1.  Eriminyerera Babeli Mukulhu

2.  Masiya Angabanikire Mughulhu Wahi?

3.  Emithambirire Eyirimu Erikolesya Omusasi

4.  Erighabulhana omo Butheke

5.  Ebiro Bikulhu n’Emibalha

6.  Amalhwere Awakasighalira

7.  Esuburu n’Emyatsi y’Ebilhaghiro

 1. Eriminyerera Babeli Mukulhu

Thukaminya thuthi ngoku “Babeli Mukulhu” yikimanira amadini wosi w’amabehi? (Eribisulirwa 17:5) Thulebaye esyonzumwa hino:

• Yiri omo kihugho kyosi. Babeli Mukulhu yikanibweko ng’eyikere oko “syondeko, n’ebihanda.” ‘Yikathabalha oko bami b’ekihugho.’​—Eribisulirwa 17:15, 18.

• Babeli Mukulhu si byangabya ini by’ekipolitiki kutse eby’ekisubure. “Abami b’ekihugho” ‘n’abathundi b’ebindu’ ibo bakalhama yikathoghothibwa.​—Eribisulirwa 18:9, 15.

• Yikatsandaya oku Nyamuhanga kw’erina. Yikahulhawamo mumalaya kundi yikasakana n’esyogavumente habw’esyosente kutse awandi maghoba. (Eribisulirwa 17:1, 2) Yikathebaya abandu b’ebihanda byosi. Kandi yiri kw’olhubanza lhw’omusasi w’abandu bangyi.​—Eribisulirwa 18:23, 24.

Suba okw‘isomo 13 enzumwa 6

 2. Masiya Angabanikire Mughulhu Wahi?

E Biblia muyalhaghulha yithi Masiya angabanikire habirilhaba amayenga 69.​—Soma Danieli 9:25.

• Amayenga 69 atsuka mughulhu wahi? Omo mwaka 455 E.K.K. Okwa buthuku obo, Omuthabali Nehemia mwahika e Yerusalemu “erisubya n’eriswahimba” omuyi oyo.​—Danieli 9:25; Nehemia 2:1, 5-8.

• Amayenga 69 mwaghunza buthuku bungahi? Omo wandi maminyereri we Biblia, ekiro kikimanira omwaka. (Emiganzo 14:34; Ezekieli 4:6) Neryo obuli yenga yikimanira emyaka musanju. Omwa buminyereri obu, amayenga 69 ni myaka 483 (amayenga 69 x biro 7).

• Amayenga 69 ahwa mughulhu wahi? Eribara emyaka 483 eritsuka oko mwaka wa 455 E.K.K. yikathuhikaya oko mwaka 29 E.K. a Oyu w’omwaka ow’enyine-nyine ogho Yesu abatizibirawamu n’eribya Masiya!​—Luka 3:1, 2, 21, 22.

Suba okw‘isomo 15 enzumwa 5

 3. Emithambirire Eyirimu Erikolesya Omusasi

Hane emithambirire ey’erithambiriramo omulhwere omw’ikolesya omusasi wiwe-wiwe. Emighuma y’okwa mithambirire ng’eyo​—ng’omundu erighaba omusasi kutse eribika omusasi wiwe-wiwe, obundi nibya habw’amayenga nuku asyamuyako akasemezibwa​—Omukristayo syalilighayo.​—Eryibuka Ebihano 15:23.

Aliwe, eyindi mithambirire yangana liwa. Eyi mwamuli eripima omusasi, hemodialysis, hemodilution, kutse erikolesya cell-salvage kutse ekyuma ekya heart-lung bypass. Obuli Mukristayo atholere iniayithwiramu omusasi wiwe ng’akendi kolesibwa athi akasemezibwa, eripimwa, kutse akathambirwa. Obuli dokita angana kolesya emithambirire eyi omwa mibere eyihukene hake okwa y’owundi. Neryo Omukristayo athali aligha emithambirire yosi-yosi ey’erisemezibwa, eripimwa, kutse omubatsi, atholere inialhangira athi akaminya omusasi wiwe ng’akendi kolesibwa athi. Lengekanaya okwa bibulyo bino:

• Kandi ibbwa owundi musasi waghe bamabya ibakendi kithyagho neryo ibabya ibakendi nyisubya ghomo ihamabirilhaba akathuku? Mbwino obunyamuthima-thima bwaghe ibunemwendi nyilighira erilhangira omusasi oyu ng’ekitsweka ky’okwa mubiri waghe, neryo ikyabya isikiriyithaghisaya indi uthibawe “oko kithaka”?​—Eryibuka Ebihano 12:23, 24.

