ERISOMO 53
Sombolha eby’Eriyitsemesya Ebikatsemesaya Yehova
Yehova ni “Nyamuhanga oyutsemire.” (1 Timoteo 1:11, NWT) Anzire ithwatsema n’eritsemera engebe. Akatsema thukahiraho endambi y’erilhuhuka okwa mibiiri yethu. Omw’isomo lino, thukendi lhangira ngoku thwangakolesya endambi yethu y’erilhuhuka omwa syonzira esikatsemesaya kandi esyuwene—kandi esikatsemesaya na Yehova.
1. Thutholere ithw’ibukaki thukasombolha eby’eriyitsemesya?
Ni byahi ebya wukanza iwakolha wukalhuhuka? Abandi bakanza ibabya eka ibobene—ibasoma ebitabu, erihulikirira omuziki, erilebya efilimu, kutse erighenda okwa Intaneti. Abandi bakanza ibabya n’ebya bakakolha n’abanywani babu—eriyibungya-bungya, eriziha, kutse erisatha emisathu mirebe. Mbulha thwamasombolha byahi, thutholere ithwalhangira thuthi eriyitsemesya lyethu ‘likatsemesaya Omukama.’ (Abanya Efeso 5:10) Ni kikulhu eriminya eki kundi eby’eriyitsemesya bingyi biri mw’ebindu ebya Yehova aponire, ng’eby’obwithi, eby’obusingiri, kutse eby’obukumu. (Soma Esyonyimbo 11:5.) Ni kyahi ekikendi thuwathikya erisombolha ndeke eby’eriyitsemesya?
Thwamasombolha abanywani abanzire Yehova, ibangana thuhambako ndeke kandi ibaleka ithwasombolha ndeke eby’eriyitsemesyamo. Ngoku thwanalhangira omw’isomo ly’ahanyuma, ‘oyukalendera n’abandu b’amenge asyabya n’amenge.’ Okwa lhundi lhuhandi, thwamasiba mughulhu wosi n’abandu abathanzire ebihano bya Nyamuhanga, ‘ithukendi syakwa.’—Emisyo 13:20.
2. Busana naki ni kikulhu erilebya ndeke obuthuku obwa thukaghunza omwa by’eriyitsemesya?
Eby’eriyitsemesya nomubyangabya ibyuwene, thutholere ithwayitheya eribighunzako buthuku bunene kutsibu. Bithe bithya, ithwanganabulha endambi y’erikolhamo emibiiri y’omughaso munene. E Biblia yikathubwira yithi ‘isithwalhabaya ebiro byo buyira,’ ni bugha ambu, thukolesaye ndeke endambi yethu.—Soma Abanya Efeso 5:15, 16.
THASYIGHA BINGYI
Minya ngoku wangathwamu ndeke bikahika okwa by’eriyitsemesya.
3. Yihighule okwa by’eriyitsemesya ebithuwene
Busana naki thutholere ithwasombolha eby’eriyitsemesya ithunayitheghirye? Mubughaye EVIDIYO, mwanakania okwa bibulyo ebikakwamako.
-
Emisathu ey’Abanya Roma eya kera yisosene yithi n’eriyitsemesya erya munabwire?
-
Omo vidiyo, ni kyahi ekya Danny alyigha okw’iyitsemesya?
Soma Abanya Roma 12:9, mwanakania okwa kibulyo kino:
-
Omulhondo oyu angakuwathikya athi erisombolha eby’eriyitsemesya ebitholere?
Ebighuma by’okwa bya Yehova aponire by’ebyahi? Soma Emisyo 6:16, 17 na Abanya Galatia 5:19-21. Enyuma w’erisoma obul’isako, mukanaye okwa kibulyo kino:
-
Okwa biri omwa milhondo eyi, ni byahi ebikanyirire omwa by’eriyitsemesya ebya munabwire?
Ngoku wanga sombolha ndeke eby’eriyitsemesya
Yibulhaye:
-
Muli byahi? Mbwino muli ebya Yehova aponire?
-
Ndambi yahi? Bikan’ingirira emibiiri y’omughaso munene?
-
Muli bahi? Binemwendi leka ingakolongana n’abandu abathanzire Yehova?
Kanya k’eriwa omo kabi, kyuwene eriyisegherya haali okw’iko. Ky’ekikaleka ithwabya ithutholere eriyihighulha okwa by’eriyitsemesya byosi-byosi ebya thukalhangira thuthi byanganabya isibyuwene
4. Kolesaya ndeke endambi yawu
Mubughaye EVIDIYO, mwanakania okwa kibulyo ekikakwamako.
-
Nomwakine indi mughalha wethu oyuli omo vidiyo abya isyalilebaya ebithuwene, emikoleserye y’obuthuku bwiwe bw’erilhuhuka muyamuhambako yithi?
Omwa Abanya Filipi 1:10, NWT, e Biblia yikabugha yithi: “Minya ndeke ebikulhu kutsibu.”
-
Omulhondo oyu angathuwathikya athi erilebya endambi eya thutholere ithwaghunza okwa by’eriyitsemesya?
5. Sombolha eby’eriyitsemesya ebyuwene
Nomwakine indi ebindi by’eriyitsemesya sibiritsemesaya Yehova, hane bindu bingyi ebikatsemesaya ebithemuponesaya. Soma Omugambuli 8:15 na Abanya Filipi 4:8, mwanakania okwa kibulyo kino:
-
Ni yitsemesya lyahi eryuwene erya wukatsemera?
Wangana tsemera eby’eriyitsemesya ebyuwene
ABANDI BAKABUGHA BATHI: “Eby’eriyitsemesya ebirimo eby’obwithi, obusingiri, kutse eby’obukumu siki, ekikulhu ly’erithendi kolha ebirimo.”
-
Iwe iwukendi bugha wuthiki?
OMWA BIKUHI
Yehova anzire ithwasombolha n’eritsemera eby’eriyitsemesya ebyuwene.
Eriyibukya
-
Ni by’eriyitsemesya byahi eby’Abakristayo batholere ibayihighulhako?
-
Busana naki ni kikulhu erilebya ndeke obuthuku obwa thukaghunza omwa by’eriyitsemesya?
-
Busana naki wanzire iwasombolha eby’eriyitsemesya ebikatsemesaya Yehova?
MINYA BINGYI
Minya oyuli kw’olhukwamirwa lhw’erisombolha ebya thukayitsemesayamo.
Minya ngoku wangathwamu bikahika okw’iyitsemesya n’erilhuhuka.
“Eriyitsemesya Lyawu Linemwendi Kughasira?” (The Watchtower, Okwerikumi 15, 2011)
Omo mwatsi “Munasingura n’Omubere Waghe w’Akasolholho,” lhangira ekyaleka omulhume iniahindulha eby’akayitsemesayamo.
“E Biblia Yikahindulha Esyongebe” (The Watchtower, Okwakabiri 1, 2010)
Lhangira ngoku mama akathwamu ndeke bikahika okwa by’eriyitsemesya ebirimo eby’obukumu.
