ERISOMO 55
Sighika Ekithunga Kyenyu
Erithimba omo kihugho kyosi, esyomiliyoni sy’abandu ibanatsemire bakaramaya Yehova omwa syongumi sy’ebithunga. Bakasima erikangiriribwa n’obusondoli ebyo bakahebawa, kandi n’omuhwa munene bakasighika ekithunga omwa syonzira nyingyi. Ayo wanamalengekania agho wuwithe okwa kithunga kyenyu?
1. Ni nzira nga syahi esya wanga koleseryamu endambi n’akaghalha kawu erisighika ekithunga?
Ithwe bosi thwangana wathikya omwa kithunga. Ng’eky’erileberyako, mbwino abandi omo kithunga kyenyu bakekelhuhire kutse ni batseke? Wangana wathikya eribathwalha okwa mihindano? Kutse wangana bawathikya okwa bindi bindu, ng’eribaghendera omwa kathali kutse eribawathikya okwa mibiiri y’eka? (Soma Yakobo 1:27.) Kandi thwangana yihayo eriwathikya eriyonza n’erisugha Ekisenge ky’Obwami. Sihali oyukathukaka erikolha ebindu ebi. Olhwanzo olhwa thuwithire Nyamuhanga n’abalikyethu lhukaleka ‘ithwayihayo.’—Esyonyimbo 110:3.
Abema ba Yehova ababatizibirwe bangana sighika ekithunga n’omwa sindi nzira. Baghalha bethu abatholere bunyakirimu bangana kolha ng’abaghombe abawathikya, endambi iyahika ibabya basyakulhu b’ekithunga. Baghalha bethu n’abali bethu abosi bangana sighika omubiiri w’erithulira omw’ikolha ng’abatemburi. Abandi Bema bangana wathikya okw’ihimba emyanya y’eriramiryamu kutse erighenda omo bithunga ebiri mw’obuyithawa bulebe.
2. Thwanga kolesya thuthi ebya thuwitheko erisighika ekithunga?
Thwangana ‘sikya Yehova omo busoki bwethu,’ kutse ebindu byethu by’obughuli. (Emisyo 3:9) Thukalhangira ini lhusunzo erihayo esyosente n’ebindi erisighika ekithunga kyethu n’omubiiri w’ekihugho kyosi ow’erithulira. (Soma 2 Abanya Korinto 9:7.) Ebya thukahayo bikawathikaya n’ahawire ekitsinduli. Abangyi mughulhu wosi bakathwamu eribya ibanemubika eky’erihayo. (Soma 1 Abanya Korinto 16:2.) Thwangana hayo erilhabira omw’ithogherya omo hisanduko ehiri omo myanya eya thukaramirayamo kutse okwa Intaneti okwa donate.pr418.com. Yehova akathuha akaghisa ak’erikangania ku thumwanzire omwa mibere thukathwiramu erikolesya ebindu byethu by’ekinyamubiri.
THASYIGHA BINGYI
Lengekanaya oko syonzira ndebe esyo wanga sighikiramo ekithunga.
3. Thwangana kolesya ebindu byethu by’ekinyamubiri
Yehova anzire abakahayo ibanatsemire, na Yesu kw’akanayowa athya. Ng’eky’erileberyako, Yesu mwalhangira omukwakali omwera n’akaghalha ako ahiraho erihayo. Soma Luka 21:1-4, mwanakania okwa bibulyo bino:
-
Mbwino eritsemesya Yehova thutholere ithwahayo bingyi?
-
Yehova na Yesu bakayowa bathi thukahayo erilhua okwa muthima?
Eriminya ebya thukahayo ngoku bikakolesibawa, mubughaye EVIDIYO. Neryo mukanaye okwa kibulyo ekikakwamako.
-
Ebikahebawayo bikakolesibawa bithi erighasira ebithunga omo kihugho kyosi?
4. Thwangana yihayo eriwathikya
Omwa buthuku bwe Biblia, abaramya ba Yehova mubakolha n’omuhwa erisugha emyanya yabu y’eriramiryamo. Aliwe eki mukithasubulira okw’ihayo esyosente lisa. Soma 2 Emyatsi y’Emigulu 34:9-11, mwanakania okwa kibulyo kino:
-
Obuli Muisraeli mwawathikya athi omw’isugha enyumba ya Yehova, kutse omwanya w’eriramiryamo?
Erilhangira ngoku Abema ba Yehova bakakwama eky’erileberyako ekya kera ekyo, mubughaye EVIDIYO. Neryo mukanaye okwa bibulyo ebikakwamako.
-
Busana naki ni kikulhu erilhangira thuthi Ekisenge ky’Obwami kikabya ikinahenirye n’erisuwa?
-
Ni nzira syahi esya wanga wathikiryamo?
5. Baghalha bethu bangana simbirira erihebwa esindi ngwamirwa
Amasako akahira omwa balhume Abakristayo mw’omuhwa w’erikolha ekyosi-kyosi ekyo banga thoka erisighika ekithunga. Erilhangira eky’erileberyako, mubughaye EVIDIYO. Neryo musubiraye okwa kibulyo ekikakwamako.
-
Omo vidiyo, Ryan mwakolhaki eryongera erisighika ekithunga?
E Biblia yikasoborera ebya baghalha bethu batholere ibakolha eritholera eribya baghombe abawathikya kandi basyakulhu. Soma 1 Timoteo 3:1-13, mwanakania okwa bibulyo bino:
-
Ni byahi ebya baghalha bethu banga kolha eritholera eribya baghombe bawathikya kandi basyakulhu?
-
Ni byahi ebikayithaghisibawa okwa b’eka yabu?—Lebaya omulhondo 4 na 11.
-
Baghalha bethu bakabya bakalengaho eribya n’emibere eyi, obuli mundu omwa kithunga akaghasirawa athi?
OMUNDU ANGANA BULYA ATHI: “Ni hayi aho Abema ba Yehova bak’iha esyosente esya bakasighikamo omubiiri wabu?”
-
Iwe wanga subirya wuthiki?
OMWA BIKUHI
Yehova akasima kutsibu obuthuku, akaghalha, n’ebindu byethu by’ekinyamubiri ebya thukakolesaya erisighika ekithunga.
Eriyibukya
-
Thwanga kolesya thuthi obuthuku n’akaghalha kethu erisighika ekithunga?
-
Thwanga kolesya thuthi ebindu byethu by’ekinyamubiri erisighika ekithunga?
-
Ni sindi nzira syahi esya wanganza erisighikiramo ekithunga?
MINYA BINGYI
Minya ekikaleka Nyamuhanga iniabya isyakiyithagha okwa baramya biwe kw’ekighuma kikumi.
“E Biblia Yikabugha Yithiki okw’Ihayo Ekighuma Kikumi?” (Omwatsi okwa muthahulha)
E Biblia yikakanganaya ngoku esyongwamirwa ndebe sikahebawa abalhume ababatizibirwe. Kandi ibbwa omukali oyubatizibirwe amanza eriberererya esyongwamirwa esyo?
“Eriyitheghererya Obukulhu obw’Omwa Kithunga” (Akaleberyo, Okwakabiri 2021)
Lhangira Abema balebe abathubaha abakayihayo erilhangira bathi ebitabu bikahika okwa baramya balikyethu.
Minya ngoku omubiiri wethu akasighikawa omwa by’esyosente omo nzira eyiri mbaghane okwa y’awandi madini.
“Omubiiri w’Abema ba Yehova Akasighikawa Athi Omwa by’Esyosente?” (Omwatsi okwa muthahulha)