• Kandi ibbwa emithambirire yamabyamo erinyihako owundi musasi waghe, ibakolha kugho, n’enyuma waho ibanyisubya ghomo kutse erikolesyagho bakaliba ekironda? Obunyamuthima-thima bwaghe ibunemwendi nyilyambya, kutse inganemwendi ligha emithambirire ng’eyo?

Suba okw‘isomo 39 enzumwa 3

 4. Erighabulhana omo Butheke

Ekinywe kya Nyamuhanga kikathanga erighabulhana kandi kikakanganaya ndeke-ndeke ngoku erighabulhana siririha omundu obughabe bw’eringira omwa bundi butheke. (1 Abanya Korinto 7:10, 11) Aliwe, hane emibere eyangaleka abandi Bakristayo ibalebya ng’abaghabulhane.

• Erithend’itsomana eka yawu omw’ikighenderera: Omulhume iniaghana eriha eka yiwe y’eby’ekinyamubiri, erihika okwa kiika indi abali omw’eka ibabya isibawithe ebiyithawa byabu.​—1 Timoteo 5:8.

• Erinubibwa kutsibu kinyamubiri: Eki ikyanganahika n’okwa kiika omwanze eriyowa amaghalha wiwe n’engebe yiwe ibiri omwa kabi.​—Abanya Galatia 5:19-21.

• Erikighenderera erikolha ebyanga leka owundi iniaherya obughuma bwiwe na Yehova: Omulhume kutse omukali angana leka ikyakalira omwanze wiwe erikolera Yehova.​—Emibiri 5:29.

Suba okw‘isomo 42 enzumwa 3

  5. Ebiro Bikulhu n’Emibalha

Abakristayo sibalisangira omwa biro bikulhu ebithetsemesaya Yehova. Aliwe obuli Mukristayo atholere iniakolesya obunyamuthima-muthima bwiwe obukangiriribwe erithwamu ng’anga kolhaki bikahika okwa biro bikulhu ng’ebyo. Lengekanaya okwa by’erileberyako bike bino.

• Omundu amabugha athi wasingya ekiro kikulhu. Iwangana kwama kyabugha wuthi, “Inga.” Amanza eriminya binene iwangana musoborera ekikaleka iwuthasangira omwa kiro kikulhu.

• Omwanze wawu, oyuthe Mwema wa Yehova iniakukokya okw’iyalya haghuma n’abahughu biwe okwa kiro kikulhu. Obunyamuthima-thima bwawu bwamakulighira erighenda, iwangana tsuka erisoborera omwanze wawu wuthi omw’irya eryo mwamabya imune emirwa y’ekikafiri, iwe isiwendi sangira muyo.

• Oyukuhere omubiiri iniakuha akasimo omwa buthuku bw’ebiro bikulhu. Wunatholere iwakaghana? Obundi eyihi. Mbwino oyukuhere mubiiri akakathwalha nga ni k’okwa kiro kikulhu, kutse akakalhangira ng’enzira y’erikangania erisima liwe?

• Omundu iniakuha ekihembo omwa buthuku bw’ebiro bikulhu. Oyulyakuha ekihembo iniabugha athi: “Nganasi ngoku wuthe sangira omwa biro bikulhu, aliwe ngalyanza erikuha eki.” Obundi omundu oyo akanza erikangania buyira olhwanzo. Okwa lhundi lhuhandi, mbwino hane enzumwa eyikaleka iwalengekania wuthi akanza erilenga okw’ikirirya lyawu kutse akanza erikwingirya omwa biro bikulhu? Wukendibya wabirilengekania okw’eki, kiri okw’iwe erithwamu nga wulighe kutse nga wughane ekihembo. Omw’ithwamu lyethu lyosi, thwanzire ithwabya n’obunyamuthima-thima obuwene n’eribya bathaleghulha oku Yehova.​—Emibiri 23:1.

