ERISOMO 56
Leka Omwa Kithunga Mubye Imune Obughuma
Omughulhu thuli haghuma n’abikirirya balikyethu, thukayowa ng’Omwami Dawudi kw’ayowa: ‘Ni ky’eriswekya, kandi ni kibuya, abandu ba Nyamuhanga bamikalha haghuma ng’abaana abasubeneko!’ (Esyonyimbo 133:1) Obughuma bwethu sibulyasa bwase. Obuli mughuma w’okw’ithwe akayira ekyo akakolha erilhangira athi bukabyaho.
1. Ni kyahi ekikaswekaya omwa bandu ba Nyamuhanga?
Wamahindana okwa mihindano y’ekithunga omwa kindi kihugho, wangana ghana eriyitheghererya omubughe, aliwe omwa nzira nyingyi iwayowa buholho. Busana naki? Kundi ehosi-hosi thuk’igha e Biblia omw’ikolesya ebitabu bighumerere. Kandi thukalengaho erikangania olhwanzo owundi okwa wundi. Mbulha thw’ikere hayi, ithwe bosi ‘thukalhakira erina lya Yehova, erimukolera omwa bughuma.’—Zefania 3:9.
2. Wanga kolhaki erikulha-kulhania obughuma?
‘Mwanzane n’emithima yenyu yosi n’omuhwa.’ (1 Petero 1:22) Wanga ghendera wuthi okw’ihabulha eri? Omwakanya k’erihira amalengekania okwa bisobyo by’abandi, hira ameso w’okwa mibere yabu mibuya. Omwakanya k’erinywana abawithe ebya musosenemu basa, lengaho eriminya balikyethu abalhuire omwa mibere muthina-muthina. Kandi thwangana lengaho eriyihamo amalengekania wosi-wosi w’akasolholho agho thwangabya thuwithe.—Soma 1 Petero 2:17. a
3. Wangakolhaki wamathendi yitheghererania n’Omukristayo mulikyenyu?
Thuli bughuma, aliwe kandi sithuhikene. Hakanayira owundi iniaponesya kutse erihithania owundi. Neryo Ekinywe kya Nyamuhanga kikathubwira kithi ‘neryo mughanyirane,’ ikyongerako kithi: ‘Ngoku Omukama ababuyira, nenyu ko mwanga buyira abandi bo muthya.’ (Soma Abanya Kolosai 3:13.) Thwabiriponesya Yehova ngendo nyingyi, aliwe abiribya inianemuthughanyira. Neryo anzire ithwaghanyira balikyethu. Wamaminya ku wabirihithania mundu mulebe, lhangira wuthi wukahiraho buholho.—Soma Matayo 5:23, 24. b
THASYIGHA BINGYI
Lengekanaya okwa bya wangakolha erihira omwa kithunga mw’obughuma n’obuholho.
Wukendi kolhaki erihiraho obuholho?
4. Singura akasolholho
Thwanzire ithwanza balikyethu abosi. Aliwe kyangana thukalira eryangirira oyuli mbaghane okw’ithwe. Ni kyahi ekyanga thuwathikya? Soma Emibiri 10:34, 35, mwanakania okwa bibulyo bino:
-
Yehova akaligha abandu b’emisindo yosi eribya Bema biwe. Ekyo kitholere ikyahamba kithi okwa malengekania agho wuwithe okw’abalhuire omwa mibere eyiri mbaghane okwa yawu?
-
Ni miringo yahi y’akasolholho eyikanyirire ewenyu eya wanzire iwayihighulhako?
Soma 2 Abanya Korinto 6:11-13, mwanakania okwa kibulyo kino:
-
Wukalengekanaya wang’ongera wuthi eriyithunda hakuhi n’abalikyethu abalhuire omwa mibere muthina-muthina?
5. Ghanyira kandi hiraho obuholho
Yehova akathughanyira nomwakine indi syendisya thuyithaghako erimughanyira. Soma Esyonyimbo 86:5, mwanakania okwa bibulyo bino:
-
Erighanyira lya Yehova ni linene bungahi?
-
Busana naki wukasima erighanyira liwe?
-
Ni mibere yahi eyangaleka ikyathukalira erikolongana n’abandi?
Thwanga gherererya thuthi Yehova n’erisighalha ithune bughuma n’abalikyethu? Soma Emisyo 19:11, mwanakania okwa kibulyo kino:
-
Omundu amakuponesya kutse erikuhithania, wangakolhaki eryuwania emyatsi?
Okwa bundi buthuku thukanahithanaya abandi. Ekyo kyamabya, thutholere ithwakolhaki? Mubughaye EVIDIYO, mwanakania okwa kibulyo ekikakwamako.
-
Omo vidiyo, mwali wethu mwakakolhaki erihiraho obuholho?
6. Sondaya omwa balikyenyu mw’ebibuya
Omughulhu thuk’ongera erinywana balikyethu, thukaminya ebya bakathoka n’erilemererwa lyabu. Thwanga hira thuthi amalengekania w’okwa bya bakathoka? Mubughaye EVIDIYO, mwanakania okwa kibulyo ekikakwamako.
-
Ni kyahi ekyanga kuwathikya erilhangira emibere mibuya y’abalikyenyu?
Yehova akahira amalengekania w’okwa mibere yethu mibuya. Soma 2 Emyatsi y’Emigulu 16:9a, mwanakania okwa kibulyo kino:
-
Eriminya ngoku Yehova akathungerera emibere yawu mibuya kikaleka iwayowa wuthi?
Nibya n’edayamonde eyuwene yikabya iyineko obulema, aliwe yikabya iyikine y’obughuli. Kuthya, balikyethu abosi sibahikene, aliwe ni b’obughuli embere sya Yehova
ABANDI BAKABUGHA BATHI: “Inde naghanyira omundu, atholere iniatsuka erikolha ekyanga leka inamughanyira.”
-
Busana naki thutholere ithwabya ithunayitheghekire erighanyira abandi?
OMWA BIKUHI
Wangana wathikya erilhangira wuthi omwa kithunga mukabya imune obughuma omw’ibya oyukaghanyira n’erikangania balikyethu abosi b’olhwanzo.
Eriyibukya
-
Wanga singura wuthi akasolholho?
-
Wanga kolhaki wamathendi yitheghererania n’Omukristayo mulikyenyu?
-
Busana naki iwanza erigherererya eky’erileberyako kya Yehova eky’erighanyira abandi?
MINYA BINGYI
Minya ngoku omughuma w’okwa misyo ya Yesu angakuwathikya eriyihighulha okw’itswera abandi.
Thunatholere ithwasaba ekighanyiro thwamayowa nga sihali kibi ekya thwakolire?
Lhangira ngoku abalhume babiri abakulira omwa kihugho ekiri mw’eripona ab’eyindi rangyi babana obughuma bw’okwenene.
Johny na Gideon: Ababya Nzighu, Lino Owundi Ni Mughalha w’Obuwundi (6:42)
Minya esyonzira esyo wangaghunziramo erithendi yitheghererania lithe lyahamba okwa buholho bw’ekithunga.
“Mughunzeho Erithendi Yitheghererania omo Lhwanzo” (Akaleberyo, Okwakathano 2016)
a Endomeko 6 yikakanganaya ngoku olhwanzo lhukaleka Abakristayo ibayihighulha okw’isighalirya abandi b’amalhwere.
b Endomeko 7 yikasoborera ngoku thwanga kanirania okwa myatsi y’esuburu n’ey’ebilhaghiro.
