ERISOMO 59
Wangana Ghumira Eriendereribwa
Endambi yosi-yosi, Abakristayo abosi bakendi hakanisibwa, nibya n’eriendereribwa. Mbwino ekyo kinatholere ikyakwitha obuba?
1. Busana naki ithwabya ithunasi ku thwangan’endereribwa?
E Biblia yikabugha yithi: ‘Abosi abanzire erikwama engebe y’erikenga Nyamuhanga n’erimathikana na Kristo Yesu, basyendereribwa.’ (2 Timoteo 3:12) Yesu mwendereribwa kundi syabya w’ekihugho kya Sitani. Nethu sithuli b’ekihugho, neryo sikiri thuswekaya esyogavumente n’ebithongole by’amadini bikathwendererya.—Yoane 15:18, 19.
2. Thwanga yitheghekera thuthi eriendereribwa?
Thutholere ithwaghumya eriyikethera lyethu omu Yehova lino. Obuli kiro hiraho obuthuku obw’erimusaba n’erisoma kitsweka kirebe omwa Kinywe kiwe. Hindana mughulhu wosi okwa mihindano y’ekithunga. Ebyosi ebi bikendi kuha akaghalha ako wukayithagha erighumira buthubaha eriendereribwa lyosi-lyosi, nomulyangabya irikalhua okwa bahughu bawu. Omukwenda Paulo, oyuw’endereribawa mughulhu mungyi, mwahandika athi: ‘Yehova ni muwathikya waghe, sindiendi syubaha.’—Abaebrania 13:6.
Kandi thwangana ghumya obuthubaha bwethu omw’ithulira mughulhu wosi. Erithulira likathweghesaya eriyikethera Yehova n’erisingura eryubaha abandu. (Emisyo 29:25) Wamabya n’obuthubaha bw’erithulira lino, iwukendi yitheghekera ndeke erilholha embere erithulira nibya n’omughulhu egavumente yanga hira okwa mubiiri wethu kw’olhukako.—1 Abanya Tesalonika 2:2.
3. Thukaghasirawa thuthi thwamasighalha bathaleghulha omughulhu thukendereribawa?
Ni kwenene, sithuli tsema thukendereribwa, aliwe thukabya thukasighalha bathaleghulha, erikirirya lyethu likongera erighuma. Thukongera eriyithunda hakuhi na Yehova kundi thukayilhangirira obuwathikya bwiwe omughulhu thukayowa isithukiwithe mani. (Soma Yakobo 1:2-4.) Yehova akayowa nabi akalhangira thukaghalhwa, aliwe akatsema akalhangira thukayiyinia. E Biblia yikabugha yithi: ‘Mwamakolha ndeke, neryo mukayiyinia omughulhu mukaghalhawa, Nyamuhanga asyabatsumulha busana n’ekyo.’ (1 Petero 2:20) Ekihembo ekya Yehova akendi syaha abosi abakayiyinaya buthaleghulha y’engebe y’erikotha omwa kihugho ekithemo erihakanisya eriramya ly’okwenene.—Matayo 24:13.
THASYIGHA BINGYI
Minya ekikaleka ikyabya ikithokekene erisighalha muthaleghulha oku Yehova nomuthwangendereribwa kandi ngoku mukalhwiririra emighisa.
4. Wangana ghumira erihakanisya ery’abahughu
Yesu abya inianasi ngoku abandi bahughu bethu bangana ghana erisighika erithwamu lyethu ly’eriramya Yehova. Soma Matayo 10:34-36, mwanakania okwa kibulyo kino:
-
Ni kyahi ekyangabya omundu omw’eka amathwamu erikolera Yehova?
Erilhangira eky’erileberyako, mubughaye EVIDIYO, mwanakania okwa kibulyo ekikakwamako.
-
Wanga kolhaki omuhughu kutse omunywani wawu amanza erikulemesya erikolera Yehova?
Soma Esyonyimbo 27:10 na Mariko 10:29, 30. Enyuma w’erisoma obul’isako, mukanaye okwa kibulyo kino:
-
Omulhaghe oyu angakuwathikya athi abahughu kutse abanywani bamakuhakanisya?
5. Lholha embere eriramya Yehova nomuwangendereribwa
Kikayithagha obuthubaha erikolera Yehova omughulhu abandi bakanza erithulemesya. Mubughaye EVIDIYO, mwanakania okwa kibulyo ekikakwamako.
-
Eby’erileberyako ebiri omo vidiyo eyi byanga kughumya bithi?
Soma Emibiri 5:27-29 na Abaebrania 10:24, 25. Enyuma w’erisoma obul’isako, mukanaye okwa kibulyo kino:
-
Busana naki ni kikulhu erilholha embere eriramya Yehova omubiiri wethu kutse emihindano yethu nomubyanga hirwako olhukako?
6. Yehova akendi kuwathikya erighuma
Abema ba Yehova ab’emyaka muthina-muthina kandi abalhuire omo mibere eyithasosene babirilholha embere erikolera Yehova nibya n’omughulhu bakendereribawa. Erilhangira ebya bawathikaya, mubughaye EVIDIYO. Neryo mukanaye okwa kibulyo ekikakwamako.
-
Omo vidiyo, ni byahi ebya wathikaya Abema aba erisighalha bathaleghulha?
Soma Abanya Roma 8:35, 37-39 na Abanya Filipi 4:13. Enyuma w’erisoma obul’isako, mukanaye okwa kibulyo kino:
-
Erisako eri likakukakasaya lithi ngoku wangana ghumira ekitsibu kyosi-kyosi?
Soma Matayo 5:10-12, mwanakania okwa kibulyo kino:
-
Busana naki wangana tsema nomuwangendereribwa?
Esyomiliyoni sy’abaramya ba Yehova syabirithoka erighumira erihakanisibwa. Nawu wangana thoka!
ABANDI BAKABUGHA BATHI: “Sinanga ghumira eriendereribwa.”
-
Ni masako wahi awanga bawathikya erighuma?
OMWA BIKUHI
Yehova akalhangira akaghalha akathukahiraho erimukolera mw’ak’obughuli nomuhane eriendereribwa. Busana n’obuwathikya bwiwe, thwangana thoka eriyiyinia!
Eriyibukya
-
Busana naki Abakristayo batholere ibabya ibanasi ku bangan’endereribwa?
-
Wanga kolhaki lino nuku wubye iwunayitheghekire hakabya eriendereribwa?
-
Ni byahi ebyanga kuwathikya erikolera Yehova iwunasikire nomuhangabya kitsibuki?
MINYA BINGYI
Lebaya mughalha wethu omulere akasoborera ngoku Yehova amuwathikaya eriyiyinia omughulhu ahirawa omwa ngomo busana n’erithendibya na lhuhandi omwa by’ekipolitiki.
Minya ekya wathikaya mughalha wethu na mukali wiwe erikolera Yehova buthaleghulha habw’emyaka mingyi nomuhanabya erihakanisibwa.
Igha ngoku wang’imanira buthubaha eriendereribwa.
“Yitheghekere Lino Eriendereribwa” (Akaleberyo, Okwomusanju 2019)
Thutholere ithwalhangira thuthi erihakanisya ery’abahughu, kandi thwanga singura thuthi ndeke ebitsibu ebikalhwiririramu?
“Ekwenene Siyiriletha ‘Obuholho, Nikwa Omuyali’” (Akaleberyo, Okwerikumi 2017)
