Obuli mundu awithe eby’anzire okwa by’emyambalire n’emiyipambire. Thwamaghendera okwa misingyi mike ye Biblia eyolhobire, isithwendi subulira okw’ilengekania okwa bya thwanzire bisa aliwe n’okw’itsemesya Yehova. Thukanaye okwa mighuma y’okwa misingyi eyo.

1. Ni misingyi yahi eyitholere erithusondolha thukasombolha emyambalire n’emiyipambire?

Thutholere ithwasombolha ‘esyongyimba esitholere,’ n’eriyisugha ndeke erikangania ku ‘thukakenga Nyamuhanga.’ (1 Timoteo 2:9, 10) Thulebaye emisingyi ini: (1) Thwambale esyongyimba ‘esitholere.’ Ngoku thukanalhangira okwa mihindano y’ekithunga, abandu ba Yehova sibalyambalha ebisosene, aliwe esyongyimba syethu n’emikolere y’esyonzwiri syethu bikakanganaya erisikya Nyamuhanga oyo thukaramaya. (2) Thutholere ithwayitheya omwa myambalire yethu, ni bugha ambu, emisosere yethu isiyabya y’eribukya omwa bandi mw’esyongumbu sy’emyatsi y’engyingo, kutse erileka abandi bakathulengekaniryamu ebindi. (3) Thukakanganaya obulengekania bw’amenge omw’ithendi kopa obuli mulembe owanamasa kuthya n’emiyipambire. (4) Emisosere yethu yitholere iyakangania mughulhu wosi ngoku ‘thukakenga Nyamuhanga,’ erikangania abandi ngoku thukaramaya Nyamuhanga w’okwenene.​—1 Abanya Korinto 10:31.

2. Emisosere yethu yangahamba yithi okwa bikirirya balikyethu?

Nomwakine indi thuwithe obughabe bw’eriyisombolera eky’eriambalha, thutholere ithwalengekania emisosere yethu nga yangahamba yithi okwa bandi. Thukalengaho kutsibu erithendi ponesya mundu, aliwe ‘eritsemesya mulikyethu, busana n’erimuwathikya n’erimuhangania ndeke.’​—Soma Abanya Roma 15:1, 2.

3. Emisosere yethu yanga letha yithi abandi omw’iramya ly’okwenene?

Thukalengaho eriambalha ndeke okwa mighulhu yosi, aliwe kwilhabirirya thukalebaya ndeke emyambalire yethu thukaghenda okwa mihindano n’omw’ithulira. Sithulyanza abandu bakalengemeribwa thukababwira omwatsi mukulhu owathuwithe. Omwakanya k’ekyo, emisosere yethu yanganaleka abandi ibanza ekwenene ‘n’eryuwania erikangirirya ly’Omulhamya wethu.’​—Tito 2:10.

 THASYIGHA BINGYI

4. Emisosere eyuwene yikakanganaya ngoku thusikirye Yehova

Ni nzumwa yahi ngulhu eyikaleka ithwatsomana emisosere yethu? Soma Esyonyimbo 47:2, mwanakania okwa bibulyo bino:

• Eribya ithuk’imanira Yehova kyanga hamba kithi okwa myambalire yethu?

• Wukalengekanaya nina kindu ekitholere eritsomana emisosere yethu thukaghenda okwa mihindano n’omw’ithulira? Busana naki?

 5. Ngoku thwanga sombolha ndeke emyambalire n’emiyipambire

Mubughaye EVIDIYO.

Mbulha esyongyimba syethu ni sy’ebbeyi kutse eyihi, sitholere isyabya isinahenirye kandi isinatholere busana n’emibere eya thulimu. Soma 1 Abanya Korinto 10:24 na 1 Timoteo 2:9, 10. Neryo, mukanaye okwa kikaleka ithwanza eriyihighulha okwambalha . . .

• kithya-kithya.

• esithwamakirire, kutse esikakanganaya ebitsuku by’esisoni.

Nomwakine indi Abakristayo sibakiri omwa Mighambo ya Musa, yikathubisulira amalengekania wa Yehova. Soma Eryibuka Ebihano 22:5, mwanakania okwa kibulyo kino:

• Busana naki thutholere ithwayihighulha okwa myambalire n’emiyipambire eyikaleka ithwasosa abakali kutse abalhume?

Soma 1 Abanya Korinto 10:32, 33 na 1 Yoane 2:15, 16, mwanakania okwa bibulyo bino:

• Busana naki thutholere ithwalebya emyambalire yethu nga yikanaponesaya abandi omwa bandu abathwikeremu kutse omwa kithunga?

• Ni mulembe wahi w’esyongyimba n’emiyipambire owakanyirire ewenyu?

• Wukalengekanaya omulembe ng’oyo anatholere okwa Mukristayo? Busana naki?

 OMWA BIKUHI

Thwamathwamu ndeke okwa by’emisosere yethu, thukakanganaya ku thusikirye Yehova n’abandi.

Eriyibukya

• Busana naki emyambalire n’emiyipambire yethu ni bikulhu embere sya Yehova?

• Ni misingyi nga yahi eyitholere erithusondolha thukathwamu okwa by’emisosere yethu?

• Emisosere yethu yangahamba yithi okwa mibere eya bandu bangalhangiriramu eriramya ly’okwenene?