ERISOMO 50

Eka Yawu Yanga Tsema Yithi?—Ekitsweka 2

BUGHAYA

Abaana ni kihembo erilhua oku Yehova. Anzire ababuthi ibatsomana ndeke ekihembo ekyo. Yehova akaha erihabulha ly’amenge eryanga wathikya ababuthi erikolha ekyo. Erihabulha liwe lyangana wathikya n’abaana eriyira ekyo bakakolha nuku omw’eka mubye etseme.

1. N’ihabulha lyahi erya Yehova akaha ababuthi?

Yehova anzire ababuthi ibanza abaana babu n’eribana endambi nene ngoku bangathoka ey’erisiba nabu. Kandi anzire ababuthi ibatheya abaana babu okwa byanga bakolha nabi kandi ibakolesya emisingyi ye Biblia eribathendeka. (Emisyo 1:8) Akabwira abathatha athi: ‘Mukulhayebo [abaana benyu] omo nzira y’Omukama.’ (Soma Abanya Efeso 6:4.) Yehova akatsema omughulhu ababuthi bakakwama obusondoli bwiwe bakalembera abaana n’erithendiha olhukwamirwa olho lhwa wundi mundu.

2. N’ihabulha lyahi erya Yehova akaha abaana?

Yehova akahabulha abaana athi: ‘Mwowe ababuthi benyu.’ (Soma Abanya Kolosai 3:20.) Abaana bakabya bakasikya n’eriowa ababuthi babu, bakatsemesaya Yehova n’ababuthi babu. (Emisyo 23:22-25) Yesu mwahiraho eky’erileberyako ekyuwene iniakine mulere. Nomwakine indi abya ahikene, iniakowa n’erisikya ababuthi biwe.—Luka 2:51, 52.

3. Mwanga yithunda muthi hakuhi na Nyamuhanga inywe ng’eka?

Wamabya iwuli mubuthi, ahathe erithika-thika wanzire abaana bawu ibanza Yehova ngoku wumwanzire. Eki wanga kiberererya wuthi? Omw’ikolha ekya Biblia yikabugha kino: ‘Wasyakangiriryabyo [ebinywe bya Yehova] abaana bawu n’omuhwa, kandi wasyakaniryabo omughulhu wikere omwa nyumba yawu, n’omughulhu wukalendera omwa nzira.’ (Eryibuka Ebihano 6:7) ‘Erikangirirya’ likamanyisaya eryeghesya omw’isubirira omwa kindu. Obundi wunasi ngoku mughulhu mungyi wutholere iwasubirira omwa kindu ekya wukabwira abaana bawu nuku bakibuke. Omulhondo oyu akamanyisaya athi mughulhu wosi wutholere iwasondekania ehighisa ehy’erikanirya abaana bawu oku Yehova. Ni kibuya erihiraho endambi y’eriramya ly’eka obuli wiki. Wamabya isiwuwithe abaana, nawu iwukendi ghasirwa omw’ihiraho endambi y’erigha Ekinywe kya Nyamuhanga obuli wiki.

THASYIGHA BINGYI

Minya ebya wanga kolha eribya n’eka eyitsemire kandi eyiri mw’obuholho.

4. Thendeka abaana bawu omo lhwanzo

Kyangana kalha erithendeka omwana. E Biblia yanga wathikya yithi? Soma Yakobo 1:19, 20, mwanakania okwa bibulyo bino:

Ababuthi banga kangania bathi olhwanzo bakakanirania n’abaana babu?
Busana naki omubuthi syatholere akakunga abaana biwe inianahithene? a

5. Theghaya abaana bawu

Erithoka eritheya abaana bawu, ni kikulhu erikania n’obuli mwana okwa by’emyatsi y’engyingo. Eki kyangana kalha. Mubughaye EVIDIYO, mwanakania okwa bibulyo ebikakwamako.

EVIDIYO: Theghaya Abaana Bawu Okwa Bibi (2:58)

Busana naki kikakalira abandi babuthi erikanirya abaana babu okwa by’emyatsi y’engyingo?
Ni nzira nga syahi esya bandi babuthi bakasoboreramu abaana babu eby’emyatsi y’engyingo?

Ngoku kyanalhaghulhawa, ekihugho kya Sitani kikayongera eribya kibi. Soma 2 Timoteo 3:1, 13, mwanakania okwa kibulyo kino:

Abaghuma b’okwa bandu babi abakanibweko omwa mulhondo 13 bakakolha okwa baana kw’eby’obuthundirya. Neryo, busana naki ni kikulhu ababuthi erikangirirya abaana babu okwa by’emyatsi y’engyingo kandi ngoku banga yitheya okwa bakakolha eby’obuthundirya?

Wunalhue wasi?

Abema ba Yehova bakahulhukaya myatsi mingyi eyikawathikaya ababuthi erikangirirya abaana babu okwa by’emyatsi y’engyingo kandi ngoku banga batheya okwa bakakolha eby’obuthundirya. Ng’eky’erileberyako, lebaya:

Theghaya Abaana Bawu (evidiyo)
Ighira Okwa Mukangirirya Mukulhu, esura 10 na 32
“Erikangirirya Omwana Wawu Okwa by’Emyatsi y’Engyingo” (Awake! No. 5 2016)

6. Sikaya ababuthi bawu

Abaana n’abalengwa bangana kangania ku basikirye ababuthi babu omwa mibere bakakaniranayamu nabu. Mubughaye EVIDIYO, mwanakania okwa bibulyo ebikakwamako.

EVIDIYO: Nanga Kanirania Indi n’Ababuthi Baghe? (2:19)

Busana naki ni kibuya omwana erikanirania n’ababuthi biwe omw’isikya?
Omwana anga kanirania athi n’ababuthi biwe omwa nzira eyikakanganaya erisikya?

Soma Emisyo 1:8, mwanakania okwa kibulyo kino:

Omwana atholere iniakolha kyahi ababuthi biwe bakamuha obusondoli?

7. Muramaye Yehova ng’eka

Esyofamile sy’Abema ba Yehova sikahiraho obuthuku bw’eriramya haghuma obuli wiki. Eriramya ly’eka eri lyanga kolhwa lithi? Mubughaye EVIDIYO, mwanakania okwa bibulyo ebikakwamako.

EVIDIYO: Eriramya ly’Eka—Ebitsibu n’Emighisa (8:04)

Efamile yangabya yithi n’endegheka y’eriramya ly’eka mughulhu wosi?
Omubuthi angakolhaki nuku eriramya ly’eka libye erikatsemesaya kandi erikaghasa?—Lebaya ekisasani ekiri okw’itsuka ly’erisomo lino.
Ni kyahi ekyangana balemesya erighira haghuma ng’eka?

Kera omwa Israeli, Yehova inianzire esyofamile isyabya isinemukanirania okwa Masako mughulhu wosi. Soma Eryibuka Ebihano 6:6, 7, mwanakania okwa kibulyo kino: