyanganza eribaghabulha. Bakakolha ekyo omw’ibana mughulhu wosi endambi y’erisiba haghuma kandi ibanemukanirania omo lhwanzo oko malengekania n’eriyowa eryo bawithe. Sibali lighira ekyosi-kyosi kutse omundu wosi-wosi​—athe Yehova​—eribya kindu kikulhu kwilhaba omwanze wabu omwa butheke. Bakayitheghaya nuku sibakulha-kulhanaye obunywani obuthatholere n’owundi mundu wosi-wosi.

 THASYIGHA BINGYI

4. Abiba​—mwanze n’eritsomana ndeke bakali benyu

5. Abakali bathahibwa​—mwanze n’erisikya bira benyu

E Biblia yikahira omwa mukali mw’omuhwa ow’erisikya mwira wiwe mbulha ni muramya wa Yehova kutse eyihi. Soma 1 Petero 3:1, 2, mwanakania okwa bibulyo bino:

• Wamabya iwuwithe omulhume oyuthikirirye, ahathe erithika-thika iwukendyanza aramaye Yehova. Wukalengekanaya ni kyahi ekyanga kolha ndeke​—eribera erimuthulira kutse erimukangya emibere eyuwene n’erimusikya? Busana naki?

Omulhume na mukali wiwe abosi babiri bangana thwamu haghuma ebyuwene. Aliwe, hanganayira omukali iniathalighirana  n’ebya mwira wiwe. Aho iniangana bugha amalengekania wiwe inianathekene kandi omw’isikya, aliwe atholere iniaminya ngoku Yehova abiriha mwira wiwe y’olhukwamirwa olhw’erithwamu ekitholere omw’eka. Omukali atholere inialengaho erisighika erithwamu lya mwira wiwe. Omw’ikolha ekyo, akawathikaya omw’iretha omw’eka mw’etseme. Soma 1 Petero 3:3-5, mwanakania okwa kibulyo kino:

• Yehova akayowa athi omukali amasikya mwira wiwe?

6. Mwangana singura ebitsibu by’omwa butheke bwenyu

 OMWA BIKUHI

Omulhume na mukali wiwe bangana tsema bamanzana, bamasikania, n’erighendera okwa misingyi ye Biblia.

Eriyibukya

• Omulhume angawathikya athi eriletha omwa butheke mw’etseme?

• Omukali angawathikya athi eriletha omwa butheke mw’etseme?

• Wamabya iwune omwa butheke, ni musingyi wahi we Biblia owanga kuwathikya erighumya obutheke bwawu?