Suba okw‘isomo 44 enzumwa 1

 6. Amalhwere Awakasighalira

Kundi thwanzire abandu, thukayitheghaya okw’isighalirya abandi b’amalhwere. Eki kihikire mbulha thulhwere obulhwere obukasighalira kutse thukayowa thuthi thwanganabya ithwabirihambwa obulhwere obwanga sighalira abandi. Thukakolha eki kundi e Biblia yikabugha yithi: “Wanze mulikyenyu ngoku wukayanza.”​—Abanya Roma 13:8-10.

Thwanga ghendera thuthi okwa kihano eki? Oyulhwere obulhwere obukasighalira syanga kolha ebindu by’olhwanzo, ng’eriwa okwa bandi kutse eribalyatsirira. Syatholere akayowa nabi abandi bamaghana erimukokya ewabu busana n’eritheya ab’eka yabu. Kandi athali abatizibwa, atholere iniabwira omusangania w’abasyakulhu okwa bulhwere bwiwe nuku hahirawe emitheghekere eritheya abandi abakendi batizibwa. Omundu oyuwangabya iniabiribya omwa mibere eyanga leka iniahambwa obulhwere obukasighalira atholere iniatsuka eripimwa athali atsuka obuthethane. Omw’ikolha eki, wukakanganaya ku wutsomene abandi ‘wukatheya ebindu by’abandi butsira erilhwira ebyawu bisa.’​—Abanya Filipi 2:4.

Suba okw‘isomo 56 enzumwa 2

 7. Esuburu n’Emyatsi y’Ebilhaghiro

Thwangana leka ihathabya ebitsibu omw’ihira obuli kindu omwa buhandiki​—eby’obusubure nomubyangabya ibikendi kolhwa n’Abakristayo basa-na-basa. (Yeremia 32:9-12) Nomwabine, hanganayira Abakristayo ibathunga erithendi yitheghererania erihambire okwa by’esyosente kutse eyindi myatsi. Batholere ibaghunzaho erithendi yitheghererania ng’eryo omwa byalhuba n’omwa buholho, kandi ibo ibobene.

Thutholere ithwakolhaki bikahika okwa myatsi eyikalire ng’erikolhwako amathebo kutse eribuwako amabehi awakalire? (Soma Matayo 18:15-17.) Yesu mwathuha ebiika bisathu bino:

1. Abahambirweko batholere ibalengesya erikanirania oko mwatsi oyo.​—Lebaya omulhondo 15.

2. Ekyo kyamathendi wathikya, saba mulikyethu mughuma kutse babiri abakulire bunyakirimu erikuwathikya.​—Lebaya omulhondo 16.

3. Emyatsi yamathendihwa, aho mutholere imwahika okwa basyakulhu.​—Lebaya omulhondo 17.

Mughulhu mungyi, si thutholere thukathwalha balikyethu b’omwa koti kutse oko batsweri kundi ekyo ikikendi hamba nabi oku Yehova n’ekithunga. (1 Abanya Korinto 6:1-8) Aliwe, hane eyindi mibere eyangana yithaghisya erighenda omo koti, obundi ng’omughulhu w’erithwa embeta, nga ni mubuthi wahi oyukendi lembera abaana, erighabana ebindu embeta yikathwibwa, erisaba esye isyuwarensi, erithwamu indi si wanga thasyathoka erithuha amabanza, kutse eby’omwandu. Omukristayo oyukakolesaya enzira ey’ekoti eyi eribuyirana oko mwatsi omo buholho, akabya isyathathwa ekihano kye Biblia.

Hamabya olhubanza olhukalire​—ng’erikesya n’omundu kinyamakara, erinubya omwana, eriswirya omundu, eriba erikalire, kutse er’itha​—Omukristayo oyukathwalha olhubanza ng’olho omwa b’obuthoki akabya isyathathwa ekihano kye Biblia.

Suba okw‘isomo 56 enzumwa 3